Tito 3 - Triqui de San Juan Copala

Veꞌé quiꞌya̱j níꞌ rihaan yuvii̱ cheꞌé se tinanii Yaꞌanj man níꞌ rihaan sayuun a

¹ Cata̱j uún so̱ꞌ rihaan nij yuvii̱ se vaa cara̱a̱ cochro̱j nij yuvii̱ rihaan nij síí nica̱j suun, ne̱ cuno̱ nij yuvii̱ rihaan nij soꞌ á. Caꞌve̱j nij yuvii̱ quiꞌya̱j nij yuvii̱ suun aꞌneꞌ nij síí nica̱j suun rihaan nij soꞌ, ne̱ me maꞌa̱n suun sa̱ꞌ quiꞌya̱j nij soꞌ á.

² Se̱ caꞌmii chiꞌi̱i̱ nij soꞌ ni̱ꞌyaj nij soꞌ tuviꞌ nij soꞌ maꞌ. Se̱ canó tuviꞌ nij soꞌ ga̱ tuviꞌ nij soꞌ maꞌ. Ma̱an se veꞌé ina̱nj quiꞌya̱j nij soꞌ, ne̱ nica̱ꞌ ndoꞌo caꞌmi̱i̱ nij soꞌ rihaan cunuda̱nj yuvii̱ a.

³ Dan me se asi̱j rque̱, ne̱ síí niꞌyo̱n rmaꞌa̱n me maꞌa̱n níꞌ, ne̱ síí tucuáá me níꞌ, ne̱ canocoꞌ níꞌ tucuáán tihaꞌ yuꞌunj, ne̱ quiꞌyaj níꞌ náá guun se vaa guun rá nee̱ man níꞌ quiꞌya̱j yoꞌ a. Dan me se qui̱j me rá níꞌ niꞌya̱j níꞌ tuviꞌ níꞌ, ne̱ guun xco̱j ruva̱a̱ rá níꞌ niꞌya̱j níꞌ tuviꞌ níꞌ, ne̱ quitáá riꞌyunj tuviꞌ níꞌ niꞌya̱j nij soꞌ man níꞌ, ne̱ nachriꞌ níꞌ man tuviꞌ níꞌ a.

⁴ Tza̱j ne̱ ga̱a xcaj níꞌ cuentá cheꞌé Yaꞌanj Si̱j Tinanii man níꞌ rihaan Sayuun, se vaa soꞌ me síí me rá ra̱cuíj man níꞌ, ga̱a ne̱ queneꞌen níꞌ se vaa cunuu ꞌe̱e̱ rá soꞌ man níꞌ a.

⁵ Dan me se tinanii Yaꞌanj man níꞌ rihaan chrej chiꞌi̱i̱ do̱ꞌ, rihaan sayuun do̱ꞌ ado̱nj. Né cheꞌe̱ se sa̱ꞌ quiꞌyaj maꞌa̱n níꞌ me tinanii Yaꞌanj man níꞌ rihaan sayuun maꞌ. Tana̱nj cunuu ꞌe̱e̱ rá maꞌa̱n Yaꞌanj niꞌya̱j soꞌ man níꞌ, ne̱ rqué Yaꞌanj Nimán Yaꞌanj rihaan níꞌ, dan cunuu naca̱ nimán níꞌ ne̱ cunuu sa̱ꞌ nimán níꞌ ado̱nj.

⁶ Dan me se ma̱an cheꞌé Jesucristó Si̱j Caꞌnéé Yaꞌanj, Si̱j Tinanii man níꞌ rihaan Sayuun me rqué ndoꞌo Yaꞌanj Nimán soꞌ nimán níꞌ na̱nj ado̱nj.

⁷ Se lu̱j quiꞌyaj soꞌ me se tinavij soꞌ cacunꞌ xráá níꞌ, ne̱ cunuu sa̱ꞌ nimán níꞌ, quiꞌyaj soꞌ, ne̱ ma̱an cheꞌé dan rque̱ ndoꞌo Yaꞌanj se sa̱ꞌ rihaan níꞌ ne̱ caꞌa̱nj níꞌ ca̱yáán níꞌ ga̱ soꞌ nu̱ꞌ cavii nu̱ꞌ caꞌanj nda̱a vaa naꞌvi̱j ya̱ níꞌ na̱nj ado̱nj.

⁸ Ya̱ uxrá vaa nu̱ꞌ nana̱ nihánj ado̱nj. Ne̱ me rá ꞌu̱nj sca̱ꞌ caꞌmi̱i̱ so̱ꞌ nu̱ꞌ nana̱ nihánj rihaan nij yuvii̱ amán rá niꞌya̱j man Yaꞌanj, cheꞌé rej xca̱j nij soꞌ cuentá se vaa no̱ xcúún nij soꞌ quiꞌya̱j nij soꞌ suun sa̱ꞌ ina̱nj á. Sese da̱nj quiꞌya̱j nij soꞌ, ne̱ si̱j vaa sa̱ꞌ me nij soꞌ, ne̱ cavi̱i̱ sa̱ꞌ doj yuvii̱, quiꞌya̱j nij soꞌ ado̱nj.

