Looma 3 - Musamu wu Mubwe

¹ Buuna, Muyudaayo mu ki lo hakulala baatu bakima? Buve, kaluha a ketili ni hima?

² Eye! Kaluha yili hwa yo yinene. Mu toni ati, hati a tsomi, ni huli Bayudaayo Nzambi haviidi mambu ma nde.

³ Mu mbuli, tso Bayudaayo bakima baabisi usa imiinu. Pelili a bo imiinu, utwala ufwinzala butsiitsa bwa Nzambi?

⁴ Ubila ve! Bisu laafwana uyaaba ti Nzambi li mbuli, na baatu boosi bali bapfuti, we bu ma baasonehe mali mu uleele ti: «Baatu baafwana utsikaha ti mu tangu yi we li mu utoyo, we li mu uleele Na tso batsundisi we, we afwana ubiinga.»

⁵ Ka tso bubi bu bisu libaasa, buli mu umwese ti mbuli Nzambi li tsiitsa, buni luutwala uleele? Ti Nzambi a hali tsiitsa ve, ŋa nde ali mu unyangumasa kesi a nde ŋa yulu a bisu — Tso me ndi mu undeele buuna, maana ni matsimi ma me ma imuutu —

⁶ Naana! Tso nde a hali tsiitsa ve, buni nde huutsundasa baatu ba tsi?

⁷ Ka tso mapfuta ma me mali mu umwese pa yalala imbuli hya Nzambi mu muyusu a nde, muhima buubwetsundasa me we musumihi?

⁸ Mu hima luuveleleele ti: «lisaani mamabi, mana mo makituha mamabwe?» Baatu bakima mu utoyo bubi mu bisu, bali mu uleele ti maana mambu ma me. Baatu mobaana bahwama na tsyembili.

Mutsiitsa tso mumosi ndeve

⁹ Ka hima? Be bisu Bayudaayo, bisu laakulala bakima? Naana! Bisu laamiimwese ti baatu boosi, Bayudaayo na ba baavele Bayudaayo, bali hutso lituma li masumu.

¹⁰ Ma baasonehe ma Ngidi mali mu uyaabisa bunuubu: «A huli na muutu wu akuha ve, tso mumosi ve,

¹¹ a huli na muutu tso mumosi wu li iyedi ve, a huli na tso mumosi wu li mu usaha Nzambi ve.

¹² Boosi baamiidunga, mu itwadi bo baaka na mbiili yi yaafulala bubi, a huli na tso mumosi wu ubaasa lilibwe ve, a bali ve, tso mumosi ve!

¹³ Mivodi mya bo myaka we ngila ya bwasi, limi la bo libaasoho, myangala mya pili mibaapala mu bibodu bya bo.

¹⁴ Minywa mya bo myaluula mu mambu ma tsingiili na ma kali.

¹⁵ Miilu mya bo myaleenge mu utsolese makila.

¹⁶ Bo bali mu utsala na usiisa mapasi kadi tsyelo yi bo bali mu uvyoho.

¹⁷ Bo a baayabi nzila a hyenze ve.

¹⁸ Bo a bubaakiinza Nzambi ve.»

¹⁹ Ka bisu liyabi ti, mambu moosi ma mali mu Mikele mya Nzambi, mubaasiingama huli ba Nzambi haviidi Mikele mya nde. Mana minywa myosi mikangama, na bayaaba ti baatu ba toto yoosi, bali na toni ŋa busu bwa Nzambi.

²⁰ Ka muutu tso mumosi utwala uba wu akuha ŋa busu bwa Nzambi ve, bu nde huvanga moosi ma Mikele mili mu utuma. Mu toni ati, nzaabili masumu ubaaya mu nzila mavanga ma Mikele.

Imiinu mu Yisu Kristo hibaakuhasa muutu

²¹ Ka bunuubu, Nzambi amiimwese buni nde ubaakuhasa bisu ŋa busu bwa nde, hwavele usalila Mikele. Mabuuku ma Mikele na ma mimbihuli, maasilisi lo mu.

²² Nzambi ubaakuhasa baatu, mu nzila yi imiinu mu Yisu Kristo. Nde ali mu uvanga buuna, mu boosi ba butsiitsa mu nde. Mu toni ati, lisobosono love ŋa hati la bo:

²³ boosi baamiisa masumu na baamiivinda ukoto mu muyusu a Nzambi.

²⁴ Ka mu bungodu, Nzambi amiikuhasa bo mu hyese hya nde, mu likumbasa li liyobolo li lili mu Kristo Yisu.

²⁵ Ni nde Nzambi hayehuli we bungodu, mu ufwinzala mu makila ma nde, masumu ma boosi ba bubaasiila nde imiinu. Nzambi havangi buuna, mu umwese butsiitsa bwa nde, mu toni ati, mu tangu a tsomi, nde a hasyembi baatu mu masumu ma bo ve.

²⁶ Mu mukami a nde, Nzambi tondi umwese butsiitsa bwa nde mu tangu moyiniyi, mana nde aba wa tsiitsa na ukuhasa pasi muutu wu amiisiila Yisu imiinu.

²⁷ Toni mabyoho ma bisu ka kiyo? Naana! Yove tso mosi! Bisu libaaleele buuna mu ki toni? Mu toni ati hya tsoongo, ni uvelebweba hutsina lituma li mavanga ma Mikele, ka mu usa imiinu.

²⁸ Mu mbuli, Nzambi ubaakuhasa muutu mu toni imiinu hya nde, ka a mu mavanga ma Mikele ve.

²⁹ Buve, Nzambi ndulu Nzambi Bayudaayo ali? Nde a hali kaka Nzambi bangoyi ve? Eye! Nde li kaka Nzambi bangoyi,

³⁰ mu toni ati, Nzambi ndulu mosi ali! Ni nde ukuhasa ba baakete mu imiinu, na ba baavelekete mu imiinu.

³¹ Ka buuna butondi uleele ti bisu ka tsoongo Mikele luufwinzala mu ukiisa imiinu? Naana! Ka bisu Mikele lili mu usilasa.