Romanos 9 - Triqui de San Juan Copala

Nanó ndoꞌo rá Pabló cheꞌé tuviꞌ soꞌ nij yuvii̱ israelitá a

¹ Cheꞌé se síí noco̱ꞌ man Cristó mé ꞌu̱nj, ne̱ se̱ caꞌmii ne̱ ꞌu̱nj rihaan nij soj maꞌ. ꞌO̱ se ya̱nj Nimán Yaꞌanj ga̱ ꞌu̱nj, ne̱ maꞌa̱n Nimán Yaꞌanj cataj rihanj se vaa nana̱ ya̱ caꞌmij á.

^2-3 Dan me se ina̱nj nanó ndoꞌo raj cheꞌé nij tuvij nij yuvii̱ israelitá, ne̱ me raj nayo̱nj rihaan nij soꞌ, ne̱ nda̱a caꞌnéé nimanj quina̱j ma̱ꞌanj rihaan sayuun, quiꞌya̱j Yaꞌanj, ne̱ ꞌo̱ naca̱j Yaꞌanj man nij soꞌ rihaan sayuun quira̱nꞌ nij soꞌ, ne̱ caꞌnéé nimanj ta̱náj Cristó manj, ne̱ naca̱j Cristó man nij soꞌ a.

⁴ Dan me se yuvii̱ israelitá me nij soꞌ, ne̱ gu̱un taꞌni̱j Yaꞌanj man nij soꞌ, rá Yaꞌanj á. Queneꞌen nij soꞌ se vaa chuguu̱n ndoꞌo Yaꞌanj ga̱a canicunꞌ maꞌa̱n Yaꞌanj ga̱ nij soꞌ ga̱a naá, ne̱ cataꞌ tuꞌva Yaꞌanj rihaan nij soꞌ da̱j quiꞌya̱j Yaꞌanj cheꞌé nij soꞌ, ne̱ cataj xnaꞌanj Yaꞌanj rihaan nij soꞌ da̱j quiꞌya̱j maꞌa̱n nij soꞌ a. Tucuꞌyón Yaꞌanj man nij soꞌ da̱j quiꞌya̱j nij soꞌ ga̱a aráj gue̱e̱ nij soꞌ rihaan Yaꞌanj, ne̱ cataꞌ tuꞌva Yaꞌanj rihaan nij soꞌ se vaa ya̱ caꞌne̱j Yaꞌanj ꞌo̱ síí ti̱nanii man nij soꞌ rihaan sayuun a.

⁵ Xi̱i nij yuvii̱ israelitá me nij síí ma̱n ga̱a naá síí cuꞌna̱j Abraham do̱ꞌ, Isaac do̱ꞌ, Jacob do̱ꞌ a. ꞌO̱ tuviꞌ nij soꞌ me Cristó Síí Caꞌnéé Yaꞌanj Ti̱nanii man Yuvii̱ rihaan Sayuun, ne̱ Cristó me se Yaꞌanj me soꞌ, ne̱ uun chij soꞌ rihaan cunuda̱nj a. Veꞌé uxrá caꞌmi̱i̱ níꞌ cheꞌé soꞌ nu̱ꞌ cavii nu̱ꞌ caꞌanj na̱nj á. Veé da̱nj ga̱a̱ ya̱ ado̱nj.

Ina̱nj nij yuvii̱ israelitá narii Yaꞌanj me ya̱ ya̱ yuvii̱ israelitá rihaan Yaꞌanj a

⁶ Dan me se ga̱a naá cataj Yaꞌanj se vaa ya̱ canoco̱ꞌ nij yuvii̱ israelitá man soꞌ nu̱ꞌ cavii nu̱ꞌ caꞌanj, ne̱ me cheꞌé ne nocoꞌ nij yuvii̱ israelitá man Yaꞌanj cuano̱, rá soj ga̱. ꞌO̱ se quisi̱j ya̱ nda̱a vaa caꞌmii Yaꞌanj, tza̱j ne̱ ne nari̱i̱ ya̱ Yaꞌanj man cunuda̱nj nij yuvii̱ israelitá maꞌ. Né ya̱ ya̱ yuvii̱ israelitá me cunuda̱nj nij soꞌ rihaan Yaꞌanj maꞌ.

