Looma 1 - Musamu wu Mubwe

Mabwehe

¹ Ni me Pahuli, musalili a Yisu Kristo, ndi mu utsonehele benu. Nzambi ateele me mu uba ilumbi, na nde asoolo me mu uyaabisa Musamu wu Mubwe.

² Nzambi asiidi lahi li Musamu wu Mubwe wunuwu, umata beleve. Mimbihuli mya nde myasonihi Musamu mo wuuna, mu mabuuku ma nde ma Ngidi.

³ Musamu wu Mubwe mowuuna, li mu utala Mwana a nde Yisu Kristo, wu baabuti mu bumuutu bwa nde, mu imbisa hya pfumu Davidi.

⁴ Mu Livupu la Ngidi, Nzambi asooli nde mu matwala ma nde ti nde li Mwana a Nzambi, bu hasuuli nde ŋa hati la babaakwa. Ni Yisu Kristo Pfumu a bisu.

⁵ Ni mu toni a Yisu, Nzambi haviidi me hyese hyuba ilumbi hya nde. Mu ubita baatu ba bibandu byosi, mana basiila nde imiinu na basiingala nde.

⁶ Benu kaka lili mu litangu la baatu mobaana, ba Yisu Kristo hateeli.

⁷ Me ndi mu utsonehele huli benu boosi ba lili hu Musyenge a Looma, benu ba Nzambi hatondo, ba nde hamiiteele mu uba bangidi. Nyaha Nzambi Taata, na Pfumu a bisu Yisu Kristo, bava benu hyese na hyenze.

Pahuli na ba libundu ba hu Looma

⁸ Hati a tsomi, me tondi ufutala matondo huli Nzambi mu benu boosi, mu nduhi a Yisu Kristo. Mu toni ati, bali mu utoyo mu imiinu hya benu mu toto yoosi.

⁹ Nzambi wu me ndi mu utsalila mu mutima a me woosi, mu uyabisa benu Musamu wu Mubwe wu li mu utala Mwana a nde, yabi ti me ndi mu undeele imbuli: Me a umbaakolo mu utangula benu ve.

¹⁰ Tangu yoosi yi me umbaatsambila, me ndi mu upondo huli Nzambi ti, tso liina ni litondo la nde, me kuhasa lahi li uyamono benu.

¹¹ Ka me na lehemene li uyamono benu, mana Nzambi ava benu bungodu bu Livupu la Ngidi, mu uhwadisa imiinu hya benu.

¹² Buuve, hufulili bubwe ti, me na lehemene li uba ŋa hati la benu, mana liyakaani kwadisili mu itwadi. Kwadisili a benu mu imiinu hya me, na kwadisili a me, mu imiinu hya benu.

¹³ Baana ba ngu, me tondi ti benu liyaaba ti, me umbaamba na matsimi ma uya huli benu. Ka nate bunuubu, me a hambaha nzila ve. Me na nzala ati isalu hya me hibuta mbutu huli benu kaka, we bu hyo hyabuta mbutu mu bibandu bikima.

¹⁴ Me ndi muutu wu afwana uyalongese huli baatu boosi: huli biyedi na huli ba baavele buyedi, huli ba baayiha na ba baaveleyiha muhanda.

¹⁵ Ni mu buuna, me ndi na lehemene li uyaabisa Musamu wu Mubwe huli benu kaka, ba lili hu Musyenge a Looma.

Matwala ma Musamu wu Mubwe

¹⁶ Me a handi na tsonyi mu uyaabisa Musamu wu Mubwe ve, mu toni ati, Musamu wu mubwe ni matwala ma Nzambi ali mu usalila, mu uyobolo pasi nde wu li mu usiila nde imiinu. Hati a tsomi mu Bayudaayo, titswene mu Bangeleke.

¹⁷ Ni mu buuna, Musamu wu Mubwe li mu umwese bunuubu: Nzambi ubaatsikaha butsiitsa bwa baatu, mu tangu yi bo bali mu usa hiitu mu nde, we bu baasonehe mu ma Ngidi: «Mutsiitsa uba monyi mu imiinu.»

