Mavanga 13 - Musamu wu Mubwe

Livupu la Ngidi limiisoolo Baranabasi na Sahuli

¹ Mu tso libundu la Antyokya, hwaba na mimbihuli na milongisi: Baranabasi, Simehoni wu baakateele «Mupindi», Lukiyusi musi Kilene, Manaheni mbahi a Eloode wu bukenyi, wu akatuma itanzi hya Ngalili, na Sahuli.

² Ilumbu imosi, bu bo baakasambila Pfumu na bu bo baakadya ikaandi, Livupu la Ngidi laayabisi bo: «Vengolwani Baranabasi na Sahuli, mu toni isalu hi me ateele bo mu hyo.»

³ Ni mu buuna, bu baamani udya ikaandi na usambila Nzambi, bo baasuusili bo myoho na baanyahi bo bayene.

Baranabasi na Sahuli hu Kipere

⁴ Livupu la Ngidi laatsindihi Baranabasi na Sahuli. Bo baakulimini hu ngulu yi makuumbi ma nzali mubaatsikama, hu bo baanami mu likuumbi la nzali mu uyene hu iliiŋa hya Kipere.

⁵ Bu bo baatoodi hu musyenge a Salamineya, bo balongisi mambu ma Nzambi mu manzo ma lisambulu ma Bayudaayo. Yowani nga kumbu Malako aba itwadi na bo na akabaakumbasa bo.

⁶ Bo baataangili iliiŋa hyosi nate hu musyenge a Pafosi. Huuna bo baabwani nganga mumosi, nduhi a nde Bare-Yisu. Nganga mowuuna aba Muyudaayo, wu akabinuha ti nde mumbihuli a Nzambi.

⁷ Nde aba abambana na Seregiyusi nga kumbu Pahulusi, pfumu a iliiŋa mohina, wu aba muutu nga buyedi. Nde atsihi Baranabasi na Sahuli, bu haba na peyu yi uyuha mambu ma Nzambi.

⁸ Ka nganga mowuna, nga nduhi a «Elimasi» mu ndaha Bangeleke, abisi ma bo na akasaha ti pfumu a hasoolo nzila a Kristo.

⁹ Buuna Sahuli wu baakateele ka Pahuli, aba wu aluula mu Livupu la Ngidi. Nde asungimini nganga.

¹⁰ Nde aleeli: «We aluula mu mapfuta na bukanyi, mwana Mukuyi, muboho a byosi bibibwe! Tsikaha utengehe mavanga ma Pfumu ma maasungama.

¹¹ Bunuubu yuha bubwe! Hoho hwa Pfumu sa hubwa ŋa yulu a we, we sa ba inzimana, na we a ubwemono liyalala li litadi ve, umata mwana a tangu.» Masulubete, miisu ma Elimasi maadimi na nde akoti mu butsuhu. Nde akapeebete tsyelo na tsyelo mu usaha muutu wu ukanga nde mu hoho na ubita nde.

¹² Bu pfumu hamoni ma maavyohi, nde asooli nzila a Kristo. Ndongisili yi baasiili nde mu toni a Pfumu, yakotilili nde mu mutima.

Pahuli na Baranabasi balongisi bisu Antyokya ya Pisidiya

¹³ Umata hu Pafosi, Pahuli na bakaanga ba nde baakoti likuumbi la nzali na baasabuhi nate hu musyenge a Perege hu tsi a Papfiliya. Yowani nga kumbu Malako akabuhi na bo, na afutihi hwa nde hu Yeruselemi.

¹⁴ Bo bamata hu Perege, bo baaduukili nzila a bo na baayato hu musyenge a Antyokya ya Pisidiya. Mu ilumbu hya saba, bo baakoti mu nzo lisambulu yi Bayudaayo na baatsahili.

¹⁵ Bakuutu ba nzo lisambulu yi Bayudaayo baataangi mambu ma ilumbu mu mikele mya Moose, na mu mabuuku ma mimbihuli. Titswene, baatsindihi muutu mu uleele bo: «Baana ba ngu a me, tso benu na mambu ma uyabisa huli libundu mu uhwadisa lo, leelani.»

