2 Timoteho 1 - Musamu wu Mubwe

Mabwehe

¹ Me Pahuli, ilumbi hya Yisu Kristo, mu litondo la Nzambi. Me ndi ilumbi mu uyabisa monyi wu bilima na bilima, wu Nzambi hasiidi lahi huli ba baakangama mu Yisu Kristo.

² Me ndi mu utsonehele we Timoteho, mwana a me wu litondo: Nyaha Nzambi Taata na Yisu Kristo, Pfumu a bisu bava we hyese, litondo na hyenze.

Pfutili matondo na kwadisili mu uveletengeme

³ Me ndi mu upfutala ŋa matondo huli Nzambi, wu me ndi mu utsalila we bakaaha ba me, na matsimi ma me ma maatsyeme. Na me umbanzibwala monyi mu we, butsuhu na nyangu, mu masambulu ma me.

⁴ Me ndi mu unzibwala monyi mu matsanga ma we, na me na lehemene li ubwemono we, mana me ndula mu kinya.

⁵ Me ndi mu unzibwala monyi kaka mu hiitu hya we hya mbuli. Ni hiitu hya mu Nzambi hiina, kaaha a we Loyisi na ngu a we Enisi, baabedi na hyo. Me ndi mu umono ti we kaka ka mu usa hiitu mu Yisu.

Pahuli li mu uhwadisa Timoteho mu ukwilala wu avangama mu hiitu

⁶ Ni mu buuna, me ndi mu unzibwala we monyi mu udukasana mbaahu bungodu. Ni hyese hya Nzambi hiina, hi we ayaki ŋa me atsuusili we myoho.

⁷ Mu toni ati, Livupu li Nzambi hava bisu, a li uba yombidi ve. Ka lo lili la kwadili, li litondo na li isusi.

⁸ Ni mu buuna, a hamono tsonyi mu imbangi hi we usa mu Pfumu a bisu. A hamono kaka tsonyi mu me, wu uli kondaayi mu toni a Pfumu. Ka siinga umono pasi na me mu Musamu wu Mubwe, mu mifudi mi Nzambi ubaava.

⁹ Nde ni wu ayobolo bisu, na wu ateele bisu mu mbila ya ngidi, a mu toni mavanga ma bisu mamabwe ve, ka mu toni a kesili a nde mwakulu na mu toni bubwe bwa nde. Nde asa bisu kolo-kolo a nde mu Yisu Kristo, tswamina mbandili a tangu.

¹⁰ Ka nde amiimwese bisu bwo tangu yi, mu monihili a Muyobili a bisu Yisu Kristo. Nde ni wu asukasa matwala ma lipfu, na mu Musamu wu Mubwe, nde amwese monyi wu ubaavelekwa.

¹¹ Ni mu Musamu wu Mubwe, Nzambi habyalisa me we ilumbi hya nde na mulongisi.

¹² Na, ni mu buuna, me ndi mu umono mapasi momanima. Ka me a handi na tsonyi ve, mu toni ati me nzabi mu na me atsa hiitu hya me. Me na hiitu mu nde, wu uli na matwala ma ukelese bi nde hava me, nate mu ilumbu hya tsundusu.

¹³ Volo ifwani mu ndongisili ya mbuli yi me anzaabisa we, na hwada mu imiinu hya Nzambi. Titswene, hwada mu utondo baatu mutso itwadi hya na Yisu Kristo.

¹⁴ Kelese mandongi ma talu, ma we ayaka mu likumbasa li Livupu la Ngidi li lili mu bisu.

¹⁵ We bu we yabi, boosi ba itanzi hya Asiya, baamiitimba me. Baatu we Fizeli na Emozeni.

¹⁶ Ka nyaha Pfumu alusa kwili a nde lingebe mu nzo a Onezifole, mu toni ati nde akahwadisa me tangu yoosi. Na nde a hamono tsonyi mu me wu uli mu kondaayi ve.

¹⁷ Bu Onezifole hayato hu musyenge a Looma, nde asahi me na lehemene loosi, nate bu nde hayasoolo me.

¹⁸ Nyaha Pfumu atasila nde, mu kwili lingebe a nde, mu ilumbu hya tsundusu! We afula kaka uyaba mamabwe moosi ma nde havangili me hu musyenge a Efeso.