2 Tesalonika 3 - Musamu wu Mubwe

Usambila mu bisu

¹ Mu umana, baana ba ngu, baasambilaani mu bisu, mana mambu ma Pfumu matsamuha mu mawasa na bakiinza mo matsyelo makima, we bu bali mu ukiinza mo huli benu.

² Baasambilaani kaka mu bisu, mana bisu liyoboho ŋa busu bwa baatu ba nga bukanyi, na mavanga mamabi. Mu toni ati, boosi a bali na imiinu ve.

³ Ka Pfumu li nga imbuli. Nde sa ahwadisa benu na nde sa akeelese benu ŋa busu bu Muboho.

⁴ Bisu lili na hiitu mu Pfumu ti benu lili mu usa, na luukaabwesa ma bisu lili mu utuma benu.

⁵ Nyaha Pfumu abaabita mitima mya benu hutsyelo litondo la Nzambi. Nyaha nde abaamwese benu buni benu luuba na mukonono mutso mapasi, we bu Kristo hamwesi ifwani.

Usala mu ifwani hi iluumbi hya Yisu

⁶ Baana ba ngu, mu nduhi a Pfumu a bisu Yisu Kristo, livondi benu mu utahuha na pasi nde nga bubolo, buve nga a mbiili yi yaveleyelemene na ndongisili yi bisu laaviidi bo.

⁷ Benu mwakulu liyabi buni benu lafwana uduukala ifwani hya bisu. Mu toni ati, bisu a laabeedi babolo ŋa bisu laabeedi huli benu ve.

⁸ Bisu a laavondi pasi muutu byudya bi bungondu ve. Ka bisu laakasala, nyangu na butsuhu, hutso ikolili na munyongi, mu uveleva muutu tso mumosi, mupfuna wu ubungala bisu.

⁹ Ka bisu ti laabeedi na muswa wu uvondo benu. Ni ifwani bisu laatondi umwese benu, mana benu lidukala hyo.

¹⁰ Ni mu buuna, ŋa bisu laabeedi huli benu, bisu laaviidi benu tumili moyiniyi: «Woosi wu uveletondo usala, anyaha kaka udya.»

¹¹ Ka bisu lili mu uyuha ti bakima ŋa hati la benu, na mbiili yi yavelefwana. Bo bali hutso budwa na bo bali mu ukoto mu misamu mi myaveletala bo.

¹² Huli baatu mobaana, bisu lili mu uvondo na lili mu utuma bo mu nduhi a Pfumu Yisu Kristo ti, bo baafwana ubaasala tangu yoosi mu ubaha byudya.

¹³ Ka benu, baana ba ngu, hwadaani mu ubaavanga bubwe a likolo ve.

¹⁴ Tso muutu a hasiingili ma bisu lili mu utuma mutso muhanda mo wunuwu ve, tsikahaani nde na a liba likoongo na nde ve, mana nde amono tsonyi.

¹⁵ Ka a livolo nde we muboho a benu ve. Syembaani nde we mwana a ngu a beno.

Mabwehe ma tsyelele

¹⁶ Nyaha Pfumu a hyenze nde mwakulu, ava benu hyenze tangu yoosi, we bu nde atoondi! Nyaha Pfumu aba na benu boosi!

¹⁷ Mu kaka la me Pahuli, me ndi mu upa benu bwehe. Ni mu iliimbu mohiina, me umbaatala mihanda mya me myosi.

¹⁸ Nyaha Pfumu a bisu Yisu Kristo asyeme benu boosi!