2 Timoteho 4 - Musamu wu Mubwe

Uyabisa Mambu ma Nzambi

¹ Me tumi we ŋa busu bwa Nzambi, na ŋa busu bwa Yisu Kristo wu utsundasa ba bali monyi na babaakwa, bu nde hu uyamonehele mu Ipfumu hya nde.

² Yabisa Mambu ma Nzambi, na mukonono, tso mu tangu yimbwe, tso mu tangu yimbi. Pamina, syembe, hwadisa baatu na kwilala mu ulongese bo na mukami woosi.

³ Ka sa huba na tangu yi baatu bu ubwevelekunda ndongisili a mambu ma mbuli. Ka mu mapeyu ma bo mwakulu, bo sa bakangama mu ndongisili yi milongisi mi milahi, we bu hwafwana na mapeyu ma bo mwakulu.

⁴ Bo buudibuha matswi ma bo, mu uveleyuha imbuli. Bo buukinguha mu ubaayuha makuma ma mapfuta.

⁵ Ka we, kuta linyutu la we mu moosi. Kunda mapasi, yabisa Musamu wu Mubwe, na kuhasa bu hwafwana isalu hya we hi musalili a Nzambi.

Me miimana tiinu, me miikelese imiinu

⁶ Me Pahuli, me ndi mu umono ti tangu a me yaka bebele mu uyeholo muvumu a me we bungodu bu musiitu huli Pfumu. Tangu a me yi ukwa yimiito.

⁷ Me miindwana mudiingu we bu hwafwana mu ulwana. Me miitsukasa tiinu a me na me miikeelese imiinu.

⁸ Bunuubu, bamiiswehele me mutata a butsitsa, humbisa a mbingili a me. Pfumu, nzonzi wa tsitsa, wu utsundasa bu hwafwana, uva me mutata mo ilumbu mohiina. Nde uva mutata, ndulu a huli me ve, ka napa huli boosi ba bali na lehemene li ukeele monihili a nde.

Manzabisili ma tsyelele

⁹ Leenge, sa moosi ma we utwala, we yabiisala me matsuhu momanima.

¹⁰ Yanga yabiisala me, me aka siha, mu toni ati Demasi amiitimba me. Nde amiikangama mu makinya ma toto. Nde miiyene hu musyenge a Tesalonika. Keresenisi miiyene hu tsi a Ngalatiya, na Tiite hu tsi a Dalamatiya.

¹¹ Ndulu ni Luuka li na me. Buuna, yanga we mwakulu na Malako, nde na tsongo mu me na mu isalu.

¹² Me miitsindaha Tisike hu musyenge a Efeso.

¹³ Ŋa we uya, behele me iyunga hi me atsiisa hu musyenge a Tolowasi mu nzo a Karaposi. We behi kaka mabuuku, homo ma mikobo mi bibulu.

¹⁴ Alekizandi, mutsuli bitali, avangila me mamalahi ma maafulala bubi. Pfumu usyembe nde we bu huli mavanga ma nde.

¹⁵ Baakele na nde we kaka, mu toni ati, nde atelemene ndongisili a bisu mu mifudi.

¹⁶ Ŋa me anzakala nyutu a me kala la tsomi, muutu tso mumosi a havolili me milembe ve. Baatu boosi baatiimbi me. Nyaha Nzambi avengolo bo lo!

¹⁷ Ka Pfumu ni wu avolili me milembe. Nde aviidi me mifudi, mana me twala uyabisa bo Musamu wu Mubwe, mana baatu ba matsi ma bangoyi kaka bayuha nde. Na nde ayobili me mu munywa a kosi.

¹⁸ Pfumu ubiingasa me mu mavanga moosi mamabi. Nde uyobolo me na ukotese me mu Ipfumu hya nde hi mayulu. Muyusu aba huli nde mu bilima na bilima! Ameni!

Mabwehe ma tsyelele

¹⁹ Va bwehe huli Pilisile, Akilasi, na baatu ba nzo a Onezifole.

²⁰ Erasite miisaala hu musyenge a Koliinto. Me miitsisa Tolofime, hu ngulu makumbi ma nzali a musyenge a Mile, hutso bubeedu.

²¹ Leenge mu uya, tswamina ndolo mu uto. Ebulusi, Pudenesi, Linyusi, Kolodiya na baana ba ngu boosi, batsindihi we bwehe.

²² Nyaha Pfumu aba na we, na hyese hya Nzambi hiba na benu.