Looma 15 - Musamu wu Mubwe

Kwadisili a baana ba ngu mu imiinu

¹ Bisu ba laahwada mu imiinu, laafwana ukumbasa ba baakolo. A lisaha mu ukuhasa mapeyu ma bisu mwakulu ve.

² Nyaha pasi muutu mu bisu a benu asaha hi hyumwese munawe kinya mu libwe la nde, mana nde akula mu imiinu.

³ Eye, Kristo a hasahi libwe la nde mwakulu ve. Ka we bu ma Baasonehe ma Ngidi mali mu uleele: «Bituhi bi baakatuha we, byayaabwa ŋa yulu a me.»

⁴ Moosi ma mali mutso a ma Baasonehe ma Ngidi tsikulu, baasonihi mo mu uva bisu nzabiili. Mana bisu libaha hiitu mu mukami na kwadiili bi mo mali mu uva bisu.

⁵ Nyaha Nzambi wu li mu uva bisu mukami, na kwadisili, ava benu bunyanga mu ubaaba likoongo we bu huli tumili a Yisu Kristo.

⁶ Buna, boosi itwadi, mu ndaha mosi, yuusaani Nzambi, wu li Taata a Pfumu a bisu Yisu Kristo.

Kristo musalili a boosi

⁷ Mu ukuka, baayakasanaani we bu Kristo haayaki benu, mana baatu bayusa Nzambi.

⁸ Ka li me ndi mu utsilasa ni liniili: hati a tsomi, Kristo ayidi mu usalila Bayudaayo mu usilasa ti Nzambi li mu uleele mbuli. Ni mu liina, nde hakuhisi malahi ma Nzambi asiidi huli bakaaha ba bo.

⁹ Ni bumosi kaka, ba baavele Bayudaayo, bali mu uyusa Nzambi mu bubwe bwa nde, we bu ma Baasonehe ma Ngidi mali mu uleele: «Ni mu buuna, me tsa pa we muyusu ŋa hati li bibandu bikima bya ŋa toto, na me tsa nzimba mu toni muyusu a nduhi a we.»

¹⁰ Ma Baasonehe ma Ngidi mali mu ubweleele: «Benu bibandu bi matsi moosi, baani mu kinya na ibandu hya Pfumu!»

¹¹ Mali mu ubweleele bunuubu: «Yusaani Pfumu, benu matsi moosi, yimbaani nyimbu yi muyusu a nde, benu bibandu byosi!»

¹² Mumbihuli Esaya kaka li mu uleele: «Imbisa hya Yese hyuya, nde uteleme mu utuma bibandu bikima, matsi moosi sa masiila nde hiitu».

¹³ Nyaha Nzambi wu ubaava hiitu, aluusa benu mu kinya na mu hyenze bi byakuha mu imiinu hya benu mu nde. Mana benu liluula mu hiitu hi matwala ma Livupu la Ngidi.

Isalu hya Pahuli huli ba baavele Bayudaayo

¹⁴ Baana ba ngu, me ndodi lo, mitima mya benu myaluula mu matsimi mamabwe, na mu nzabiili yi yaayelemene. Na benu laaka mu iteesi hi uvasasana mandongi.

¹⁵ Ka me miitsonehele benu na mwana wasa, hutso mihanda mu mambuha mamalahi, mu uyibwala benu monyi, mu ma benu laamiikwayaba. Me atsonehe buuna, mu toni a hyese hi Nzambi hava me,

¹⁶ mu uba musalili a Yisu Kristo huli ba baavele Bayudaayo. Me ndi mu utsa isalu hya nganga a Nzambi, hi uyabisa Musamu wu Mubwe a Nzambi, mana ba baavele Bayudaayo bakituha bungodu bu bubwe, bu Nzambi husilasa, bu baamiisyeme mu matwala ma Livupu la Ngidi.

¹⁷ Ni mu buuna, mu itwadi na Yisu Kristo, me ndi na nyeme mu toni isalu hya me mu Nzambi.

¹⁸ Ka tso me utwala undeele dyambu, ndulu ni mu li Kristo hasalila mu me, mu ubehe ba baavele Bayudaayo mu usiingala Nzambi. Nde hakuhasa lo, mu mambu ma maapala mu munywa a me na mu mavanga ma me,

¹⁹ mu matwala ma biliimbu bya kimwili, na bipadi, mu matwala ma Livupu la Nzambi. Mono buni me anzaabisi we bu hwafwana Musamu wu Mubwe wa Kristo, mu ubaayene matsyelo moosi, umata musyenge a Yeruselemi nate hu itanzi hya Iliriya.

²⁰ Ka me na muyusu mu uyaabisa Musamu wu Mubwe, ndulu mu mambuha ma baatu bakini a baayuhi Tsangu a Kristo ve. Mu toni uveletunga ŋa yulu ibene hi mukima hatunga.

²¹ Me apaanga we bu ma Baasonehe ma Ngidi mali mu uleele: «Huli ba baaveliyaabisa lo, sa bamono nde, na ba baaveliyuha lo, sa batsikaha.»

Makani ma midyenge mya Pahuli

²² Yiina ni toni yi yaasiidi ti me pelenza tangu yoosi huli benu.

²³ Ka bunuubu, me miitsukasa isalu hya me mu bitanzi mobiniibi. Umata bilima bibilahi, me na nzala yindahi mu uyamono benu

²⁴ na me tondi usa buuna ŋa me unzyene hu Esipanye. Mu toni ati, me na hiitu hi umono benu ŋa me upyoho na uyaka likumbasa la benu mu mudyenge mu tsi moyiina, humbisa utsahala na benu mu mwa bilumbu.

²⁵ Ka mu tangu moyiniiyi, me ndi mu unzyene hu Yeruselemi mu uyakuhasa isalu hya ba libundu ba bali huuna.

²⁶ Eye, mabundu ma Masedonya na ma Akayi, maakese mu ukukaha bungodu bwa bo, bu ukumbasa ba nga puumbu ba libundu la Yeruselemi.

²⁷ Bo mwakulu baakese buuna. Ka tso lisinzitsikaha, huli bo beedi aka we mukanu. Mu toni ati tso Bayudaayo ba libundu bali mu uva labo kabu li busina bu livupu, huli ba baavele Bayudaayo ba libundu, bo kaka bafwana ukuumbasa Bayudaayo ba libundu mu bi bo bali na byo nzala.

²⁸ Ŋa me umana isalu mohiina, na ŋa me upa bo pahu moyiina, me tsa nzyene hu Esipanye na me tsa pyohele huli benu.

²⁹ Na me nzabi ti ŋa me unziila benu, ni na lisyeme la Kristo li lafulala me unza.

³⁰ Me ndi mu upondo benu liniili baana ba ngu, mu toni a Yisu Kristo na mu toni litondo li Livupu libaava: lwanaani itwadi na me mu uvondele me hyese huli Nzambi mu masambulu ma benu.

³¹ Sambilaani mana me pelembwa ŋa myoho mya ba baavelesa imiinu ba hu itanzi hya Yude, na mana libundu li musyenge a Yeruselemi liyaka likumbasa li me ndi mu umbitala bo, mu mutima mumosi.

³² Buuna, tso Nzambi tondi, me tsa nza huli benu na kinya yindahi mu mutima. Na me tsa polo mwana tangu mu uvuuma na benu.

³³ Nyaha Nzambi wu ubaava hyenze, aba na benu boosi. Ameni!