Luuka 17 - Musamu wu Mubwe

Yisu li mu ulongese mu tsobili a mbiili mu ufutaha huli Nzambi

¹ Yisu aleeli bayihi ba nde: «Matonyi mamalahi mali ma utahuha na Nzambi. Ka ni lingebe huli nde wuna wu uba toni yi utahusa muutu na Nzambi.

² Hufwani bubwe huli nde wuna, bakutala nde manya li linene mu likingu na ubwaha nde mu mubu. Hufwani buuna, ka a mu ubita tso mumosi mu bangebe mo baaniiba mu utahuha na Nzambi ve.

³ Kebaani! Tso mwana a ngu a we buve kedi avanga lilibi, yibusa nde we bu hwafwana. Nde asobo mbiili a nde, sa nde kolo-kolo.

⁴ Tso nde siidi we bubi tsa tsambu mu ilumbu, na tso nde ya monehele huli we monehele tsambu na uleele: “Me miitsobo mbiili a me.” Sa nde kolo-kolo.»

Hiitu mu Nzambi

⁵ Bayihi baaleeli huli Pfumu: «Kulasa hiitu hya bisu mu Nzambi.»

⁶ Pfumu aleeli: «Tsimaani ti hiitu mu Nzambi hili we mwa libutu la mutade. Tso benu na hiitu hya pila yina, benu utwala utuma muti we mbuyu: “Tuupama, na yamene hutso mubu.” Nde sa asiingala benu.

Mupfuna musalili

⁷ Tsimaani ti mumosi mu benu li na ngamba wuli mu usala toto. Buve ngamba wuli mu ukeelese biboodi. Bu nde humata mangundu, nde uleele nde: “Yanga mawasa yatsahala ŋa metse?”

⁸ Naana! Ka nde sa aleele nde: “Lamba byudya bya me, na sobo bikutu mu usalila me nate bu me umana udya na unywa. Humbisa we sa dya na unywa mu ya we tangu.”

⁹ A hwafwana huli nde mu ufutala matondo huli ngamba mowunuwu ve, mu toni ati nde vangi ma baatumi nde.

¹⁰ Ni we benu ka, ŋa benu limiivanga ma baatumi benu, leelaani: “Bisu lili bangamba ba baavele a tsoongo, bisu limiivanga mamaakuha huli bisu mu usa.”»

Yisu abeelusi kuumi la banga a bwatsi

¹¹ Bu Yisu hakayene hu musyenge a Yeruselemi, nde atangili mandilu ma bitanzi bya Samariya na Ngalili.

¹² Bu nde hakakoto hu bula bumosi, kuumi la baatu banga a bwatsi bayabwana na nde. Bo baatelimi hu lala.

¹³ Bo baabwi mu ufulaha: «Yisu, Mulongisi, kwila bisu lingebe.»

¹⁴ Yisu amono bo, nde aleeli: «Yamwesani nyutu a benu huli banganga ba Nzambi.» Na bu baaba mudwe huuna, bo baabeeluhi.

¹⁵ Mumosi mu bo, bu hamoni ti nde miibeeloho, ayafutaha, na ayusi Nzambi na mifudi myosi.

¹⁶ Nde abwidi mbalanga mu toto, ŋa busu bwa Yisu na afutili nde matondo. Muutu mowunuwu aba musi Samariya.

¹⁷ Yisu aleeli: «A kuumi la baatu babeeluhi ve? Ka ipfwa hina huni bali?

¹⁸ Ŋa hati la bo boosi, ndulu ni mwenyi mowunuwu tsimi uyafutaha mu ufutala matondo huli Nzambi!»

¹⁹ Titswene, Yisu abweleele nde: «Teleme yene! Hiitu hya we mu Nzambi himiifuuhasa we.»

Nziili Ipfumu hya Nzambi

²⁰ Bafarisi baafuuli Yisu: «Ki tangu Ipfumu hya Nzambi hi uya?» Nde afutili bo: «Ipfumu hya Nzambi a hili we iliimbu hi bubaamono mu uya ve.

²¹ Mu tangu moyina baatu a bu uleele ve: “Hyo hyohi ŋa!” Buve: “Hyo hyohinaa!” Mu toni ati Ipfumu hya Nzambi ŋa hati la benu hili.»

²² Na nde aleeli huli bayihi: «Bilumbu bi byuya, benu luusaha umono tso ilumbu imosi mu bilumbu bya Mwana a muutu. Ka benu a luumono hyove.

²³ Sa baleele benu: “Nde ŋa ali!” — Buve “Nde huuna ali!” A liyene maatiinu ve! A liduukala bo ve!

²⁴ We bu muvedyavedi ubaamwedeme na uyalusa mayulu tsoso moyi nate yina, ni buuna ka bu uba mu Mwana a muutu mu ilumbu hi nde hu uya.

²⁵ Ka nde afwana umaamono pasi bulahi, na baatu ba tungi molinili sa babisa nde.

²⁶ Mambu ma mabwidi mu tangu Nowa, sa mavyoho bumosi ka we mu bilumbu bya nziili a Mwana a muutu.

²⁷ Baatu baakadya na baakanywa, baakakwele na baakakwelese baana ba bo, nate mu ilumbu hi Nowa hakoti mutso likuumbi. Humbisa, nyamba yayidi na yanyambisini bo boosi.

²⁸ Sa huba bumosi ka we mu tangu Loti: baatu baakadya na baakanywa, baakasumba na baakasumbasa, baakakuna mbutu na baakatunga manzo.

²⁹ Ka ilumbu hi Loti hapali mu musyenge a Sodoomo, mbaahu na mamanya ma mbaahu maakanoho we mvula na boosi baanyambiini.

³⁰ Sa huba ka bumosi mu ilumbu hi Mwana a muutu huyamonehele.

³¹ Mu ilumbu mohina, woosi wu uba ŋa yulu ibanga, aba na bisiha mutso a nzo, a nyaha usutaha mu uvolo byo. Bumosi ka, wuna wu uba hutso matsyehe, avelefutaha hu nzo.

³² Yibwalaani monyi mu mukadi a Loti.

³³ Woosi wu usaha ukeelese muvumu a nde sa anyambasana nde, na woosi wu unyambasana muvumu a nde sa akeelese nde.

³⁴ Me ndeele benu, mu butsuhu mo buuna, baatu boole ba bu uba ŋa taangi mosi, mumosi sa babita, na wuna sa basiisa.

³⁵ Bakaasu boole ba bu uba mu unyiha mbutu mu itwadi, mumosi sa babita, na wuna sa basiisa. [

³⁶ ]»

³⁷ Bayihi baafuuli Yisu: «Pfumu, maana mbadi huni mutswiha?» Nde afutili: «Ŋa hu uba mvumbi, ni huuna ka bambida bu ukuukama.»