1 Peetelo 5 - Musamu wu Mubwe

Mandongi huli bakuutu ba libundu

¹ Bunuubu, me ndi mu ukwadisa bakuutu ba libundu ba bali ŋa hati la benu. Me kaka wu ndi mukuutu libundu we bo. Me ndi mbangi mapasi ma Kristo hamoni, na me tsambaha kaka kabu mu muyusu wu uya. Me ndi mu upondo bo mambu momanima:

² Baakelesaani konge mameme yi Nzambi hava benu we bakeedi. Bakelesaani yo, a hwati mu kwamisa ve, ka mu mutima wu ayaluha, we bu hu li litondo la Nzambi. Baasaani buuna hwavele a nzala a kaluha, ka mu toni lisiingala.

³ A lisaha unangimana ba baasuusa hutso lituma la benu ve. Ka baani na mbiili yimbwe ŋa busu bwa konge mameme, mana mo madukala ifwani hya benu.

⁴ Na ŋa Mukuutu babungili hu uyamonehele, benu lu uyaka mutata a muyusu, wu uvelebiya.

⁵ Ni bumosi kaka, benu pfudu-mbahala, baani hutsina lituma la ba baakulala benu. Na benu boosi, lwataani kulimini mu itwadi hya benu. Mu toni ati, ma Baasonehe mali mu uleele ti: «Nzambi ubaatelemene banga likwayi, ka nde ubava hyese hya nde huli banga a kulimini.»

⁶ Ni mu buuna, baandamaani na bulembo hutsina a hoho hwa Nzambi hu matwala, mana nde asyenolo benu mu tangu yi nde hakese.

⁷ Yeholwani nde mapasi ma benu moosi, mu toni ati nde ubaakeelese benu.

⁸ Kutaani linyutu! Baani likanda! Mu toni ati muboho a benu, Mukuyi li mu uvyana we kosi, wu li mu usiinga na ubaasaha wu nde hu umbyasa.

⁹ Telemenaani nde na kangamaani mu Nzambi. Yabaani ti, mapasi mo manima, bali mu umwese mo kaka huli baana ba ngu a benu mu tsi yoosi.

¹⁰ Benu sa libwemono pasi mwana a tangu hoole. Ka Nzambi wu ubaamwese hyese hya nde hyosi, amiiteele benu mu ukoto hutso muyusu a nde wu bilima na bilima, mu itwadi hya na Yisu Kristo. Nde mwakulu sa atelemese benu, nde sa ahwadisa benu, sa ava benu mifudi, nde sa asusa benu ŋa yulu ibeene hi hyavangama.

¹¹ Nyaha matwala maba mu nde mu bilima na bilima! Ameni!

Mabwehe ma tsukusu

¹² Me atsonihili benu muhanda mowunuwu wu mukusi, mu likumbasa la Silaasi wu me umbaapolo we mwana a ngu a me wu akuha mu imiinu. Me atsonihi nde, mu uhwadisa benu, na mu usilasa ti, benu hutso a hyese hya Nzambi laakangama.

¹³ Libundu la Nzambi li lili huni, hu musyenge a Babylooni, na li Nzambi hasoolo we benu, litsindihi benu mabwehe. Ni bumosi kaka, Malako mwana a me, tsindihi benu mabwehe.

¹⁴ Baavaani mabwehe ma ubumbasana mu litondo li bumwana bu bungu. Nyaha hyenze hiba na benu boosi ba lili mu Kristo!