Looma 11 - Musamu wu Mubwe

¹ Ni mu buuna, me ndi mu upfuula: Nzambi baatu ba nde hanyasula? Naana, ubila ve! Me mwakulu muutu hu Isereli me ndi, wu imbisa hya Abrahami, wa buli la Benyamini?

² Nzambi a hanyasula baatu ba nde hamiitswamina uyaaba ve. Yibwalaani monyi mu ma baasonehe ma Ngidi, ma mali mu ngu musamu wu mumbihuli Eliya ali mu unyongele Isereli ŋa busu bwa Nzambi:

³ «Pfumu, bo bamiiduba mimbihuli mya we, bamiitsala madiiku ma we ma bungodu. Na me amiitsaala siha vii. Na bo baaka mu usaha umaasa muvumu a me.»

⁴ Ka mono mvutu yi Nzambi haviidi nde: «Me amaasili me mwakulu biveeve tsambu (7000) bi babahala ba baavelikongemene ŋa busu bwa nzambi a Baale.»

⁵ Ni bumosi kaka mu tangu a loloyi, hwasaala mwa litangu la baatu ba Nzambi hasoolo mu hyese hya nde.

⁶ Nde hasoolo bo mu hyese hya nde, ka a mu toni mavanga ma bo ve. Tso a buuna ve, hyese hya Nzambi a hisaali hyese ve.

⁷ Ka hima? Baatu ba Isereli a baabaha hi bo baakasaha ve. Ka ndulu ba nde hasoolo baayaki hi bo baakasaha. Ka uto ti bakima, baamiikondosono bo utsikaha,

⁸ we bu huli ma baasonehe: «Nzambi aviidi bo livupu li butsuudu, nde adibuhi bo miisu mana bavelemono, na matswi mana baveleyuha nate loloyi.»

⁹ Mutumi Davidi kaka li mu uleele bunuubu: «Nyaha mikuungi mya bo mi udya mikituha mweto huli bo, siinga, baku, nzila yi uyaka tsyembili yi yayelemene mu bo.

¹⁰ Nyaha miisu mya bo miba piipidi, mu iteesi hyubwevelemono. Hodemese bo mungoongo hwanzyeni».

¹¹ Ni mu buuna, me ndi mu upfuula: ŋa bisu Isereli baakubi baku, bo nzyeni baabwidi? Peleve naana! Ka mu toni a mbwili a bo mu mamabi, bangoyi baayaki liyobolo, mana bisu Isereli bamono nyengi.

¹² Na tso mbwili Bayudaayo mu mamabi yaabeedi dyambu lilibwe li linene mu toto yoosi, na ubwa hwa bo hwaviidi busina bu livupu huli bangoyi, ki pila bunene bwa dyambu li libwe luuba mu pfutihili a bo yi yakuha hu liyobolo!

¹³ Me ndeele huli benu ba laavele Bayudaayo: Me wu ndi ilumbi hya ba baavele Bayudaayo, me ndi mu unzuusa isalu hya me,

¹⁴ mana tso me twali, me tsimbalala nyengi a baatu ba me, mana bakima ŋa hati la bo bayoboho.

¹⁵ Mu toni ati, tso uvengolo hu Bayudaayo hwaba ni unongese hwa tsi na Nzambi, buni huuba mu tangu yi buubweyaka bo? Sa huba pfutihili a lipfu hu monyi.

Miti myole mya olive

¹⁶ Tso kabu la tsomi li lipa bali mu uva huli Nzambi, kabu lina li limiisaala lili kaka la nde. Tso manganzi ma muti baviidi huli Nzambi, bitabi kaka bili bya nde.

¹⁷ Isereli hili we muti a olive wu Nzambi amiikese bitabi bikima. Ŋa mbuha a byo, baamiikatisa we, we wu avele Muyudaayo. Baamiikatisa we, we itabi hi muti a olive wa piinda. Bunuubu, we ka mu ubahila mu malimbu ma mali mu ukuma mu linganzi li muti a olive.