Ba bubaanyanza Nzambi na Mikele mya nde

¹⁸ Umata hu yulu, Nzambi ubaamwese kesi a nde huli baatu ba bubaaveleyusa nde na ba bubaavanga mamabi. Bo bali mu upfubaha imbuli mu ngaabi a bo.

¹⁹ Ni mu buuna, mambu ma mbuli ma buutwala uyaaba mu Nzambi, mali ma maayaluha ŋa busu bwa bo: ni Nzambi nde mwakulu amwesi bo lo pa yalala.

²⁰ Mu toni ati, umata bu Nzambi havangi tsi, mbiili a nde yi yibaavelemonehele, yi yili matwala ma nde ma nzyeni, na bu nde ali, bibaamonehele mu mavanga ma nde. Ni mu buuna, bo utwala uleele ti bo a bayaabi ve.

²¹ Bo bayaabi Nzambi. Ka bo a bubaakinza nde ve, na bo a bubaayusa nde we bu hwafwana ve. Bo baamiidunga hutso matsimi ma maavele lisuunga, na mitima mya bo, mi myavele buyedi, myamiisohomo hutso a pipidi.

²² Bo bali mu ubinuha ti bo na buyedi, ka bo baamiiyama maladi.

²³ Ŋa mbuha uva muyusu huli Nzambi wu avelekwa, bo bubaakunda bifwita, bifwani bya baatu ba bubaakwa, banyunyi, banyama ba miilu mina, na banyama ba bubaayene mu bali.

²⁴ Ni mu buuna, Nzambi havahuli bo hutso a tsumihili, we bu huli linyungi li mitima mya bo, mana bo basumana nyutu a bo, bomo na bomo.

²⁵ Bo bubaasobo imbuli hya Nzambi mu mapfuta, bo bubaakunda na bubaasalila mavanga ma Nzambi ŋa mbuha Muvangi a tsi, wu baasyeme mu bilima na bilima. Ameni!

²⁶ Ni mu buuna, Nzambi hayeholo bo mu ubaavanga ma tsumihili. Bakadi ba bo, a bali mu ubwepfuuta taangi na balumi ba bo ve, buuna bo ubaapfuuta taangi aka bomo na bomo bakaasu.

²⁷ Bumosi kaka huli babahala, taangi upfuuta na bakadi ba bo ve. Bo bali mu upfuuta taangi bomo na bomo babahala, maana mavanga ma tsonyi. Na bo bali mu uyaka tsyembili yi yayelemene na udunga hwa bo.

²⁸ Bu bo baabisi uyaaba Nzambi, Nzambi atiimbi bo ŋa busu bu buyedi bwa bo bu bwadunga, na bo bali mu uvanga ma maavelefwaana.

²⁹ Bo baamiiluula mu vele li butsiitsa bwa pila mu pila, mu bubi, linyungi, bukanyi; bo baaluula mu nyengi, mu ndubili a baatu, mu midiingu, mu ubaavahula bana, mu mitsotso, mu dyele, mu mavanga ma tsumihili. Bo bubaakusa bana mu upfuta.

³⁰ Bo bubaakuta mapfuundu mu bana. Bo bali baboho ba Nzambi, banga lisabu, banga a ngaabi, banga nyeme. Bo baatondo ubaabuta mamabi, bo bubaakakana na bikuta bya bo.

³¹ Bo bali ba baavele na buyedi, bo a bubaakuhasa malahi ma bo ve, bo bali na mitima mi minono, lingebe mu bana ve.

³² Bo bayaabi we bu hwafwana, mukele butsiitsa wa Nzambi. Baatu ba bubaasalila buuna, baahwama na lipfu. Ka bo bali mu usupaha ubaavanga ma pila moyiina, na titswene, bo bali mu usilasa kaka bavangi ba mamabi.