Romanos 8 - Triqui de San Juan Copala

Sese uun chij Nimán Yaꞌanj rihaan nimán níꞌ, ne̱ cavi̱i̱ sa̱ꞌ nimán níꞌ a

¹ Ya̱j me se daj chiha̱a̱ míj se̱ cutaꞌ Yaꞌanj cacunꞌ xráá níꞌ si̱j uun rcuaꞌa̱a̱n ga̱ Cristó Jesús maꞌ.

² Cheꞌé se canocóꞌ ꞌu̱nj man Cristó Jesús, ne̱ cheꞌé dan Nimán Yaꞌanj me síí uun chij rihaan nimanj, ga̱a ne̱ dan me se cunuu sa̱ꞌ nimanj, ne̱ cheꞌé dan nanii ꞌu̱nj rihaan cacunꞌ, ne̱ se̱ caviꞌ nu̱ꞌ nimanj quiꞌya̱j cacunꞌ a̱ maan ado̱nj.

³ Ne gu̱un nucua̱j nee̱ man níꞌ canoco̱ꞌ yoꞌ nu̱ꞌ stucua̱nj Moisés, ne̱ cheꞌé dan se̱ guun nucua̱j níꞌ nani̱i̱ maꞌa̱n níꞌ rihaan cacunꞌ tumé níꞌ maꞌ. Tza̱j ne̱ Yaꞌanj me síí tinanii man níꞌ rihaan cacunꞌ yoꞌ, ne̱ caꞌnéé Yaꞌanj maꞌa̱n Taꞌníí Yaꞌanj rihaan chumii̱, ne̱ ase vaa nee̱ man níꞌ roꞌ, da̱nj vaa nee̱ man soꞌ uún a. Dan me se caviꞌ soꞌ cheꞌé níꞌ, ne̱ cheꞌé se taj cacunꞌ tumé maꞌa̱n soꞌ, ne̱ cheꞌé dan taj cheꞌé quiꞌya̱j níꞌ cacunꞌ ya̱j maꞌ.

⁴ Cuano̱ ya̱j me se taj cheꞌé quiꞌya̱j níꞌ ina̱nj se vaa me rá nee̱ man níꞌ quiꞌya̱j níꞌ maꞌ. Ina̱nj rihaan o̱rúnꞌ Nimán Yaꞌanj cuno̱ níꞌ, ne̱ quiꞌya̱j maꞌa̱n níꞌ nda̱a vaa me rá Yaꞌanj quiꞌya̱j níꞌ a. Dan me se Nimán Yaꞌanj ꞌyaj uno maꞌa̱n níꞌ stucua̱nj Moisés ado̱nj.

⁵ Dan me se taꞌa̱j yuvii̱ roꞌ, aráyaꞌa̱nj nij soꞌ cheꞌé ina̱nj nee̱ man nij soꞌ a. Tza̱j ne̱ ino̱ uxrá vaa yuvii̱ noco̱ꞌ man Nimán Yaꞌanj, ne̱ dan me se cheꞌé ina̱nj se vaa me rá Nimán Yaꞌanj aráyaꞌa̱nj nij soꞌ ado̱nj.

⁶ Sese gu̱un rá yuvii̱ quiꞌya̱j yuvii̱ se me rá nee̱ man yuvii̱, ne̱ cavi̱ꞌ nu̱ꞌ nimán yuvii̱ a. Tza̱j ne̱ sese gu̱un rá yuvii̱ quiꞌya̱j yuvii̱ se me rá Nimán Yaꞌanj, ne̱ caꞌve̱e ca̱yáán yuvii̱ ga̱ Yaꞌanj nu̱ꞌ cavii nu̱ꞌ caꞌanj, ne̱ ga̱a̱ xe̱j nimán yuvii̱, quiꞌya̱j Nimán Yaꞌanj ado̱nj.

