Filiipo 1 - Musamu wu Mubwe

Mabwehe

¹ Pahuli na Timoteho, baviha ba Kristo Yisu. Bisu lili mu usonehele muhanda mowunuwu, huli boosi ba baakangama mu Nzambi, mu itwadi na Kristo Yisu. Bisu lili mu usonehele huli bakuutu ba libundu, na huli bakeelisi ba libundu ba bo boosi, ba bali hu musyenge a Filiipo.

² Nyaha Nzambi Taata a bisu na Pfumu Yisu Kristo, basyeme benu na bava benu hyenze na hyese.

Pahuli miifutala matondo huli Nzambi

³ Me ndi mu upfutala matondo huli Nzambi, pasi tangu yi me ndi mu unzibwala monyi mu benu.

⁴ Tangu yoosi yi me ndi mu utsambila mu benu, me ubaasambila na kinya.

⁵ Me umbaatsambila na kinya, mu toni ati, benu laakumbisi me, mu uyabisa Musamu wu Mubwe, umata ilumbu hya tsomi, nate bunuubu.

⁶ Me ndi na hiitu ti: Nzambi wu abaandihi usa isalu hi hibwe ŋa hati la benu, ukwilala mu ubaasa hyo, nate hu tsukusu, mu ilumbu hi Kristo Yisu hu uyafutaha.

⁷ Hu li tsiitsa ti, me mba na matsimi ma bunuubu mu toni a benu boosi. Me ndi mu utondo benu mu mutima a me woosi. Mu toni ati, benu laakumbisi me mu isalu hi Nzambi havidi me, mu hyese hya nde. Benu laakumbisi me ŋa me ambedi bunyanga, mu ulwanila Musamu wu Mubwe, na uyabisa nde na mifudi myosi. Benu a laasuki ŋaana ve, ka benu laakumbisi me kaka nate mu tangu moyiniyi, yi me ndi mu mapanga.

⁸ Nzambi yabi ti me atondo benu mu mutima a me woosi, we bu Kristo Yisu hatondo benu.

⁹ Mono ma me ndi mu upondo huli Nzambi, mu masambulu ma me ni ti, litondo la benu libaasinzakula. Me ndi upondo huli nde kaka ti, benu liyaba na utsikaha bubwe-bubwe, buni benu lafwana udyata ŋa busu bwa bana, mu nzaabili ya mbuli.

¹⁰ Ni buuna, benu luuyaba usilasa ndyatili yimbwe. Benu luuba banga imbuli na ba baavele na masyembo, mu ilumbu hya nziili a Kristo.

¹¹ Benu luuba bisina bi mimbutu mi mavanga mamabwe mu Yisu Kristo, mana baatu boosi bava muyusu huli Nzambi.

Musamu wu Mubwe miiyabaana

¹² Baana ba ngu, me tondi uyaabisa benu ti mambu ma maayiili me, ni ma maasiidi ti Musamu wu Mubwe ayabaana mu mambuha moosi.

¹³ Ni mu toni a maana, masadaadu moosi ma mu ubaakelese pfumu a tsi a Looma, na bakima boosi, bayaba ti me ndi mu kondaayi, bu me umbaatsalila Kristo.

¹⁴ Titswene, bukondaayi bwa me bwamiihwadisa babalahi mu baana ba ngu, mu imiinu hya bo mu Pfumu. Na bo bali na ibahala, mu uyabisa Mambu ma Nzambi hwavele a boomo.

¹⁵ Mu mbuli, bana bali mu uyabisa Musamu a Kristo na nyengi, na mitsotso mu toni a me. Ka bakima, bali mu uyabisa Musamu a Kristo na matsimi mamabwe.

¹⁶ Bo baniiba, bali mu usa buuna, mu toni ati, bo baatondo me. Bo bayabi ti me ndi mu kondaayi, mu uvolele Musamu wu Mubwe milembe.

¹⁷ Kabu la tsomi la baatu, lili mu uyabisa Kristo mu mutima wu mubi. Bo bali mu usa lo na nyengi yoosi mu toni ati, bayabi ti me ndi mu kondaayi. Bo bali mu utsima urangisa mapasi ma me.

¹⁸ Liina a lili dyambu la tsongo ve. Lo kaka a lili mu ukwamisa me ve. Tso hwaba ti mu matsimi mamabi, buve mu matsimi mamabwe, la tsoongo ni ti, bo bali mu ulongese mambu ma Kristo. Ni mu toni a maana, me ndi na kinya. Na me umbwetsinzamono kinya,

¹⁹ mu toni ati mapasi momaana mu ubita hu liyobolo la me, mu nzila yi masambulu ma benu, na mu nzila yi likumbasa li Livupu la Yisu Kristo.

²⁰ Li me ndi mu ukeele na usa hiitu mu lo ni ti, me a handi na tsonyi mu pasi dyambu ve. Li me ndi mu utondo loloyi, we mu pasi tangu na hiitu hyosi ni ti, Kristo uyaka muyusu mu nyutu a me. Me tso amba monyi, me tso akwa.

²¹ Ka mu me, Kristo ni idiingu hya me. Na lipfu, aka ni kaluha a me.

²² Ka tso me mbwemba monyi mu usa isalu hya kaluha ŋa toto, buuna me a hanzaabi hi me utsoolo ve.

²³ Me amiiteleme ŋa busu bwa mambu moole. Tsimi a me ya tsomi ni mu ukwa, mana me tsahala na Kristo. Liina ni li lafulala bubwe.

²⁴ Ka hwafulala talu huli me, mu uba monyi ŋa toto moyiniyi, mu toni a benu.

²⁵ Ni mu buuna, me ndi na hiitu mu liina, na me nzaabi ti, me ukwilala ŋa hati la benu boosi, mu ukumbasa benu. Mana benu likula, na benu liba na kinya mu imiinu.

²⁶ Na bu me unzapfutaha huli benu, benu luuba na kinya yi yafulala mu toni a me, mu mambu mamabwe ma mali mu Yisu Kristo.

Mudingu wu imiinu

²⁷ Pasi bu buuyiila, dyataani we bu hwayelemene na Musamu wu Mubwe wa Kristo. Tso me nzidi, tso me pelinza, me mbanzuha babaaleele ti, benu laavangama mu matsimi mamosi, na lili mu usala itwadi mu mutima mumosi, mu ulwanila Musamu wu Mubwe wu bisu laayaki.

²⁸ A liba na boomo bu bambene ba benu ve. Mu bo, hiina ni iliimbu hyati bo buudimbala. Ka mu benu, hyo ni iliimbu hyati benu luuyoboho, na lo lili mu umata huli Nzambi.

²⁹ Ka Nzambi hava benu hyese hi usalila Kristo, ndulu a mu usa imiinu hya benu mu nde ve, ka napa mu umono pasi mu nde.

³⁰ Bunuubu, we bu benu liyabi, mudiingu wu benu lili mu ulwana, ni nde mumosi wu benu laamoni me mu ulwana hu tsomi, na wu me kini mu umbwendwana.