Filiipo 4 - Musamu wu Mubwe

¹ Ni mu buuna, baana ba ngu ba litondo, me na lehemene li ubwemonono na benu! Benu lili kinya a me na mutata a me wa monyi. Benu ba lili bambahi ba me, kwilalaani ba baakangama mu Pfumu.

Mandongi ma tsyelele

² Evodi na Syntike, me ndi mu unzayana benu, mu uyuhasana na ukangama mu Pfumu.

³ We kaka mbahi a me wa tangu yoosi, me pondi we mu ukumbasa bakaasu baboole baniiba, ba baalwani na me mu mifudi mu uyabisa Musamu wu Mubwe. Me a handimbili Kelema na bambahi ba me bakima ve, ba manduhi ma bo basonehe mu Muhanda a Monyi.

⁴ Baani na kinya tangu yoosi mu Pfumu! Me pfutahala: baani na kinya!

⁵ Nyaha baatu boosi bamono bulembo bwa benu. Pfumu aka bebele.

⁶ A lihelene mitima mu pasi isiha ve. Ka mu mambu moosi, yabisaani mapondili ma benu huli Nzambi mu masambulu, mu manzayini, na mu pfutili matondo.

⁷ Na hyenze hya Nzambi, hi hyalutala buyedi bwosi, hyukeelese mitima mya benu na matsimi ma benu mu Kristo Yisu.

⁸ Baana ba ngu, mu umana, nyaha matsimi ma benu mabaakwilala tangu yoosi mu biina byosi bi bili bya mbuli, bi byahwama, bi byasungama, bi byatsyeme, bi bubaatondo, bi bubaasingasala, bi bibwe na bi byahwama mu muyusu.

⁹ Salilaani ndongisili yi benu laayihi na laayaki huli me, mu mambu ma me na mu mbiili a me. Na Nzambi a hyenze, uba na benu.

Pahuli miifutala matondo huli bisu Filiipo mu bungodu bwabo

¹⁰ Me amoni kinya yindahi mu Pfumu, mu toni ati litondo la benu mu me, laabwebuta mbutu yi nyatihi. Litondo moliina, benu laabeedi na lo, ka benu a laabahi nzila yi umwese me love.

¹¹ Me a handi mu undeele buuna mu toni manzala ma me ve. Mu mbuli, ka mu toni ati, me amiinziha uba mu kinya, tso mu hoole hu me ndi na hwo.

¹² Me nzaabi ubaaba hutso buyaha, na me nzaabi kaka ubaaba hutso busina. Me anzihi ubaaba na kinya, mu tangu yi me ndi na byudya bi byafwana, napa mu tangu yi me ndi na nzala, tso mu tangu a mvwadu, buve yi limbunga.

¹³ Me utwala ukunda mambu moosi, mu likumbasa la Kristo wu ubaahwadisa me.

¹⁴ Bunuubu, benu laavanga bubwe, mu ukumbasa me mu mapasi ma me.

¹⁵ We bu benu mwakulu liyabi, benu bisu Filiipo, mu tangu yi me ambaandihi ulongese Musamu wu Mubwe, ŋa me apali mu itanzi hya Masedonya, libundu tso limosi a laakumbisi me ve. Ndulu ni benu laakatsimala me, mu mapasi ma me na mu makinya ma me.

¹⁶ Ka tso ŋa me ambedi hu musyenge a Tesalonika, benu laatsindihi me likumbasa la mbongo tsindaha yoole, mu umana mapasi ma me.

¹⁷ Me a handi mu undeele buuna, mu ubwesaha uyaka bungodu ve. Hi me ndi mu utsaha ni ti, Nzambi asyeme benu mu bungodu bwa benu.

¹⁸ Mu muhanda mowunuwu, me ndi mu utsingasala ti, me anzaka bungodu bwa benu bwosi, bu bwavyohelele iteesi. Bunuubu, bu Epafodite amiibehele me bungodu bwa benu, me miimbaha byosi bi me ndi na byo nzala. Bungodu bwa benu buli we nyafi ya tsulu yimbwe, bungodu bu Nzambi ubaasiinga na bu nde ubaamono kinya.

¹⁹ Na Nzambi a me uluusa benu mu biina byosi bi benu laavele na byo, we bu hu li busina bu muyusu a nde, mu Kristo Yisu.

²⁰ Muyusu aba huli Nzambi Taata a bisu, mu bilima na bilima! Ameni!

Mabwehe ma tsyelele

²¹ Vaani mabwehe huli pasi muutu wu li mu buli la Yisu Kristo. Baana ba ngu ba bali na me, bamiiva benu mabwehe.

²² Bangidi boosi ba musyenge mowunuwu, bamiitsindaha benu mabwehe, fula-fula ba bali mu usala mu nzo a Kayisaali, pfumu a tsi a Looma.

²³ Nyaha hyese hya Pfumu Yisu Kristo, hiba na benu boosi.