Filemoni 1 - Musamu wu Mubwe

Mabwehe

¹ Me Pahuli, ikondaayi hya Kristo Yisu, na mwana a ngu Timoteho, lili mu usonehele muhanda mowunuwu huli Filemoni, tsyengi a bisu wu litondo.

² Bisu lili mu usonehele nde ka huli Apiya, kedi a bisu, huli Arikiipe, mbaahi a bisu wu mudiingu, na huli libundu li lili mu ukuukama mu nzo a we.

³ Nyaha hyese na hyenze bi bimati huli Nzambi Taata a bisu na Pfumu Yisu Kristo, biba na benu.

Litondo na imiinu bya Filemoni

⁴ Filemoni, me ndi mu upfutala matondo tangu yoosi huli Nzambi, na ubaasambila mu we.

⁵ Mu tonyi ati, me ndi mu unzuha tsangu yi litondo li we li mu umwese huli bangidi boosi, na yi imiinu hya we mu Pfumu Yisu.

⁶ Me ndi mu upondo huli Nzambi, mana itwadi hi hili mu upfuuta bisu a benu mu imiinu, himonehele. Itwadi mohina himonehele, mu mavanga mamabwe moosi ma luukuhasa mu usalila Kristo.

⁷ Mwana a ngu a me, litondo li we amwesi laaviidi me kinya yindahi na kwadili. Mu litondo moliina, we ahwadisi kaka mitima mya babalahi ŋa hati li libundu.

Pahuli miivolele Onesimi milembe huli Filemoni

⁸ Ni mu buuna, me ndi na bunyanga bu Kristo hamiiva me, mu uyabisa we isalu hi we afwana mu usa.

⁹ Me Pahuli, wu aka inunu na ikondaayi mu tonyi a Kristo Yisu, me ndi mu upondo huli we, isiha imosi.

¹⁰ Me pondi huli we, mu uvanga lilibwe mu tonyi a Onisimi, nde wu aka mwana a me hutso a kondaayi huni.

¹¹ Tsomi nde a haba na tsoongo huli we ve. Ka bunuubu nde ka na tsoongo huli we na huli me.

¹² Bunuubu, me ndi mu upfutala we nde. Nde wu aka we mutima a me.

¹³ Me kiikeelese nde mana nde akumbasa me ŋa mbuha a we, bu me ndi mu kondaayi mu tonyi a Tsangu Yimbwe.

¹⁴ Ka me a hatondi usa pasi isiha hwavele ufuula matsimi ma we ve. Mana we a havanga lilibwe mu kwamisa. Ka we vanga lo mu mutima wu ayaluha.

¹⁵ Peleve Onisimi amiitahuha na we mu mwana tangu hole, mana nde akwilala mu ubweba na we.

¹⁶ Ka bunuubu, nde a hasaali muviha ve, ka nde afulala tso muviha, mu tonyi ati, nde li mwana a ngu wu afulala talu. Eye, nde li na tsongo huli me! Ka nde sa afulala tsongo huli we mu busalili na mu bumwana bwa ngu mu Pfumu.

¹⁷ Buuna, tso we li wu abambana na me, yaka nde we bu we uyaka me mwakulu.

¹⁸ Tso nde havangila we lilibi, buve tso nde li na mukanu a we, suusa byo mu tso a biita la me.

¹⁹ Me mwakulu ndi mu utsonehe mambu mo manima mu hoho hwa me: «Me Pahuli, me tsa pfuta we mukanu mowuna.» We ayaba bubwe-bubwe ti, we na mukanu a me. Mukanu mo, ni monyi a we.

²⁰ Eye, mwana a ngu a me, kumbasa me mu musamu mowunuwu mu litondo la Pfumu. Hwadisa mutima a me mu itwadi na Kristo.

²¹ Me ndi mu utsindaha we muhanda mowunuwu, na hiitu ti we sa vanga ma me ndi mu upondo huli we. Na me nzaabi ti we sa kuhasa hu hwafulala, bi me ndi mu upondo we.

²² Titswene, vangila me itini hya nzo hi ubwamina. Me ndi na hiitu ti mu tonyi masambulu ma benu, me tsa nzapfutahala benu.

Mabwehe ma tsyelele

²³ Epafrasi wu uli mutso a kondaayi na me mu tonyi a Yisu Kristo, tsindihi we mabwehe.

²⁴ Malako, Alisitake, Damasi na Luuka, bambaahi ba me ba isalu, bo kaka batsindihi we mabwehe.

²⁵ Nyaha hyese hya Pfumu Yisu Kristo hiba na benu.