1 Peetelo 2 - Musamu wu Mubwe

¹ Ni mu buuna, siisaani mambu moosi mamabi. Nyahani mapfuta, muwala, nyengi, na makusa mu bana.

² Benu lili we baana ba bamiibuta. Sahaani mambu ma Nzambi ma mbuli, we bu mwana ubaasaha unywa mabeelo ma ngu a nde. Mana mu mo, benu likula na liyaka liyobolo.

³ Mu toni ati, baasonehe: «Benu laamoni buni Pfumu ali wu mubwe.»

Yisu manya li itungu

⁴ Yasusahani huli Pfumu Yisu, nde wu li manya la monyi, li baatu baabumi, ka Nzambi amiisoolo lo la talu.

⁵ Na benu mwakulu, we mamanya ma monyi, kuukamaani mu utuunga nzo Livupu. Kuukamaani mu uvanga kabu li banganga ba Nzambi ba nga lehemene, ba bu uba na isalu hi ubaayeholo bungodu bu Livupu. Bungodu mobuuna, Nzambi usiinga bwo, mu toni a Yisu Kristo.

⁶ Eye, mu Libuuku la Ngidi baasonehe: «Me utsusa mu musyenge a Syoni, manya li itungu. Me amiitsoolo lo la talu yi ndahi. Pasi muutu wu usa hiitu hya nde mu lo, a hutwala umono tsonyi ve.»

⁷ Manya mo, libaava butsitu huli benu ba lili mu usa imiinu mu lo. Ka huli ba bali mu uvelesa imiinu: «Manya li batungi baatiimbi, laamikituha manya la ngu ŋa itungu hya nzo.»

⁸ Baabwesonehe bunuubu: «Lo lili manya li libaakubasa baatu baku. Lo lili manya li libaabwisa baatu.» Tso baatu bubaakuba baku mu lo, mu toni ati, bo bubaabisa usa imiinu mu mambu ma Nzambi. Maana ni ma mu uyiila bo.

⁹ Ka benu, benu lili ibandu hibaasoolo, buli li banganga ba Nzambi ba Pfumu, buli li laatsyeme. Tso Nzambi hamiibaha benu, ni mu toni ati, benu liyaabisa mavanga ma maasyenoho. Nzambi hapalisi benu mu piipidi, nate mu ukotese benu hutso liyalala la nde la kimwili.

¹⁰ Tsomi, benu a laabeedi ibandu ve. Ka bunuubu, benu lika ibandu hya Nzambi. Benu ba laaveliyaka kwili lingebe, ka bunuubu Nzambi miikwila benu lingebe.

Mbiili musalili a Nzambi

¹¹ Bambaahi ba me ba litondo, benu lili bapyohi-nzila na byenyi ŋa toto moyiniyi. Ni mu buuna, me ndi mu upondo benu dyambu limosi: siisaani mapeyu ma musunya. Mapeyu momaana mubaalwanisa idiingu hya benu.

¹² Baani na mbiili yimbwe ŋa hati li bangoyi. Tso bo bakesi benu ti benu bavangi ba mamabi, bo sa bamono mbiili a benu yimbwe. Na bo sa bayusa Nzambi ilumbu hi nde hu uyamonehele.

¹³ Mu toni a Pfumu, baakinzaani batumi boosi: huli mutumi a tsi wu li na lituma ŋa yulu a baatu boosi,

¹⁴ na huli biduuka bya nde. Bo bali na isalu hi usyembe bavangi ba mamabi, na ubaasilasa bavangi ba mamabwe.

¹⁵ Nzambi tondi ti benu livanga mamabwe. Benu livanga buuna, benu lu udibuha minywa mi bitsuudu bi byaveleyaba ma bo bu ubaasa.

¹⁶ Badyataani we baatu ba bamiipala mu buviha. Ka bu benu laamiipala mu buviha, a litsima ti benu utwala uswehe mavanga ma benu mamabi ve. Ka baani baviha ba Nzambi.

¹⁷ Baakinzaani baatu boosi, baatondwani baana ba ngu ba benu ba imiinu, baabaani na boomo bwa Nzambi, baakiinzaani mutumi a tsi.

Mukami ŋa busu bu mapasi

¹⁸ Benu basalili, baani na lisiingala na butsitu bwosi ŋa busu bu bapfumu ba benu. A lisiingala ndulu bapfumu ba bali ba babwe na bulembo ve, ka baasiingalaani napa ba bali na mutima wu munono.

¹⁹ Ka huli bubwe tso muutu li mu ukunda mapasi ma bali mu usiila nde hwavele a dyambu, bu nde ali mu usiingala Nzambi.

²⁰ Ki musyendo li, mu ukunda bikooti bi bali mu utete we, humbisa a hu we miisa dyambu lilibi? Tso we li mu ukunda byo mu toni a mambu mamabwe ma we miivanga, huli bubwe ŋa busu bwa Nzambi.

²¹ Ni muliina Nzambi hateele benu, mu toni ati, Kristo nde mwakulu amoni pasi mu benu. Nde asiisala benu ifwani mana benu liduukala bondo la nde.

²² Mu buuku la ngidi baasonehe: «Nde a hasiidi lisumu ve; dyambu tso limosi li upfuta a laapali mu munywa a nde ve.»

²³ Ŋa baatuhi nde, nde a hafutili bituhi ve; ŋa baamwesi nde pasi, nde a hasahi ulwana ve. Ka nde asuusi myosi ŋa myoho mya Nzambi wu ubaatsundasa baatu we bu hwafwana.

²⁴ «Nde abiti nde mwakulu masumu ma bisu», mu nyutu a nde ŋa muti. Nde hasiidi buuna, mana bisu liba we baatu babaakwa ŋa busu bu masumu, na ubaha monyi mu ukuhasa butsiitsa. Eeye, basonehe ti: «Ni mu toni a mbuma a nde benu laabeloho.»

²⁵ Mu toni ati, benu laabeedi we «mameme ma maadimbala». Ka bunuubu, benu limiifutaha huli Mubungili a benu, na Keedi mivuumu mya benu.