1 Peetelo 3 - Musamu wu Mubwe

Itwadi hi bakadi na balumi

¹ Ni bumosi kaka, benu bakaasu, baani na lisiingala ŋa busu bu balumi ba benu. Tso lisiidi buuna, uba ti na babahala ŋa hati la bo ba bali mu uvelesa imiinu mu Mambu ma Nzambi, babaha imiinu mu mbiili bakadi ba bo.

² Bo bu ubaha imiinu, bu bo bali mu umono mbiili a benu ya ngidi yi likiinzu.

³ A lisaha uba yoli-yoli mu nyutu mu pandili a naanga a benu, mu bilabu bya wolo, buve mu bikutu bi byafulala bubwe ve.

⁴ Ka yoli-yoli a nyutu a benu, yafwana uba ya hutso mutima. Ni yoli-yoli yi yuvelebiya, yi livupu li bulembo na la hyenze. Ni liina lili la talu ŋa busu bwa Nzambi.

⁵ Ni buuna hutsomi, bakaasu bangidi ba baakasa hiitu mu Nzambi, baakamwese yoli-yoli a bo. Bo baakasiingala balumi ba bo.

⁶ We ifwani hya Sara wu akasiingala Abrahami, akateele nde «pfumu a me». Bunuubu, benu laaka baana ba nde, tso benu lili mu uvanga mambu mamabwe, hwavele a boomo.

⁷ Benu balumi kaka, bu benu lili mu utsahala na bakadi ba benu, yabaani ti bo a bali na mifudi ve. Ka baakinzaani bo, mu toni ati, itwadi na benu, bo bu ubaha bungodu bwa monyi wu umata huli Nzambi. Benu lisa buuna, dyambu tso limosi a lu usa ikahu mu masambulu ma benu ve.

Uvanga libwe

⁸ Ni mu buuna, baani benu boosi matsimi mamosi. Baani na kwili lingebe mu bana, na bulembo, na litondo li mutima na kulimini.

⁹ A lifutala lilibi mu lilibi ve, tso ituhi mu ituhi ve. Ka futalaani bunuubu: «Nyaha Nzambi asyeme benu!» Mu toni ati, ni muliina Nzambi hateele benu, mana benu liyaka lisyeme.

¹⁰ Ma baasonehe ni manima: «Muutu wu utondi uba na idiingu hi ibwe, na umono bilumbu bya kinya, nde afwana ubaavelekusa na ubaavelepfuta.

¹¹ Nde afwana ubaatahuha na bubi, nde afwana ubaavanga mamabwe, na nde afwana ubaasaha hyenze tangu yoosi.

¹² Mu toni ati, miisu ma Pfumu mali tangu yoosi ŋa yulu a baatu babaasungama, na matswi ma nde mali bwasi mu ubaayuha masambulu ma bo, ka Pfumu ubaabisa ba bubaavanga lilibi.»

Hiitu ŋa busu bu malobese

¹³ Na utwala uvangila benu libi, tso benu laahwada mu ubaavanga libwe?

¹⁴ Tso benu lili mu umono pasi mu toni a mamabwe ma benu lili mu uvanga, baani mu kinya! Mu toni ati, baasonehe: «A liba na boomo bwa baatu ba bu utwala uvangila benu libi ve, na a liheleene mitima ve.»

¹⁵ Ka baayusaani Kristo mu mitima mya benu we Pfumu a benu wa Ngidi. Baavangamaani mu ubaakala linyutu la benu, ŋa busu bwa ba bali mu ufuula benu toni a hiitu hya benu.

¹⁶ Baasaani buuna na bulembo na likiinzu. Babaani na matsimi ma maatsyeme, mana ba bali mu ukusa benu mu ndyatili a benu yimbwe ya ba Mukristo, bakwa tsonyi mu makusa ma bo.

¹⁷ Tso liina ni litondo la Nzambi, hwafulala bubwe mu umono pasi mu uvanga lilibwe, ka a mu uvanga mamabi ve.

Ifwani hya Kristo mu mapasi

¹⁸ Ka Kristo nde mwakulu amoni pasi ya nzyeni, mu toni masumu ma baatu. Nde wa tsiitsa, mu babaaveletsiitsa, mu ubita benu huli Nzambi. Baadubi nde mu linyutu, ka Nzambi asuuli nde mu Livupu.

¹⁹ Mu matwala ma Livupu moliina, nde ayalongese te mavupu ma maaba hutso a kondaayi.

²⁰ Ni mavupu ma maabisi usiingala nde mu tangu a tsikulu, ŋa Nzambi hakakeele na mukami, bilumbu bi Nowa hatungi likuumbi la nzali. Mwana a baatu pwombo baakoti hutso likuumbi moliina na baafuuhi mu mamba.

²¹ Mamba momaana aba ni ifwani hya tondihili yi yili mu ufuuhasa benu tangu yi. Tondihili mo, a yili mu uswaha mbiindu a nyutu a benu ve. Ka ni mu usobo mbiili ŋa busu bwa Nzambi, mu matsimi ma maatsyeme. Tondihili yili mu ufuuhasa benu, mu toni ati Yisu Kristo asuuhi mu babaakwa.

²² Nde wu ayeni hu yulu, na wu li ŋa mbahala a Nzambi, hu nde ali mu utuma bapofi, na bipfumu bikima, na matwala ma hu yulu.