Filiipo 2 - Musamu wu Mubwe

Kulimini na bunene bwa Kristo

¹ Kristo li mu uva benu ibahala hi hyafulala. Litondo la nde libaava benu kwadisili na Livupu la nde libaatuunga itwadi hya benu. Benu laaluula mu litondo na kwili lingebe bana mu bana. A ni buuna ve?

² Ni mu buuna, kuhasaani kinya a me, mu ubaapfuuta matsimi. Baani na litondo limosi, mu ubaaba mutima mumosi, na matsimi mamosi.

³ A lisa pasi dyambu na matsimi ma nyeme ve, buve mu nzala umonehele. Ka hutso a kulimini, mwesaani ti bana baakulala benu.

⁴ Pasi muutu mu benu, a hasaha ndulu kaluha a nde mwakulu ve, ka abaasaha kaka kaluha a bana.

⁵ Dyataani ŋa hati la benu, na matsimi ma baatu ba baakangama mu Yisu Kristo:

⁶ Nde wu aba ifwani hya Nzambi, a havatiini mu uba itsitsa hya Nzambi ve.

⁷ Ka nde mwakulu abisi moosi mu uba muviha. Nde wu baabuti muutu ŋa hati la baatu, na baatu baamoni mu nde ifwani hya muutu.

⁸ Nde akulimini we ikenyi, na nde asiingili Nzambi te hu lipfu. Eye! Tso lipfu la ŋa muti.

⁹ Ni mu buuna, Nzambi hasyenuli nde ŋa mbuha ya hati a yulu, na havidi nde nduhi yi yili ŋa yulu manduhi makima.

¹⁰ Mana mu muyusu a nduhi a Yisu, bya monyi byosi, bya hu yulu, bya ŋa toto na bi bili hu tsi a babaakwa, bitsokomo.

¹¹ Na boosi bayaabisa ti: «Yisu Kristo ni Pfumu, mu muyusu a Nzambi Taata.»

Umwedeme we liyalala mu tsi

¹² Ni mu buuna, bambahi ba me ba litondo, benu laakasiingala ndongisili a me, ŋa me ambedi ŋa hati la benu. Ka bunuubu, singalaani yo bu hwafulala, tso me peli ŋa hati la benu. Mu mavanga ma benu, mu boomo na likamba, mwesaani ti benu laamiiyoboho.

¹³ Ka ni Nzambi li mu uva benu matwala ma ukana na uvangimasa mambu, we bu hu li litondo la nde.

¹⁴ Saani moosi, hwavele miŋono na usobosono hu minywa.

¹⁵ Mana benu liba baana ba Nzambi ba baatsyeme na ba baavele masyembo, ŋa hati la baatu ba tsi moyiniyi. Baatu ba bubaavanga mamabi na ba baatengeme matsimi. Benu lafwana ubaamwedeme we liyalala li libaayalusa tsi,

¹⁶ mu uyabisa bo Musamu a monyi. Saani buuna, ilumbu hi Kristo huuya, me umba na nyeme mu benu mu toni ati, me a hatsali tso umono pasi mu pu ve.

¹⁷ Na tso makila ma me matsoli, we ikuku hi bungodu bu benu libaava huli Nzambi mu imiinu hya benu, me umono kinya. Me umba mu kinya itwadi na benu boosi.

¹⁸ Bumosi kaka huli benu, monwani kinya, na baani mu kinya itwadi na me.

Isalu hya Timoteho na Epafodite

¹⁹ Me ndi na hiitu mu Yisu Kristo ti, me utsindahala benu Timoteho mawasa-mawasa, me ukwada bu me unzaka matsangu ma benu.

²⁰ Ŋa yulu a Timoteho, muutu mukima ndeve wu apfuuta matsimi na me, na wu li na nzala ukumbasa benu bu hwafwana.

²¹ Mu toni ati, boosi ubaavangimasa ndulu kaluha a bo mwakulu, hwavele uvangimasa ma Yisu Kristo ali mu utondo ti bo bavangimasa.

²² Benu liyabi benu mwakulu, bu Timoteho hamwesi buni nde haba na tsongo mu isalu, we mwana ŋa pedu a taata a nde. Nde asali itwadi na me we ngamba, mu ulongese Musamu wu Mubwe.

²³ Ni nde me ndi mu utsima utsindaha benu, ŋa me umono, tso bapalisi me mu kondaayi buve naana.

²⁴ Me ndi na hiitu mu Pfumu, ti tso Nzambi tondi, me mwakulu kaka unzaamono benu.

²⁵ Benu laatsindihi me Epafodite, mu ubehele me likumbasa li me amba na lo nzala. Ka me moni bubwe, mu ufutala benu nde, nde wuli mwana a ngu a bisu, tsyengi a me wu isalu na wu midingu.

²⁶ Ni mu buuna, nde li na lehemene li ubwemono benu boosi. Na nde li na mutima lehehe, bu nde hayuhi ti baamiiyabisa benu tsangu bubeedu bwa nde.

²⁷ Mu mbuli, nde abeedi na ubeele, hwa ŋa pedu lipfu. Nzambi akwili nde lingebe. Ka ndulu a nde Nzambi hakwili lingebe ve, napa me Nzambi hakwili lingebe, mana me pelemba mu minyongo mi myafulala.

²⁸ Me miindenge atsindaha benu nde mu mutima mumosi, mana benu liba mu kinya mu ubwemono nde, na lingebe la me lileenge.

²⁹ Yakaani nde na kinya yindahi, nde mwana a ngu a benu mu Kristo. Benu laafwana uba na likiinzu mu baatu boosi ba bubaavanga we bu nde havangi,

³⁰ mu toni ati, nde abeedi bebele na lipfu mu usala isalu hya Kristo. Nde avahuli idiingu hya nde, mu ubehele me likumbasa, li benu laavelitwala ubehele me benu mwakulu.