⁷ Abraham síí cayáán ga̱a naá roꞌ, do̱j taꞌníí taꞌnij siꞌno̱ soꞌ guun taꞌníí Yaꞌanj, ne̱ dan me se cataj Danj Yaꞌanj se vaa ina̱nj nij taꞌníí taꞌnij siꞌno̱ síí cuꞌna̱j Isaac me ya̱ ya̱ taꞌníí taꞌnij siꞌno̱ Abraham rihaan Yaꞌanj á. Da̱nj caꞌmii Yaꞌanj rihaan Abraham ga̱a naá a.

⁸ Dan me se cataj Yaꞌanj se vaa se̱ guun taꞌni̱j Yaꞌanj man cunuda̱nj nij taꞌníí taꞌnij siꞌno̱ Abraham maꞌ. Ma̱an se taꞌa̱j nij soꞌ narii Yaꞌanj, ne̱ ina̱nj cheꞌé nij síí narii Yaꞌanj caꞌmii Yaꞌanj, ga̱a cataꞌ tuꞌva Yaꞌanj se vaa ya̱ canoco̱ꞌ nij soꞌ man soꞌ a.

⁹ Dan me se ga̱a ataa caꞌnga̱a̱ síí cuꞌna̱j Isaac síí narii Yaꞌanj man, ne̱ caꞌmii Yaꞌanj cheꞌé soꞌ, cataj Yaꞌanj se vaa rque ꞌo̱ yoꞌ, ga̱a ne̱ caꞌna̱ꞌ uún Yaꞌanj rihaan Abraham, ne̱ ya̱ ga̱a̱ ꞌo̱ taꞌnij sno̱ꞌo chana̱ cuꞌna̱j Sará a. Ne̱ snóꞌo cunii yoꞌ roꞌ, me Isaac a. Da̱nj cataj Yaꞌanj rihaan Abraham a.

¹⁰ Ne̱ vaa chana̱ cuꞌna̱j Rebeca uún, ne̱ cotoj noꞌ ga̱ o̱rúnꞌ nica̱ noꞌ síí cuꞌna̱j Isaac, ne̱ nda̱a neꞌej cuaté nu̱u̱ rque noꞌ a.

^11-12 Ga̱a ataa caꞌnga̱a̱ ro̱j neꞌej, ne̱ cataj xnaꞌanj Yaꞌanj rihaan noꞌ se vaa gu̱un neꞌej ta̱j ya̱a̱n mozó rihaan neꞌej noco̱ꞌ xco̱, cataj Yaꞌanj a. ꞌO̱ se ataa caꞌnga̱a̱ neꞌej, ne̱ taj a̱ ꞌó ro̱j soꞌ quiꞌyaj sa̱ꞌ do̱ꞌ, quiꞌyaj chiꞌi̱i̱ do̱ꞌ maꞌ. Ma̱an se ina̱nj da̱nj quiꞌyaj Yaꞌanj narii Yaꞌanj man ꞌo̱ soꞌ gu̱un chij soꞌ rihaan tinúú soꞌ, cheꞌé rej a̱j guun rá Yaꞌanj da̱nj ga̱a̱ suun ca̱ta̱ ꞌo̱ ꞌo̱ soꞌ rihaan Yaꞌanj na̱nj ado̱nj.

¹³ Dan me se taj Danj Yaꞌanj a: “Cunuu ꞌe̱e̱ rá ꞌu̱nj niꞌya̱j ꞌu̱nj man Jacob, tza̱j ne̱ nachríꞌ ꞌu̱nj niꞌya̱j ꞌu̱nj man Esaú a”, taj Danj Yaꞌanj ado̱nj.

Caꞌve̱e nari̱i̱ Yaꞌanj na̱j guun yuvii̱ a

¹⁴ Dan me se nij quiꞌyaj Yaꞌanj ga̱ síí cuꞌna̱j Esaú, rá soj naꞌ. Taj a̱ doj maꞌ.