⁷ Sese gu̱un rá yuvii̱ quiꞌya̱j yuvii̱ ase me rá nee̱ man yuvii̱, ne̱ ta̱j riꞌyunj yuvii̱ man Yaꞌanj, cheꞌé se ne uno yuvii̱ stucua̱nj Yaꞌanj maꞌ. Ne̱ a̱ se̱ guun nucua̱j maꞌa̱n yuvii̱ cuno̱ yuvii̱ stucua̱nj Yaꞌanj vaa ga̱a a̱ maꞌ.

⁸ Ne aranꞌ rá Yaꞌanj niꞌya̱j Yaꞌanj man nij yuvii̱ acaj cuentá cheꞌé nee̱ man maꞌa̱n nij yuvii̱ a̱ maan ado̱nj.

Sese ya̱nj Nimán Yaꞌanj nimán níꞌ, ne̱ sa̱ꞌ uxrá ga̱a̱ níꞌ a

⁹ Tza̱j ne̱ ino̱ uxrá vaa nij soj sese ya̱ ya̱nj Nimán Yaꞌanj nimán soj á. Cheꞌé dan ne ꞌyaj soj nda̱a vaa me rá nee̱ man soj quiꞌya̱j soj maꞌ. Tana̱nj ina̱nj rihaan Nimán Yaꞌanj uno soj, ne̱ dan me se sese nuviꞌ Nimán Cristó yáán nimán ꞌo̱ soꞌ, ne̱ né si̱j ꞌni̱j raꞌa Cristó man me soꞌ maꞌ.

¹⁰ Neꞌen soj se vaa cavi̱ꞌ nee̱ man níꞌ cheꞌé cacunꞌ quiꞌyaj nee̱ man níꞌ, tza̱j ne̱ sese ya̱nj Cristó nimán níꞌ, ne̱ ꞌo̱ vaa sa̱ꞌ nimán níꞌ rihaan Yaꞌanj, ne̱ cheꞌé dan ꞌo̱ vaa iꞌna̱ꞌ nimán níꞌ ado̱nj.

¹¹ Ne̱ neꞌen soj se vaa cunuu iꞌna̱ꞌ uún Jesús ga̱a caviꞌ soꞌ, quiꞌyaj Yaꞌanj, ne̱ maꞌa̱n Nimán Yaꞌanj nuû nimán soj, ne̱ cheꞌé dan asa̱ꞌ caviꞌ soj, ne̱ cunu̱u naca̱ nee̱ man soj vaa güii, quiꞌya̱j uún Yaꞌanj a.

Yuvii̱ uno aꞌmii Nimán Yaꞌanj me taꞌníí Yaꞌanj a

¹² Cheꞌé dan ne nó xcúún níꞌ quiꞌya̱j níꞌ nda̱a vaa me rá nee̱ man níꞌ, maan tinu̱j, maan nocoj.

¹³ ꞌO̱ se sese aráyaꞌa̱nj ndoꞌo soj man nee̱ man soj, ne̱ caꞌa̱nj yaníj soj rihaan Yaꞌanj, quiꞌya̱j maꞌa̱n soj ado̱nj. Tza̱j ne̱ sese cuno̱ soj nana̱ aꞌmii Nimán Yaꞌanj, ne̱ se̱ caꞌvej rá soj quiꞌya̱j nee̱ man soj cacunꞌ, ga̱a ne̱ ꞌo̱ ga̱a̱ iꞌna̱ꞌ nimán soj ado̱nj.

¹⁴ ꞌO̱ se yuvii̱ uno aꞌmii Nimán Yaꞌanj me taꞌníí Yaꞌanj ado̱nj.