Nataꞌ Pabló cheꞌé nij yuvii̱ ꞌyaj xraꞌ taꞌa̱j nij síí noco̱ꞌ man Yaꞌanj a

⁹ Tza̱j ne̱ se̱ canó tuvíꞌ so̱ꞌ ga̱ yuvii̱ maꞌ. Síí niꞌyo̱n me síí ꞌyaj da̱nj chugua̱nj. Se̱ nanó rá so̱ꞌ cheꞌé xií so̱ꞌ ga̱a naá da̱j si̱j me nij soꞌ maꞌ. Se̱ canó tuvíꞌ so̱ꞌ cheꞌé stucua̱nj Moisés maꞌ. ꞌO̱ se né se racuíj man yuvii̱ me nana̱ anó tuviꞌ yoꞌ maꞌ. Tana̱nj nana̱ snúú rmaꞌa̱n me yoꞌ ado̱nj.

¹⁰ Sese vaa ꞌo̱ síí ꞌyaj xraꞌ taꞌa̱j yuvii̱, ne̱ cata̱j xnaꞌanj so̱ꞌ rihaan soꞌ se vaa caꞌne̱ꞌ rá soꞌ ga̱ suun ꞌyaj da̱nj a. Nda̱a vi̱j caꞌmi̱i̱ so̱ꞌ rihaan soꞌ, ne̱ sese se̱ caꞌvej rá soꞌ cuno̱ soꞌ, ne̱ se̱ caꞌvej so̱ꞌ nichru̱nꞌ soꞌ rihaan soj maꞌ.

¹¹ ꞌO̱ se xa̱ꞌ síí ꞌyaj xraꞌ taꞌa̱j yuvii̱, tza̱j ne̱ a̱j tanáj soꞌ tucuáán ya̱, ne̱ tumé soꞌ cacunꞌ ado̱nj. Ne̱ ma̱an cheꞌé cacunꞌ ata̱ soꞌ roꞌ, ꞌyaj yu̱u̱n cheꞌe̱ riꞌ soꞌ na̱nj ado̱nj.

Suun caꞌneꞌ Pabló rihaan Titó a

¹² Caꞌne̱j ꞌu̱nj man síí cuꞌna̱j Artemas cuchi̱ꞌ soꞌ rihaan so̱ꞌ, ne̱ sese se̱ caꞌvee cuchi̱ꞌ soꞌ, ne̱ caꞌne̱j ꞌu̱nj man síí cuꞌna̱j Tíquico a. Asa̱ꞌ cuchiꞌ soꞌ rihaan so̱ꞌ, ne̱ raꞌya̱nj cuchi̱ꞌ so̱ꞌ chumanꞌ Nicópolis, ga̱a ne̱ nari̱ꞌ tuviꞌ níꞌ ado̱nj. ꞌO̱ se guun rá ꞌu̱nj ca̱yáán ꞌu̱nj chumanꞌ yoꞌ tiempó acoj ndoꞌo ado̱nj.

¹³ Ra̱cuíj so̱ꞌ man síí cuꞌna̱j Zenas licenciadó síí aꞌmii cheꞌé yuvii̱ rihaan cuese̱ do̱ꞌ, man síí cuꞌna̱j Apolos do̱ꞌ, quiꞌya̱j chuvi̱i ro̱j soꞌ caꞌa̱nj ro̱j soꞌ á. Taj se cachi̱in man ro̱j soꞌ, qui̱ꞌyáá so̱ꞌ maꞌ. ꞌO̱ se me maꞌa̱n rasu̱u̱n achiin man ro̱j soꞌ, ne̱ rque̱ so̱ꞌ na̱nj á.

¹⁴ Ne̱ me rá ꞌu̱nj nari̱ꞌ ꞌó nij tinúú níꞌ quiꞌya̱j ndoꞌo nij soꞌ suun sa̱ꞌ cheꞌé tuviꞌ nij soꞌ síí achiin ya̱ rasu̱u̱n man uún chugua̱nj. Sese da̱nj ꞌyaj nij soꞌ, ne̱ vaa se gúnꞌ man nij soꞌ chugua̱nj.

Veꞌé cuma̱n nij tuvi̱ꞌ Titó, rá nij tuvi̱ꞌ Pabló a

¹⁵ Me rá cunuda̱nj nij yuvii̱ ya̱nj ga̱ ꞌu̱nj cuano̱ se vaa veꞌé ca̱yáán so̱ꞌ ado̱nj. Ne̱ cata̱j so̱ꞌ rihaan nij síí ꞌe̱e̱ rá man níꞌ nij síí noco̱ꞌ man Yaꞌanj se vaa veꞌé cuma̱n cunuda̱nj nij soꞌ á. Me rá ꞌu̱nj ꞌo̱ quiꞌya̱j ndoꞌo Yaꞌanj se lu̱j cheꞌé cunuda̱nj nij soj na̱nj ado̱nj.