1 Yowani 2 - Musamu wu Mubwe

Kristo muvolili mileembe mya bisu

¹ Baana ba me, me ndi mu utsonehele benu mambu momanima, mana benu livelesa masumu. Ka tso muutu miisa masumu, bisu lili na muvolili mileembe ŋa busu bwa Taata, ni Yisu Kristo, nde wu li wu akuha.

² Nde mwakulu asiingi ukwa we bungodu mu masumu ma bisu, mana Nzambi asa kolo-kolo. Nde unyahula masumu ma bisu, napa masumu ma baatu ba tsi yoosi.

Mukele litondo

³ Tso bisu libaasiingala mikele mya Nzambi, bisu lili na hiitu ti bisu liyaabi nde.

⁴ Tso muutu li mu uleele ti: «Me nzaabi Nzambi», hwavele usiingala Mikele mya nde, nde li mupfuti, na nde a hayabi Nzambi mu mbuli ve.

⁵ Ka woosi wu ubaakeelese mambu ma Nzambi na bukuhu bwosi, ubamwese ti, nde atondo Nzambi bu hwafwana. Ni buuna bisu luuba na hiitu ti bisu itwadi na Nzambi:

⁶ woosi wu ubaaleele ti nde akwilala mu Nzambi, afwana kaka ubaadyata we bu Yisu Kristo hakadyata.

⁷ Baana ba ngu ba litondo, me a handi mu utsonehele benu Mukele wu munyatihi ve, ka ni Mukele wu mukulu, wu benu laayaki umata hu mbandu. Mukele mo wu mukulu wuuna, ni musamu wu benu laamiiyuha.

⁸ Ka hwa nde, nde mukele wu munyatihi me ndi mu utsonehele benu. Na imbuli hi Mukele hili mu umonehele mu Kristo na mu benu. Mu mbuli, piipidi yili mu uvyoho, na liyalala la mbuli laaka mu umwedeme.

⁹ Woosi wu ubaatsima ti nde hutso liyalala ali, ka nde ubaabelele mwana a ngu a nde, nde kini a hapala hutso a piipidi ve.

¹⁰ Woosi wu ubaatondo mwana a ngu a nde, ubaakwilala hutso liyalala, na isiha tso imosi utwala ubwisa imiinu hya nde ve.

¹¹ Ka woosi wu li na ibelili mu mwana a ngu a nde, li hutso a piipidi. Nde li mu udyata mu piipidi hwavele uyaba hu nde ali mu uyene, mu toni ati, piipidi yamiikitusa nde inzimana.

¹² Baana ba me, me ndi mu utsonehele benu muhanda mowunuwu mu toni ati, Nzambi amiisa kolo-kolo mu masumu ma benu, mu nduhi a Yisu Kristo.

¹³ Bataata, me ndi mu utsonehele benu muhanda mowunuwu, mu toni ati benu liyaabi wu li monyi, umata mbandu. Bafudu, me ndi mu utsonehele benu muhanda mowunuwu, mu toni ati benu laabiingili Nga bubi.

¹⁴ Me ndi mu utsonehele benu muhanda mowunuwu, baana ba me, mu toni ati benu liyaabi Taata. Me ndi mu utsonehele benu muhanda mowunuwu, bataata, mu toni ati benu liyaabi wu li monyi umata mbandu. Me atsonehele benu muhanda mowunuwu, bafudu, mu toni ati benu lili na mifudi. Mambu ma Nzambi mali mu ukwilala mu benu, na benu laamiibiingala Nga bubi.

Ukebe mu mambu ma tsi

¹⁵ A litondo tsi ve, tso bisiha bya tsi. Woosi wu tondi ndyatili a baatu ba tsi, utwala ubwetondo Taata Nzambi ve.

¹⁶ Mono bi libaateele bisiha bya tsi: manzala mamabi ma imuutu, linyungi li musunya, linyungi la miisu, nyeme yi busina bwosi bu benu lili na bwo. Bisiha mobiina byosi, a bili mu umata huli Taata ve, ka byo bili bya tsi.

¹⁷ Tsi yili mu uvyoho, na byosi bi linyungi bi bili mu yo. Ka muutu wu ukuhasa litondo la Nzambi, ukwilala bilima na bilima.

Baboho ba Kristo

¹⁸ Baana ba me, yiniiyi ni tangu a tsyelele. Benu laayuhi ti, muboho a Kristo mu uya ali. Ka bunuubu, baboho ba Kristo babalahi baamiimonehele. Ni mu buuna, bisu liyabi ti bisu laaka mu tangu a tsyelele.

¹⁹ Baatu mo baniba baamiisiisa bisu, ka bo a babeedi banga imiinu ba mbuli ve. Mu toni ati, bo kini baabeedi banga imiinu ba mbuli, bo baakiikwilala na bisu. Ka bu bo baamiisiisa bisu, bumiimonehele ti, baatu mobaana a bali banga imiinu ba mbuli ve.

²⁰ Ka uto ti benu, Kristo apuhili benu Livupu la Ngidi, mana benu boosi liyaba imbuli.

²¹ Me a handi mu utsonehele benu muhanda mowunuwu, bu benu laadiimbili imbuli ve. Naana, me ndi mu utsonehele benu, mu toni ati benu laayaba imbuli. Benu laayaba kaka ti, upfuta tso umosi utwala upala hutso imbuli ve.

²² Buuna na li mupfuti? Ni nde wuuna wu ubaatuna ti Yisu ni Kristo. Pasi muutu wu ubaatuna Nzambi Taata na Mwana a nde Yisu, ni wuuna li muboho a Kristo.

²³ Ni mu buuna, woosi wu ubaatuna Mwana, ubaatuna kaka Taata. Ka woosi wu ubaasiinga ti Yisu Mwana a Nzambi, nde li kaka itwadi na Taata.

²⁴ Ka uto ti benu, keelesaani bubwe-bubwe mambu ma benu laayuhi umata hu mbandu. Tso benu likeelisi mambu ma benu laayuhi umata hu mbandu, benu kaka sa likwilala ukangama mu Mwana na mu Taata.

²⁵ Mu mbuli, monyi wu bilima na bilima, ni lahi li Kristo asiidi bisu.

²⁶ Me miitsonehele benu mambu momanima, mu toni a baatu ba bali mu usaha udungasa benu.

²⁷ Ka uto ti mu benu, Livupu li Kristo hapuhili benu, lili mu ukwilala mu benu. Ni mu buuna, benu a lili na nzala mulongisi mukima ve. Mu toni ati, Livupu moliina, libaalongese benu mambu moosi. Lo lili Livupu li imbuli, ka a li mapfuta ve. Ni mu buuna, kwilalaani ba baakangama mu Kristo, we bu Livupu la Ngidi laalongisi benu.

²⁸ Bunuubu, baana ba me, kangamaani mu Kristo, mana bisu liluula mu hiitu mu tangu yi nde huyamonehele. Kangamaani mu nde, mu uvelekwa tsonyi ŋa busu bwa Kristo, mu ilumbu hya nziili a nde.

²⁹ Benu liyabi ti Kristo li wu akuha. Ni mu buuna, benu laafwana uyaba kaka ti, woosi wu ubaavanga mambu ma maasungama, li wu Nzambi habuta.