Santiago 3 - Triqui de San Juan Copala

ꞌYaj chiꞌi̱i̱ níꞌ man tuviꞌ níꞌ, sese ne tumé níꞌ nana̱ avii tuꞌva níꞌ a

¹ Tinu̱j. Nocoj. Se̱ guun ga̱a̱ queꞌe̱e̱ maestró tihaa̱n snana̱ Yaꞌanj man soj maꞌ. ꞌO̱ se núj si̱j tihaa̱n snana̱ Yaꞌanj roꞌ, neꞌen soj se vaa doj a̱ cara̱a Yaꞌanj cacunꞌ xráá núj sese se̱ cuno núj rihaan Yaꞌanj ado̱nj.

² Dan me se ta̱ranꞌ níꞌ me se ꞌyaj ndoꞌo níꞌ se chiꞌi̱i̱ na̱nj ado̱nj. Tza̱j ne̱ sese vaa ꞌo̱ síí ne aꞌmii a̱ ꞌó nana̱ chiꞌi̱i̱, ne̱ soꞌ me síí caꞌve̱e gu̱un nucua̱j gu̱un chij rihaan nu̱ꞌ nee̱ man soꞌ chugua̱nj.

³ Xca̱j soj cuentá ni̱ꞌyaj soj man cuayó á. Nda̱ꞌ se xi̱j vaa cuayó, tza̱j ne̱ anuꞌ níꞌ agaꞌ cunii tuꞌva xoꞌ, ga̱a ne̱ cuno̱ xoꞌ rihaan níꞌ caꞌa̱nj xoꞌ me rej maꞌa̱n me rá níꞌ chugua̱nj.

⁴ Ne̱ xca̱j soj cuentá ni̱ꞌyaj soj man rihoo xi̱j chéé rihaan na uún á. Nda̱ꞌ se xi̱j vaa rihoo, ne̱ nucua̱j ndoꞌo oꞌ nana̱ rihaan rihoo, tza̱j ne̱ rcuchra̱ꞌ cunii rásuun nii tuguáj nii rihoo, ne̱ caꞌa̱nj yoꞌ me rej maꞌa̱n me rá nii caꞌa̱nj yoꞌ uún ado̱nj.

⁵ Ne̱ taꞌngaꞌ da̱nj vaa gue̱e̱ daa níꞌ uún, ne̱ tzínꞌ vaa daa níꞌ, tza̱j ne̱ nucua̱j uxrá daa níꞌ na̱nj ado̱nj. Dan me se neꞌen soj se vaa o̱rúnꞌ yaꞌan leꞌe̱j nii roꞌ, caꞌve̱e quiꞌya̱j yoꞌ caca̱a̱ cunu̱ꞌ quij na̱nj á.

⁶ Ne̱ ase vaa yaꞌan vaa nana̱ aꞌmii daa níꞌ, ne̱ uun nucua̱j daa níꞌ quiꞌya̱j ndoꞌo yoꞌ se chiꞌi̱i̱, ne̱ nda̱a riꞌ nu̱ꞌ man níꞌ, ꞌyaj daa níꞌ na̱nj ado̱nj. Riꞌ na̱nj níꞌ, ꞌyaj daa níꞌ, ne̱ Síí Chre̱e me síí ꞌyaj aꞌmii daa níꞌ nana̱ chiꞌi̱i̱ na̱nj á.

⁷ Aꞌvee uun chij yuvii̱ rihaan me maꞌa̱n xcuu, ne̱ dan me se rihaan xcuu ma̱n quij do̱ꞌ, rihaan xtâj do̱ꞌ, rihaan xcuáá do̱ꞌ, rihaan xcuu ma̱n rque na yaꞌa̱nj do̱ꞌ, uun chij yuvii̱,

⁸ tza̱j ne̱ taj se ꞌyáꞌ gu̱un chij a̱ ꞌó yuvii̱ rihaan daa maꞌa̱n yuvii̱ maꞌ. Avii ndoꞌo nana̱ chiꞌi̱i̱ tuꞌva níꞌ, ne̱ taj se ꞌyáꞌ gu̱un dínj tuꞌva níꞌ, ꞌyaj daa níꞌ a̱ maꞌ. Ase vaa na xna̱j ta̱j tuꞌva xcuáá yuva̱a̱ roꞌ, da̱nj vaa nana̱ chiꞌi̱i̱ avii tuꞌva níꞌ, ꞌyaj daa níꞌ chugua̱nj.

⁹ Dan me se tuꞌva níꞌ me avii nana̱ sa̱ꞌ aꞌmii níꞌ cheꞌé Rej níꞌ Yaꞌanj Si̱j ꞌNi̱j Raꞌa man níꞌ, ne̱ veé tuꞌva níꞌ avii nana̱ chre̱e cheꞌé tuviꞌ níꞌ, ꞌyaj daa níꞌ uún a. Ne̱ dan me se ase vaa Yaꞌanj roꞌ, da̱nj vaa nij tuvi̱ꞌ níꞌ ga̱a quiꞌyaj Yaꞌanj man ta̱ranꞌ níꞌ a.