¹⁶ Pahuli atelimi, asyenuli hoho hwa nde mu uliha kele, na aleeli: «Bisu Isereli na benu ba libaakiinza Nzambi, yuhani me!

¹⁷ Nzambi a bisu Isereli amiisoolo bakaaha ba bisu. Nde akulisi buli la bisu bu lo laaba mu bumwenyi hu tsi a Ngipiti. Titswene nde apalisi lo mu tsi moyina mu matwala ma nde.

¹⁸ Nde akundi mbiili a lo mu bilima bebele maku mana mu kumu a nzala.

¹⁹ Humbisa, nde abungisini mabuli tsaambu hu tsi a Kanana. Na nde aviidi itanzi we mukobe huli buli la nde.

²⁰ Maana moosi maasiidi bilima bebele maakama mana maku mataanu.» «Ŋa yulu a ŋana, nde aviidi banzonzi huli baakaaha ba bisu nate mu tangu mumbihuli Samueli.

²¹ Titswene bo baavondi pfumu mumosi, na Nzambi aviidi bo Sahuli, mwana a Kiise, wu ibandu hya Benyamini. Nde atumi mu bilima maku mana.

²² Nzambi anyasuli Sahuli na atelimisi bo Davidi we pfumu. Nzambi atiili nde imbangi mohi: “Me miimono ti Davidi, mwana a Yese, nde li muutu wu ubaakuhasa matsimi ma mutima a me, nde sa akuhasa moosi ma litondo la me.”

²³ Mumosi ŋa hati li imbisa hya Davidi aba Yisu, wu Nzambi hasooli mu uba Muyobili a Isereli we bu nde hasiidi lahi.

²⁴ Tswamina nziili a Yisu, Yowani alongisi musamu wu mubwe huli buli li Isereli loosi, mu usobo mbiili na uyaka tondihili.

²⁵ Tangu yi Yowani hasukisi isalu hya nde, nde akaleele: “Benu ubaatsima ti me na ndi? Me a ndi wuna wu benu libaakeele ve. Ka yuhani: muutu li mu uya humbisa a me, na me a handi tso wu akuha mu uba muviha, mu unyangula midi mi bikoodi bya miilu mya nde ve.”»

²⁶ «Baana ba ngu a me, benu ba imbisa hya Abrahami, na ba bubaakiinza Nzambi. Ni huli bisu a benu boosi, Nzambi hatsindaha musamu liyobolo wunuwu.

²⁷ Ka bisu Yeruselemi na baatumi ba bo a baatsikihi Yisu na ali ve. Ŋa batsundisi nde, bo baakuhisi mambu ma mimbihuli ma bubaataanga pasi ilumbu hya Saba.

²⁸ Tso bu bo baavelimono toni mu utsundasa nde mu lipfu, ka bo baavondi huli mutumi Pilaato, mu utuma uduba nde.

²⁹ Humbisa ukuhasa moosi ma bisono bya Ngidi byayabisi mu toni a nde, baasutisi nde ŋa kuruwa na baasuusi nde mutso a ngila.

³⁰ Ka Nzambi asuuli nde mu babaakwa.

³¹ Mu bilumbu bibilahi, Yisu amonihili huli ba baakadyenge na nde. Ni baatu ba baakayene na nde umata hu itanzi hya Ngalili nate hu Yeruselemi. Na bunuubu, bo bali bambangi ba nde, ŋa busu bwa bisu Isereli.

³² Bisu mwakulu lili mu ubehele benu musamu wu mubwe wu Nzambi hasiidi lahi huli bakaaha ba bisu.

³³ Bunuubu, Nzambi miikuhasa lo we bu hwafwana huli bisu bikiisa bya bo. Mu usa buuna, Nzambi miisuula Yisu mu babaakwa we bu baasonehe mu Mukuunga wa myole: “We ni wuli mwana a me, loloyi, me mimbuta we.”