¹⁵ ꞌO̱ se ga̱a naá caꞌmii Yaꞌanj rihaan síí cuꞌna̱j Moisés, cataj Yaꞌanj a: “Ga̱a̱ ꞌe̱e̱ rá ꞌu̱nj ni̱ꞌyaj ꞌu̱nj man yuvii̱ me rá ꞌu̱nj niꞌya̱j ꞌu̱nj man, ne̱ qui̱ꞌyáj se lu̱j rihaan yuvii̱ me rá ꞌu̱nj qui̱ꞌyáj se lu̱j rihaan ado̱nj.” Da̱nj caꞌmii Yaꞌanj rihaan Moisés ga̱a naá a.

¹⁶ Dan me se caꞌve̱e se da̱j a̱ me rá yuvii̱, caꞌve̱e se da̱j a̱ quiꞌya̱j yuvii̱, tza̱j ne̱ se̱ caꞌvee quiꞌya̱j nij yuvii̱ se vaa me rá maꞌa̱n nij yuvii̱ maꞌ. O̱rúnꞌ Yaꞌanj me síí cata̱j me síí cunu̱u ꞌe̱e̱ rá soꞌ maan ado̱nj.

¹⁷ Ne̱ rihaan Danj Yaꞌanj nó nana̱ caꞌmii Yaꞌanj rihaan síí cuꞌna̱j Faraón ga̱a cataj Yaꞌanj a: “Guún so̱ꞌ síí nica̱j suun, quiꞌyáj, ga̱a ne̱ queneꞌe̱n yuvii̱ da̱j qui̱ránꞌ so̱ꞌ, qui̱ꞌyáj, ne̱ chaꞌnu̱u̱ nana̱ rihaan nu̱ꞌ chumii̱ se vaa Yaꞌanj si̱j nucua̱j uxrá mej ado̱nj.” Da̱nj cataj Yaꞌanj rihaan Faraón ga̱a naá a.

¹⁸ Dan me se neꞌen níꞌ se vaa sese me rá Yaꞌanj cunu̱u ꞌe̱e̱ rá Yaꞌanj man ꞌo̱ soꞌ, ne̱ cunu̱u ꞌe̱e̱ rá Yaꞌanj man soꞌ, ne̱ sese me rá Yaꞌanj gu̱un nichra̱j rá ꞌo̱ soꞌ, ne̱ gu̱un nichra̱j rá soꞌ, quiꞌya̱j Yaꞌanj ado̱nj.

¹⁹ Vaa yuvii̱ cata̱j a: “Cheꞌé dan, me cheꞌé utaꞌ Yaꞌanj cacunꞌ xráá yuvii̱ ga̱. ꞌO̱ se ina̱nj se me rá Yaꞌanj quiꞌya̱j níꞌ ꞌyaj níꞌ á.” Da̱nj cata̱j taꞌa̱j yuvii̱ a.

²⁰ Tza̱j ne̱ ne nó xcúún níꞌ cata̱j níꞌ se vaa ne nó xcúún Yaꞌanj quiꞌya̱j soꞌ nda̱a vaa ꞌyaj soꞌ maꞌ. Caꞌve̱e xna̱ꞌanj ꞌo̱ xruj yoꞌóó man síí quiꞌyaj man xruj: “Me cheꞌé quiꞌyáá so̱ꞌ da̱nj mán ꞌu̱nj ga̱.”

²¹ Dan me se síí ꞌyaj xruj me se do̱j yoꞌóó niquii ga̱a̱ rihaan soꞌ, ga̱a ne̱ caꞌve̱e quiꞌya̱j soꞌ xruj a. Do̱j yoꞌóó niquii ni̱caj soꞌ quiꞌya̱j soꞌ xruj veꞌé ndoꞌo vaa, ga̱a ne̱ doj yoꞌóó niquii ni̱caj soꞌ quiꞌya̱j soꞌ xruj nij doj a. Caꞌve̱e quiꞌya̱j soꞌ da̱j me rá maꞌa̱n soꞌ á.

