Looma 12 - Musamu wu Mubwe

Uyuusa we bu hwafwana

¹ Baana ba ngu, mu toni ati Nzambi amiimwese bubwe bwa nde mu bisu, me ndi mu upondo huli benu, mu uyeholo nde nyutu a benu we bungondu bwa monyi, bwa ngidi, bu Nzambi husilasa. Buuna, benu sa liyusa Nzambi we bu hwafwana.

² A liduukala bipfu bya baatu ba tsi moyiniyi ve. Ka nyahaani Nzambi akitusa benu na uva benu buyedi bubunyatihi. Na benu sa litsikaha litondo la Nzambi: ma mabwe, ma nde hatondo, na ma masupahana.

Udyata mu litondo itwadi na Kristo

³ Mu toni bungodu bu Nzambi hava me mu bubwe bwa nde, me ndi mu upondo huli pasi nde mu benu, mu uveletsima ti nde alutaala bana. Ka nyaha pasi muutu mu benu aba we bu huli iteesi hya kabu li imiinu hi Nzambi hava nde.

⁴ Buuna, mu nyutu ndulu mosi, bisu lili na binama bibilahi. Ka pasi inama na isalu hya hyo.

⁵ Bumosi kaka, tso lili ba balahi, bisu a benu lili nyutu ndulu mosi itwadi na Kristo, na lili itwadi bana na bana we binama bya nyutu ndulu mosi.

⁶ Ka bisu a benu lili na bungodu bu bwasoboono we bu hu li hyese hi Nzambi akabila muutu muutu: Tso mumosi mu bisu a benu li na bungodu bu ubihula, nyaha nde abaasalila bwo we bu hu li imiinu.

⁷ Tso mukima li na bungodu bu usalila bana, nyaha abaasalila. Wu li na bungodu bu ulongese, nyaha abaalongese.

⁸ Wu li na bungodu bu uhwadisa bana mu mavanga ma mabwe, nyaha abaahwadisa bo. Wu li na bungodu bu ukaba, nyaha abaasalila bwo mu mutima wu mubwe. Wu li mu utuma, nyaha abaatuma na lehemene loosi. Wu li mu ukumbasa nga puumbu, nyaha abaakumbasa na kinya.

⁹ Nyaha litondo liba li laavele muwala. Belelaani bubi, kangamaani mu mamabwe.

¹⁰ Luulaani mu litondo bana mu bana, we binama bya buli limosi; Baani batsomi mu ukinza bana.

¹¹ Baani na lehemene mu isalu, ka a liba babolo ve. Salilaani Pfumu mu mutima a benu woosi.

¹² Baani na kinya mu toni a hiitu hya benu. Baani na mukami mu tangu a pasi, baasambilaani na mukonono.

¹³ Baakumbasaani baana ba ngu ba bali na nzala likumbasa, na baayakaani bubwe tangu yoosi, ba bali mu uya mu manzo ma benu.

¹⁴ Vondelaani ba bali mu utsuta benu lisyeme la Nzambi. Vondelaani bo lisyeme, ka a livondo nde mu usinga bo ve.

¹⁵ Baani mu kinya na baatu ba bali mu kinya, na lilaani na ba bali mu ulila.

¹⁶ Baani mu hyenze ŋa hati la benu. A liba na peyu mu bi byasyenoho ve, ka baasahaani bi byavelemonehele ŋa miisu ma baatu. A limonehele we bangeele benu mwakulu ve.

¹⁷ A lifutala ma mabi mu ma mabi ve, ka hwadaani mu ubaasa ma mabwe ŋa busu bwa baatu boosi.

¹⁸ Tso benu litwali ukuhasa buuna, mu iteesi hi hyahwama na benu, baani mu hyenze na baatu boosi.

¹⁹ Bambaahi ba litondo, a lifutala piinga huli ba bubaavangila benu bubi ve, ka nyahaani Nzambi amwese kesi a nde. Mu toni ati baasonehe bunuubu: «Me ni wu ufutala piinga, me ni wu ufutala huli pasi muutu we bu huli mavanga ma nde», bu leeli Pfumu.

²⁰ Na nde abweleele bunuubu: «Tso muboho a we li na nzala, va nde byudya. Tso nde li na peyu, va nde byunywa. Mu toni a ŋa we li mu usa buuna, we li mu ukuukaha nde makala ma mbahu ŋa yulu mutswe.»

²¹ A nyaha bubi bubingala we ve, ka nyaha we biingala bubi mu libwe.