Santiago 1 - Triqui de San Juan Copala

¹ ꞌU̱nj roꞌ, me síí cuꞌna̱j Santiagó, síí nu̱u̱ rihaan Yaꞌanj do̱ꞌ, rihaan Jesucristó Si̱j ꞌNi̱j Raꞌa man níꞌ do̱ꞌ, ne̱ ꞌyáá ꞌu̱nj yanj nihánj caꞌne̱j ꞌu̱nj rihaan ta̱ranꞌ soj si̱j noco̱ꞌ man Yaꞌanj nij síí chaꞌnuu̱ rihaan queꞌe̱e̱ chumanꞌ na̱j rihaan chumii̱ a. Dan me se ase vaa chuvi̱j nij xꞌneꞌ yuvii̱ israelitá yuvii̱ noco̱ꞌ man Yaꞌanj ga̱a naá roꞌ, da̱nj vaa gue̱e̱ soj rihaan Yaꞌanj na̱nj á.

Rque̱ Yaꞌanj nana̱ cu̱u sa̱ꞌ rihaan níꞌ a

² Dan me se asa̱ꞌ caꞌnaꞌ me maꞌa̱n sayuun rihaan soj, ne̱ gu̱un niha̱ꞌ uxrá rá nimán soj, tinu̱j, nocoj.

³ ꞌO̱ se neꞌen soj se vaa asa̱ꞌ caꞌnaꞌ sayuun rihaan soj cheꞌé se me soj síí amán rá niꞌya̱j man Yaꞌanj, ne̱ cunu̱u nucua̱j doj nimán soj ado̱nj.

⁴ Ma̱an se ga̱a̱ nana̱j uxrá nimán soj rihaan sayuun, ga̱a ne̱ caꞌve̱e cavi̱i̱ sa̱ꞌ nu̱ꞌ se‑su̱u̱n soj, ne̱ síí cachij ya̱ nu̱ꞌ nimán gu̱un soj, ne̱ se̱ cachiin a̱ doj se sa̱ꞌ man nimán soj a̱ maan ado̱nj.

⁵ Sese ꞌo̱ tuviꞌ maꞌa̱n soj me rá nari̱ꞌ nana̱ cu̱u sa̱ꞌ, ne̱ cachi̱nj niꞌya̱j soꞌ rihaan Yaꞌanj, ne̱ rque̱ Yaꞌanj nana̱ cu̱u sa̱ꞌ yoꞌ man soꞌ chugua̱nj. ꞌO̱ se né si̱j nachriꞌ man síí achíín niꞌya̱j me Yaꞌanj maꞌ. Tana̱nj niha̱ꞌ rá soꞌ ga̱a achíín níꞌ man soꞌ, ne̱ rqué soꞌ nu̱ꞌ se sa̱ꞌ man cunuda̱nj yuvii̱ ado̱nj.

⁶ Tza̱j ne̱ ꞌo̱ cuchuma̱n ya̱ rá síí achíín niꞌya̱j rihaan Yaꞌanj ni̱ꞌyaj soꞌ man Yaꞌanj, ne̱ se̱ guun vi̱j rá soꞌ maꞌ. Tza̱j ne̱ sese guun vi̱j nimán ꞌo̱ soꞌ, ne̱ ase chéé nuû na yaꞌa̱nj ga̱a oꞌ nana̱ rihaan na yaꞌa̱nj roꞌ, da̱nj vaa nimán síí uun vi̱j nimán, chéé nuû uxrá nimán soꞌ uún,

⁷ ne̱ taj cheꞌé gu̱un rá soꞌ se vaa rque̱ Yaꞌanj rasu̱u̱n man soꞌ a̱ maꞌ.

⁸ ꞌO̱ se síí vi̱j vaa nimán me se ꞌo̱ chéé nuû nimán soꞌ na̱nj ado̱nj.

Nataꞌ Santiagó cheꞌé ruꞌvee do̱ꞌ, cheꞌé síí nique̱ do̱ꞌ a

⁹ Ne̱ soj si̱j nique̱, tza̱j ne̱ ga̱a̱ niha̱ꞌ rá soj cheꞌé se si̱j avii sa̱ꞌ rihaan Yaꞌanj me soj ado̱nj.

¹⁰ Ne̱ vaa nij soj si̱j ruꞌvee uún, ne̱ ga̱a̱ niha̱ꞌ rá soj cheꞌé se nuu nica̱ꞌ nimán soj rihaan Yaꞌanj á. ꞌO̱ se ase vaa cuaj navij yâj ma̱n tacaan roꞌ, da̱nj ga̱a̱ navi̱j nij ruꞌvee vaa güii, ne̱ quina̱j se‑saꞌa̱nj nij soꞌ na̱nj ado̱nj.

