Luuka 12 - Musamu wu Mubwe

Ukele na baatu banga mapfuta

¹ Mu tangu moyina, limya la baatu laakuukimi na baakadyata miilu mya bana. Yisu atswamini uleele huli bayihi ba nde: «Baakelaani mu iloho hi hibaadanisa paate a Bafarisi, hyo hibaamwese muwala a bo.

² Mambu moosi ma maasweme sa mamonehele; na mambu ma tswehi sa mayabaana.

³ Ni mu buuna, mambu moosi ma benu luleele hutso a piipidi sa bayuha mo ŋa liyalala. Na mambu ma benu luleele wadi-wadi mu matswi ma bambaahi mu bitini bi manzo. Baatu sa bata mo ibila ŋa yulu bibanga bi manzo.

⁴ Me ndeele benu bambaahi ba me: A libata boomo bwa babaali mu uduba nyutu na uveletwala usa isiha ikima ŋa yulu ve.

⁵ Me tsa mwese benu wu benu lafwana ubata boomo. Bataani boomo bwa Nzambi, nde wuna Humbisa uduba muutu, li na lituma li ubwaha nde hu mbenge a mbaahu. Eeye, me ndeele benu, ni nde wuna benu lafwana ubata boomo.

⁶ Masyehe mataanu bali mu usumbasa mu mwa makuta moole. Ka a huli na tso limosi mu mo li Nzambi havusaana mutima ve.

⁷ Na paa naanga mitswe mya benu baayaba yoosi litangu. Ni mu buuna a liba na boomo ve. Talu a benu yafula yi masyehe moosi.

⁸ Me ndi mu undeele benu: pasi muutu wu utiila me imbangi ŋa busu bwa baatu, Mwana a Muutu ka sa atiila nde imbangi ŋa busu bu bapofi ba Nzambi.

⁹ Ka muutu wu utunala me ŋa busu bwa baatu, Mwana a Muutu sa atunala nde ka ŋa busu bu bapofi ba Nzambi.

¹⁰ Na pasi muutu wu utoyo bubi mu Mwana a Muutu, sa ayaka kolo-kolo. Ka pasi muutu wu uyambila bubi mu Livupu la Ngidi, Nzambi a husa nde kolo-kolo ve.

¹¹ Sa baabita benu hu utsundasa hu manzo ma lisambulu li Bayudaayo, ŋa busu bu bakuutu na lituma la tsi. A litsima buni benu lukalila nyutu a benu ve, tso ki mambu benu lupalisa ve.

¹² Nyahani hwa benu, Livupu la Ngidi sa lilongese benu mu tangu moyina mambu ma benu lafwana uleele.»

Sahu li isina hi itsuudu

¹³ Muutu mumosi ŋa hati la konge aleeli Yisu: «Mulongisi, leele huli mwana a ngu a me akaba na me mukobe wu taata hasiisa.»

¹⁴ Yisu afutili nde: «Mbaahi a me, na asoolo me mu uba nzonzi a benu, buve mu ukabila benu mukobe a benu?»

¹⁵ Titswene Yisu aleeli huli baatu boosi: «Kebaani! Baabataani manzala moosi ma busina; tsoongo a idiingu hya muutu a hyakangama mu bisiha bya nde ve.»

¹⁶ Yisu atiidi bo sahu moli: «Isina imosi hya bahala hyaba na bwadi bu bwabuti mbutu yindahi.

¹⁷ Nde akabaatsima hutso mutima na ubaaleele: “Me ka buni utsa! Me a ndi na mbuha yinene mu uswehe mbutu a me yoosi ve.”

¹⁸ Na nde abweleele mu nde mo: “Mono bu me utsa: me tsa tsala biswehili bya mbutu a me, me tsa mbwetunga biswehili bi byafulala bunene. Ni huuna me ukuukaha mbutu a me yoosi, na bisiiha bya me byosi.

¹⁹ Titswene me tsa ndeele muvumu a me: ‘Mbaahi a me, we li na biloho bi bilahi bya ŋa muvanga bi byudiinga bilima bi bilahi. Vuma hwa we, dya, nywa na ba mu kinya.’”

