1 Tesalonika 5 - Musamu wu Mubwe

Ilumbu hya Pfumu

¹ Baana ba ngu, mu ma mali mu utala matangu na bilumbu, benu a lili na nzala ati basonehele benu ve.

² Mu toni ati benu liyabi bubwe-bubwe benu mwakulu, ti ilumbu hya Pfumu sa iya we muyibi hutso butsuhu.

³ Tangu yi baatu buuba mu uleele bunuubu: «Tsi yoosi yika hutso a hyenze, midiingu a misaali ve», ŋaana ni ŋa mapasi muupuhama ŋa yulu a bo we ŋa misoongo mibaabaanda mukaasu nga yimi. Muutu tso mumosi a huufuuha ve.

⁴ Baana ba ngu, benu a lili hutso a piipidi ve, mana ilumbu hya Pfumu iyiila benu we muyibi.

⁵ Mu toni ati, benu boosi lili baana ba liyalala, ba bali mu udyata mu liyalala. Bisu a benu a lili baatu ba butsuhu tso ba piipidi ve.

⁶ Bisu a benu a libwamina we baatu bakima ve, ka bisu a benu laafwana uba likanda, na ukuta linyutu.

⁷ Babwamini, ni butsuhu bali mu ubwamina. Bakoli ba malamu kaka, ni butsuhu bali mu ukolo malamu.

⁸ Ka bisu ba lili baana ba liyalala, bisu laafwana ukuta linyutu. Likangaani imiinu na litondo we ikutu hi midiingu na hiitu hi liyobolo we ibudu hi midiingu.

⁹ Nzambi a hateele bisu mu ubwana tsyembili a nde ve, ka mu ubaha liyobolo mu Pfumu a bisu Yisu Kristo.

¹⁰ Yisu Kristo akwa mu toni a bisu, mana tso lili monyi buve babaakwa, bisu liba monyi itwadi na nde.

¹¹ Ni mu buuna, hwadasanaani na kumbasanaani mu ukula mu imiinu, we bu benu lili mu ubaasa.

Mandongi ma tsyelele na mabwehe

¹² Baana ba ngu, bisu livondi benu mu ubaakiinza ba bali mu usala na bugeele bwosi ŋa hati la benu. Baakiinzaani ba bali mu usuungaha benu mu nduhi a Pfumu, na ba bali mu uyelese benu.

¹³ Baamwesaani bo litondo na likiinzu li linene mu toni a kwadili a bo mu isalu. Baabaani mu hyenze ŋa hati la benu.

¹⁴ Baana ba ngu, bisu livondi benu mu ubaayibusa ba bubaasala hyayuhu. Baahwadisaani ba mitima myamiiduka, baakumbasaani ba baavele mifudi, baabaani na bulembo ŋa busu bwa baatu boosi.

¹⁵ Kebaani muutu a hafutala mamabi mu mamabi ve, ka mu pasi tangu, baasahaani libwe ŋa hati la benu, na ŋa hati la baatu boosi.

¹⁶ Kwilalaani mu kinya,

¹⁷ baasambilaani tangu yoosi.

¹⁸ Baafutalaani matondo huli Nzambi mu pasi musamu. Liina ni li Nzambi ubaavondo benu, mu idiingu hya benu na Yisu Kristo.

¹⁹ A lidimasa Livupu la Ngidi ve.

²⁰ A lirokolo mbihulili ve.

²¹ Ka baakengesaani pasi dyambu, baakangaani ma mali mamabwe.

²² Tahuhaani na pasi dyambu li libi.

²³ Nyaha Nzambi wu li suhu la hyenze, akuhasa bungidi bwa nde boosi mu benu. Na nde akeelese benu we bu hwafwana: ilunzi hyosi, muvumu woosi na nyutu yoosi bya benu, biveleba na masyembo mu ilumbu hya nziili a Pfumu a bisu Yisu Kristo.

²⁴ Wu li mu uteele benu li wu akuha, nde sa atswihasa maana moosi.

²⁵ Baana ba ngu, baasambilaani kaka mu toni a bisu.

²⁶ Bumbasanaani na litondo, we baana ba ngu.

²⁷ Me ndi mu utuma benu mu nduhi a Pfumu: tangaani muhanda mo wunuwu huli baana ba ngu boosi.

²⁸ Nyaha hyese hya Pfumu a bisu Yisu Kristo hiba na benu boosi!