¹¹ Dan me se ga̱a uun xta̱ꞌ güii, ne̱ uun yaꞌa̱an naán, ga̱a ne̱ nacoo̱ coj, ne̱ uun cheꞌe̱ yâj yoꞌ ayuu yoꞌ raa̱ coj a. Núj ayuu yoꞌ, ne̱ taj se gúnꞌ man yoꞌ ga̱a maꞌ. Ne̱ veé da̱nj vaa gue̱e̱ nij ruꞌvee uún, ne̱ ꞌo̱ nuû rá nij soꞌ rej quiꞌya̱j canaán nij soꞌ saꞌanj, ne̱ dan me se va̱j cavi̱ꞌ nij soꞌ na̱nj á.

Né si̱j ꞌyaj uun rá níꞌ quiꞌya̱j níꞌ cacunꞌ me Yaꞌanj maꞌ

¹² Síí nucua̱j nimán rihaan sayuun roꞌ, soꞌ me síí cavi̱i̱ sa̱ꞌ, ne̱ asa̱ꞌ quiꞌyaj canáán soꞌ rihaan sayuun, ne̱ rque̱ Yaꞌanj se sa̱ꞌ man soꞌ ase vaa rqué nii ꞌo̱ cachriin coroná sa̱ꞌ cu̱nuû raa̱ ꞌo̱ síí quiꞌyaj canaán a. Ne̱ se sa̱ꞌ yoꞌ me rej caꞌve̱e ca̱yáán so̱ꞌ ga̱ Yaꞌanj nu̱ꞌ cavii nu̱ꞌ caꞌanj, nda̱a vaa cataꞌ tuꞌva Yaꞌanj se vaa ya̱ quiꞌya̱j Yaꞌanj cheꞌé nij síí aráj cochro̱j rihaan soꞌ a.

¹³ Sese me rá níꞌ quiꞌya̱j níꞌ cacunꞌ, ne̱ se̱ guun cata̱j níꞌ se vaa Yaꞌanj me síí quiꞌyaj guun rá níꞌ quiꞌya̱j níꞌ cacunꞌ maꞌ. A̱ ꞌó xcoꞌ se̱ caꞌvee quiꞌya̱j Yaꞌanj cacunꞌ maꞌ. Ne̱ né Yaꞌa̱nj me síí axríj chrej chiꞌi̱i̱ rque a̱ ꞌó yuvii̱ a̱ maꞌ.

¹⁴ ꞌO̱ se maꞌa̱n ina̱nj níꞌ me rá quiꞌya̱j se chiꞌi̱i̱ cheꞌé se veꞌé vaa se chiꞌi̱i̱ yoꞌ rihaan níꞌ na̱nj ado̱nj.

¹⁵ Tza̱j ne̱ sese quiꞌya̱j níꞌ nda̱a vaa me rá maꞌa̱n níꞌ quiꞌya̱j níꞌ, ne̱ quiꞌya̱j níꞌ cacunꞌ, ne̱ asa̱ꞌ quisíj quiꞌyaj ndoꞌo níꞌ cacunꞌ, ga̱a ne̱ yu̱u̱n cheꞌe̱ cavi̱ꞌ nimán níꞌ vaa ga̱a na̱nj ado̱nj.

¹⁶ Se̱ cuchumán rá soj nana̱ ne̱, maan tinu̱j, maan nocoj.

¹⁷ Xca̱j soj cuentá se vaa da̱j a̱ se sa̱ꞌ vaa rihaan níꞌ roꞌ, Yaꞌanj me síí rqué nij yoꞌ, ne̱ dan me se ma̱an rej ya̱nj maꞌa̱n ya̱ síí ꞌyaj avii yaꞌan chuguu̱n roꞌ, ma̱an dan ꞌnaꞌ nu̱ꞌ se sa̱ꞌ do̱ꞌ, se lu̱j do̱ꞌ, se niꞌya̱nj do̱ꞌ á. Dan me se se̱ caꞌvee natuna̱ snana̱ soꞌ nana̱ sa̱ꞌ nana̱ nica̱ ya̱ ya̱ maꞌ. ꞌO̱ vaa rá soꞌ, ne̱ se̱ caꞌvee cunu̱u ino̱ Yaꞌanj a̱ maꞌ. ꞌO̱ sa̱ꞌ ꞌyaj soꞌ ga̱ níꞌ na̱nj ado̱nj.

¹⁸ Guun rá soꞌ gu̱un taꞌni̱j soꞌ man níꞌ, ga̱a ne̱ cuno níꞌ snana̱ soꞌ nana̱ ya̱, quiꞌyaj soꞌ, ne̱ cheꞌé dan guun taꞌni̱j soꞌ man níꞌ ga̱a asino ya̱a̱n, ga̱a ne̱ vaa güii naquiꞌya̱j sa̱ꞌ soꞌ man cunuda̱nj nij rasu̱u̱n quiꞌyaj soꞌ a.

