Santiago 5 - Triqui de San Juan Copala

Quira̱nꞌ ndoꞌo nij ruꞌvee sayuun a

¹ Ne̱ soj si̱j ruꞌvee me se ya̱j me se cuno̱ soj á. Taꞌve̱e cagua̱j uxrá soj cheꞌé sayuun quira̱nꞌ soj vaa güii chugua̱nj.

² Ne̱ rihaan Yaꞌanj me se ase vaa se cuchruu̱ vaa nu̱ꞌ siꞌyaj soj, ne̱ ase vaa yatzíj navij chá xcuu vaa nu̱ꞌ saga̱nꞌ soj,

³ ne̱ ase vaa agaꞌ navij quiꞌyaj tucunj yo̱o roꞌ, da̱nj vaa nu̱ꞌ se‑saꞌa̱nj soj, ne̱ tucunj yo̱o yoꞌ roꞌ, ni̱ꞌyaj Yaꞌanj, ne̱ xca̱j Yaꞌanj cuentá se vaa síí yanu̱ꞌ me soj rihaan síí nique̱, ne̱ cheꞌé dan caca̱a̱ maꞌa̱n soj, quiꞌya̱j tucunj yo̱o yoꞌ ado̱nj. Dan me se uxrá caraa sa̱ꞌ soj saꞌanj rihaan chumii̱ nihánj, tza̱j ne̱ nichrunꞌ caꞌa̱nj niꞌya̱ chumii̱ nihánj na̱nj ado̱nj.

⁴ Xca̱j soj cuentá á. Ne na̱ruꞌvee soj tuꞌvee se‑mo̱zó soj síí rii xnaa̱ soj, ne̱ aguáj ndoꞌo nij mozó yoꞌ achíín niꞌya̱j nij soꞌ rihaan Yaꞌanj cheꞌé se‑saꞌa̱nj nij soꞌ chugua̱nj. Ne̱ catúj snana̱ nij soꞌ xréé Yaꞌanj si̱j uun chij ndoꞌo rej xta̱ꞌ na̱nj á.

⁵ Ne̱ dan me se uun niha̱ꞌ uxrá rá soj rihaan chumii̱ nihánj, ne̱ ina̱nj rasu̱u̱n sa̱ꞌ uxrá mán rihaan soj, ne̱ ase vaa xcáá namij roꞌ, da̱nj vaa soj, ne̱ ne acaj soj cuentá se vaa nichrunꞌ caꞌna̱ꞌ sayuun rihaan soj a̱ maꞌ.

⁶ Tza̱j ne̱ dan me se cutaꞌ ndoꞌo nii cacunꞌ rmi̱ꞌ xráá nij síí sa̱ꞌ, ne̱ nda̱a ticaviꞌ nii man taꞌa̱j nij soꞌ, quiꞌyaj soj, ne̱ ne nacaj nij soꞌ man nij soꞌ maꞌ.

Ga̱a̱ ina̱j nimán níꞌ cachi̱nj niꞌya̱j níꞌ rihaan Yaꞌanj a

⁷ Cheꞌé dan ga̱a̱ ina̱j nimán soj na̱ꞌvi̱j soj nda̱a se quisi̱j güii caꞌna̱ꞌ uún Síí ꞌNi̱j Raꞌa man níꞌ, tinu̱j, nocoj. Xca̱j soj cuentá da̱j ꞌyaj síí unô naa̱ á. Na̱j vaa nimán soꞌ naꞌvi̱j soꞌ maa̱n cheꞌé rej cachi̱j sa̱ꞌ veꞌé xnaa̱ soꞌ, ga̱a ne̱ quiri̱i̱ soꞌ xnaa̱ soꞌ ado̱nj.

⁸ Da̱nj quiꞌya̱j gue̱e̱ soj, ne̱ ga̱a̱ ina̱j nimán soj, ne̱ caꞌne̱j nucua̱j soj nimán soj, cheꞌé se nichrunꞌ caꞌna̱ꞌ uún Síí ꞌNi̱j Raꞌa man níꞌ ado̱nj.

⁹ Se̱ caꞌmii soj nana̱ nij cheꞌé tuviꞌ soj, ga̱a ne̱ se̱ gaa na̱nj quita̱j cacunꞌ xráá maꞌa̱n soj, maan tinu̱j, maan nocoj. ꞌO̱ se a̱j nicunꞌ chru̱u̱n síí caꞌne̱ꞌ cacunꞌ cheꞌé níꞌ rej taꞌyaa na̱nj ado̱nj.

¹⁰ Xca̱j soj cuentá, ni̱ꞌyaj soj nij síí nataꞌ snana̱ Yaꞌanj ga̱a naá se vaa nucua̱j nimán nij soꞌ rihaan sayuun, ne̱ ase vaa quiꞌyaj nij soꞌ roꞌ, da̱nj ga̱a̱ quiꞌya̱j soj á.

¹¹ Ne̱ uxrá cavii sa̱ꞌ nij síí nucua̱j nimán rihaan sayuun, rá níꞌ, niꞌya̱j níꞌ man nij soꞌ, ne̱ a̱j cuno soj se vaa nucua̱j nimán síí cuꞌna̱j Job rihaan sayuun ga̱a naá, ne̱ a̱j neꞌen soj se vaa avii sa̱ꞌ nu̱ꞌ nij síí vaa da̱nj, ꞌyaj Síí ꞌNi̱j Raꞌa man níꞌ, cheꞌé se ꞌe̱e̱ uxrá rá soꞌ niꞌya̱j soꞌ man níꞌ chugua̱nj.

