Mavanga 19 - Musamu wu Mubwe

Pahuli li mu ulongese hu musyenge a Efeso

¹ Bu Apoloosi haba hu musyenge a Koliinto, Pahuli ataatili itanzi hi bisyelo bya hu Asiya na atoodi hu musyenge a Efeso. Huuna, nde abwani na mwana a kabu li bayihi.

² Nde afuuli bo: «Benu laayaki Livupu la Ngidi ŋa benu laasiidi hiitu mu Nzambi?» Bo baafutili: «Bisu kini a laayuhi batoyi mu Livupu la Ngidi ve.»

³ Pahuli afuuli bo: «Ki tondihili benu laayaki?» Bo baafutili: «Bisu laayaki tondihili a Yowani.»

⁴ Pahuli aleeli bo: «Yowani akatondehe ba baakasiinga usobo mbiili. Nde akaleele huli bisu Isereli, mu usa hiitu mu muutu wu uya ŋa mbisa a nde, muutu mowuna ni Yisu.»

⁵ Humbisa uyuha mambu momaana, bo baayaki tondihili mu nduhi a Pfumu Yisu.

⁶ Pahuli asuusili bo myoho, na Livupu la Ngidi laakulimini ŋa yulu a bo. Lo laaviidi bo matwala ma utoyo mu mandaha ma baaveleyaba, na ubihula.

⁷ Bo baabeedi bebele a kuumi na baatu boole.

⁸ Pahuli akayene tangu yoosi hu nzo lisambulu yi Bayudaayo, na nde akatoyo na imbuli hyosi. Mu batsungi batatu, nde akayabisa bo misamu mi Ipfumu hya Nzambi. Nde akahwada mu usundasa matsimi ma ba baakayuha nde.

⁹ Ka mitima mya babalahi ŋa hati la bo, myaba miminono. Bo a baakasa hiitu ve, na baakakwede ŋa kuungi la baatu boosi, baana ba baakaduukala nzila a Pfumu. Ka Pahuli atahuhi na bo. Nde abiti bayihi hu nzo a nzihili ya Tiranyusi, na akatoyo na bo pasi ilumbu.

¹⁰ Pahuli ahwadi mu ulongese mu bilima byole, mana Bayudaayo na Bangeleke boosi, ba baakatsahala hu itanzi hya Asiya, bayuha mambu ma Pfumu.

Baana tsaambu ba Seva

¹¹ Nzambi akavanga bipadi bya kimwili mu myoho mya Pahuli.

¹² Baatu baakasuusala babeedu matsaanda, buve maleeso ma maakakubaana nyutu a Pahuli. Babeedu baakabeloho mu mabeedu ma bo, na mavupu mamabi maakapala mu bo.

¹³ Bayudaayo bamosi, baakadyengele ibiingi na ibiingi mu ubinga mavupu mamabi. Baatu mobaana, baayehili usalila nduhi a Pfumu Yisu mu musamu mowuna. Bo baakaleele huli mavupu mamabi: «Me tumi benu mu upala mu nyutu a muutu mowunuwu, mu nduhi a Yisu mo wu Pahuli ubaalongese!»

¹⁴ Buuna ni bu tsaambu la baana ba Seva baakavanga. Seva aba mukuutu Bayudaayo, wu akasa isalu hya nganga a Nzambi.

¹⁵ Ka ilumbu imosi, livupu lilibi laafutili bo bu: «Me nzaabi Yisu, na me atsikaha Pahuli na ali. Ka benu, benu baana lili?»

¹⁶ Na muutu nga livupu lilibi ayabwa ŋa yulu a bo, na amwesi ti nde afula bo mifudi. Nde amwesi bo pasi, na boosi baapali mu nzo a nde pene na mbuma.

¹⁷ Musamu mowunuwu ayabiini huli bisu musyenge a Efeso boosi. Bayudaayo na Bangeleke baayabi matwala ma Nzambi, na baabaandihi usinzakiinza nduhi a Pfumu Yisu.

¹⁸ Babalahi mu ba baasiidi hiitu mu Nzambi, baakayasiinga mamabi ma bo ŋa kuungi la baatu.

¹⁹ Kabu lilinene la baatu ba baakasalila maviingu, baabehi mabuuku ma baakasalila, na baatsuhi mo ŋa kuungi la baatu boosi. Talu mabuuku momaana, yatoodi iteesi hi maku mataanu ma biveeve bi makuta ma mbongo (50000).

²⁰ Ni mu buuna, mu matwala ma Pfumu, mambu ma nde maakatsaamuha na maakafulala ubaha mifudi.

Muyungisi a baatu hu musyenge a Efeso

²¹ Bu misamu momiina myavyohi, Pahuli atsimi uyene hu Yeruselemi mu uvyohele mu bitanzi bya Masedonya na Akayi. Nde akaleele: «Bu me umata huuna, me apfwana uyene ka hu musyenge a Looma.»