¹⁵ Neꞌen soj se vaa chuꞌviꞌ mozó niꞌya̱j soꞌ se‑ruꞌve̱e̱ soꞌ, tza̱j ne̱ naꞌvej rá Yaꞌanj quiꞌya̱j soj da̱nj rihaan Yaꞌanj maꞌ. Se̱ cuchuꞌviꞌ nimán soj ni̱ꞌyaj soj Yaꞌanj maꞌ. ꞌO̱ se nica̱j yuꞌunj Yaꞌanj man soj, ne̱ guun taꞌni̱j Yaꞌanj man soj, ne̱ cheꞌé dan me ga̱a̱ niha̱ꞌ rá soj cata̱j soj “Ata̱j” rihaan Yaꞌanj á.

¹⁶ Dan me se ꞌo̱ aꞌmii Nimán Yaꞌanj ga̱ nimán níꞌ, ne̱ taj Nimán Yaꞌanj se vaa taꞌníí Yaꞌanj me níꞌ a.

¹⁷ Cheꞌé dan vaa güii rque̱ ndoꞌo Yaꞌanj se sa̱ꞌ rihaan níꞌ ga̱ Cristó, ne̱ ꞌo̱ cuya̱a̱n ga̱a̱ se sa̱ꞌ rihaan Cristó ga̱ níꞌ a. Veé dan me cheꞌé se ranꞌ níꞌ sayuun nda̱a vaa quiranꞌ Cristó roꞌ, cheꞌé dan cavi̱i̱ sa̱ꞌ níꞌ ga̱ soꞌ, ne̱ niꞌndaj ya̱ veꞌé ga̱a̱ níꞌ ga̱ soꞌ vaa güii ado̱nj.

Vaa güii, ne̱ veꞌé ndoꞌo ga̱a̱ cunuda̱nj chumii̱ ga̱ xta̱ꞌ, quiꞌya̱j Yaꞌanj cheꞌé níꞌ a

¹⁸ Veé dan me se ranꞌ xa̱ꞌ níꞌ sayuun cuano̱, tza̱j ne̱ vaa güii, ne̱ cavi̱i̱ sa̱ꞌ uxrá níꞌ doj rihaan sayuun ranꞌ níꞌ cuano̱ ado̱nj. ꞌO̱ se ataa ti̱haa̱n Yaꞌanj rihaan níꞌ se vaa niꞌndaj ya̱ veꞌé ga̱a̱ níꞌ, quiꞌya̱j Yaꞌanj na̱nj chugua̱nj. Da̱nj vaa raj na̱nj á.

¹⁹ Naꞌvi̱j uxrá cunuda̱nj nij rasu̱u̱n quiꞌyaj Yaꞌanj rihaan chumii̱ ga̱ xta̱ꞌ quisi̱j güii ti̱haa̱n Yaꞌanj da̱j ga̱a̱ nij taꞌníí soꞌ a.

²⁰ Cuano̱ roꞌ, taj yuꞌvee nó nij rasu̱u̱n ma̱n rihaan chumii̱ ga̱ xta̱ꞌ maꞌ. Ga̱a quiꞌyaj Yaꞌanj chumii̱, ne̱ vaa sa̱ꞌ cunuda̱nj nij rasu̱u̱n yoꞌ, tza̱j ne̱ quiriꞌ nij rasu̱u̱n cheꞌé cacunꞌ quiꞌyaj yuvii̱, ne̱ caꞌvej rá Yaꞌanj quiri̱ꞌ nu̱ꞌ nij rasu̱u̱n yoꞌ a. Tza̱j ne̱ neꞌen Yaꞌanj

²¹ se vaa vaa güii cunu̱u sa̱ꞌ cunuda̱nj nij rasu̱u̱n yoꞌ rihaan chumii̱ ga̱ xta̱ꞌ, ne̱ asa̱ꞌ quisíj güii yoꞌ, ne̱ taj rasu̱u̱n quiri̱ꞌ ne̱ taj rasu̱u̱n cuchru̱u̱ maꞌ. ꞌO̱ se veꞌé ndoꞌo ga̱a̱ nu̱ꞌ nij rasu̱u̱n yoꞌ na̱nj ado̱nj. Dan me se ase vaa maꞌa̱n nij taꞌníí Yaꞌanj roꞌ, da̱nj ga̱a̱ uún nij rasu̱u̱n uún, ne̱ niꞌndaj ya̱ veꞌé ga̱a̱ nij yoꞌ ado̱nj.