¹⁸ Ni mu buuna, we a harokolo bitabi bi baakese. Buni we utwala usyenolo mapapanga? A ni we ubaahwadisa linganzi ve, ka ni linganzi libaahwadisa we.

¹⁹ We sa leele me: «Baakesi bitabi mobiina, mu unamiha me ŋa mbuha a byo.»

²⁰ Ni buuna hwa nde. Baakesi byo, mu toni a pelili imiinu hya byo. Na baanamiha we, mu toni imiinu hya we. Ka a hasa nyeme! Homo ba na boomo!

²¹ Ka tso Nzambi avengolo Bayudaayo ba bali bitabi bi muti a mbuli, kele hwa we! We wu li itabi hi banamiha, mana nde a havengolo we kaka.

²² Ni mu buuna, tsikaha bubwe bwa Nzambi na bunono bwa nde: nde li mu umwese bunono bwa nde huli ba baamiibwa, na bubwe bwa nde mu we, tso we kwilili mu bubwe mobuuna. Tso a buuna ve, sa bakese we kaka we bitabi bikima.

²³ Ka tso Bayudaayo bayafutaha na basiidi imiinu, Nzambi sa abwekatisa bo kaka ŋa mbuha yi bo baabeedi tsomi. Buuna Nzambi na matwala ma ubwekatisa bo.

²⁴ Ni mu buuna, we itabi hi muti a olive wa mu piinda, Nzambi akesi we na akatisi we mu muti a Olive wu baakuna, na wu li na lisobosono na muti wu baamaasi we. Ka uto ti Bayudaayo, bo bali bitabi bya mbuli bi muti a Olive wa mbuli: Ni mu buuna, Nzambi ubwekatisa bo mu muti wu bo baabeedi tsomi.

Liyobolo li Isereli

²⁵ Baana ba ngu, me tondi ti benu liyaaba matswehi ma Nzambi momanima, mana benu a libaamonehele we bangeele: kabu limosi la baatu ba Isereli sa likwilala hutso a dungili, nate bu boosi ba bali bangoyi buuyaka liyobolo.

²⁶ Ni buuna, buli li Isereli loosi luuyoboho, we bu ma Baasonehe ma Ngidi mali mu uleele: «Muyobili sa amata hu isyelo hya Syoni, nde umaasa bubi bu imbisa hya Yakobi.

²⁷ Liina ni lahi la me li me utsa na bo, ŋa me umaasa masumu ma bo.»

²⁸ Tso limoni ubisa hwa bo hu Musamu wu Mubwe, bo baaka bambene ba Nzambi mu libwe la benu. Ka tso litelimi ŋa busu bwa tsolili a Nzambi, nde kini mu utondo bo, mu toni bakaaha ba bo.

²⁹ Ka Nzambi a hubaapatula hi nde hamiikwava ve. Na nde a hubaasobo matsimi ŋa busu bwa ba nde hamiiteele ve.

³⁰ Mu tangu a tsomi, benu laabisili Nzambi. Ka bunuubu, Nzambi amiikwila benu lingebe, mu toni ati Bayudaayo baabisili nde.

³¹ Ni bumosi kaka, kene a bo mu tangu moyiniyi yili mu usa ti benu liyaka kwili lingebe ya Nzambi, na mana bo kaka bayaka kwili lingebe moyiina.

³² Mu toni ati, Nzambi amiikangimasa baatu boosi hutso a kene, mana nde amwese kwili lingebe a nde huli boosi.

³³ Ki pila bunene bu busina bwa Nzambi! Ki pila idongi hili mu nzabili na buyedi bwa nde! Na utwala ubindula maakesili ma nde? Na utwala utsikaha makani ma nde?

Nyimbu muyusu a bunene bwa Nzambi

³⁴ We bu ma Baasonehe ma Ngidi mali mu uleele: «Na ayaaba matsimi ma Pfumu? Na atwali uba muviidi a nde ndongi?

³⁵ Na atswamina uva nde isiha, mana nde wuuna, ayaka pfuta humbisa?»

³⁶ Byosi bibaamata huli Nzambi, mu nde, na byo bili bya nde. Nyaha muyusu aba huli Nzambi mu bilima na bilima! Amen!