Santiago 2 - Triqui de San Juan Copala

No̱ xcúún níꞌ quiꞌya̱j níꞌ se lu̱j rihaan daj a̱ yuvii̱ a

¹ Amán rá soj niꞌya̱j soj man Jesucristó Si̱j ꞌNi̱j Raꞌa man níꞌ, síí niꞌndaj ya̱ veꞌé vaa, tinu̱j, nocoj. Cheꞌé dan se̱ guun cata̱j soj se vaa vaa se uun doj síí ruꞌvee rihaan síí nique̱ maꞌ.

^2-3 Xca̱j soj cuentá, ne̱ ga̱a nuu chre̱ꞌ xꞌneꞌ soj cachra̱a̱ soj rihaan Yaꞌanj, ne̱ sese atúj ꞌo̱ síí ruꞌvee nu̱u̱ yatzíj sa̱ꞌ rej ma̱n soj, ne̱ ꞌni̱j raꞌa soꞌ seꞌej tuꞌve̱e̱ ndoꞌo, ne̱ aráyaꞌa̱nj ndoꞌo soj man soꞌ, ne̱ taj soj se vaa caꞌa̱nj quita̱j soꞌ chruun xlá sa̱ꞌ a. Ne̱ sese atúj ꞌo̱ síí nique̱ nu̱u̱ yatzíj tachri̱nj rej ma̱n soj, ne̱ ne aꞌmii noco̱o soj ga̱ soꞌ maꞌ. Caꞌve̱e canicu̱nꞌ caya̱ soꞌ do̱ꞌ, caꞌve̱e caꞌa̱nj ca̱yáán soꞌ rihaan yoꞌóó rej taco̱j soj do̱ꞌ, taj soj rihaan soꞌ na̱nj á.

⁴ Tza̱j ne̱ sese da̱nj quiꞌya̱j soj, ne̱ vaa se uun doj ruꞌvee rihaan síí nique̱, rá soj, ne̱ ase vaa cuese̱ chiꞌi̱i̱ nimán naꞌvej rá xca̱j sa̱ꞌ cuentá cheꞌé yuvii̱ vaa soj na̱nj chugua̱nj.

⁵ ꞌE̱e̱ raj man soj, tinu̱j, nocoj. Nano̱ xre̱j soj nana̱ caꞌmi̱j á. Narii Yaꞌanj man nij síí nique̱ gu̱un nij soꞌ síí amán uxrá rá niꞌya̱j man soꞌ ado̱nj. Nique̱ nij soꞌ rihaan yoꞌóó nihánj, tza̱j ne̱ ya̱ ca̱yáán nij soꞌ ga̱ Yaꞌanj asa̱ꞌ guun chij Yaꞌanj, nda̱a vaa cataꞌ tuꞌva Yaꞌanj quiꞌya̱j soꞌ ga̱ nij síí aráj cochro̱j rihaan soꞌ ado̱nj.

⁶ Tza̱j ne̱ nij soj me se nij ndoꞌo ꞌyaj soj ga̱ nij síí nique̱ chugua̱nj. Xca̱j soj cuentá se vaa nij ruꞌvee me síí ꞌyaj sayuun man soj, ne̱ ꞌanj soj rihaan cuese̱, ꞌyaj nij ruꞌvee a.

⁷ Ne̱ nana̱ qui̱j aꞌmii nij ruꞌvee cheꞌé se‑chuvi̱i Jesucristó síí cataꞌ ne soj cheꞌé a.

⁸ Dan me se vaa cheꞌé cuno̱ níꞌ suun caꞌneꞌ Yaꞌanj rihaan níꞌ suun no̱ rihaan Danj Yaꞌanj nana̱ ya̱ ado̱nj. Ne̱ dan me se taj suun yoꞌ a: “Ga̱a̱ ꞌe̱e̱ rá níꞌ man tuviꞌ níꞌ nda̱a rá se vaa ꞌe̱e̱ rá níꞌ man maꞌa̱n níꞌ na̱nj á”, taj suun yoꞌ, ne̱ sese cuno̱ soj suun yoꞌ, ne̱ cuna̱j ꞌyaj soj ado̱nj.

⁹ Tza̱j ne̱ sese narii soj yuvii̱ ruꞌvee ina̱nj, ga̱a ne̱ tumé ndoꞌo soj cacunꞌ cheꞌé se ne ꞌyaj ya̱ soj stucua̱nj Yaꞌanj ado̱nj.

¹⁰ Sese vaa ꞌo̱ síí ꞌyaj nu̱ꞌ stucua̱nj Yaꞌanj, tza̱j ne̱ sese vaa o̱rúnꞌ suun naꞌvej soꞌ quiꞌya̱j soꞌ, ne̱ ase vaa síí ne uno daj chiha̱a̱ míj rihaan Yaꞌanj roꞌ, vaa soꞌ na̱nj á.

