Mavanga 27 - Musamu wu Mubwe

Pahuli bamiitsindaha hu musyenge a Looma

¹ Bu bisu laavoli kesili mu uyene hu Italiya mu likuumbi, batumi baayehuli Pahuli na mwa litangu li bikondaayi ŋa myoho mi mukuutu masadaadu Yuliyusi. Muutu mowunuwu akatuma kabu li balwani li baakateele «kabu la nga tsi».

² Bisu laakoti mutso likuumbi la Adalamite li laaba mudwe hu ngulu makuumbi yi itanzi hya Asiya, na bisu laayeni. Arisitake, musi Masedonya, wu musyenge a Tesalonika, aba na bisu.

³ Ilumbu hi hyaduuki, bisu laayato hu musyenge a Sidoni. Yuliyusi wu aba na bukuhu ŋa busu bwa Pahuli, aviidi nde muswa mu uyamono bambaahi ba nde mu ubaha bi nde haba na byo nzala.

⁴ Bu laamati ŋaana, bisu laalondi simu li laasweme li iliiŋa hya Kipere, mu toni ifula hi hyakayabwana bisu.

⁵ Bisu laasabuhi mubu wu alondo itanzi hya Silisiya na Papfiliya, na bisu laayato hu musyenge a Myra, hu itanzi hya Lisi.

⁶ Huuna, mukuutu masadaadu, amoni likuumbi li laapali mu musyenge a Alekizandi, mu uyene hu tsi a Italiya. Buuna, nde akotisi bisu mu tso likuumbi mo.

⁷ Humbisa bilumbu bibilahi, bisu laakayene mu nzali buke-buke, na bisu laamoni pasi yindahi, mu uyato ŋa masungimini ma musyenge a Kinide. Ifula hyakapfubasa bisu mu usuungama mu nzila yi laakatalisa. Buuna, bisu laavyohili hu tsyelo a Salomone, mu upalila hu tsoso iliiŋa hya Kerete, hi hyaswemene bifula.

⁸ Bisu laalondi muvanga mubu na pasi yindahi. Laayato ŋa mbuha mosi nduhi Bonpore, ŋa pedu musyenge a Lazee.

⁹ Bisu laavyosi tangu yindahi, na mubu aba aka tsisu. Bisu laamoni ti mubu ukala bisu mudyenge. Mudyenge mu likuumbi aba aka pasi mu ukuhasa, mu toni ati ilumbu hi mukungi Bayudaayo wa ndiili ikaandi mu Nzambi, aba hyamiivyoho. Ni mu buuna, Pahuli hayibusi ba baakatuma likuumbi:

¹⁰ «Bambaahi ba me, me ndi mu umono ti mudyenge mowunuwu sa aba mudyenge wa pasi lipfu. Likuumbi na makatu ma lo, sa bitsamuha mu biteesi bibinono. Na bisu mwakulu ka, utwala ukoto mu pasi lipfu.»

¹¹ Mukuutu masadaadu aba asuusa hiitu fula-fula mu mubiti likuumbi na mu nga likuumbi, ka a mu mandongi ma Pahuli ve.

¹² Titswene, ngulu makuumbi a yaba yakuha mu uvyoso maangala huuna ve. Ni mu buuna, baatu ba baaba mutso likuumbi, fula-fula baatelimi mudwe. Bo baakasaha tso baakitwala uto hu Fenikisi, ngulu makuumbi ya Kerete. Ngulu makuumbi yi yaakatalisa hu tsyelo a sude-weste na node-weste, huuna hwaba mbuha yimbwe mu uvyoso maangala.

Ifula hili mu unyingasa likuumbi la Pahuli

¹³ Mwa ifula hi hyakamata hu sude hyatelimi, na bo baamoni ti bo baakitwala utswihasa makani ma bo. Bo baamaasi manya li baaba baadyamisa mu nzali mu ukangimasa likuumbi. Bo baayeni, na baakalondo muvanga mubu, ŋa pedu iliiŋa hya Kerete.

¹⁴ Ka masulubete, ifula hi mifudi hi baakatele «ifula hya Node-Esete», hyayakulamana, umata hu yulu bisyelo bi iliiŋa mo.

¹⁵ Ifula hyatsindihili likuumbi. Lo aba utwala ukunda ifula ve. Na bisu laakatwatwana.

¹⁶ Bu bisu laaba mu uvyoho hu sude a iliiŋa hi ikeehe, hya nduhi a Koda, bisu laayehili usweme ifula. Buuna, na pasi yindahi bisu laatwali ulwanila hyabu hya pfuuhili, hi bubaasalila mu tangu ya pasi.

¹⁷ Basali ba hutso likuumbi baabwekumasa hyo. Baakuti hyo mikudu mu likuumbi, mu uhwadisa hyo. Bu bo baakabata uyabwa hu yulu musyeŋunyu a hu simu la tsi a Libi, bo baakulimisi mu mubu, isiha hi baaba bakutala mu likuumbi. Bo baasiidi buuna, mana likuumbi liveleyene mawasa. Na bo baakayene we bu ifula hyakabita bo.

¹⁸ Ifula hyahwadi mu ubaapfikasa bisu na mifudi. Ilumbu hi hyaduuki ŋa ngwali, basali ba hutso likuumbi baabumi ibadi hi makatu mu mubu.

¹⁹ Na mu ilumbu hi bitatu, bo baabumi bisalili bi likuumbi hutso mubu, mu makaka ma bo mwakulu.

²⁰ Matsuhu mamalahi maavyohi, hwavele bisu umono tso nyangu, tso bavwelele. Na bu ifula hyakavelefwa, hiitu hya bisu hi ufuuha hyafwidi.