²² Dan me se neꞌen níꞌ se vaa ranꞌ uxrá nu̱ꞌ rasu̱u̱n ma̱n rihaan chumii̱ ga̱ xta̱ꞌ sayuun cuano̱, ne̱ me uxrá rá yoꞌ cunu̱u naca̱ uún yoꞌ, ne̱ naꞌvi̱j yoꞌ quisi̱j güii cunu̱u sa̱ꞌ yoꞌ ado̱nj.

²³ Ne̱ ráchej maꞌa̱n níꞌ uún, ne̱ naꞌvi̱j níꞌ cunu̱u naca̱ maꞌa̱n níꞌ uún a. Dan me se ya̱nj Nimán Yaꞌanj ga̱ níꞌ, ne̱ sa̱ꞌ uxrá vaa Nimán Yaꞌanj, ne̱ cheꞌé dan neꞌen níꞌ se vaa rque̱ Yaꞌanj se sa̱ꞌ doj rihaan níꞌ, ne̱ neꞌen níꞌ se vaa vaa güii, ne̱ queneꞌe̱n yuvii̱ se vaa ya̱ ya̱ guun taꞌni̱j Yaꞌanj man maꞌa̱n níꞌ, ne̱ cunu̱u sa̱ꞌ nu̱ꞌ nee̱ man níꞌ a.

²⁴ Dan me se tinanii Yaꞌanj man níꞌ rihaan chrej chiꞌi̱i̱ do̱ꞌ, rihaan sayuun do̱ꞌ, ne̱ cheꞌé dan uun ya̱ rá níꞌ se vaa cavi̱i̱ sa̱ꞌ níꞌ ado̱nj. Tza̱j ne̱ ataa queneꞌe̱n níꞌ nu̱ꞌ se vaa quiꞌya̱j Yaꞌanj cheꞌé níꞌ, ne̱ cheꞌé dan nucua̱j ndoꞌo rá níꞌ man Yaꞌanj se vaa ya̱ ya̱ quiꞌya̱j soꞌ cheꞌé níꞌ a.

²⁵ Ne neꞌen níꞌ da̱j quiꞌya̱j Yaꞌanj cheꞌé níꞌ maꞌ. Ma̱an se nucua̱j rá níꞌ man Yaꞌanj, ne̱ cheꞌé dan se̱ gaa raꞌya̱nj nimán níꞌ maꞌ. Ma̱an se ga̱a̱ ina̱j nimán níꞌ, ne̱ na̱ꞌvi̱j níꞌ nda̱a se cavi̱i̱ sa̱ꞌ níꞌ quiꞌya̱j Yaꞌanj ado̱nj.

Racuíj ndoꞌo Nimán Yaꞌanj man níꞌ a

²⁶ Sese ne neꞌen níꞌ quiꞌya̱j níꞌ nu̱ꞌ se vaa no̱ xcúún níꞌ quiꞌya̱j níꞌ, ne̱ Nimán Yaꞌanj ra̱cuíj man níꞌ, ne̱ gu̱un nucua̱j níꞌ a. Ne neꞌen níꞌ da̱j caꞌmi̱i̱ níꞌ ga̱a achíín niꞌya̱j níꞌ rihaan Yaꞌanj maꞌ. Cheꞌé dan achíín niꞌya̱j Nimán Yaꞌanj cheꞌé níꞌ, ne̱ rnúj ya̱ soꞌ rihaan Yaꞌanj cheꞌé níꞌ a.