¹⁰ Veé tuꞌva níꞌ avii nana̱ sa̱ꞌ ne̱ veé tuꞌva níꞌ avii nana̱ chre̱e, ꞌyaj daa níꞌ, ne̱ nij uxrá vaa ꞌyaj níꞌ da̱nj, na̱nj tinu̱j, nocoj.

¹¹ Se̱ caꞌvee cavi̱i̱ na chiha̱nꞌ ga̱ na ꞌne̱ꞌ rque o̱rúnꞌ yuꞌuj na maꞌ.

¹² Taj chruj olivó avii raa̱ chruun higó maꞌ. Ne̱ chruj higó ne avii raa̱ chruun uvá maꞌ. Ne̱ da̱nj na̱nj na uún, ne̱ se̱ caꞌvee cu̱riha̱nj na chiha̱nꞌ rej nu̱u̱ na ꞌne̱ꞌ a̱ maan ado̱nj.

Nataꞌ Santiagó cheꞌé síí nica̱j tucuáán sa̱ꞌ cavii rihaan Yaꞌanj a

¹³ Sese vaa taꞌa̱j soj síí acaj cuentá ne̱ avii ndoꞌo raa̱ soj, rá soj, ne̱ veꞌé ina̱nj quiꞌya̱j soj si̱j vaa da̱nj rá rihaan tuviꞌ soj, ne̱ xca̱j tuviꞌ soj cuentá se vaa cheꞌé se avii raa̱ soj roꞌ, cheꞌé dan síí na̱j nimán me soj, ne̱ cheꞌé dan me veꞌé ina̱nj ꞌyaj soj a.

¹⁴ Tza̱j ne̱ sese xco̱j ruva̱a̱ rá soj, ne̱ sese me ina̱nj rá soj quiri̱i̱ taꞌngaꞌ soj rihaan tuviꞌ soj, ga̱a ne̱ se̱ guun caꞌmi̱i̱ xta̱ꞌ soj cata̱j soj se vaa síí acaj cuentá avii raa̱ me soj a̱ maꞌ. ꞌO̱ se né si̱j acaj cuentá me síí ꞌyaj da̱nj maꞌ.

¹⁵ Sese si̱j xco̱j ruva̱a̱ rá me soj, ne̱ né si̱j nica̱j tucuáán sa̱ꞌ cavii rihaan Yaꞌanj me soj a̱ maꞌ. Ina̱nj tucuáán cavii raa̱ nij síí ma̱n rihaan chumii̱ nihánj me tucuáán nica̱j soj, ne̱ da̱nj ina̱nj ꞌyaj yuvii̱ cheꞌé se nana̱ chre̱e uno nij yuvii̱ na̱nj ado̱nj.

¹⁶ Rej ya̱nj síí xco̱j ruva̱a̱ rá me se taj se qui̱ꞌyáꞌ ga̱a̱ dínj maꞌ. Daj a̱ se chiꞌi̱i̱ ꞌyaj nij soꞌ na̱nj ado̱nj.

¹⁷ Tza̱j ne̱ síí nica̱j tucuáán sa̱ꞌ cavii rihaan Yaꞌanj me se ꞌo̱ vaa sa̱ꞌ nimán soꞌ, ne̱ cheꞌé dan ꞌo̱ chij yáán soꞌ, ne̱ ne unuꞌ soꞌ ga̱ yuvii̱ maꞌ. ꞌO̱ lu̱j aꞌmii soꞌ ga̱ tuviꞌ soꞌ, ne̱ ne naquiꞌyaj soꞌo̱ soꞌ xréé soꞌ ga̱a aꞌmii tuviꞌ soꞌ ga̱ soꞌ maꞌ. ꞌE̱e̱ uxrá rá soꞌ niꞌya̱j soꞌ tuviꞌ soꞌ, ne̱ ina̱nj se sa̱ꞌ ꞌyaj soꞌ, ne̱ ꞌo̱ cuya̱a̱n veꞌé ꞌyaj soꞌ rihaan nu̱ꞌ nij yuvii̱, ne̱ ꞌyaj soꞌ nu̱ꞌ nda̱a vaa taj soꞌ a. Veé síí ꞌyaj nu̱ꞌ nihánj me síí nica̱j ya̱ tucuáán sa̱ꞌ cavii rihaan Yaꞌanj chugua̱nj.

¹⁸ Dan me se síí ꞌyaj dínj yáán yuvii̱ ga̱ tuviꞌ yuvii̱ roꞌ, maꞌa̱n soꞌ me síí ya̱nj dínj ga̱ tuviꞌ, ne̱ cheꞌé dan cunu̱u sa̱ꞌ nij tuvi̱ꞌ soꞌ rihaan Yaꞌanj, quiꞌya̱j soꞌ na̱nj ado̱nj.