Looma 16 - Musamu wu Mubwe

Mabwehe

¹ Me pondi huli benu mu uyaka kedi a bisu Febe, wu li mutumi libundu la Sankereya.

² Yakaani nde mu Yisu, Pfumu a bisu, we bu hwafwana mu uyaka bangidi. Kumbasaani nde mu pasi dyambu li nde huba na nzala a benu. Mu toni ati nde akumbasa babalahi, homo me mwakulu.

³ Bilaani Pirisiye na Akilasi, batsyengi ba me ba isalu mu Yisu Kristo.

⁴ Bo baasyeti mivuumu mya bo mu ufuuhasa me. Me a handi siha mu ufutala bo matondo ve. Mabundu moosi ma ba baavele Bayudaayo kaka, mali mu usilasa bo.

⁵ Bilaani kaka libundu li libaatsonzomo mu nzo a bo. Bilaani kaka Epayineti, mbahi a me wu litondo, nde li wa tsomi mu usa imiinu mu Kristo mu itanzi hya Asiya.

⁶ Bilaani Mariya, wu amoni pasi yindahi mu benu.

⁷ Bilaani Andronikusi na Yunyasi, ikuta hya me, bo ba baaba na me mu kondaayi. Bu baasilasa bo ŋa hati li bilumbi, na bo baatswamini me uyaka Kristo.

⁸ Bilaani Amplyatusi, mbahi a me wu afulala litondo mu Pfumu.

⁹ Bilaani Uribani, tsyengi a bisu wu isalu mu Kristo, na Sitakyusi, wa me wu litondo.

¹⁰ Bilaani Apelisi wu amwesi me imbuli hi imiinu hya nde mu Kristo. Bilaani ba bali mu nzo a Aristobule.

¹¹ Bilaani Erodyoni, ikuta hya me. Bilaani ba mu nzo a Narasise ba bubaasa imiinu mu Pfumu.

¹² Bilaani Tirifene na Tirifosi, bakaasu ba bali mu usala mu toni a Pfumu, na wa me wu litondo, Pereside wu asiidi isalu hi inene mu nduhi a Pfumu.

¹³ Bilaani Rufusi wu Pfumu hasooli, na ngu a nde, wu li kaka ngu a me.

¹⁴ Bilaani Asinikrite, Felegoni na Heremesi, Patorobasi, Heremasi na baana ba ngu ba bali na bo.

¹⁵ Bilaani Filologi, na Yulya, Nere na kedi a nde, na Olipasi na bangidi boosi ba bali na bo.

¹⁶ Bilasanaani mu pivili a tama yi bungidi. Mabundu ma Kristo moosi mabili benu.

Kuminini ya tsyelele

¹⁷ Me ndi mu upondo huli benu baana ba ngu, kebaani mu ba bali mu ubehe burandu husto libundu, na ba bali mu udungasa banga imiinu mu utuna ndongisili yi benu laayaka. Tahuhaani na bo,

¹⁸ mu toni ati baatu ba pila moyiina, a bali mu usalila Kristo Pfumu a bisu ve, ka mapeyu ma bo mwakulu. Na humbisa mikuma mya bo mi mibwe, na bileedi bya soho, bo bali mu upfuta ba baavele na tsikihili.

¹⁹ Ka uto ti benu, boosi bayaabi lisiingala la benu mu Pfumu. Me ndi mu kinya mu benu. Ka me tondi ti benu liba banga a tsiki mu uvanga ma mabwe, na uba ba baatsyeme mu mitima mu ubata ma mabi.

²⁰ Nzambi wu ubaava hyenze a hutaamba mu unyihula Satana hutsina matambi ma benu ve. Nyaha hyese hya Pfumu a bisu Yisu Kristo hiba na benu.

²¹ Timoteho, tsyengi a me mu isalu mu Kristo li mu uva benu mabwehe. Ni bumosi, Lusyusi, Yasoni na Sozipatere, bikuta bya me, batsindihi benu mabwehe.

²² Me Terityusi wu li dingisi mu usonehele benu muhanda mo wunuwu, me ndi mu utsindaha mabwehe ma me mu Pfumu wu li mu upfuuta bisu a benu.

²³ Ngayusi wu miiyaka me mu nzo a nde, viidi benu mabwehe. Ni huli nde libundu loosi libaakuukama. Erasite, iswehe mbongo hi musyenge, na mwana a ngu Karitusi baviidi mabwehe.

²⁴ Nyaha hyese hya Pfumu a bisu Yisu Kristo hiba na benu boosi! Ameni!

Muyusu a tsyelele

²⁵ Liyusaani Nzambi! Nde li na matwala ma uhwadisa benu mu imiinu, we bu hu li Musamu wu Mubwe wu me ndi mu undongese na wu li mu usangula Yisu Kristo, na we bu hu li nzabisili yi Nzambi hamiisa mu lahi la nde li liyobolo, we bu hu li nzabisili yi Nzambi haswehe umata beleve.

²⁶ Bunuubu, lahi mo li liyobolo limiimonehele pa yalala, mu nzila mabuuku ma mimbihuli we bu hu li tumili a Nzambi wu avele na tsukusu, lahi mo laamiimonehele mu mabuli makima ma toto yoosi, mana mo masiila nde imiinu na masiingala nde.

²⁷ Muyusu aba hu li Nzambi, wu li siha nga tsiki, mu Yisu Kristo, mu bilima na bilima! Ameni!