²⁰ Ka Nzambi aleeli nde: “Itsuudu! Mu butsuhu mobu ndulu, me tsa maasa muvumu a we. Na bi we akuukaha biina byosi, na uvolo byo?”»

²¹ Yisu abwesi: «Ni buuna ka huli muutu wu ubatsonzehe busina mu nde mo, na wu aveletsonzehe biloho bi byayelemene ŋa busu bwa Nzambi.»

Baani na hiitu mu Nzambi

²² Titswene Yisu abweleele bayihi ba nde: «Ni mu buuna me ndi mu undeele benu: a liba na matsimi mu idiingu hya benu, mu bi benu luudya, buve mu nyutu a benu, mu bi benu lu ulwata ve.

²³ Ka idiingu hyaluta byudya talu, na nyutu bele bikutu ve.

²⁴ Talaani mingongoyo, myo a mibaakuna ve, tso ukuukaha ve, myo a mili na iswehili hya mbutu ve, tso inzunihi ve, ka Nzambi ubaabuungala myo! Benu lalutala myo tsoongo!

²⁵ Na ŋa hati la benu mu toni minyongo mya nde, utwala ubwese bilumbu bya idiingu hya nde?

²⁶ Ka tso benu a lili na matwala mu bisiha bya hole ve, mu hima benu libaaba na matsimi mu bisiha bi byafula tsoongo?

²⁷ Talaani buni bifulu bya bwadi bibaakula. Byo a bibaasala ve, tso utuunga bikutu ve. Ka me ndeele benu ti: tso mutumi Soolomo na busina bwa nde bwosi, a hali na bikutu bibibwe we imosi mu bifulu mobi ve.

²⁸ Tso Nzambi ubaalwatisa himbu hya bwadi loloyi, na hi bubwaha hutso a mbaahu ngwali, taandisi a benu, nde sa alwatsisa benu ka! Benu baatu banga imiinu hi ikeehe.

²⁹ Benu, nyahani matsimi mu bi benu luudya na bi benu lunywa, tso byukwana.

³⁰ Ka ni bangooyi ba tsi moyi ba baasaha tangu yoosi. Ka benu, benu lili na Taata wu ayaba ti benu lili na nzala a byo.

³¹ Ma tswaminani usaha Ipfumu hya Nzambi, na Nzambi sa ava benu bisiha byosi bi benu lili na byo nzala.

³² A ba na boomo ve, we mwana a konge biboodi! Mu toni ati Taata a benu mimono bubwe mu uva benu Ipfumu hya nde.

³³ Sumbasaani bisiha bi benu lili na byo byosi, na vaani mbongo huli biyaha. Vangaani bapaala ba mbongo ba baavelebiiya, kukahani busina bu bu uvelefwa hu yulu, hu bwo bu uveledimbala. Mu toni ati, huuna biibi utwala uto ve, na batsyedidi utwala ubiyasa bwo ve.

³⁴ Ni mu buuna, ŋa huli busina bwa we, ni ŋana ka huli mutima a we.

Kinya huli basalili ba bali likanda

³⁵ Banaani balaavangama, lwataani bikutu bya benu bi isalu, na baangisaani minda mya benu.

³⁶ Banaani we basalili ba bali mu ukeele pfutihili a pfumu a bo wu ayene hu mukungi makwele. Mana bu nde hu uyato ŋa nzo a nde, na nde adoodo, bo badibula nde munywa a nzo.

³⁷ Kinya huli basalili moba ba pfumu hu uyabiisa musihi ŋa nde hu uyafutaha! Ni mbuli, mu pfutihili a nde, nde ni wu ulwata ikutu hya nde hi isalu, wu utsahisa bo ŋa metse, na usuhala bo byudya.

³⁸ Nde tso hayato hu hahati a busi, buve ŋa ngwali, a dyambu ve, kinya huli basalili, tso nde ya biisa bo musihi!

³⁹ Yabaani lo bubwe, tso pfumu a nzo kini ubaayaba ki tangu muyibi hu uya, nde ukala nde mu ubula nzo a nde.

⁴⁰ Benu ka, bavangamaani, mu toni ati Mwana a Muutu sa aya, mu tangu yi benu laaveletsima.»