²⁷ Dan me se Yaꞌanj me síí neꞌen da̱j me rá nimán níꞌ, ne̱ uno soꞌ aꞌmii Nimán Yaꞌanj cheꞌé níꞌ ado̱nj. Neꞌen Nimán Yaꞌanj me se achiin man níꞌ, ne̱ achíín niꞌya̱j soꞌ rihaan Yaꞌanj se vaa rque̱ Yaꞌanj se vaa achiin man níꞌ a. Dan me se neꞌen Yaꞌanj se vaa ina̱nj se vaa aꞌvej rá Yaꞌanj ni̱caj níꞌ achíín niꞌya̱j Nimán Yaꞌanj, ne̱ da̱nj ꞌyaj Nimán Yaꞌanj cheꞌé cunuda̱nj níꞌ si̱j noco̱ꞌ man Yaꞌanj ado̱nj.

²⁸ Dan me se neꞌen níꞌ se vaa racuíj ndoꞌo Yaꞌanj man níꞌ si̱j aráj cochro̱j rihaan soꞌ na̱nj á. ꞌO̱ se canacúún Yaꞌanj man níꞌ ca̱yáán níꞌ ga̱ Yaꞌanj nu̱ꞌ cavii nu̱ꞌ caꞌanj, ne̱ cheꞌé dan me nu̱ꞌ se ranꞌ níꞌ rihaan chumii̱ nihánj roꞌ, ꞌyaj yoꞌ se vaa sa̱ꞌ doj cavi̱i̱ níꞌ nu̱ꞌ cavii nu̱ꞌ caꞌanj ado̱nj.

²⁹ Ga̱a naá me se queneꞌen Yaꞌanj se vaa canoco̱ꞌ níꞌ man soꞌ vaa güii, ga̱a ne̱ ꞌo̱ guun rá Yaꞌanj se vaa naquiꞌya̱j sa̱ꞌ Yaꞌanj nimán níꞌ a. Ne̱ ase vaa Taꞌníí Yaꞌanj síí cuꞌna̱j Jesucristó roꞌ, da̱nj ga̱a̱ níꞌ uún, ne̱ vaa güii cuma̱n ndoꞌo tinúú Jesucristó do̱ꞌ, raꞌvij Jesucristó do̱ꞌ, ne̱ soꞌ gu̱un síí chava̱ꞌ rihaan cunuda̱nj níꞌ a.

³⁰ Ga̱a ne̱ canacúún Yaꞌanj man níꞌ, ga̱a ne̱ cunuu sa̱ꞌ níꞌ rihaan Yaꞌanj, quiꞌyaj Yaꞌanj, ga̱a ne̱ ya̱ niꞌndaj ya̱ veꞌé ga̱a̱ níꞌ, quiꞌya̱j maꞌa̱n Yaꞌanj ado̱nj.

Daj chiha̱a̱ míj se̱ tanáj Yaꞌanj man níꞌ maꞌ

³¹ Dan me se Yaꞌanj me tuviꞌ níꞌ, ne̱ cheꞌé dan taj síí quisi̱j quiꞌya̱j sayuun man níꞌ maꞌ.

³² ꞌO̱ se ne cuchuꞌvi̱ꞌ Yaꞌanj rque̱ Yaꞌanj maꞌa̱n Taꞌníí Yaꞌanj cavi̱ꞌ cheꞌé níꞌ, ne̱ cheꞌé dan guun ya̱ rá níꞌ se vaa rque̱ Yaꞌanj nu̱ꞌ se sa̱ꞌ rihaan níꞌ, ne̱ cavi̱i̱ sa̱ꞌ níꞌ ado̱nj.

³³ Níꞌ si̱j narii Yaꞌanj man me se se̱ guun cuta̱ꞌ yuvii̱ cacunꞌ xráá níꞌ rihaan Yaꞌanj maꞌ. ꞌO̱ se maꞌa̱n Yaꞌanj cataj se vaa cunuu sa̱ꞌ níꞌ rihaan soꞌ chugua̱nj.

