1 Tesalonika 2 - Musamu wu Mubwe

Pahuli hu Tesalonika

¹ Benu mwakulu layaaba, baana ba ngu, ti nziili a bisu huli benu a yili yi yavele na kaluha ve.

² Ka benu liyabi kaka ti bisu laayaka bituhi na laamono pasi hu musyenge a Filipo. Ka Nzambi ahwadisa mana bisu lilongese Musamu a nde wu Mubwe, hutso a mbingisili.

³ Mambu ma bisu laakalongese a maaba ma mapfuta, buve ma soho ve, na bisu a laakasaha usoho tso muutu mumosi ve.

⁴ Naana! Nzambi asusa bisu ŋa busu bwa lobese na nde ava bisu Musamu a nde wu Mubwe. Bisu a lili mu utoyo mu usaha muyusu a baatu ve, ka muyusu a Nzambi wu ayaaba matsimi ma mitima mya bisu.

⁵ Benu layaaba lo bubwe, bisu a libaasalila lipedi tso hoole ve. Bisu kaka a lili mu uswehe manzala ma mapfuta humbisa a ma bisu lili mu uleele ve. Nzambi nde mwakulu li mbangi a bisu.

⁶ Bisu a laasaha ti muutu asilasa bisu ve, tso benu, tso bakima.

⁷ Bisu beedi na muswa mu unangimana benu, bu bisu lili bilumbi bya Kristo. Ka bisu laamwese bulembo bwa bisu ŋa hati la benu, we ngu wu li mu ukeelese bibabana bi nde ubaabungala.

⁸ Bisu laatondo benu mu itesi hi ulongese benu Musamu wu Mubwe wa Nzambi. Litondo moliina laamiivangimasa bisu mu uva kaka muvumu a bisu mwakulu. Benu laaba na talu yi yafulala ŋa busu bwa bisu!

⁹ Baana ba ngu, benu lili mu uyibwala monyi mu mapasi ma bisu na ikolili hya bisu. Ni mbuli bisu laakalongese benu Musamu wu Mubwe wa Nzambi hwavele ukolo. Bisu laakasala nyangu na butsuhu, mu ubweveleva mupfuna huli pasi nde ŋa hati la benu.

¹⁰ Benu lili bambangi ba bisu, napa Nzambi kaka. Mbiili a bisu ŋa busu bwa benu ba nga imiinu, yaaba yi yatsyeme, ya tsiitsa, yi yavele masyembo.

¹¹ Benu liyaabi ti, bisu laaba mu pasi muutu mu benu, we bu taata ali mu baana ba nde.

¹² Bisu laahwadisi benu, laabombisili benu na laayelisi benu mu ubaaba na mbiili yi yafwana ŋa busu bwa Nzambi. Nde wu li mu uteele benu mu ukoto mu ipfumu hya nde na mu muyusu a nde.

¹³ Ni mu buuna, bisu libaafutala matondo huli Nzambi tangu yoosi, bu benu laayaki mambu ma bisu laayabisi benu. Benu a laayaki mo we mambu ma maapali mu muutu ve, ka we bu mo mali ma mbuli, Mambu ma Nzambi, ma mali mu usala na mifudi, ma benu lili mu usa hiitu mu mo.

¹⁴ Baana ba ngu, benu laamwese buuna, bu benu laaduukala ifwani hi mabundu ma Nzambi ma Itanzi hya Yude, ma mubaasa imiinu mu Yisu Kristo. Mu toni ati, baatu ba tsi a benu baamwesi benu pasi, we bu mabundu maamoni pasi ŋa busu bu lituma li Bayudaayo.

¹⁵ Bo ni ba baadubi Pfumu Yisu Kristo na mimbihuli. Bo baanyongisi bisu kaka. Bo bali bababi ŋa busu bwa Nzambi. Bo bali baboho ba baatu boosi.

¹⁶ Bo bali mu ukala bisu mu ulongese huli ba baavele Bayudaayo, Mambu ma Nzambi ma mu ubehele bo liyobolo. Bo bali mu ukulasa itesi hi masumu ma bo baasidi. Ka kesi a Nzambi yamiibwila bo.

Pahuli na nzala ubwemono bisu Tesalonika

¹⁷ Mu ma matali bisu, baana ba ngu, bisu laaba we bitsana bi bamiitahusa kidumana na benu, mu mwana a tangu mu miisu, ka a mu mutima ve. Bisu lasaha uyafutaha huli benu, mono buni bisu laasiidi mifudi myosi, mu ubwemono biinzi bya benu.

¹⁸ Ni mu buuna, bisu laatondi uyamono benu. Na me Pahuli, me anzyehili yehele limosi buve nzyehele yoole. Ka Satana akali bisu.

¹⁹ Ni benu, a baatu bakima ve, lili hiitu hya bisu, kinya a bisu na iliimbu hya mbiingili a bisu, yi bisu luutwala usa nyeme ŋa busu bwa Pfumu a bisu Yisu Kristo, ŋa nde huuya.

²⁰ Eye, benu lili toni muyusu a bisu na kinya a bisu!