1 Tesalonika 3 - Musamu wu Mubwe

¹ Ni mu buuna, bu bisu laaveletwala ukuunda ubwekeele bulahi, bisu laamono bubwe mu uyaba siha hu musyenge a Ateene.

² Bisu latsindaha benu mwana a ngu a bisu Timoteho, wu li tsyengi a me mu isalu hya Nzambi, mu nzabisili a Musamu wu Mubwe wa Kristo. Bisu laatuma nde mu uhwadisa benu na uva benu mandongi mu toni imiinu hya benu,

³ mana pasi muutu avelebwa hutso ikolili mu toni a mbingisili yi lili mu ubwana. Benu mwakulu liyabi lo, yiina ni kesili a Nzambi mu bisu.

⁴ Ŋa bisu laaba kini ŋa hati la benu, bisu laakayibusa benu ti buumwese bisu pasi. Maana ni ma mavangimi, benu liyabi lo bubwe.

⁵ Ni mu buuna, bu me akambwepeletwala ukuunda ukeele, me atsindihi benu Timoteho mu usaha uyaaba kwadili imiinu hya benu. Me akambata boomo ti mukuyi, mulobisi mo wunuwu, alobese benu na pasi a bisu a yiba ya mupu.

⁶ Ka bunuubu, Timoteho miiyafutahala bisu, na nde ava bisu matsangu mamabwe mu toni imiinu hya benu na litondo la benu. Nde ayabisa bisu, ti benu a laakolo mu utsima bisu na litondo loosi ve. Na ti benu lili na nzala mu ubwemono bisu, we bu bisu kaka lili na nzala ubwemono benu.

⁷ Ni mu buuna baana ba ngu, hutso minyongi mya bisu na mapasi ma bisu moosi, bisu laahwadi mu matsangu momaana, mu toni imiinu hya benu.

⁸ Bunuubu, idiingu hya bisu hika lisuunga, mu toni ati benu limiikangama mu Pfumu mu idiingu hya benu.

⁹ Buni bisu luusinzafutala matondo huli Nzambi mu benu, mu kinya yoosi yi benu lili mu uva bisu, ŋa busu bwe nde?

¹⁰ Butsuhu na nyangu, bisu libaavondo nde na mukonono woosi, mu uva bisu nzila mu ubwemono benu na mu usuungaha bi byaveleyelemene mu imiinu hya benu.

¹¹ Nyaha Nzambi Taata a bisu nde mwakulu na Pfumu a bisu Yisu, badibula bisu nzila yi uto nate huli benu.

¹² Nyaha Pfumu asinzakulasa na asinzaluusa litondo li benu lili na lo mu bana na mu baatu boosi, mu ifwani hi litondo li bisu lili na lo mu benu.

¹³ Nyaha nde ahwadisa mitima mya benu, mana benu liba bangidi, ba baavele masyembo ŋa busu bwa Nzambi taata bisu, ŋa Pfumu a bisu Yisu huuya na bapofi ba nde boosi. Amen!