¹² Dan me se nana̱ nihánj me nana̱ noco̱o doj rihaan nu̱ꞌ nij nana̱, tinu̱j, nocoj. Ga̱a caꞌmi̱i̱ soj, ne̱ se̱ cutaꞌ soj raa̱ xta̱ꞌ do̱ꞌ, raa̱ chumii̱ do̱ꞌ, raa̱ me maꞌa̱n ꞌó rasu̱u̱n do̱ꞌ maꞌ. Sese caꞌve̱e quiꞌya̱j soj, rá soj, ne̱ “Caꞌve̱e á”, cata̱j u̱u̱n soj, ne̱ sese se̱ caꞌvee quiꞌya̱j soj, rá soj, ne̱ “Se̱ caꞌvee maꞌ”, cata̱j u̱u̱n soj, ga̱a ne̱ se̱ cutaꞌ Yaꞌanj cacunꞌ xráá soj maan chugua̱nj.

¹³ Sese vaa ꞌo̱ tuviꞌ soj ranꞌ sayuun, ne̱ cachi̱nj niꞌya̱j soꞌ rihaan Yaꞌanj á. Sese vaa ꞌo̱ tuviꞌ soj niha̱ꞌ rá, ne̱ cachra̱a̱ soꞌ chraꞌ taj se vaa veꞌé uxrá quiꞌyaj Yaꞌanj á.

¹⁴ Sese vaa ꞌo̱ tuviꞌ soj ranꞌ, ne̱ nacu̱nj soꞌ man nij síí tumé sa̱ꞌ rihaan Yaꞌanj xꞌneꞌ nij síí noco̱ꞌ man Cristó caꞌna̱ꞌ nij soꞌ, ne̱ cata̱ꞌ tuꞌva nij soꞌ se‑chuvi̱i Síí ꞌNi̱j Raꞌa man níꞌ, ne̱ cuta̱a̱ nij soꞌ casté raa̱ síí ranꞌ, ne̱ cachi̱nj niꞌya̱j nij soꞌ rihaan Yaꞌanj cheꞌé síí ranꞌ a.

¹⁵ Sese ya̱ amán rá nij síí achíín niꞌya̱j rihaan Yaꞌanj se vaa ra̱cuíj Yaꞌanj man síí ranꞌ, ne̱ nahu̱un síí ranꞌ yoꞌ, quiꞌya̱j Síí ꞌNi̱j Raꞌa man níꞌ, ne̱ sese tumé síí ranꞌ yoꞌ cacunꞌ, ne̱ navi̱j cacunꞌ xráá soꞌ a.

¹⁶ Cheꞌé dan nda̱a ꞌo̱ ꞌo̱ níꞌ nata̱ꞌ ya̱ rihaan tinúú níꞌ cheꞌé cacunꞌ tumé níꞌ, ne̱ nda̱a ꞌo̱ ꞌo̱ níꞌ cachi̱nj niꞌya̱j rihaan Yaꞌanj cheꞌé tuviꞌ níꞌ, ga̱a ne̱ nahu̱un níꞌ, quiꞌya̱j Yaꞌanj a. Sese vaa ꞌo̱ síí vaa nica̱ ya̱ nimán achíín niꞌya̱j uxrá rihaan Yaꞌanj, ne̱ cuno̱ ya̱ Yaꞌanj, ne̱ quiꞌya̱j Yaꞌanj nda̱a vaa cachíín niꞌya̱j soꞌ ado̱nj.

¹⁷ Na̱nj yuvii̱ me síí cuꞌna̱j Elías síí cayáán ga̱a naá, ne̱ ase vaa maꞌa̱n níꞌ vaa soꞌ, tza̱j ne̱ cachíín niꞌya̱j soꞌ rihaan Yaꞌanj se vaa se̱ camanꞌ, ne̱ quisíj nda̱a vaꞌnu̱j ya̱ yoꞌ táá néé ne cama̱nꞌ quiꞌyaj soꞌ, quiꞌyaj Yaꞌanj ga̱a cachíín niꞌya̱j soꞌ rihaan Yaꞌanj maꞌ.

¹⁸ Nda̱a síj, ga̱a ne̱ cachíín niꞌya̱j uún soꞌ maa̱n rihaan Yaꞌanj, ga̱a ne̱ camanꞌ uún, quiꞌyaj Yaꞌanj, ga̱a ne̱ cavii sa̱ꞌ naa̱ a.

¹⁹ Cuno̱ soj caꞌmi̱j, tinu̱j, nocoj. Sese ta̱náj xco̱ ꞌo̱ tuviꞌ soj stucua̱nj Yaꞌanj tucuáán ya̱, ne̱ sese gu̱un nucua̱j ꞌó tuviꞌ soj quiꞌya̱j canaán soꞌ ca̱nica̱j uún síí caꞌanj yaníj yoꞌ canoco̱ꞌ soꞌ tucuáán sa̱ꞌ,

²⁰ ne̱ dan me se síí quiꞌya̱j canaán man tuviꞌ caꞌanj yaníj me se gu̱un nucua̱j soꞌ ti̱nanii soꞌ man nimán tuviꞌ soꞌ rihaan sayuun ado̱nj. Dan me se caꞌne̱e̱ noco̱o ndoꞌo soꞌ cacunꞌ xráá tuviꞌ soꞌ ado̱nj.