Romanos 5 - Triqui de San Juan Copala

Cavi̱i̱ sa̱ꞌ uxrá níꞌ cheꞌé se cunuu sa̱ꞌ nimán níꞌ rihaan Yaꞌanj a

¹ Dan me se amán rá níꞌ neꞌen níꞌ Yaꞌanj, ne̱ cheꞌé dan navij cacunꞌ tumé níꞌ, ne̱ cunuu sa̱ꞌ nimán níꞌ rihaan Yaꞌanj, ne̱ cheꞌé dan me ne chuꞌviꞌ níꞌ ya̱j, cheꞌé se a̱j naꞌmii sa̱ꞌ níꞌ ga̱ Yaꞌanj quiꞌyaj Jesucristó Si̱j ꞌNi̱j Raꞌa man níꞌ ado̱nj.

² Dan me se amán rá níꞌ niꞌya̱j níꞌ man Cristó, ne̱ cheꞌé dan guun cheꞌe̱ níꞌ nacaj níꞌ se lu̱j ꞌyaj Yaꞌanj cheꞌé níꞌ, ne̱ xraan nica̱j níꞌ se lu̱j yoꞌ a. Ne̱ ya̱j roꞌ, uun niha̱ꞌ ndoꞌo rá níꞌ cheꞌé se uun ya̱ rá níꞌ se vaa vaa güii ti̱haa̱n Yaꞌanj rihaan níꞌ nu̱ꞌ se vaa niꞌndaj ya̱ sa̱ꞌ veꞌé vaa soꞌ ado̱nj.

³ Ne̱ vaa cheꞌé gu̱un niha̱ꞌ rá níꞌ cheꞌé sayuun ranꞌ níꞌ, ne̱ neꞌen níꞌ se vaa cheꞌé sayuun ranꞌ níꞌ me se nariꞌ nucuaj doj nimán níꞌ,

⁴ ne̱ cheꞌé dan aranꞌ rá Yaꞌanj niꞌya̱j Yaꞌanj man níꞌ, ne̱ cheꞌé dan uun ya̱ rá níꞌ se vaa vaa güii ca̱yáán níꞌ ga̱ soꞌ a.

⁵ Cheꞌé dan se̱ guun naꞌa̱j níꞌ maꞌ. ꞌO̱ se rqué Yaꞌanj Nimán Yaꞌanj man níꞌ, ne̱ Nimán Yaꞌanj tihaa̱n man níꞌ se vaa ꞌe̱e̱ uxrá rá Yaꞌanj man níꞌ ado̱nj.

⁶ ꞌO̱ se Cristó me se ga̱a ne gu̱un nucua̱j maꞌa̱n níꞌ si̱j ma̱n rihaan chumii̱ nihánj quiꞌya̱j sa̱ꞌ níꞌ do̱ꞌ, ga̱a né si̱j noco̱ꞌ man Yaꞌanj me níꞌ do̱ꞌ, ne̱ caviꞌ Cristó cheꞌé maꞌa̱n níꞌ, ga̱a quisíj güii cachrón maꞌa̱n Yaꞌanj cavi̱ꞌ soꞌ na̱nj ado̱nj.

⁷ Dan me se sayu̱u̱n ndoꞌo vaa nari̱ꞌ níꞌ ꞌo̱ yuvii̱ caꞌve̱j rá nayo̱n rihaan tuviꞌ cavi̱ꞌ, nda̱ꞌ se síí ne tumé cacunꞌ me tuviꞌ yuvii̱ a. Caꞌve̱e se síí ne tumé cacunꞌ me tuviꞌ yuvii̱, tza̱j ne̱ se̱ caꞌvej rá yuvii̱ cavi̱ꞌ yuvii̱ cheꞌé soꞌ maꞌ. Caꞌve̱e se nda̱a síí sa̱ꞌ uxrá nimán me tuviꞌ yuvii̱, tza̱j ne̱ do̱j yuvii̱ quisi̱j rá cavi̱ꞌ cheꞌé tuviꞌ na̱nj ado̱nj.

⁸ Xa̱ꞌ Yaꞌanj, tza̱j ne̱ nda̱ꞌ se tumé níꞌ cacunꞌ, tza̱j ne̱ caviꞌ Cristó cheꞌé níꞌ, ne̱ nayón soꞌ rihaan níꞌ, quiꞌyaj Yaꞌanj, ne̱ veé dan me se tihaa̱n Yaꞌanj rihaan níꞌ se vaa ꞌe̱e̱ ndoꞌo rá Yaꞌanj man níꞌ ado̱nj.

⁹ Cuano̱ me se a̱j cunuu sa̱ꞌ nimán níꞌ rihaan Yaꞌanj, cheꞌé se cayanj ton man Cristó ga̱a caviꞌ soꞌ, ne̱ cheꞌé dan neꞌen níꞌ se vaa ti̱nanii Cristó man níꞌ rihaan sayuun quiꞌya̱j Yaꞌanj güii cuya̱nj rá Yaꞌanj ni̱ꞌyaj Yaꞌanj man yuvii̱ tumé cacunꞌ ado̱nj.

