1 Timoteho 1 - Musamu wu Mubwe

Mabwehe

¹ Me Pahuli, ndi ilumbi hya Kristo Yisu. Me ndi mu unzabisa we mu tumili a Nzambi Mufuhisi a bisu, na mu tumili a Kristo Yisu wu uli hiitu hya bisu.

² Me ndi mu utsonehele huli we Timoteho. We li mwana a me mwakulu, mu hiitu hya we mu Kristo. Nyaha Nzambi Taata na Kristo Yisu Pfumu a bisu, bava we hyenze, bakwila we lingebe na uva we hyese.

Kebisili mu ndongisili yi mapfuta

³ Tsahala hu musyenge a Efeso, we bu me akwadisi we ŋa me akanzyene hu tsi a Masedonya. Huuna, hu uli na baatu bakima babali mu uva ndongisili yi mapfuta. Liha bo mu uva ndongisili moyiina.

⁴ Leele bo banyaha masahu momaana, na utanga mihanda mimila, mi manduhi ma bakaaha. Maana moosi ubaabehe ndulu ukaakana, hwavele uvanga litondo la Nzambi, li libaavangama mu imiinu.

⁵ Tsongo a nzibusili moyiina, ni mu upalisa litondo. Litondo li libaamata hutso mutima wu atsyeme, na matsimi mamabwe, na imiinu hi hyavele na muwala.

⁶ Bakima baamiitahuha na nzila moyiina, na baamiiyadunga hutso bileedi bi byavele na kaluha.

⁷ Bo ubaasaha uba balongisi ba Mikele mya Nzambi. Ka bo a bali mu utsikaha mambu ma bo bali mu uleele ve, tso ma bo bali mu uyabisa na hiitu hyosi.

⁸ Bisu liyabi ti Mikele mya Nzambi mili mimibwe, tso baatu bali mu usalila myo we bu hwafwana.

⁹ Mu mbuli, bisu liyabi kaka ti, Nzambi a havanga Mikele mu baatu ba baakuha ve. Nde havanga kaka Mikele mu toni a ba baavele na lisingala, bangoyi, banga bukanyi, banga masumu, ba baavelekinza Nzambi, na bya ngidi. Nde havanga Mikele, mu toni a baatu ba bubaaduba bataata na bangu ba bo, napa mu badubi ba baatu.

¹⁰ Nzambi havanga Mikele, mu toni a baatu banga butsutsungu, ba bubaanyiha masambu babahala na babahala, babali mu usumbasa bambaahi mu buviha. Nzambi havanga kaka Mikele, mu toni a banga mapfuta, banga milabu mi mapfuta, na mu moosi ma maasobono na ndongisili yimbwe yi benu laayaki.

¹¹ Ndongisili moyiniyi, yayelemene na Musamu wu Mubwe wu baaviidi me, wu ubaamata huli Nzambi Nga Muyusu.

Pahuli miifutala matondo huli Nzambi mu bubwe bwa nde

¹² Me ndi mu upfutala matondo huli Yisu Kristo Pfumu a bisu, wu aviidi me matwala, mu toni ati nde amoni ti me ndi wu apfwana, mu ukuhasa isalu hya nde.

¹³ Nzambi akwili me lingebe, tso bu me akandeele mamabi mu nde, tso bu me akakwamisa baatu ba nde, tso bu me amba mutuhi. Nde hasidi buuna, mu toni ati, me a hakanzaba ma me akapanga ve, mu pelili imiinu.

¹⁴ Pfumu a bisu amiipuhala hyese hya nde mu me, mu iteesi hi hyafulala. Nde akumbisi me mu usa imiinu mu nde, na mu utondo bana. Maana moosi mu ubaayelemene, mu toni a bu me akangama mu Yisu Kristo.

¹⁵ Liniili ni dyambu la mbuli, li baatu boosi baafwana uyaka: Yisu Kristo amiiya ŋa tsi mu uyobolo banga masumu. Ka me wa tsomi ŋa hati la bo.

¹⁶ Ka Nzambi amiikwila me lingebe, wu uli wa tsomi mu banga masumu. Nde havangi buuna, mana nde amwese huli baatu mukami a nde. Nde avoli me we ifwani, mana bakima ba bu usa imiinu mu nde, bayaka monyi wu bilima na bilima.

¹⁷ Butsitu na muyusu biba, huli Pfumu matangu moosi! Nde wu uli Nzambi ndulu mosi, wu avelekwa, na wu bubaavelemono! Ameni!

Ulwana mudiingu wu afwana

¹⁸ Timoteho mwana a me, me ndeele we buni we afwana mu usa, we bu hwayelemene na mbihulili yi baasiidi mu we umata beleve. Nyaha mambu momaana mava we ibahala, mana we yaba buni we ulwana mudingu wu afwana.

¹⁹ Kelese imiinu hya we na matsimi mamabwe. Bakima baamiitimba matsimi ma bo, na imiinu hya bo hyamiiyene mu nyamba.

²⁰ Imene na Alekizandi bali mu litangu la baatu mobaana. Me apahulili bo huli Satana, mana batungalala bo mu uveletuha Nzambi.