¹¹ ꞌO̱ se cataj Yaꞌanj se vaa se̱ cotoj ꞌo̱ soꞌ ga̱ ꞌó yuvii̱ sese né nica̱ soꞌ me, ne̱ veé cataj uún Yaꞌanj se vaa se̱ ticaviꞌ níꞌ tuviꞌ níꞌ a. Vaa síí ne otoj ga̱ ꞌó yuvii̱ sese né ni̱ca̱ soꞌ me, tza̱j ne̱ ticaviꞌ soꞌ tuviꞌ soꞌ, ga̱a ne̱ síí ꞌyaj da̱nj roꞌ, yu̱u̱n cheꞌe̱ tiriꞌ soꞌ stucua̱nj Yaꞌanj tucuáán noco̱ꞌ soꞌ ga̱a na̱nj ado̱nj.

¹² Cheꞌé dan veꞌé caꞌmi̱i̱ soj, ne̱ veꞌé quiꞌya̱j soj, ne̱ cu̱nuû rá soj se vaa vaa güii caꞌne̱ꞌ Yaꞌanj cacunꞌ cheꞌé níꞌ, nda̱a vaa taj stucua̱nj Yaꞌanj tucuáán tinanii man níꞌ rihaan cacunꞌ á.

¹³ ꞌO̱ se asa̱ꞌ caꞌne̱ꞌ Yaꞌanj cacunꞌ cheꞌé yuvii̱, ne̱ se̱ gaa ꞌe̱e̱ rá Yaꞌanj ni̱ꞌyaj Yaꞌanj man síí ne ꞌe̱e̱ rá man tuviꞌ maꞌ. Tza̱j ne̱ se niꞌya̱nj rá me se yoꞌ me quiꞌya̱j canaán rihaan sayuun ado̱nj.

Cuchuma̱n rá níꞌ ni̱ꞌyaj níꞌ Yaꞌanj, ne̱ quiꞌya̱j níꞌ se lu̱j uún a

¹⁴ Cuno̱ soj caꞌmi̱j, tinu̱j, nocoj. Sese taj ꞌo̱ soꞌ se vaa amán rá soꞌ niꞌya̱j soꞌ Yaꞌanj, tza̱j ne̱ ne ꞌyaj soꞌ a̱ doj se lu̱j rihaan tuviꞌ soꞌ, ne̱ caꞌve̱e nani̱i̱ soꞌ rihaan sayuun ne̱ cavi̱i̱ sa̱ꞌ soꞌ, rá soj naꞌ. Taj maꞌ.

¹⁵ Xca̱j soj cuentá á. Sese vaa tinúú níꞌ do̱ꞌ, raꞌvij níꞌ do̱ꞌ, ne̱ achiin se chá achiin yatzíj cu̱nuû soꞌ,

¹⁶ ne̱ sese cata̱j ꞌo̱ soj rihaan síí achiin rasu̱u̱n man a: “Caꞌa̱nj sa̱ꞌ so̱ꞌ, ne̱ dínj ga̱a̱ nimán so̱ꞌ á. Rque̱ Yaꞌanj yatzíj quita̱j xráá so̱ꞌ do̱ꞌ, rque̱ Yaꞌanj se chá cha̱ so̱ꞌ do̱ꞌ á”, cata̱j soꞌ rihaan síí achiin rasu̱u̱n man, tza̱j ne̱ se̱ quirii soꞌ se vaa achiin man tuviꞌ níꞌ, ne̱ taj se gúnꞌ snana̱ soꞌ ga̱a a̱ maꞌ.

¹⁷ Ya̱ veé da̱nj vaa a. Sese vaa síí taj se vaa amán rá soꞌ niꞌya̱j soꞌ Yaꞌanj, tza̱j ne̱ ne ꞌyaj soꞌ a̱ doj se lu̱j rihaan tuviꞌ soꞌ, ne̱ caꞌve̱e nani̱i̱ soꞌ rihaan sayuun ne̱ cavi̱i̱ sa̱ꞌ soꞌ, rá soj naꞌ.

¹⁸ Tza̱j ne̱ taꞌa̱j nii cata̱j rihaan tuviꞌ se vaa so̱ꞌ me se síí amán rá niꞌya̱j man Yaꞌanj mé so̱ꞌ, ne̱ ꞌu̱nj nihánj me se síí ꞌyaj se sa̱ꞌ rihaan Yaꞌanj mé ꞌu̱nj, cata̱j nii chugua̱nj. Tza̱j ne̱ xca̱j so̱ꞌ cuentá, ne̱ asa̱ꞌ caꞌve̱e queneꞌe̱n yuvii̱ se vaa síí amán rá niꞌya̱j man Yaꞌanj mé so̱ꞌ, sese nuviꞌ a̱ ꞌó se sa̱ꞌ ꞌyáá so̱ꞌ ga̱. Tza̱j ne̱ ꞌu̱nj nihánj me se cheꞌé se sa̱ꞌ ꞌyáá ꞌu̱nj roꞌ, cheꞌé dan neꞌen yuvii̱ se vaa síí amán rá niꞌya̱j man Yaꞌanj mé ꞌu̱nj chugua̱nj.