²² Nde atsindihi Timoteho na Erasite, ba baakakumbasa nde mu isalu, hu Masedonya. Ka nde mwakulu amasaala mwana a tangu hole, hu itanzi hya Asiya.

²³ Mu tangu moyina, muyungisi wu munene abwidi hu musyenge a Efeso, mu toni a ndongisili yi yatala «Nzila a Pfumu».

²⁴ Mutsuli bilunga mumosi, nga nduhi Demetiyusi, akatsula bifwani bi manzo ma nzambi mu mbongo. Bi nde hakatsula, aba bifwani bya nzo yi baatu baakasambila inzanzambi, hi mukaasu nga kumbu Aritemisi. Demetiyusi akabutasa kaluha yinene huli nde, na huli ba baakasala na nde.

²⁵ Ilumbu imosi, nde ateeli basali ba nde boosi, napa bakima ba baakasala isalu mohina. Nde aleeli bo: «Bambaahi ba me, benu liyabi ti isalu mohinihi hibaabutala bisu a benu kaluha yimbwe.

²⁶ Ka benu lili mu umono, tso uyuha ma mali mu uvyoho mu musyenge a Efeso, nate mu itanzi hya Asiya hyosi. Pahuli mowunuwu amiikingula matsimi ma makonge ma baatu, ti banzambi ba myoho mya baatu myavanga, a bali banzambi ba mbuli ve!

²⁷ Monwani! Isalu hya bisu a benu hyufwa tsoongo, na muyusu a nzo a nzambi mukaasu Aritemisi, sa afwa. Buuna, inzanzambi mohinihi, hi baatu bubaayusa mu itanzi hya Asiya hyosi, na mu toto yoosi, sa hitsulaana.»

²⁸ Bu baatu baayuhi mambu momaana, bo baaluuli mu kesi, na baakafulaha: «Aritemisi a bisu Efeso wu munene ali!»

²⁹ Buuna, bisu musyenge a Efeso boosi, baakoti mu muyungisi. Konge a baatu yakaangi bisu Masedonya boole, Ngayusi na Arisitake, bambaahi ba Pahuli ba midyenge. Boosi mu mutima mumosi, baabingilili udutaha bo ŋa litandala li mikuungi.

³⁰ Pahuli akatondo umonehele mu utoyo ŋa busu bwa baatu boosi, ka bayihi baalihi nde.

³¹ Bamosi ka mu bafoko ba basyenoho ba itanzi hya Asiya, bambaahi ba Pahuli, baatsindihi nde baatu mana bayalembesene Pahuli mu uveleyene hu litandala li mikuungi.

³² Mu tangu moyina, kuungi la baatu laakoti hutso muyungisi. Baaniiba baakafulaha dyambu limosi, bana baakafulaha likima. Na babalahi ŋa hati la bo, a baakayaba tso toni ya kuukimini a bo ve.

³³ Mwana a kabu la baatu mu konge, baabinduli musamu huli muutu mumosi nga kumbu Alezande, wu Bayudaayo baakatehese ŋa busu. Alezande asyenuli hoho, mu uyabisa ti nde tondi utoyo. Na nde abinduli ŋa busu bwa konge ti ba bo baakangi, a bali na mbele ve.

³⁴ Ka bu baayabi ti nde Muyudaayo haba, baatu boosi baakafulaha mu itwadi mu mangunga moole: «Aritemisi a bisu Efeso, we li wu munene!»

Foko mumosi wu musyenge a Efeso, miivumasa konge

³⁵ Tangu mosi, foko wu lituma li musyenge, avumisi konge na aleeli: «Benu bisu Efeso, boosi bayabi ti musyenge a Efeso, ni keedi a nzo a nzambi a Aritemisi. Benu liyabi ka ti iliimbu hi inzambi hya nde, hyamati hu yulu we manya, na hyabwidi ŋa toto.

³⁶ Muutu utwala utuna love. Ni mu buuna, benu laafwana uba swii na utsima, na uvelebingalala uvanga pasi dyambu.

³⁷ Benu limiibehe baatu mobaniba ŋa. Bo a baayiba bi bili mu manzo ma nzambi ma Aritemisi ve. Pila mosi ka, bo a baatuha nde, tso uleele dyambu lilibi mu nde ve.

³⁸ Tso Demetiyusi na bambaahi ba nde ba isalu batondi ukese muutu, bo baafwana uyene mu manzo ma tsundusu, ŋa busu bu banzonzi. Ni huuna baafwana uyakese bo.

³⁹ Na tso benu lili na musamu mukima wu ukese, sa bavanga nde hu likutuunu li laayelemene mu mikele.

⁴⁰ Livelekebani, bisu Looma sa bayakese bisu a benu, ti lili mu utuumbasa konge a baatu mu usa muyungisi. Umono ti ni buuna, bisu a benu a lu ubaha mbiinga mu ubindula ma mamiivyoho loloyi ve.»

⁴¹ Humbisa uleele buuna, foko mowunuwu afutili baatu boosi.