³⁴ Nzambi ayabisi ti nde sa asuula Yisu ŋa hati la babaakwa mana nyutu a nde a yibolo. Nzambi aleeli bunuubu: “Me tsa pa benu lisyeme la ngidi, li me atsiidi lahi la simi-simi huli Davidi.”

³⁵ Ni mu buuna, nde ali mu ubwesiitasa mu Mukuunga mukima: “We a hutuma ti me, musalili a we wa ngidi, nyutu a me yibolo mutso a ngila ve.”

³⁶ Mu tangu a nde, Davidi akuhisi litondo la Nzambi, na nde akwidi. Baadiihi nde ŋa muvanga bakaaha ba nde na nyutu a nde yaboli.

³⁷ Ka Yisu wu Nzambi hasuuli mu babaakwa, a haboli ve.

³⁸ Baana ba ngu a me, benu lafwana uyaba lo ti: ni mu toni a Yisu, Nzambi haminyahula masumu ma benu. Ka Mikele mya Moose a myatwali unyahula masumu ma benu ve.

³⁹ Ni mu nde pasi muutu wu ubaasa hiitu mu Yisu, amiiyaka nyahulili masumu ma nde.

⁴⁰ Buuna kebaani, mana ma mimbihuli myasonehe a mayiila benu:

⁴¹ “Talaani, benu ba libaabaaya Nzambi, kimuhani na dimbalaani. Ka me ukuhasa vanga limosi, mu tangu a benu yi. Vanga liina li benu lu uvelesa hiitu, tso muutu mukima yabisi benu lo!”»

⁴² Pahuli na Baranabasi baapali mu nzo lisambulu yi Bayudaayo. Baavondi bo mu ubweyafutaha mu ilumbu hya saba hi hyakaduukala, mu ubwetoyo mu musamu mowuna.

⁴³ Bu imoho hyafwidi, Bayudaayo babalahi na baatu bakima ba baasiingi uyusa Nzambi, baaduukili Pahuli na Baranabasi. Bo baakahwadisa bo mu ukangama mu Nzambi, wu ubanyahula masumu ma baatu.

Pahuli na Baranabasi baaka mu ulongese ba baavele Bayudaayo

⁴⁴ Mu ilumbu hya saba hi hyaduuki, bisu musyenge a Antyokya babalahi, baayakuukama mu uyuha mambu ma Pfumu Yisu.

⁴⁵ Bu Bayudaayo baamoni konge a baatu moyina, bo baaluuli mu nyengi. Na baakatuna ndongisili a Pahuli ti yi upfuta, na baakatuha nde.

⁴⁶ Buuna, Pahuli na Baranabasi baayabisi bo na hiitu hyosi ti: «Beedi hwafwana ti benu liba baatsomi mu uyuha mambu ma Nzambi. Ka bu benu lili mu unyasula mo, na umono ti benu a laakuha mu uyaka monyi wu bilima na bilima ve, bunuubu, bisu sa liyene huli ba baavele Bayudaayo.

⁴⁷ Buuna monwani ma Pfumu hatuma bisu: “Me atsooli we mana we ba liyalala huli ba baaveleyaba me, mana we bita liyobolo, nate hu tsukusu a tsi.”»

⁴⁸ Bu ba baavele Bayudaayo baayuhi mambu momaana, bo baaluuli mu kinya na baayusi mambu ma Pfumu. Boosi ba Nzambi hasooli mu ubaha monyi wu bilima na bilima, baasiidi hiitu mu Pfumu.

⁴⁹ Maambu ma Pfumu maasinzitsaamuha mu itanzi mohina hyosi.

⁵⁰ Ka Bayudaayo baasimbilili bakaasu ba biita lilinene, ba baakayusa Nzambi, napa bangeele ba musyenge. Bo baatsumbili kwamisili ya Pahuli na Baranabasi, na baabingi bo mu itanzi hya bo.

⁵¹ Pahuli na Baranabasi baakubili bo mufundu a miilu mya bo mu uyibusa bo, na baayeni hu Ikoniwumi.

⁵² Ka bayihi ba Pfumu hu Antyokya, baaluuli mu kinya na mu Livupu la Ngidi.