²² Ne̱ ase vaa ꞌyaj síí ꞌyaj xruj roꞌ, da̱nj vaa ꞌyaj Yaꞌanj, ne̱ dan me se quiriꞌ ndoꞌo taꞌa̱j yuvii̱ quiꞌyaj Yaꞌanj, ne̱ vaa güii caꞌa̱nj nij soꞌ rihaan yaꞌan a. Uyanj rá Yaꞌanj niꞌya̱j soꞌ man nij soꞌ cheꞌé cacunꞌ ꞌyaj nij soꞌ, ne̱ me rá Yaꞌanj quiꞌya̱j Yaꞌanj sayuun man nij soꞌ, ne̱ me rá Yaꞌanj ti̱haa̱n Yaꞌanj se vaa nucua̱j ndoꞌo Yaꞌanj a. Tza̱j ne̱ aráj xꞌnaa uxrá Yaꞌanj niꞌya̱j Yaꞌanj man nij yuvii̱,

²³ cheꞌé rej ti̱haa̱n Yaꞌanj rihaan nij yuvii̱ nu̱ꞌ nda̱a vaa quiꞌya̱j soꞌ cheꞌé ꞌó nij yuvii̱ a. Ne̱ ꞌó nij soꞌ me se a̱j guun rá Yaꞌanj se vaa gu̱un chij nij soꞌ ga̱ soꞌ, ne̱ cheꞌé dan cunu̱u ꞌe̱e̱ rá soꞌ man nij soꞌ, ga̱a ne̱ xca̱j cunuda̱nj nij yuvii̱ cuentá se vaa síí niꞌndaj ya̱ sa̱ꞌ veꞌé uun chij me Yaꞌanj na̱nj ado̱nj.

²⁴ Maꞌa̱n níꞌ me nij yuvii̱ gu̱un chij ga̱ Yaꞌanj, ne̱ dan me se taꞌa̱j níꞌ me yuvii̱ israelitá, ne̱ ꞌó taꞌa̱j níꞌ me yuvii̱ yaníj, tza̱j ne̱ canacúún Yaꞌanj man ꞌo̱ ꞌo̱ níꞌ gu̱un chij níꞌ ga̱ soꞌ ado̱nj.

²⁵ Ase vaa nana̱ aꞌmij nihánj roꞌ, da̱nj vaa nana̱ caꞌmii Yaꞌanj ga̱a naá nana̱ cachrón síí cuꞌna̱j Oseas rihaan yanj a. Dan me se cataj Yaꞌanj a: Yuvii̱ ne nocoꞌ manj roꞌ, ne ꞌe̱e̱ raj man nij soꞌ maꞌ. Tza̱j ne̱ vaa güii gu̱un nij soꞌ tuvij, ne̱ vaa güii cunu̱u ꞌe̱e̱ raj man nij soꞌ ado̱nj.

²⁶ Dan me se ma̱an rej nicu̱nꞌ ꞌu̱nj ga̱a cataj ꞌu̱nj se vaa né se‑chuma̱nꞌ ꞌu̱nj me nij yuvii̱ roꞌ, ma̱an dan ca̱nicúnꞌ ꞌu̱nj cata̱j ꞌu̱nj se vaa taꞌni̱j ma̱ꞌanj me nij soꞌ a. ꞌO̱ se Yaꞌanj vaa iꞌna̱ꞌ mej ado̱nj. Da̱nj caꞌmii Yaꞌanj ga̱a naá a.

²⁷ Ne̱ nucua̱j caꞌmii síí cuꞌna̱j Isaías ga̱a naá cheꞌé nij yuvii̱ israelitá a. Cataj soꞌ a: Caꞌve̱e se gu̱un ri̱i̱ uxrá nij síí israelitá, ne̱ nda̱a ase uun ráꞌ neꞌénꞌ yoꞌóó chru̱u̱ na̱j tuꞌva na yaꞌa̱nj gu̱un ráꞌ que̱neꞌénꞌ man nij tuvi̱ꞌ nij soꞌ, tza̱j ne̱ ꞌo̱ se do̱j nij soꞌ nani̱i̱ rihaan sayuun ne̱ cavi̱i̱ sa̱ꞌ na̱nj ado̱nj.

²⁸ O̱rúnꞌ orá leꞌe̱j nii quiꞌya̱j Yaꞌanj sayuun man nu̱ꞌ nij síí tumé cacunꞌ ya̱nj rihaan chumii̱ ado̱nj. Da̱nj caꞌmii Isaías a.