¹⁰ Nda̱ꞌ se síí ta̱j riꞌyunj man Yaꞌanj me níꞌ ga̱a rque̱, tza̱j ne̱ caꞌnéé Yaꞌanj Taꞌníí Yaꞌanj cavi̱ꞌ soꞌ cheꞌé yuvii̱, ne̱ guun tuvi̱ꞌ níꞌ ga̱ Yaꞌanj, quiꞌyaj soꞌ a. Ne̱ cunuu iꞌna̱ꞌ uún Cristó, ne̱ cheꞌé dan neꞌen níꞌ se vaa ya̱ nani̱i̱ níꞌ rihaan sayuun ne̱ cavi̱i̱ sa̱ꞌ níꞌ vaa güii ado̱nj.

¹¹ Ne do̱j nihánj me maꞌ. Da̱nj na̱nj uún ne̱ uun niha̱ꞌ rá níꞌ cata̱j níꞌ rihaan tuviꞌ níꞌ cheꞌé se vaa quiꞌyaj Yaꞌanj cheꞌé níꞌ, ne̱ da̱nj ꞌyaj níꞌ cheꞌé Jesucristó Si̱j ꞌNi̱j Raꞌa man níꞌ na̱nj á. ꞌO̱ se soꞌ me síí quiꞌyaj guun tuvi̱ꞌ níꞌ ga̱ Yaꞌanj ado̱nj.

Quiꞌyaj canaán Cristó rihaan cacunꞌ rii taꞌngaꞌ rihaan chumii̱ nihánj a

¹² Dan me se o̱rúnꞌ snóꞌo cuꞌna̱j Adán me síí guun ya̱a̱n quiꞌyaj cacunꞌ asino ya̱a̱n, ne̱ cheꞌé dan ase vaa tumé Adán cacunꞌ roꞌ, da̱nj vaa tumé cunuda̱nj nij yuvii̱ cacunꞌ rihaan Yaꞌanj a. ꞌO̱ se cheꞌé cacunꞌ quiꞌyaj Adán me se ya̱ guun cheꞌe̱ yuvii̱ quiꞌyaj yuvii̱ cacunꞌ, ga̱a ne̱ guun cheꞌe̱ nij yuvii̱ caviꞌ nimán nij yuvii̱, ne̱ cheꞌé dan nu̱ꞌ ꞌnaꞌ aviꞌ nimán cunuda̱nj nij yuvii̱ ma̱n rihaan chumii̱ nihánj cuano̱ ado̱nj.

¹³ Dan me se asi̱j ataa caꞌmi̱i̱ Yaꞌanj tucuáán cuchruj Moisés roꞌ, asi̱j da̱nj me quiꞌyaj yuvii̱ cacunꞌ, tza̱j ne̱ taj va̱j stucua̱nj Moisés cuno̱ nij yuvii̱ maꞌ. Cheꞌé dan ne quiꞌya̱j nij yuvii̱ cacunꞌ rihaan stucua̱nj Moisés maꞌ.

¹⁴ ꞌO̱ se caviꞌ síí cuꞌna̱j Adán caviꞌ cunuda̱nj tuviꞌ soꞌ caviꞌ, ne̱ nda̱a yuvii̱ ne quiꞌya̱j cacunꞌ nda̱a vaa quiꞌyaj síí cuꞌna̱j Adán roꞌ, nda̱a caviꞌ nij soꞌ ga̱a ataa quina̱j stucua̱nj Moisés ne̱ ga̱a cuchruj Yaꞌanj stucua̱nj Moisés uún a. Dan me se ase vaa quiranꞌ cunuda̱nj nij yuvii̱ ma̱n rihaan chumii̱ sayuun, quiꞌyaj o̱rúnꞌ síí cuꞌna̱j Adán roꞌ, da̱nj vaa cavii sa̱ꞌ queꞌe̱e̱ nij yuvii̱ ma̱n rihaan chumii̱, quiꞌyaj o̱rúnꞌ Jesucristó uún a.

¹⁵ Dan me se neꞌen níꞌ se vaa cacunꞌ quiꞌyaj síí cuꞌna̱j Adán rihaan Yaꞌanj roꞌ, quisíj cacunꞌ yoꞌ tiriꞌ yoꞌ man nimán cunuda̱nj nij yuvii̱ ma̱n rihaan chumii̱ cuano̱, ne̱ cheꞌé dan nu̱ꞌ ꞌnaꞌ aviꞌ nimán nij yuvii̱ na̱nj ado̱nj. Tza̱j ne̱ doj a̱ nucua̱j Yaꞌanj rihaan Adán na̱nj ado̱nj. Cheꞌé dan neꞌen ya̱ níꞌ se vaa ra̱cuíj Yaꞌanj man ri̱i̱ ndoꞌo yuvii̱, ne̱ doj a̱ caꞌve̱e cavi̱i̱ sa̱ꞌ nij yuvii̱ cheꞌé se lu̱j quiꞌyaj Jesucristó cheꞌé nij soꞌ na̱nj ado̱nj.

