1 Yowani 4 - Musamu wu Mubwe

Utsikaha Livupu la Nzambi

¹ Bambahi ba litondo, a lisiingala pasi livupu ve. Baatsikahani mavupu, mana benu liyaba ki livupu lili mu umata huli Nzambi. Mu toni ati, mimbihuli mi mapfuta mimilahi myamiitsamuha mu tsi.

² Mono buni benu luutwala uyaba nga Livupu la Nzambi. Pasi wu ubaasiinga ti Yisu Kristo mu mbuli baabuti mu musunya, nde wuuna li na Livupu la Nzambi.

³ Ka pasi wu uvelesiinga ti Yisu baabuti mu musunya, nde a hali na Livupu la Nzambi ve. Ka nde li na livupu li Muboho a Kristo. Baaleeli benu ti Muboho mu uya haaka, na nde amiikwaya ŋa tsi.

⁴ Ka benu bibabana bya me, benu lili ba Nzambi habaha, na benu laamiibiingala mimbihuli mi mapfuta. Mu toni ati, Livupu li lili mu benu, laakulala livupu li lili mu tsi mu matwala.

⁵ Mimbihuli mi mapfuta mili mya tsi. Myo mibaatoyo mambu ma tsi, na tsi yibaayuhala myo.

⁶ Ka bisu, lili ba Nzambi habaha. Woosi wu ayaaba Nzambi, uyuhala bisu. Pasi wu aveleyaaba mwana a Nzambi, a huyuhala bisu ve. Ni buuna bisu libaatsikaha banga Livupu la mbuli na banga livupu li mapfuta.

Nzambi ni litondo

⁷ Bambahi ba litondo, litondosonwaani. Mu toni ati, litondo libaamata huli Nzambi. Woosi wu ubaatondo bana, li wu Nzambi habuta. Nde yaabi Nzambi.

⁸ Ka muutu wu aveletondo bana, kini a hayaabi Nzambi ve. Mu toni ati, Nzambi ni litondo.

⁹ Mono buni Nzambi hamwese litondo la nde mu bisu: Nzambi atsindihi Mwana a nde ndulu mumosi ŋa tsi, mana bisu libaha monyi mu nde.

¹⁰ Na mono litondo buni lili: a huli ti ni bisu laatondi Nzambi ve, ka ni nde atondi bisu na atsindihi Mwana a nde, wu aviidi muvumu a nde mu bungodu mu toni umaasa masumu ma bisu.

¹¹ Bambahi ba litondo, ubaamono ti ni buuna Nzambi hatondo bisu a benu, bisu a benu kaka lafwaana ubaatondosono.

¹² Muutu tso mumosi kini a hamoni Nzambi ve. Ni mu buuna, tso bisu libaatondosono, Nzambi ukwilala mu bisu, na litondo la nde laakuha mu bisu.

¹³ Nzambi aviidi bisu Livupu la nde. Ni buuna bisu libaayaba ti bisu libaakwilala mu nde, na nde kaka ubaakwilala mu bisu.

¹⁴ Na bisu laamoni, na lili mu uta imbangi, ti Taata Nzambi atsindihi Mwana a nde Yisu Kristo, mu uba mufuhisi a tsi.

¹⁵ Tso muutu li mu usiinga na li mu uta ibila ti: «Yisu ni Mwana a Nzambi!» Nzambi ubaakwilala mu nde na nde kaka ubaakwilala mu Nzambi.

¹⁶ Mono buni bisu luuyaaba ki litondo li Nzambi hatondo bisu. Nzambi ni litondo, na woosi wu ubaakwilala mu litondo, ubaakwilala mu Nzambi, na Nzambi kaka ubaakwilala mu nde.

¹⁷ Tso litondo la Nzambi libaasinzamonehele mu bisu, buuna bisu lili na hiitu mu ilumbu hi Nzambi huyatsundasa baatu. Bisu luuba na hiitu mu toni ati, idiingu hya bisu ŋa toto mo yiniyi, hyafwanina na hya Yisu Kristo.

¹⁸ Hutso litondo, boomo tso hoole ve. Ka litondo li laakuha, libaabinga boomo, mu toni ati muutu nga boomo, ni wu ubaakeele tsyembili. Ni mu buuna, muutu nga boomo bwa Nzambi, litondo la Nzambi kini a laayele mu nde ve.

¹⁹ Ka uto ti bisu, bisu libaatondo Nzambi, mu toni ati nde atswamini utondo bisu.

²⁰ Tso muutu li mu uleele: «Me atondo Nzambi» na li mu ubelele mwana a ngu a nde, nde li mupfuti. Mu toni ati, wu abelele mwana a ngu a nde wu nde ali mu umono, buni nde hu utwala utondo Nzambi wu nde havelemono?

²¹ Woosi wu utondo Nzambi, afwana utondo kaka mwana a ngu a nde. Wunuwu ni mukele wu Kristo hava bisu.