Musalili wu asungama na wu avelesungama

⁴¹ Na Peetelo afuuli: «Pfumu we sahu moli ndulu mu bisu we tiidi lo, vo mu baatu boosi?»

⁴² Pfumu afutili: «Mukuutu basalili wu asungama na nga tsiki ni na? Ni muutu wu Pfumu hasuusala mutima a nde mu ubakeelese basalili, mana nde abaava pasi muutu mu tangu yi yafwana kabu la byudya.

⁴³ Kinya yili na mukuutu mowunuwu, tso pfumu mu pfutihili a nde, ya biisa nde mu ubaasa isalu hi nde hasiila nde!

⁴⁴ Me ndeele benu, ni mbuli: Pfumu sa ava nde lituma ŋa yulu bisiha bya nde byosi.

⁴⁵ Ka tso mukuutu basalili li mu uleele hutso mutima a nde ti: “Pfumu a me li mu utaamba mu uya.” Nde abwa mu ubeete basalili bana ba babahala na ba bakaasu, na udya, na unywa, na ukolo malamu.

⁴⁶ Buuna pfumu sa ayafutaha mu ilumbu hi nde haveletsima, na mu tangu yi nde haveleyaba. Pfumu sa asyembe mukuutu mowunuwu mu tsyembili yi nono, na uva nde musyendo mumosi na ba baavelesungama.

⁴⁷ Musalili wu ayaba litondo la pfumu a nde, ka velivangimasa lo, nde sa ayaka bikooti bibyafulala.

⁴⁸ Ka musalili wu aveleyaba ma pfumu a nde hatondo, na li mu uvanga mambu mamabi, afwana uyaka tsyembili, na bikooti byatsiitsa. Huli muutu wu ayaka bibilahi, sa bavondo bulahi. Na sa banono bibyafulala bulahi huli wu ubaasoombese bibilahi.

Mu Yisu sa huba na kabwili

⁴⁹ Me miinza mu ubehe mbaahu ŋa toto, na me na nzala yindahi ti yo yiba yi yamibaangama!

⁵⁰ Me apfwana uyaka tondihili mapasi, na me na lehemene mu uyaka yo.

⁵¹ Benu libaatsima ti me hyenze ambehe ŋa toto? Naana, me ndeele benu, ka kabwili ŋa hati la baatu.

⁵² Umata bunuubu, nzo yi yili na baatu bataanu, bo sa bakabuha. Baatu batatu sa babelele baatu boole, na baatu boole sa babelele baatu batatu.

⁵³ Taata sa abelele mwana a nde wa bahala, na mwana wa bahala sa abelele taata a nde. Ngu sa abelele mwana a nde wu mukaasu, na mwana wu mukaasu sa abelele ngu a nde. Ngu a mwana wa bahala sa abelele mukadi a mwana a nde, na mukadi a mwana nde sa abelele buko bwa nde bu mukaasu.»

Uyaba na utsikaha bilimbu bya tangu

⁵⁴ Yisu abweleele huli konge a baatu: «Ŋa benu lumono yidu mu upala hu weste, mu mawasa benu libaaleele ti: “Mvula sa anoho”, na nde ubaanoho.

⁵⁵ Na ŋa benu li baamono ifula hya suude mu usa, benu libaaleele: “Nyangu sa abenge”, na bubaaba buuna.

⁵⁶ Benu baatu banga muwala! Benu libaayaba utsikaha bilimbu bya toto na bya yulu, buni benu laaveletsikaha mambu ma mali mu uvyoho mu tangu moyiniyi?

⁵⁷ Benu mwakulu a laatwala utsikaha mambu ma mbuli ve!

⁵⁸ Ni mu buuna, ŋa we li mu uyene hu utaanda na muboho a we ŋa busu bwa nzonzi, bu benu likini mu nzila, ma yuhasana na nde. Tso a buuna ve, nde sa abita we ŋa busu bwa nzonzi, na nde sa ayeholo we huli bapulusu ba buyatimba we mu kondaayi.

⁵⁹ Ka me ndeele we, we a upala huuna ve hwavele ufuta mukanu a we woosi te likuta laatsiitusu.»