²⁹ Veé dan caꞌmii uún Isaías cheꞌé nij yuvii̱ israelitá, ne̱ cataj uún soꞌ a: Uun nucua̱j ndoꞌo Yaꞌanj uun chij Yaꞌanj á. Ne̱ níꞌ me se aviꞌ níꞌ cheꞌé cacunꞌ tumé níꞌ, tza̱j ne̱ ti̱nanii Yaꞌanj man do̱j tuviꞌ níꞌ si̱j israelitá rihaan sayuun a. Sese taj tuviꞌ níꞌ nani̱i̱ rihaan sayuun, ne̱ cavi̱ꞌ cunuda̱nj nij yuvii̱ ma̱n chiháán níꞌ, ne̱ navi̱j chiháán níꞌ, ne̱ ase vaa navij chumanꞌ Sodoma do̱ꞌ, ase vaa navij chumanꞌ Gomorra do̱ꞌ, da̱nj ga̱a̱ navi̱j chiháán níꞌ asuun na̱nj ado̱nj. Veé da̱nj caꞌmii Isaías cheꞌé nij yuvii̱ israelitá ga̱a naá a.

Ne cunu̱u sa̱ꞌ nij yuvii̱ israelitá rihaan Yaꞌanj, cheꞌé se ne cuchuma̱n rá nij soꞌ ni̱ꞌyaj nij soꞌ man Cristó maꞌ

³⁰ Xca̱j níꞌ cuentá da̱j quiꞌyaj nij yuvii̱ israelitá do̱ꞌ, da̱j quiꞌyaj nij yuvii̱ yaníj do̱ꞌ, rihaan Yaꞌanj á. Dan me se né yuvi̱i̱ israelitá me nij yuvii̱ yaníj, ne̱ ne rquee̱ nij soꞌ yan cunu̱u sa̱ꞌ maꞌa̱n nij soꞌ rihaan Yaꞌanj, tza̱j ne̱ taꞌa̱j nij soꞌ me síí amán rá niꞌya̱j man Yaꞌanj, ne̱ cheꞌé dan cunuu sa̱ꞌ nij soꞌ rihaan Yaꞌanj ado̱nj.

³¹ Ino̱ quiꞌyaj nij yuvii̱ israelitá a. Dan me se rquee̱ uxrá nij soꞌ chrej cunu̱u sa̱ꞌ maꞌa̱n nij soꞌ rihaan Yaꞌanj, tza̱j ne̱ ne nari̱ꞌ nij soꞌ chrej sa̱ꞌ maꞌ.

³² Me cheꞌé ne nari̱ꞌ nij soꞌ, rá soj ga̱. Dan me se ga̱a rquee̱ nij soꞌ cunu̱u sa̱ꞌ nimán nij soꞌ rihaan Yaꞌanj, ne̱ nanoꞌ nij soꞌ chrej ꞌyaj suun maꞌa̱n nij soꞌ, ne̱ ne amán rá nij soꞌ niꞌya̱j nij soꞌ man Yaꞌanj maꞌ. Acoꞌ cheꞌé nij soꞌ yuvej na̱j rá chrej ado̱nj.

³³ ꞌO̱ cuya̱a̱n vaa nana̱ aꞌmij ga̱ nana̱ aꞌmii Danj Yaꞌanj cheꞌé Jesucristó, ne̱ dan me se ga̱a naá cataj Yaꞌanj a: Ni̱ꞌyaj so̱ꞌ á. A̱j cunéꞌ ꞌu̱nj ꞌo̱ yuvii̱ chumanꞌ Sion, ne̱ ase vaa ꞌo̱ yuvej vaa soꞌ, nucua̱j ndoꞌo soꞌ a. Naxru̱ꞌ yuvii̱, quiꞌya̱j yuvej yoꞌ, ne̱ gu̱un naꞌa̱j nij yuvii̱ queneꞌe̱n nij yuvii̱ man soꞌ, tza̱j ne̱ sese cuchuma̱n rá ꞌo̱ soꞌ queneꞌe̱n soꞌ man síí cunéꞌ ꞌu̱nj, ne̱ se̱ guun naꞌa̱j soꞌ maꞌ. Tana̱nj cavi̱i̱ sa̱ꞌ soꞌ ado̱nj. Da̱nj caꞌmii Yaꞌanj cheꞌé Jesucristó a.