Nataꞌ Santiagó cheꞌé me síí nocoꞌ ya̱ man Yaꞌanj a

¹⁹ Se̱ niꞌyón soj nana̱ nihánj, maan tinu̱j, maan nocoj. Ga̱a̱ niha̱ꞌ rá ta̱ranꞌ níꞌ nano̱ xre̱j níꞌ á. Tza̱j ne̱ se̱ gaa niha̱ꞌ rá níꞌ caꞌmi̱i̱ níꞌ do̱ꞌ, caꞌma̱an rá níꞌ do̱ꞌ maꞌ.

²⁰ ꞌO̱ se sese aꞌmaan ndoꞌo rá níꞌ, ne̱ naꞌvee quiꞌya̱j sa̱ꞌ níꞌ nda̱a vaa me rá Yaꞌanj quiꞌya̱j níꞌ maꞌ.

²¹ Yu̱u̱n cheꞌe̱ caꞌne̱ꞌ rá soj ga̱ suun ꞌyaj da̱j a̱ se nij, ne̱ ga̱a̱ nica̱ꞌ nimán soj, ne̱ cuno̱ soj nana̱ caꞌnéé Yaꞌanj nimán soj, cheꞌé yan caꞌve̱e nani̱i̱ nimán soj rihaan sayuun ne̱ cavi̱i̱ sa̱ꞌ soj ado̱nj.

²² Se̱ guun catu̱u̱ rmaꞌa̱n snana̱ Yaꞌanj xréé níꞌ maꞌ. Tana̱nj quiꞌya̱j níꞌ nda̱a vaa taj Yaꞌanj ado̱nj. Sese se̱ quiꞌyaj níꞌ da̱nj, ne̱ tiha̱ꞌ yuꞌunj níꞌ man maꞌa̱n níꞌ ga̱a na̱nj á.

²³ ꞌO̱ se síí atúj rmaꞌa̱n snana̱ Yaꞌanj xréé roꞌ, ase vaa síí niꞌya̱j rihaan espejó roꞌ, da̱nj vaa soꞌ,

²⁴ ne̱ síí niꞌya̱j rihaan espejó me se xcaj soꞌ cuentá se vaa canó nacaj rihaan soꞌ, tza̱j ne̱ ꞌanj soꞌ, ga̱a ne̱ yu̱u̱n cheꞌe̱ niꞌyón soꞌ nacaj no̱ rihaan soꞌ a.

²⁵ Ne̱ ase vaa espejó roꞌ, da̱nj vaa tucuáán sa̱ꞌ ina̱nj cuchruj Yaꞌanj rihaan níꞌ, ne̱ xcaj níꞌ cuentá da̱j me rá Yaꞌanj quiꞌya̱j níꞌ, ꞌyaj tucuáán sa̱ꞌ yoꞌ, tucuáán tinanii man níꞌ rihaan cacunꞌ a. Se̱ guun níꞌ síí tucuꞌyón rmaꞌa̱n nana̱ yoꞌ ne̱ niꞌyón nana̱ yoꞌ maꞌ. Tana̱nj quiꞌya̱j níꞌ nda̱a vaa taj nana̱ yoꞌ á. Ne̱ sese se̱ caꞌneꞌ rá níꞌ ga̱ nana̱ yoꞌ, ne̱ Yaꞌanj me síí quiꞌya̱j cavi̱i̱ sa̱ꞌ níꞌ ado̱nj.

²⁶ Me maꞌa̱n síí uun rá se vaa síí veꞌé nocoꞌ man Yaꞌanj me soꞌ, tza̱j ne̱ niha̱ꞌ rá soꞌ nano̱ soꞌ cuentó cheꞌé tuviꞌ soꞌ, ne̱ né si̱j noco̱ꞌ ya̱ man Yaꞌanj me soꞌ maꞌ. Tana̱nj síí tihaꞌ yuꞌunj man maꞌa̱n me soꞌ na̱nj chugua̱nj.

²⁷ Cata̱j xnaꞌanj ꞌu̱nj rihaan soj me síí me síí noco̱ꞌ ya̱ man Rej níꞌ Yaꞌanj a. Síí racuíj man xnii nique̱ caviꞌ rej do̱ꞌ, síí racuíj man chana̱ nique̱ caviꞌ nica̱ do̱ꞌ, síí ne nocoꞌ man síí chiꞌi̱i̱ ma̱n rihaan chumii̱ nihánj do̱ꞌ roꞌ, soꞌ me síí noco̱ꞌ ya̱ man Yaꞌanj ado̱nj.