¹⁹ Dan me se cuna̱j ꞌyáá so̱ꞌ se vaa amán rá so̱ꞌ se vaa o̱rúnꞌ Yaꞌanj, tza̱j ne̱ da̱nj ꞌyaj gue̱e̱ nij nana̱ chre̱e uún, ne̱ cheꞌé dan chuꞌviꞌ nij soꞌ nda̱a riꞌíj maꞌa̱n man nij soꞌ cheꞌé sayuun quiꞌya̱j Yaꞌanj man nij soꞌ vaa güii a.

²⁰ Síí niꞌyo̱n mé so̱ꞌ, sese uun rá so̱ꞌ se vaa taj cheꞌé qui̱ꞌyáá so̱ꞌ se lu̱j, ne̱ nihánj me se ti̱haán ꞌu̱nj rihaan so̱ꞌ se vaa sese taj se lu̱j ꞌyaj níꞌ, ne̱ amán rmaꞌa̱n rá níꞌ niꞌya̱j níꞌ Yaꞌanj na̱nj chugua̱nj.

²¹ Dan me se xi̱i níꞌ síí cuꞌna̱j Abraham síí cayáán ga̱a naá me se neꞌén so̱ꞌ se vaa caꞌvej soꞌ ticavi̱ꞌ soꞌ taꞌníí soꞌ síí cuꞌna̱j Isaac rihaan chraan altar rque̱ soꞌ man taꞌníí soꞌ rihaan Yaꞌanj a. Ne̱ cheꞌé se vaa quiꞌyaj soꞌ da̱nj roꞌ, cheꞌé dan cunuu sa̱ꞌ soꞌ rihaan Yaꞌanj ado̱nj.

²² Xca̱j so̱ꞌ cuentá se vaa cheꞌé se cuchumán rá Abraham niꞌya̱j soꞌ man Yaꞌanj roꞌ, cheꞌé dan me guun rá soꞌ quiꞌya̱j soꞌ suun caꞌneꞌ Yaꞌanj rihaan soꞌ, ne̱ cheꞌé se quiꞌyaj soꞌ da̱nj roꞌ, cheꞌé dan neꞌen níꞌ se vaa cuchumán ya̱ nu̱ꞌ rá soꞌ niꞌya̱j soꞌ man Yaꞌanj chugua̱nj.

²³ Ne̱ quisíj ya̱ nu̱ꞌ snana̱ Yaꞌanj nana̱ nihánj a: “Cuchumán rá Abraham niꞌya̱j soꞌ man Yaꞌanj, ne̱ cheꞌé dan cataj Yaꞌanj se vaa si̱j sa̱ꞌ nimán me Abraham a.” Ne̱ síí chéé ga̱ Yaꞌanj me Abraham, taj nii uún a.

²⁴ Xca̱j soj cuentá se vaa cheꞌé se lu̱j ꞌyaj níꞌ roꞌ, cheꞌé dan nuu sa̱ꞌ nimán níꞌ rihaan Yaꞌanj, ne̱ né cheꞌe̱ se ina̱nj taj níꞌ se vaa amán rá níꞌ niꞌya̱j níꞌ man Yaꞌanj me nuu sa̱ꞌ nimán níꞌ rihaan Yaꞌanj maꞌ.

²⁵ Dan me se Rahab chana̱ niha̱ꞌ rá ga̱ chii me se cunuu sa̱ꞌ noꞌ rihaan Yaꞌanj ga̱a quiꞌyaj noꞌ se lu̱j rihaan ro̱j síí caꞌnéé Yaꞌanj man caꞌmi̱i̱ nana̱ sa̱ꞌ rihaan noꞌ a. Ne̱ dan me se veꞌé racuíj noꞌ man ro̱j síí israelitá caꞌanj suun chiháán noꞌ caxríj yuve̱ noꞌ man ro̱j soꞌ rihaan nij síí guun rá ticavi̱ꞌ man ro̱j soꞌ, ga̱a ne̱ caꞌnéé noꞌ man ro̱j soꞌ ꞌó chrej vaa dínj na̱nꞌ ro̱j soꞌ tucuá ro̱j soꞌ a.

²⁶ Dan me se sese nuviꞌ nimán ꞌo̱ soꞌ, ne̱ né si̱j vaa iꞌna̱ꞌ me soꞌ maꞌ. Ma̱an cúú caviꞌ u̱u̱n me soꞌ, ne̱ ase vaa xnangá nuviꞌ nimán rque roꞌ, da̱nj vaa síí taj se vaa amán rá niꞌya̱j man Yaꞌanj, ne̱ nuviꞌ a̱ doj se lu̱j ꞌyaj soꞌ, ne̱ taj se gúnꞌ man nana̱ tuꞌva u̱u̱n soꞌ a̱ maan ado̱nj.