Mavanga 12 - Musamu wu Mubwe

Ndubili a Yaaki, kotili a Peetelo mu kondaayi

¹ Mu tangu moyina, pfumu Eloode akaangi baana ba libundu bakima mu unyongese bo.

² Nde atumi masadaadu ma nde mu uduba Yaki mwana a ngu a Yowani mu sabila.

³ Bu hamoni ti mavanga momaana mali mu umwese bakuutu ba Bayudaayo kinya, nde abwetuma ukanga ka Peetelo. Baakangi nde mu tangu mukungi mapa ma maaveledaana.

⁴ Humbisa ukanga Peetelo na ubwaha nde mu kondaayi, Eloode asuusi mabuli mana ma masadaadu mana-mana mu ukeelese nde. Nde atsimi utsundasa Peetelo ŋa kuungi la baatu, humbisa mukungi a Paake.

⁵ Bu baakakelese Peetelo mu kondaayi, libundu laakasambila Nzambi mu nde tangu yoosi na ibahala.

Pofi miiyobolo Peetelo

⁶ Mu butsuhu bu bwatehili ilumbu hi Eloode hakiitsundasa Peetelo ŋa kuungi la baatu, Peetelo aba abwamina ŋa hati li masadaadu moole. Baakuti nde mu mapanga moole. Bakeedi bakima baakakelese ŋa busu bu munywa a nzo a kondaayi.

⁷ Masulubete, pofi a Pfumu ayamonehele, na ŋa Peetelo haba, hwaluuli mu liyalala. Pofi anyingisi nde, asuuli nde na aleeli: «Teleme mu mawasa!» Buuna, mapanga ma maaba mu myoho mya nde maabwidi.

⁸ Pofi aleeli: «Hada mudi a we a luungu, na kuta bikoodi bya we!» Peetelo asiidi buuna na pofi abwesi: «Lwata iyunga hya we, na duukala me.»

⁹ Peetelo aduukili pofi, na apali mu kondaayi. Ka nde akatsima ti hyo aba imono-miisu. Nde a hakatsikaha moosi ma pofi hakavanga ve, tso maaba ma mbuli.

¹⁰ Bo baavyohi mbuha bakeedi ya tsomi, titswene ya moole, buuna bo baayato ŋa busu bu munywa a nzo bitali, wu akatalisa hu musyenge. Munywa a nzo adibumi mu nde mwakulu. Bu bo baapali na baayasusaha hu tsoso a nzila, mu mawasa, pofi asisi Peetelo.

¹¹ Buuna Peetelo apadumini na atsimi: «Bunuubu me miimono bubwe ti mu mbuli, Pfumu miitsindaha pofi a nde. Nde miiyobolo me ŋa myoho mya Eloode. Nde miiyobolo me, mu moosi ma buli li Bayudaayo bakiivangila me.»

¹² Bu nde hatsikihi buuna, nde ayeni hu nzo a Mariya, ngu a Yowani nga kumbu Malako. Baatu babalahi baakuukimi huuna mu usambila Nzambi.

¹³ Peetelo adoodi munywa a nzo. Musalili mumosi wu mukaasu wu bubaateele Roode, ayasusaha mu udibula na ufuula; na doodi.

¹⁴ Nde adihuli ndaha a Peetelo wu ayahuli, na aluuli mu kinya. Teehele nde adibula, nde abingilili uyayabisa ti Peetelo hu mbadi ali ŋa busu bu munywa a nzo.

¹⁵ Buuna bo baaleeli nde ti: «We ladi li na lo!» Ka nde akwilili mu ubaaleele ti Peetelo hu mbadi ali. Bo baaleeli ti: «Nde ŋana ka Pofi a nde!»

¹⁶ Ka Peetelo akwilili mu udoodo munywa a nzo. Bu bo baadibuli munywa a nzo na baamoni Peetelo, bo baakimuhi boosi bu baamoni nde.

¹⁷ Mu hoho hwa nde, Peetelo avondi bo mu ubaa «swii». Na nde ayabisi bo buni Pfumu hapalisi nde mu tso a kondaayi. Nde abwebwese: «Yayabisaani mambu mo maaniima huli Yaki na huli baana ba ngu bakima.» Titswene, nde apali na ayeni tsyelo kima.

¹⁸ Bu busi bwakiidi, muyungisi wu munene aba ŋa hati li masadaadu. Bo baakatsundana: «Ki dyambu libwili Peetelo!»

¹⁹ Eloode atumisi baatu mu uyasaha Peetelo, ka bo abaamoni nde ve. Buuna, Eloode atsundisi ba baakakelese Peetelo. Bu baavelifutala nde mvutu, nde atsindihi baatu mu uduba bo. Humbisa, Eloode asiisi itanzi hya Yuda, mu uyavyoso tangu hole hu musyenge a Sezare.

Lipfu la pfumu Eloode

²⁰ Mu tangu moyina, Eloode aba na kesi a bisu Tiilo na bisu Sidoni. Ni mu buuna, baatu ba bitanzi mobiina baayuhisini mu uyamono Eloode. Humbisa baafuti mbongo huli Balasitusi, mukelisi itini hya nzo a pfumu. Bo baavangi buuna, mana Balasitusi ayalembesene Eloode mu uyuhasana na bo. Mu toni ati, byudya bya Tiilo na Sidoni ubaamata hu tsi a pfumu Eloode.

²¹ Mu ilumbu hi bo baasooli, Eloode alwati ikutu hya nde hi mifwende, atsahili ŋa kiti a nde yi ipfumu, asiidi ileedi ŋa litandala.

²² Baatu baakafulaha: «Wunuuwu, woosi we Nzambi li mu utoyo, ka a muutu ve!»

²³ Mu tangu moyina, pofi a Pfumu ateti Eloode, mu toni ati nde ayaki muyusu wu bubaava huli Nzambi. Mu usyembe nde, misobi myakaatuhi nde mu monyi, na nde akwidi.

²⁴ Ka mambu ma Nzambi maakafulala utsamuha, na baatu babalahi baakasiinga mo.

²⁵ Bu Baranabasi na Sahuli baamani ukuhasa isalu hu Yeruselemi, bo baasiisi Yeruselemi na baabiti Yowani wu baakateele ka Malako.