Mavanga 28 - Musamu wu Mubwe

Pahuli hu iliiŋa hya Malete

¹ Humbisa a hu laatoodi mbenze ve muhahusunu ve, ni huuna bisu laayabi ti nduhi a iliiŋa mohina aba Malete.

² Bisu iliiŋa mohina baayaki bisu na litondo li laafulala. Bu mvula haba mu unoho, na bu hwaba na piyu yindahi, bo baaduuki mbaahu yinene. Baayaki bisu boosi ŋa mukoho a mbaahu mo.

³ Pahuli atoli iko hi bapyapya ba baakanya mu ubwaha hutso a mbaahu. Ka mu toni a ibabudu, pili apali hutso iko, akatiti na akahi nde mu kaka.

⁴ Bu bisu iliiŋa baamoni taadi akatita mu kaka la Pahuli, bo baalelisini: «Bahala molinili a huvele mudubi a baatu ve. Mu toni ati, humbisa ufuuha mu mubu, nzambi wu akuha, a hali mu uva nde bunyanga mu uba monyi ve.»

⁵ Ka Pahuli akubili pili hutso a mbaahu, na a hamoni pasi tso hole ve.

⁶ Baatu baakatsima ti nyutu a nde sa yiranda, buve ti nde sa abwa na ukwa kabala. Ka bo barimbasa, a baamoni dyambu la pasi li laabwili nde ve. Buuna, bo baasobi matsimi na uleele ti, Pahuli aba mumosi mu banzambi.

⁷ Ŋa pedu a mbuha moyina, hwaba na ibuha hi mukuutu iliiŋa, nga nduhi a Pubiliyusi. Nde ni wu ayaki bisu mu litondo, na wu alaahi bisu mbuha yi ubwamina mu bilumbu bitatu.

⁸ Taata a Pubiliyusi aba ŋa taangi, mu toni a baahu na wongo. Pahuli ayamono nde, asaambili Nzambi, asuusili nde myoho na abelusi nde.

⁹ Humbisa, babeedu bakima baayidi, na nde abelusi kaka baana.

¹⁰ Baamwesi bisu butsitu bu bulahi. Bu tangu yi ufutaha mu likuumbi yaatoodi, baaviidi bisu bi bisu laaba na byo nzala mu mudyenge a bisu.

Pahuli miimata iliiŋa hya Malete mu uyene hu musyenge a Looma

¹¹ Humbisa batsungi batatu, bisu laanami mu likuumbi la nduhi «banzambi ba mavasa», li laakatalisa hu musyenge a Alekizandi. Likuumbi moliina, laavyosi maangala hutso a ngulu makuumbi a iliiŋa mohina.

¹² Bisu laayato hu musyenge a Sirakusi, hu bisu laavyosi bilumbu bitatu.

¹³ Bu laamati ŋaana, bisu laalondi simu li mubu, mu uyato hu musyenge a Lezyo. Ilumbu hi hyaduuki, ifula hya sude hyatelimi. Mu bilumbu byole, bisu laayato hu musyenge a Puzoole.

¹⁴ Hutso musyenge mowunuwu, bisu laamoni ba mu buli la Kristo, ba baavondi bisu mu uvyoso tsambu li bilumbu na bo. Ni mu nzila moyina, bisu laatoodi hu musyenge a Looma.

¹⁵ Baana ba ngu ba mu Kristo ba musyenge mowuna, baayuhi tsangu a bisu. Bo baayabwana bisu nate hu saandu la Apiyusi na hu «manzo matatu ma byenyi». Bu Pahuli hamoni bo, nde afutili matondo huli Nzambi na ahwadi.

¹⁶ Bu bisu laayato hu Looma, bakuutu baaviidi muswa huli Pahuli mu utsahala mu nzo a siha, na lisadaadu li laakakeelese nde.