¹⁶ Dan me se ga̱a quiꞌyaj o̱rúnꞌ síí cuꞌna̱j Adán cacunꞌ, ne̱ quitáá cacunꞌ xráá cunuda̱nj nij yuvii̱, tza̱j ne̱ ino̱ uxrá vaa se lu̱j quiꞌyaj Jesucristó cheꞌé níꞌ, ne̱ dan me se ga̱a quisíj quiꞌyaj ndoꞌo níꞌ cacunꞌ ne̱ caviꞌ soꞌ cheꞌé níꞌ, ne̱ dan me se güéj cacunꞌ xráá níꞌ, quiꞌyaj soꞌ ado̱nj.

¹⁷ ꞌO̱ se neꞌen níꞌ se vaa ga̱a quiꞌyaj o̱rúnꞌ síí cuꞌna̱j Adán cacunꞌ yoꞌ, ne̱ quiranꞌ cunuda̱nj nij yuvii̱ ma̱n rihaan chumii̱ sayuun se vaa nu̱ꞌ ꞌnaꞌ aviꞌ nimán cunuda̱nj nij yuvii̱ a. Cheꞌé dan níꞌ si̱j cunuu sa̱ꞌ rihaan Yaꞌanj cheꞌé se lu̱j quiꞌyaj o̱rúnꞌ Jesucristó cheꞌé níꞌ me se doj a̱ neꞌen níꞌ se vaa ga̱a̱ iꞌna̱ꞌ nimán níꞌ ne̱ gu̱un chij níꞌ rihaan chumii̱ nihánj cheꞌé se vaa quiꞌyaj soꞌ ado̱nj.

¹⁸ Dan me se cheꞌé o̱rúnꞌ cacunꞌ quiꞌyaj Adán me táá cacunꞌ xráá cunuda̱nj nij yuvii̱ ma̱n rihaan chumii̱, tza̱j ne̱ cheꞌé o̱rúnꞌ suun sa̱ꞌ ndoꞌo quiꞌyaj Jesucristó roꞌ, cheꞌé dan caꞌve̱e güe̱j cacunꞌ xráá cunuda̱nj nij yuvii̱, quiꞌyaj soꞌ, ne̱ caꞌve̱e ꞌo̱ ga̱a̱ iꞌna̱ꞌ nimán nij yuvii̱ a.

¹⁹ Dan me se síí cuꞌna̱j Adán roꞌ, o̱rúnꞌ soꞌ ne caꞌve̱j rá cuno̱ rihaan Yaꞌanj, ne̱ cheꞌé dan queꞌe̱e̱ ndoꞌo yuvii̱ tumé cacunꞌ, tza̱j ne̱ cuno o̱rúnꞌ síí cuꞌna̱j Jesucristó rihaan Yaꞌanj, ne̱ cheꞌé dan cunu̱u sa̱ꞌ ri̱i̱ uxrá yuvii̱ rihaan Yaꞌanj ado̱nj.

²⁰ Dan me se cataj xnaꞌanj Yaꞌanj da̱j ga̱a̱ stucua̱nj Moisés rihaan Moisés ga̱a naá, tza̱j ne̱ queneꞌen Yaꞌanj se vaa síí se̱ cuno rihaan Yaꞌanj me yuvii̱ ne̱ tana̱nj a̱ doj a̱ quiꞌya̱j yuvii̱ cacunꞌ cheꞌé stucua̱nj Moisés a. Dan me se quisíj cataj xnaꞌanj Yaꞌanj da̱j ga̱a̱ stucua̱nj Moisés rihaan soꞌ, ga̱a ne̱ doj a̱ guun rá yuvii̱ quiꞌya̱j yuvii̱ se chiꞌi̱i̱ á. Tza̱j ne̱ ga̱a xnaꞌanj uxrá doj cacunꞌ tumé yuvii̱, ne̱ Yaꞌanj me síí quirii nimán doj a̱ quiꞌya̱j se lu̱j cheꞌé nij yuvii̱ rihaan cacunꞌ a.

²¹ Dan me se asino guun chij ndoꞌo cacunꞌ rihaan nimán yuvii̱, ga̱a ne̱ guun cheꞌe̱ yuvii̱ caviꞌ nimán yuvii̱ cheꞌé cacunꞌ, ne̱ quira̱nꞌ nij yuvii̱ sayuun nu̱ꞌ cavii nu̱ꞌ caꞌanj a. Tza̱j ne̱ quiꞌyaj ndoꞌo Yaꞌanj se lu̱j cheꞌé nij yuvii̱, cheꞌé rej quiꞌya̱j canaán se lu̱j yoꞌ rihaan cacunꞌ, ne̱ gu̱un chij ndoꞌo se lu̱j yoꞌ rihaan nimán nij yuvii̱, ne̱ cheꞌé dan nuu sa̱ꞌ nimán nij yuvii̱ rihaan Yaꞌanj, ne̱ ca̱yáán nij yuvii̱ ga̱ Yaꞌanj nu̱ꞌ cavii nu̱ꞌ caꞌanj a. Da̱nj quiꞌyaj Yaꞌanj cheꞌé níꞌ ga̱a caviꞌ Jesucristó Si̱j ꞌNi̱j Raꞌa man níꞌ rihaan rcutze̱ ado̱nj.