1 Timoteho 6 - Musamu wu Mubwe

Baviha na bapfumu

¹ Nyaha boosi ba bali mu panga buviha, babaakinza bapfumu ba bo we ba baakuha, mu uyaka muyusu woosi. Vangani buuna, mana pasi muutu a harokolo nduhi a Nzambi na ndongisili a nde.

² Na, baviha ba bali na bapfumu banga imiinu, a baafwana upenye bo ve, bu bo bali baana ba ngu. Ka bo baafwana ubaasalila bo hu ulahi, bu bo bali banga imiinu na bambaahi ba litondo, ba bubaayaka likumbasa la bo lilibwe. Maana ni ma we afwana ubaalongese na ubaatuma baatu.

Imiinu hya mu Nzambi ni busina bwa mbuli

³ Tso muutu li mu ulongese mandongi makima, ma masobono na mambu ma mbuli ma Pfumu a bisu Yisu Kristo, buve ma masobono na ndongisili yi yibaayusa Nzambi,

⁴ nde wuuna aluula mu isayi. Muutu wa pila yiina, a hayabi isiha tso imosi ve. Nde na bubedu bwa paha mu toni mikuma. Maana ni ubaabuta nyengi, ukakana, bituhi, na utsima mambu mamabi mu bana.

⁵ Mo mubaabehe kaka ukakana hu hwavelefwa, ŋa hati la baatu banga buyedi bu bwatengeme. Bo a baabweyaba imbuli ve. Bo bubaatsima ti imiinu mu Nzambi, ni nzila yi ubahila busina.

⁶ Mu mbuli, imiinu mu Nzambi ni nzila yinene yi busina, tso muutu li mu umono kinya mu bi Nzambi hava nde.

⁷ Mu toni ati, bisu a laabehi isiha tso imosi ŋa laayidi ŋa tsi ve. Ni bumosi kaka, a luutwala ubita isiha tso imosi ve, ŋa luusisa tsi moyiniyi.

⁸ Ni mu buuna, tso bisu lili na byudya, na bikutu, biina byukuha huli bisu.

⁹ Ka ba bubaasaha uba bisina, baamiibwa mu lobese na mu mweto manzala mamabi ma maavele na tsongo. Manzala momaana mubaabiyasa baatu na ubita bo hu lipfu.

¹⁰ Ka nzuki a mbongo, ni nzila a bisiha byosi bibibi. Mwana a kabu la baatu mu nzuki a mbongo, baatahuhi na imiinu hya bo, na baakwamisi linyutu la bo mwakulu.

Ulwana mudingu wu afwana wu imiinu

¹¹ Ka we muutu a Nzambi, bata maana moosi. Saha mbiili butsitsa, muyusu a Nzambi, imiinu, litondo, mukami, na isusi.

¹² Lwana mudingu wu afwana wu imiinu. Kanga monyi wu bilima na bilima wu Nzambi hateeli we mu nde. Monyi mowuuna, ni wu we asiingi ŋa we abinuhi mu udukala nzila imiinu, ŋa busu bu bambangi babalahi.

¹³ Me ndi mu utuma we lo ŋa busu bwa Nzambi, wu ubaava monyi huli bisiha byosi. Ŋa busu bwa Yisu Kristo, wu atiidi imbangi hi ibwe ŋa busu bwa Ponse Pilaato, me utuma we mu

¹⁴ ubaakeele mukele wu we ayaki na uba wu atsyeme na wu avele na masyembo, nate bu Pfumu a bisu Yisu Kristo hu uyamonehele.

¹⁵ Yisu Kristo uyafutaha, mu tangu yi Nzambi hakese. Nde ni Nga Matwala moosi, Nga Kinya, Mutumi batumi, Pfumu bapfumu,

¹⁶ ndulu ni nde wu uvelekwa. Nde ubaatsahala hutso liyalala, li pasi muutu huvelekunda, mu ubeleme na lo. Muutu tso mumosi kini a hamoni nde ve, tso utwala umono nde ve. Nyaha muyusu na matwala biba huli nde, mu bilima na bilima! Ameni!

Mandongi huli bisina

¹⁷ Leele huli banga busina ba tsi moyiniyi, baveleba na isayi. Leele bo bavelesa hiitu hya bo mu busina bu bubaadimbala, mu toni ati, bwo a buudinga ve. Ka nyaha babaasa hiitu hya bo mu Nzambi, wu ubaava bisu byosi bi byafulala, mana bisu liba mu kinya.

¹⁸ Tuma bo babaavanga mamabwe, bo baba bisina mu mavanga mamabwe, mu umonehele banga a lehemene li ukabila bana.

¹⁹ Buuna, bo buukukaha busina bu bubwe na bu bwavangama bwa hu busu, na ukanga monyi wa mbuli.

Mabwehe ma tsyelele

²⁰ Ho! Timoteho! Kelese isalu hi Nzambi hava we. Peke bileedi bi butsudu, na mikuma mi myasobono na imiinu.

²¹ Bamosi baasiingi ndongisili yi mapfuta yiina, we yi yaaba ya mbuli. Na bo baadungi nzila imiinu. Nyaha hyese hya Nzambi hiba na benu!