Looma 10 - Musamu wu Mubwe

¹ Baana ba ngu, me ndi mu utsaha mu mutima a me woosi, na li me umbaapondo tangu yoosi mu masambulu ma me, ni ti bisu Isereli bayoboho.

² Na me umbaatiila bo imbangi mo hinihi: Bo bali na lehemene li linene mu Nzambi, ka lehemene la bo a laayaluha mu nzabili ve.

³ Ni mu buuna, bo a baatsikaha buni Nzambi ubaasa ti baatu baba ba butsiitsa ŋa busu bwa nde ve. Na bo ubaasaha ma bo mwakulu manzila ma uba butsiitsa. Ni buuna, bo a baasiingala nzila yi Nzambi hasalila mu ubita baatu mu uba ba butsiitsa ve.

⁴ Mu toni ati, Kristo ni kaluha Mikele mya Moose, mana boosi ba nga imiinu mu Yisu, baba ba butsiitsa ŋa busu bwa Nzambi.

Boosi ba buuteele Pfumu sa bayoboho

⁵ Moose asonihi bunuubu, mu toni butsiitsa bu bubaamata mu Mikele: «Muutu wu li mu usalila bu huli matumili ma Mikele, sa aba monyi mu mo.»

⁶ Ka mono buni butsiitsa bu bubaamata mu imiinu buli mu uleele: «A haleele hutso mutima a we: Na uvata hu yulu?» Mbindulili ni ti: mu usutasa Kristo.

⁷ A haleele kaka ve: «Na ukulamana nate hutso a mbeenge ya doheselee» (mbindulili ni ti: mu upalisa Kristo ŋa hati la babaakwa).

⁸ Nde buni ali mu uleele? Bunuubu: «dyambu labaambana na we, mu munywa na mu mutima a we» (mbindulili ni ti: liina ni dyambu li imiinu li bisu libaalongese).

⁹ Tso we li mu usilasa buuna mu munywa a we ŋa busu bwa boosi ti Yisu ni Pfumu, na tso we li mu usa imiinu mu mutima a we woosi ti Nzambi asuula nde ŋa hati la ba baakwa, we sa yoboho.

¹⁰ Mu toni ati, wu ubaasa imiinu mutso mutima a nde Nzambi ukitula nde wa tsiitsa. Wu ubaasilasa mu munywa a nde, Nzambi uyobolo nde.

¹¹ Ni mu buuna ma baasonehe ma Ngidi mali mu uleele: «Woosi wu ubaasa imiinu mu nde, a humono tsonyi ve.»

¹² A huli na lisobosono ŋa hati li Bayudaayo na ba baavele Bayudaayo ve: bo boosi Pfumu mumosi wu ubava busina bwa nde huli boosi ba bubaateele nde.

¹³ Mu toni ati, Mabaasonehe ma Ngidi mali mu uleele: «woosi wu uteele Pfumu mbila, sa ayoboho.»

¹⁴ Ka buni bo buuteele mbila huli wu bo baavelesa imiinu mu nde? Na buni bo buusa imiinu hwavele uyuha tsangu a nde? Na buni bo buuyuha tsangu a nde hwavele milongisi?

¹⁵ Buni milongisi myusoloho tso a batsindihi myo ve? We bu Mabaasonehe ma Ngidi mali mu uleele: «Miilu mya bo mili mi mibwe, bo baana ba bali mu uyaabisa misamu mi mibwe!»

¹⁶ Ka boosi a baasiingala Musamu wu Mubwe ve. Na mumbihuli Esaya atswamini ufuula: «Pfumu, na asa imiinu mu musamu wu bisu lili mu uyabisa?»

¹⁷ Ni mu buuna, imiinu ubaamata mu mambu ma bubaayuha, na mambu ma bubaayuha ubaamata mu mambu ma Kristo.

Nzambi a hanyasula baatu ba nde ve

¹⁸ Buuna me ndi mu upfuula: Bayudaayo a baayuhi musamu mo wuuna ve? Eye, bo baayuhi nde! Mu toni ati, Mabaasonehe ma Ngidi mali mu uleele: «Ndaha a bo yaayuhini mu toto yoosi, na mambu ma bo baalongisi, maamiito nate hu tsi yaasuka.»

¹⁹ Me ndi mu umbwepfuula: baatu ba Isereli kini a baatsikaha ve? Moose aba ni muutu wa tsomi mu ufutala mvutu: «Me utsa ti benu liba na likwabi mu ibandu hi bangooyi, huleeli Nzambi, me utsimbalala kesi a benu mu baatu ba baavele na buyedi.»

²⁰ Esaya aleeli na butuuta bwosi: «Me miitsoloho huli baatu ba baakavelesaha me, Me miimonehele huli baatu ba baakavelefuula me pasi dyambu.»

²¹ Ka uto ti mu bisu Isereli, nde aleeli: «Bilumbu byosi, me ndi mu unzala myoho mya me, mu uyaka baatu ba nga kene, na batumbihi.»