²¹ Ba baaba mutso likuumbi, a baaba na isiha hyudya ve, umata tangu yinda. Buuna Pahuli, mutele ŋa hati la bo, aleeli: «Bambaahi ba me, benu kini laayuhili me, na uvelemata iliiŋa hya Kerete. Tso benu laayuhili me, bisu a benu a likibwana mangoongo momanima na unyambasana biniibi byosi ve.

²² Bunuubu, me ndi mu upondo benu mu uhwada. Mu toni ati tso mumosi mu bisu a benu a hukwa ve. Ka ndulu likuumbi lu utsamuha.

²³ Pofi mumosi a Nzambi, wu abaha me na wu me umbaatsalila, ayamonehele na me butsuhu mobunuubu.

²⁴ Na nde aleele me: “Pahuli a haba na boomo! Baafwana utsundasa we ŋa busu bwa Kayisaali, mukuutu batumi. Ka mu toni litondo la Nzambi mu we, boosi ba bali mu mudyenge na we mutso likuumbi, sa bafuuha.”

²⁵ Ni mu buuna, hwadaani bambaahi ba me, me atsiingama mu Nzambi. Sa huba we bu nde haleeli me!

²⁶ Ka tswamina bisu mu utsikama, bisu a benu lafwana mu ubumana simu li iliiŋa imosi.»

Ifula himiitsindahala likuumbi hu muvanga mubu

²⁷ Butsuhu bwa kuumi na bina, ifula hyakadyengese bisu mu mubu wa Miditirani. Hu hahati a busi, basali ba mutso likuumbi baasi tsimi ti, sa linama mu toto.

²⁸ Bo baatsootsi idongi hi mubu, na bo baamoni ndoongi mubu aba mataka maku moole (20). Hu mwana lala, bo baabwetsootso idongi, ndoongi aba ka mataka kuumi mataanu (15).

²⁹ Bo baaba na boomo ti, likuumbi a liyabumana mamanya ma mutso mubu. Ni mu buuna, humbisa likuumbi, bo baabwahi mamanya mana ma maaleme, mu ukangimasa lo. Na bo baakakeele ti busi bukya mawasa.

³⁰ Buuna, basali ba likuumbi, baasahi ubata mu tswehi mu ufuuha. Mu usaha ubata, bo baabaandihi upalisa hyabu hya pfuuhili, na ususa hyo ŋa yulu mubu. Na bo baapfuti uleele ti, bo baakayene hu ukulamasa mamanya, ma ukangimasa likuumbi hu busu.

³¹ Pahuli aleeli huli mukuutu na huli masadaadu: «Tso babahala mobaniba bapali mutso likuumbi, benu a lu utwala ufuuha ve.»

³² Buuna masadaadu maakesi mikudu mi myakakaanga hyabu hya pfuuhili, na hyo hyayeni mu mubu.

³³ Bu bo baakakeele ti busi bukya, Pahuli avondi boosi mu udya. Nde aleeli: «Loloyi ni ilumbu hya kuumi na bina (14), bi benu laamihwada mu ubakeele, hwavele udya pasi isiha.

³⁴ Me pondi benu mu udya. Mu toni ati ŋa, byo bika na tsalu mu uhwadisa polo linyutu la benu. Tso mumosi mu benu, a hunyambasana linaanga li mutswe a nde ve.»

³⁵ Bu nde hamani maana uleele, Pahuli avoli lipa, afutili matondo huli Nzambi ŋa busu bwa baatu boosi. Titswene, nde akesi lipa na nde abaandihi udya.

³⁶ Na bana boosi kaka baadiidi.

³⁷ Bisu laaba makama moole maku tsaambu na baatu basamunu (276), mutso likuumbi.

³⁸ Bu boosi baaywati, mu ulengese likuumbi, bo baabumi makatu ma mbutu yi baakasalila mu uvanga mapa, hutso mubu.

Likuumbi laadyami

³⁹ Ka bu busi bwakiidi, basali ba likuumbi a baakayaba mbuha yi bo baaba ve. Bo baatalili hu lala ngulu yi yaaba na musyeŋunyu. Bo baataasi mu uyatelemese likuumbi huuna.

⁴⁰ Ni mu buuna, basalili ba likuumbi baakesi mikudu na bikahu byosi bi byakakaanga likuumbi na baatimbi byo hutso mubu. Titswene bo baanyanguli mikudu mi manaangu ma maakasuungaha likuumbi mu nzila. Bo baatelimisi ngooto hu busu bu likuumbi, mana livupu litsindahala lo. Na bo baatalisi hu tsyelo a ngulu mubu.

⁴¹ Ka bo baayabumana ibaha hi musyeŋunyu. Likuumbi laadyami hutso a hyo, na laakangimi. Busu bu likuumbi loosi, laakoti hutso musyeŋunyu, hwavele utwala ubwenyingama. Itini hya mbisa hyabohihi, mu toni mifudi mi mapo ma mubu.

⁴² Masadaadu maatondi uduuba bikondaayi byosi, mana tso mumosi a habata mu ubwila.

⁴³ Ka mukuutu wu akatondo ufuuhasa Pahuli, alihi bo mu usa buuna. Nde atumi boosi ba baaba baayaba ubwila, mu uba baatsomi mu ubwa mu mamba na uyene hu simu.

⁴⁴ Bana baakiiduukala bo mu yulu mabaya, buve mu yulu bibulaha bi likuumbi. Na boosi baatoodi hu simu, mbenze ve, muhahusunu ve.