Santiago 4 - Triqui de San Juan Copala

Se̱ guun rá níꞌ cavi̱i̱ sa̱ꞌ níꞌ rihaan chumii̱ nihánj maꞌ

¹ Me cheꞌé unuꞌ ndoꞌo nij soj ga̱ tuviꞌ soj, rá soj ga̱. Né cheꞌe̱ se me ndoꞌo rá soj ina̱nj quiꞌya̱j soj nda̱a vaa me rá nee̱ man soj, ne̱ cheꞌé dan naꞌvee ga̱a̱ xe̱j nimán soj a̱ naꞌ. Ne̱ né cheꞌe̱ dan unuꞌ soj ga̱ tuviꞌ soj a̱ naꞌ.

² Me ndoꞌo rá soj ga̱a̱ rasu̱u̱n sa̱ꞌ rihaan soj, tza̱j ne̱ ne caꞌve̱e quiri̱ꞌ soj rasu̱u̱n yoꞌ cuma̱n yoꞌ rihaan soj a̱ maꞌ. Dan me se cheꞌé dan ticaviꞌ soj tuviꞌ soj, ne̱ uun xco̱j ruva̱a̱ ndoꞌo rá soj niꞌya̱j soj man síí vaa rasu̱u̱n rihaan ado̱nj. Tza̱j ne̱ soj me se taj se ꞌyáꞌ quiri̱ꞌ soj, ne̱ cheꞌé dan unuꞌ soj ga̱ tuviꞌ soj ado̱nj. Tza̱j ne̱ nuviꞌ rasu̱u̱n sa̱ꞌ rihaan soj, cheꞌé se ne achíín niꞌya̱j soj rihaan Yaꞌanj a̱ maꞌ.

³ Ne̱ nda̱ꞌ se achíín niꞌya̱j soj rihaan Yaꞌanj, tza̱j ne̱ ne rqué Yaꞌanj nij rasu̱u̱n yoꞌ rihaan soj, cheꞌé se chiꞌi̱i̱ ndoꞌo vaa nimán soj ga̱a achíín niꞌya̱j soj rihaan Yaꞌanj maꞌ. Dan me se me ina̱nj rá soj cavi̱i̱ sa̱ꞌ maꞌa̱n ina̱nj soj rihaan chumii̱ nihánj quiꞌya̱j nij rasu̱u̱n yoꞌ ado̱nj.

⁴ Ne̱ ase vaa chana̱ otoj ga̱ ꞌó snóꞌo roꞌ, da̱nj vaa soj, ne̱ ne nocoꞌ ya̱ nimán soj man Yaꞌanj a̱ maꞌ. Xca̱j soj cuentá se vaa síí me rá cavi̱i̱ sa̱ꞌ ina̱nj rihaan chumii̱ nihánj roꞌ, soꞌ me síí ta̱j riꞌyunj man Yaꞌanj ado̱nj. Ya̱ uxrá á.

⁵ Ne̱ xca̱j soj cuentá se vaa ne tuꞌva rmaꞌa̱n nana̱ nihánj nana̱ aꞌmii Danj Yaꞌanj maꞌ: “Yaꞌanj quiꞌyaj nimán níꞌ, ne̱ me uxrá rá Yaꞌanj canoco̱ꞌ nimán níꞌ man o̱rúnꞌ soꞌ a”, taj Danj Yaꞌanj ado̱nj.

⁶ Ne̱ uxrá doj ꞌyaj Yaꞌanj se lu̱j cheꞌé níꞌ, ne̱ cheꞌé dan no̱ nana̱ nihánj rihaan Danj Yaꞌanj a: “Aráán Yaꞌanj chrej rihaan nij síí xta̱ꞌ nimán se̱ cavii sa̱ꞌ nij soꞌ, tza̱j ne̱ ꞌyaj Yaꞌanj se lu̱j cheꞌé nij síí vaa nica̱ꞌ nimán a”, taj Danj Yaꞌanj a.

⁷ Cheꞌé dan cuno̱ soj rihaan Yaꞌanj á. Naquiꞌya̱j soꞌo̱ soj xréé soj rihaan Síí Chre̱e, ne̱ cuna̱nj Síí Chre̱e rihaan soj na̱nj ado̱nj.

⁸ Nichru̱nꞌ soj rihaan Yaꞌanj, ga̱a ne̱ nichru̱nꞌ Yaꞌanj rihaan soj á. Soj si̱j tumé cacunꞌ roꞌ, ta̱náj soj stucua̱nj soj tucuáán chiꞌi̱i̱, ne̱ soj si̱j uun vi̱j rá canoco̱ꞌ man Yaꞌanj roꞌ, naquiꞌya̱j nica̱ soj nimán soj á.