³⁴ Taj va̱j yuvii̱ cuta̱ꞌ cacunꞌ xráá níꞌ si̱j narii Yaꞌanj man maꞌ. ꞌO̱ se caviꞌ Cristó cheꞌé níꞌ, ne̱ cunuu iꞌna̱ꞌ uún Cristó, ne̱ cuano̱ nicunꞌ soꞌ xꞌnúú Yaꞌanj rej nuva̱ꞌ Yaꞌanj, ne̱ maꞌa̱n soꞌ me síí achíín niꞌya̱j rihaan Yaꞌanj cheꞌé níꞌ ado̱nj.

³⁵ A̱ ꞌó güii se̱ guun yaníj Cristó rihaan níꞌ, quiꞌya̱j nij yuvii̱ maꞌ. ꞌO̱ ꞌe̱e̱ rá Cristó man níꞌ na̱nj ado̱nj. Caꞌve̱e se quira̱nꞌ níꞌ sayuun do̱ꞌ, caꞌve̱e se nano̱ ndoꞌo rá níꞌ do̱ꞌ, caꞌve̱e se quita̱j riꞌyunj yuvii̱ man níꞌ do̱ꞌ, caꞌve̱e se quinaꞌa̱an rque níꞌ do̱ꞌ, caꞌve̱e se taj yatzéj cu̱nuû níꞌ do̱ꞌ, caꞌve̱e se vaa yuvii̱ ticavi̱ꞌ man níꞌ do̱ꞌ, tza̱j ne̱ daj chiha̱a̱ míj se̱ guun yaníj Cristó rihaan níꞌ maꞌ.

³⁶ No̱ nana̱ rihaan Danj Yaꞌanj taj se vaa cheꞌé se noco̱ꞌ níꞌ man Yaꞌanj, cheꞌé dan me rá yuvii̱ ticavi̱ꞌ yuvii̱ man níꞌ da̱j a̱ orá, ne̱ ase vaa ticaviꞌ nii man matzinj roꞌ, da̱nj me rá nii ticavi̱ꞌ nii man níꞌ, taj Danj Yaꞌanj a.

³⁷ Tza̱j ne̱ caꞌve̱e se da̱j a̱ sayuun ranꞌ níꞌ, tza̱j ne̱ Cristó me síí ꞌe̱e̱ rá man níꞌ, ne̱ cheꞌé dan quiꞌya̱j canaán uxrá níꞌ rihaan sayuun ado̱nj.

³⁸ Cheꞌé dan uun ya̱ rá ꞌu̱nj se vaa a̱ ꞌó rasu̱u̱n se̱ caꞌvee naquiꞌya̱j yaníj man níꞌ ga̱ Yaꞌanj maꞌ. Sese aviꞌ níꞌ do̱ꞌ, sese vaa iꞌna̱ꞌ níꞌ do̱ꞌ, nij se‑mo̱zó Yaꞌanj do̱ꞌ, nij nana̱ chre̱e uun chij do̱ꞌ, nij nana̱ chre̱e nucua̱j do̱ꞌ, sayuun ranꞌ níꞌ cuano̱ do̱ꞌ, sayuun quira̱nꞌ níꞌ rej riha̱a̱n do̱ꞌ,

³⁹ rasu̱u̱n no̱ rej xta̱ꞌ do̱ꞌ, rasu̱u̱n nu̱u̱ rej cunu̱u̱ do̱ꞌ, me maꞌa̱n ꞌó rasu̱u̱n quiꞌyaj Yaꞌanj do̱ꞌ, se̱ caꞌvee naquiꞌya̱j yaníj nij rasu̱u̱n yoꞌ man níꞌ ga̱ se ꞌe̱e̱ rá Yaꞌanj man níꞌ se vaa tihaa̱n Cristó Jesús Si̱j ꞌNi̱j Raꞌa man níꞌ rihaan níꞌ maan ado̱nj.