Pahuli miilongese Musamu wu Mubwe hu Looma

¹⁷ Bilumbu bitatu bu byavyohi, Pahuli atsihi bakuutu ba Bayudaayo ba hu musyenge a Looma. Bo baayakuukama huli nde mu uyuhala nde. Pahuli aleeli bo: «Baana ba ngu, me a hatsa pasi dyambu lilibi ŋa busu bwa buli la bisu a benu ve, tso unyanza bipfu bi bataata ba bisu a benu. Ka baakangi me hu Yeruselemi hwavele a toni, na baayehuli me ŋa myoho mi bakuutu ba Looma.

¹⁸ Bu bo baamani ufuula me byuhu, bo baatondi unyahula me. Bo a baabahi toni tso mosi, yi yaafwana mu uduba me ve.

¹⁹ Ka bu Bayudaayo baabisi, me apondi ti nga tsi Kayisaali atsundasa me. Ka mu maana moosi, me a handi na dyambu tso limosi li ukese baatu ba tsi a me ve.

²⁰ Ni mu buuna, me miipondo mu umono benu, na mu umoho na benu. Nyaha me ndeele benu. Ni mu toni a muutu mowuna, wu Isereli ubaasa hiitu, me ndi mu umbita mapanga momanima.»

²¹ Bakuutu ba Bayudaayo baakaali nde: «Bisu a laayaka pasi muhanda, wu Bayudaayo ba hu tsi a Yuda baasonehe mu toni a we ve. Na ŋa hati la bo, pasi muutu a hayaabisa bisu dyambu lilibi mu toni a we ve.

²² Ka bisu litondi ti, we mwakulu yaabisa bisu matsimi ma we. Mu toni ati bibiingi byosi, bisu liyaabi ti baatu bubaabisa kabu li we akangama mu lo.»

²³ Bo baabwesoolo ilumbu ikima, hi ubwepfuutana na Pahuli. Bu ilumbu mohina hyatoodi, bo baayeni huli nde, mu litangu lililahi li laafulala la tsomi. Imoho hyabaandihi ŋa ngwali nate ŋa tsitsaha. Mu ndongisili a nde, Pahuli akalongese na ubindula mambu ma Ipfumu hya Nzambi. Nde akabindula bo mikele mya Moose, na mihanda mi mimbihuli mya Nzambi myasonihi, mana nde abita bo mu ukangama mu Yisu.

²⁴ Bamosi baasiidi hiitu mu ma nde hakaleele, ka bakima baabisi.

²⁵ Ka bo baafutihi hwavele uyuhasana. Pahuli aleeli bo: «Livupu la Ngidi laaba na mbiinga, ŋa lo laakaleele bakaaha ba benu mu munywa mumbihuli Esaya!

²⁶ Nde aleeli: “Yene yaleele huli buli molinili: Benu tso laayuha mu matswi ma benu, ka benu a lu ubaangula tso limosi ve. Benu tso laamono mu miisu ma benu mwakulu, benu a lu ukanga pasi isiha ve.

²⁷ Mu toni ati, mutima a buli li Isereli aka wu munono. Bo baamiidibuha matswi ma bo, baamiidibuha miisu ma bo. Miisu ma bo a mamono, matswi ma bo a mayuha, mutima a bo a habaangula, na bo a bakiinguha huli me, mana me mbeeloso bo.”»

²⁸ Titswene Pahuli abweleele: «Buuna, yabaani li: yabaani ti mu musamu wu liyobolo, Nzambi amiitsindaha nde huli ba baavele Bayudaayo. Ka bo bu uyaka mu mutima a bo, musamu liyobolo!» [

²⁹ ]

³⁰ Pahuli atsahili bilima byole bi bitindala mutso a nzo yi nde hayakoto mu tsoombi. Nde akayaka boosi ba baakayamono nde.

³¹ Nde akayabisa bo mu dyambu li Ipfumu hya Nzambi. Na nde akalongese baatu na isuusi hyosi, hwavele ikahu, mana bo babaha nzaabili mu Pfumu Yisu Kristo.