⁹ Se̱ gaa niha̱ꞌ rá soj caꞌnga̱ꞌ soj maꞌ. Vaa cheꞌé nano̱ rá soj ne̱ taꞌve̱e soj cheꞌé cacunꞌ tumé soj á.

¹⁰ Naquiꞌya̱j nica̱ꞌ soj nimán soj rihaan Síí ꞌNi̱j Raꞌa man níꞌ, ga̱a ne̱ cavi̱i̱ sa̱ꞌ soj, quiꞌya̱j soꞌ chugua̱nj.

Se̱ caꞌmii níꞌ nana̱ nij cheꞌé tuviꞌ níꞌ maꞌ

¹¹ Se̱ guun caꞌmi̱i̱ soj nana̱ nij cheꞌé tuviꞌ soj, maan tinu̱j, maan nocoj. Síí aꞌmii cheꞌé tuviꞌ do̱ꞌ, síí araa cacunꞌ xráá tuviꞌ do̱ꞌ, soꞌ me síí taj se vaa taj cheꞌé cuno̱ níꞌ cunuda̱nj stucua̱nj Yaꞌanj chugua̱nj. Ne̱ síí aꞌmii da̱nj roꞌ, né si̱j uno stucua̱nj Yaꞌanj me soꞌ maꞌ. Ma̱an se síí naquiꞌyaj cu̱u stucua̱nj Yaꞌanj me soꞌ vaa ga̱a na̱nj á.

¹² Dan me se o̱rúnꞌ Yaꞌanj ya̱ me síí cuchruj stucua̱nj Yaꞌanj, ne̱ veé o̱rúnꞌ Yaꞌanj me síí caꞌne̱ꞌ cacunꞌ cheꞌé níꞌ vaa güii, ne̱ soꞌ me síí gu̱un nucua̱j ti̱nanii man níꞌ rihaan sayuun, ne̱ veé soꞌ me síí gu̱un nucua̱j caꞌne̱j man níꞌ rihaan yaꞌan ado̱nj. Tza̱j ne̱ níꞌ me se yuvii̱ u̱u̱n me níꞌ, ne̱ taj cheꞌé cara̱a níꞌ cacunꞌ xráá tuviꞌ níꞌ maꞌ.

Ne neꞌen níꞌ da̱j quira̱nꞌ níꞌ aꞌyuj a

¹³ Ne̱ vaa soj si̱j aꞌmii nana̱ nihánj uún a: “Se cuanꞌ se aꞌyuj se caꞌa̱nj núj ꞌo̱ chumanꞌ ca̱yáán núj ꞌo̱ yoꞌ, ne̱ quira̱a̱n núj rasu̱u̱n natuꞌve̱e̱ núj, ne̱ quiꞌya̱j canaán ndoꞌo núj saꞌanj”, taj soj, ne̱ nihánj me se cuno̱ soj caꞌmi̱j á.

¹⁴ Nij soj me se ne neꞌen uxrá soj da̱j quira̱nꞌ soj aꞌyuj a̱ maꞌ. ꞌO̱ se ase vaa ngaa yaꞌa̱an roꞌ, da̱nj vaa soj rihaan chumii̱ nihánj, ne̱ nanij ngaa yaꞌa̱an ꞌo̱ orá leꞌe̱j nii, ne̱ raꞌya̱nj naxtunꞌ uún ngaa yaꞌa̱an yoꞌ na̱nj ado̱nj.

¹⁵ Cheꞌé dan no̱ xcúún soj cata̱j soj a: “Sese me rá Síí ꞌNi̱j Raꞌa man níꞌ, ne̱ caꞌve̱e ga̱a̱ iꞌna̱ꞌ níꞌ, ne̱ caꞌve̱e quiꞌya̱j níꞌ se nihánj se yoꞌ se ado̱nj”, cata̱j soj á.

¹⁶ Tza̱j ne̱ soj me se aꞌmii xta̱ꞌ ndoꞌo soj, ne̱ chiꞌi̱i̱ ndoꞌo vaa nu̱ꞌ nana̱ xta̱ꞌ aꞌmii soj ado̱nj.

¹⁷ Tza̱j ne̱ sese neꞌen níꞌ da̱j me rá Yaꞌanj quiꞌya̱j níꞌ, ne̱ ne ꞌyaj níꞌ da̱nj, ga̱a ne̱ gu̱un níꞌ síí tumé ndoꞌo cacunꞌ na̱nj ado̱nj.