Looma 2 - Musamu wu Mubwe

Tsundusu butsiitsa ya Nzambi

¹ Ni mu buuna, pasi wu we li, we wu ubaatsundasa bana, we utwala uleele ve ti we ayaabi ve. Bu we ubaatsundasa bana, we li mu usyembe we mwakulu. Mu toni ati, we wu ubaatsundasa bana, we kaka ubaavanga mamabi we bo.

² Bisu liyabi ti Nzambi ubaatsundasa mu imbuli hyosi, baatu ba bubaavanga ma pila yiina.

³ We wu li mu utsundasa ba bubaavanga mamabi, ka we li mu uvanga bumosi we bo! Mu we ti we upeke tsundusu a Nzambi?

⁴ Buve, we bubwe bu bunene bwa Nzambi ubaapenye, mu mukami a nde na bunene bu mutima a nde? We a hayabi ve ti bubwe bwa Nzambi buli mu ubita we hu usobo mbiili?

⁵ Ka mu toni a kamini mutima a we, we a hasobo mbiili ve. Buuna, we li mu ukuukaha ŋa yulu a we mwakulu kesi yinene, mu ilumbu hi Nzambi humwese kesi a nde, na tsundusu a nde ya tsiitsa.

⁶ Ilumbu mohiina, Nzambi usyende muutu muutu we bu huli mavanga ma nde.

⁷ Nzambi uva monyi wu bilima na bilima huli ba bali na mukonono wu ubaavanga mambu mamabwe. Bo bali mu usaha muyusu, likiinzu na idiingu hi hyuvelekwa.

⁸ Ka Nzambi umwese kesi na ifwefwe hya nde, huli boosi ba bubaatunala nde na ba bubaasiila nde kene. Mbiili moyiina, yibaatelemene imbuli na yibaasingasala mavanga mamabi.

⁹ Mapasi na minyongi byubwila boosi ba bubaasalila bubi. Hati a tsomi Bayudaayo, titswene ba baavele Bayudaayo!

¹⁰ Ka Nzambi uva muyusu, likiinzu na hyenze huli pasi nde wu ubaasalila mavanga mamabwe. Hati a tsomi Bayudaayo, titswene ba baavele Bayudaayo!

¹¹ Mu toni ati, Nzambi a hubaasa burandu mu baatu ve.

¹² Boosi ba bubaasumaha hwavele uyaaba Mikele mya Moose, buunyambana tso bu baaveleyaaba Mikele momiina. Ka boosi ba bayaabi Mikele na bubaasumaha, buutsundasa bo mu Mikele momiina.

¹³ Ni mu buuna, a ba bali mu uyuha Mikele bali ba baakuha ŋa busu bwa Nzambi ve, ka ni ba bali mu usalila myo, buuba ba baakuha.

¹⁴ Ŋa Bangoyi ba baaveleyaba Mikele mya Nzambi, bubaasalila myo mu bo mwakulu, bo boosi we ba bali na myo hutso mitima mya bo, tso bu bo baaveleyaba myo.

¹⁵ Mu mbiili a bo yiina, bo bali mu umwese ti mavanga ma Mikele mili mu utuma, baasonehe mutso mitima mya bo. Tsikihili a bo yi misamu, yili mu uta imbangi. Ni bumosi kaka, matsimi ma mitima mya bo, mubaakese bo, buve mubaavolele bo milembe.

¹⁶ Maana ni ma mu umonehele, ilumbu hi Nzambi huutsundasa matswehi ma pasi muutu, mu nduhi a Yisu Kristo, we bu Musamu wu Mubwe wu me ndi mu unzaabisa ali mu umwese.

Mbiili Bayudaayo ŋa busu bu Mikele

¹⁷ Ka we wu li mu ubula mabyoho ti we Muyudaayo, we li mu usiingama mu Mikele na we li mu unyeme ti Nzambi, Nzambi a we.

¹⁸ We yaabi litondo la Nzambi, na Mikele mili mu ulongese we mu usoolo mamabwe ma muutu huutwala uvanga.

¹⁹ We li mu umonehele ti, we ni mubiti binzimana wu li mu ulaha bo nzila. We li mu umonehele ti, we ni liyalala la ba bali mu piipidi.

²⁰ We li mu umonehele ti, we mulongisi a ba baavele na nzabili, muyihisi bibabana. Eye, we li na hiitu ti hutso Mikele, we ubaha nzaabili na imbuli!

²¹ Ni mu buuna, we wu li mu ulongese bakima, muhima we avelelongese we mwakulu? We wu li mu uyaabisa bana ti uyiba ve, muhima we li mu uyiba?

²² We wu li mu uleele ti mayamba usa ve, muhima we li mu usa mayamba? We wu li mu ubelele bifwita, muhima we li mu uyiba bisiha bi bili mu manzo ma nzambi ma bifwita?

²³ We wu li mu ubinuha ti we na Mikele mya Moose, we li mu umwese Nzambi tsogni mu toni ati, we li mu uvanga ma maasoboono na ma Mikele mili mu utuma!

²⁴ Ni mu buuna, ma baasonehe mali mu uleele: «Ni mu toni a benu Bayudaayo, bangoyi bali mu ukwede nduhi a Nzambi.»

Ketili ya mbuli

²⁵ Mu mbuli, ketili yili na tsongo mu we, tso we li mu usalila Mikele. Ka tso we li mu utsoopolo Mikele, hu li mu umwese ti we kini a baakete ve.

²⁶ Tso muutu wu baavelekete li mu usalila Mikele mya Nzambi, Nzambi utwala usiinga nde we muutu wu baamiikete ve?

²⁷ Muutu wu baavelekete mu musunya, ka ubaasiingala Mikele, utsundasa we, we wu li mu usumana Mikele, tso bu we ayaaba Mikele mibaasonehe tso bu we li wu baakete.

²⁸ Ni mu buuna, Muyudaayo wa mbuli, a ni wu ubaamonehele ŋa miisu ma baatu ti nde Muyudaayo ve, na wu li na iliimbu hya ketili mu musunya a nde.

²⁹ Ka Muyudaayo wa mbuli ni wu li wa mu tswehi, wu baakete hutso mutima, mu ketili yi Livupu la Nzambi, kini a yi baasonehe mu Mikele ve. Muyudaayo wa mbuli, ni nde wuuna wu ubaayaka muyusu wu ubaamata huli Nzambi, ka a huli baatu ve.