Luuka 15 - Musamu wu Mubwe

Sahu li lindombo li laadimbala, li misoloho

¹ Bakaambi ba limandu na baatu ba baasumaha, baayasusaha boosi hu pedu a Yisu mu uyuha ma nde hakaleele.

² Bafarisi na bangeele ba mikele baakaŋono, na baakaleele: «Muutu mowunuwu li mu uyaka banga masumu na nde li mu udya na bo.»

³ Yisu atiidi bo sahu mo linili:

⁴ «Tso muutu ŋa hati la benu li na kama li madombo, na tso dimbisi limosi, nde a humasiisa maku ipfwa na mandombo ipfwa ŋa kumu ve? Eeye, nde usiisa mo, mu uyasaha lindombo li laadimbala, nate bu nde husoolo lo.

⁵ Ŋa nde amiisoolo lo na kinya yoosi, nde sa atsyete na ususa lo ŋa yulu bisambaha bya nde.

⁶ Bu nde hufutaha hu nzo, nde sa ateele bambaahi ba nde, na ba mu mivanga mya nzo a nde, na uleele bo: “Baanaani mu kinya na me, bu me miitsoolo lindombo la me lili beedi laadimbala.”

⁷ Ni buuna ka, me ndeele benu, kinya yi yafulala sa yiba hu yulu huli Nzambi mu muutu mumosi wu misobo mbiili a nde. Kinya moyina yaluta ya baatu maku ipfwa na ipfwa ba baavelesobo mbiili a bo.

Sahu li likuta la mbongo li laadimbala, li misoloho

⁸ Buve, tso mukaasu li na kuumi li makuta, tso nde dimbisi limosi, nde sa abaangisa mwinda, na ukoombolo nzo, na usaha mu bukuhu nate bu nde husoolo lo.

⁹ Ŋa nde amiisoolo lo, nde sa atsiha bambaahi na ba mu mivanga mya nzo a nde, na uleele: “Baani mu kinya na me, bu me mitsoolo likuta li me mbeedi andimbasa.”

¹⁰ Ni bumosi ka, me ndeele benu, huli na kinya ŋa hati li bapofi ba Nzambi mu toni a nga masumu mumosi wu misobo mbiili.»

Sahu la taata na baana boole

¹¹ Yisu abweleele: «Muutu mumosi aba na baana boole ba babahala.

¹² Wa ngebe aleeli huli taata a nde: “Taata, va la me kabu li mukobe li me apfwana ubaha.” Na taata akabili bo baabole busina bwa nde.

¹³ Mwa bilumbu bivyoho, mwana wa ngebe asumbisi bya nde byosi na ayeni hu tsi ya lala na mbongo a nde. Huuna, nde anyambisini busina bwa nde, bu nde hakoti mu mbiili yi yavelefwana.

¹⁴ Bu nde hamani unyabasana byosi, nzala yinene yaakoti mu tsi moyina. Nde akimi mu bi ufuuhala mu idiingu.

¹⁵ Nde asahi isalu huli muutu mumosi mu bisu tsi moyiina. Muutu mowuna atsindihi nde hu kumu a nde, hu uyakeelese bangulu.

¹⁶ Nde aba na nzala udya mbutu yi bangulu baakadya. Ka nde a habahi tso hahima ve.

¹⁷ Bu nde atsimi bubwe nde aleeli bu: “Basalili ba taata boosi bali na byudya bibilahi, ka me huni, me aka ukwa mu nzala.

¹⁸ Me tsa pfutaha huli taata a me na me tsa ndeele nde: ‘Taata, me atsumaha ŋa busu bwa Nzambi na ŋa busu bwa we.

¹⁹ A hwafwana ti we bweteele me mwana a we ve. Volo me we mumosi mu basalili ba we.’”

²⁰ Na nde afutihi huli taata a nde. Bu nde haba kini lala na nzo, taata a nde atalili nde, na amoni lingebe lililahi. Taata ayeni tiinu huli mwana a nde, ayabumba na avivi nde.

²¹ Mwana aleeli nde: “Taata, me atsumaha ŋa busu bwa Nzambi na ŋa busu bwa we. Me a tsaali wu afwana ti we bweteele me mwana a we ve.”

²² Ka taata aleeli huli basalili ba nde: “Mu mawasa behelani nde ikutu hi hyafulala bubwe na lwatisaani nde hyo! Lwatisaani nde muluunga mu mulembo, na bikoodi mu miilu.

²³ Behani mukole a ngombe wa tsoongo na dubaani nde, laambani! Lidyanani na lisaanani muyali.

²⁴ Mu toni ati mwana a me wu beedi amiikwa, miisuuha; nde beedi amiidimbala, miisoloho.” Na bo baabandihi mukungi.

²⁵ Mu tangu moyiina, mwana a muutu mowuna wu mukuutu aba hu mangundu. Ŋa nde hayafutaha, na ayato ŋa pedu a nzo, nde ayuhi kele a nyimbu na makinu.

²⁶ Nde ateeli musalili mumosi, afuuli nde ki mambu mali mu uvyoho.

²⁷ Musalili afutili nde: “Muhehe a we miyafutaha. Na taata a we miituma uduba mukole a ngombe a tsoongo, mu toni ati mwana a ngu a we miyafutaha polo.”

²⁸ Ka mwana wu mukuutu abahi kesi na a hatondi ukoto mu nzo ve. Taata a nde apali mu uyabondo nde mu ukoto.

²⁹ Na nde afutili huli taata a nde: “Taata! Huka bilima bibilahi me ndi mu utsalila we. Me kini a hambisili we ve. Ka we kini a havidi me tso mukole a taba me kaka tsiidi mukungi na bambaahi ba me ve.

³⁰ Ka bu mwana a we wunuwu amiiya, nde wu ayanyambasana busina bwa we na bimbembo, mu toni a nde, we tumi uduba mukole a ngoombe wa tsoongo!”

³¹ Taata a nde afutili: “Mwana a me, we li na me tangu yoosi, na byosi bi me ndi na byo bili bya we.

³² Hufwani huli bisu mu uvanga mukungi, na uba mu kinya mu toni ati, muhehe a we wu beedi amiikwa, nde miisuha. Nde beedi amiidimbala, nde miisoloho.”»