Romanos 3 - Triqui de San Juan Copala

Sa̱ꞌ uxrá quiꞌyaj Yaꞌanj cheꞌé nij yuvii̱ israelitá a

¹ A̱ me se caꞌve̱e doj quiꞌya̱j canaán nij síí israelitá, rá so̱ꞌ ga̱. Ne̱ a̱ me rasu̱u̱n quiri̱ꞌ nij soꞌ quiꞌya̱j yan ata̱ nij soꞌ taꞌngaꞌ ga̱.

² ꞌO̱ se vaa se uun ya̱ nij síí israelitá a. Dan me se asino cataj xnaꞌanj Yaꞌanj nu̱ꞌ snana̱ Yaꞌanj rihaan xi̱i nij soꞌ ga̱a naá, ne̱ nucua̱j rá Yaꞌanj man nij soꞌ se vaa tu̱mé sa̱ꞌ nij soꞌ snana̱ soꞌ, ne̱ se̱ niꞌyón nij soꞌ man yoꞌ, rá Yaꞌanj a.

³ Taꞌa̱j tuviꞌ nij soꞌ ne cuchuma̱n rá ni̱ꞌyaj snana̱ Yaꞌanj, tza̱j ne̱ se̱ caꞌvee quiꞌya̱j se nij quiꞌyaj nij soꞌ se vaa ta̱náj xco̱ Yaꞌanj nana̱ cataꞌ tuꞌva soꞌ rihaan nij síí israelitá maꞌ.

⁴ A̱ ꞌó xcoꞌ se̱ caꞌvee maꞌ. Cata̱j níꞌ se vaa síí aꞌmii ina̱nj nana ya̱ me Yaꞌanj, ne̱ síí aꞌmii nana̱ ne̱ me cunuda̱nj yuvii̱ á. Nana̱ no̱ rihaan Da̱nj Yaꞌanj taj a: Queneꞌe̱n yuvii̱ se vaa se sa̱ꞌ inanj me nana aꞌmii so̱ꞌ do̱ꞌ, se vaa nica̱ aꞌnéꞌ so̱ꞌ cacunꞌ do̱ꞌ a. Da̱nj taj Danj Yaꞌanj cheꞌé maꞌa̱n Yaꞌanj ado̱nj.

No̱ xcúún Yaꞌanj quiꞌya̱j soꞌ sayuun man yuvii̱ quiꞌyaj cacunꞌ a

⁵ Vaa taꞌa̱j yuvii̱ ne acaj sa̱ꞌ cuentá cata̱j a: “Ga̱a ꞌyaj núj se chiꞌi̱i̱, ne̱ doj a̱ neꞌen yuvii̱ se vaa síí nica̱ ina̱nj rá me Yaꞌanj a. Sese da̱nj vaa, ne̱ ne nó xcúún Yaꞌanj quiꞌya̱j Yaꞌanj sayuun man núj cheꞌé se chiꞌi̱i̱ ꞌyaj núj maꞌ”, taj nij yuvii̱ yoꞌ a.

⁶ A̱ ꞌó xcoꞌ ne ya̱ aꞌmii nij soꞌ a̱ maꞌ. ꞌO̱ se no̱ xcúún Yaꞌanj caꞌne̱ꞌ Yaꞌanj cacunꞌ cheꞌé cunuda̱nj yuvii̱ ma̱n rihaan chumii̱, ne̱ cheꞌé dan no̱ xcúún soꞌ quiꞌya̱j soꞌ sayuun man yuvii̱ quiꞌyaj cacunꞌ ado̱nj.

⁷ Ne̱ vaa taꞌa̱j nij yuvii̱ cata̱j uún a: “Sese aꞌmii ne̱ ꞌu̱nj, ne̱ sa̱ꞌ ꞌyáj, ga̱a ne̱ doj a̱ xca̱j nii cuentá se vaa Yaꞌanj me síí aꞌmii nana̱ ya̱ a. Sa̱ꞌ uxrá vaa Yaꞌanj, cata̱j nii a. Cheꞌé dan me taj cheꞌé cuta̱ꞌ Yaꞌanj cacunꞌ xráj maꞌ.” Da̱nj aꞌmii uún taꞌa̱j nij yuvii̱,

⁸ ne̱ taj uún nij soꞌ a: “Sa̱ꞌ doj quiꞌya̱j ndoꞌo níꞌ cacunꞌ, ga̱a ne̱ doj a̱ caꞌmi̱i̱ sa̱ꞌ yuvii̱ cheꞌé Yaꞌanj, quiꞌya̱j níꞌ á”, taj uún nij yuvii̱ a. Ne̱ aꞌmii nij soꞌ nana̱ nij cheꞌé núj, ne̱ aꞌmii ne̱ nij soꞌ taj nij soꞌ se vaa ꞌo̱ cuya̱a̱n vaa nana̱ aꞌmii núj ga̱ nana̱ aꞌmii nij soꞌ, taj nij soꞌ a. Ya̱ vaa cheꞌé quiꞌya̱j Yaꞌanj sayuun man nij síí ne̱ yoꞌ na̱nj ado̱nj.

Tumé cunuda̱nj yuvii̱ cacunꞌ a

⁹ Me nana̱ caꞌmi̱i̱ níꞌ cheꞌé níꞌ si̱j israelitá ga̱. Sa̱ꞌ doj vaa nij síí israelitá rihaan nij yuvii̱ yaníj naꞌ. Taj maꞌ. Ma̱an se a̱j cataj ꞌu̱nj se vaa ꞌo̱ cuya̱a̱n vaa se qui̱j quiꞌyaj níꞌ si̱j israelitá ga̱ se qui̱j quiꞌyaj nij yuvii̱ yaníj, ne̱ cunuda̱nj níꞌ tumé cacunꞌ a.

¹⁰ Ase vaa nana̱ taj ꞌu̱nj roꞌ, da̱nj vaa nana̱ no̱ rihaan Danj Yaꞌanj a. Taj yoꞌ a: Taj va̱j a̱ ꞌó síí sa̱ꞌ nimán maꞌ.

¹¹ A̱ ꞌó yuvii̱ ne neꞌen da̱j vaa Yaꞌanj maꞌ. A̱ ꞌó yuvii̱ ne nanoꞌ man Yaꞌanj maꞌ.

¹² Tanáj cunuda̱nj yuvii̱ stucua̱nj Yaꞌanj, ne̱ taj se gúnꞌ man nij yuvii̱ a̱ maꞌ. A̱ ꞌó yuvii̱ ne ꞌyaj se sa̱ꞌ maꞌ.

¹³ Ase vaa riꞌyuj nee̱ man xnangá na̱j rihaan santó roꞌ, da̱nj vaa nana̱ aꞌmii nij síí tumé cacunꞌ yoꞌ ado̱nj. ꞌO̱ se nana̱ tihaꞌ yuꞌunj aꞌmii nij soꞌ, ne̱ ase vaa na xna̱j ma̱n tuꞌva xcuáá roꞌ, da̱nj vaa nana̱ tuꞌva nij soꞌ, ne̱ ꞌyaj chiꞌi̱i̱ nij soꞌ man nimán yuvii̱ ado̱nj.

¹⁴ Dan me se ina̱nj aꞌmii chre̱e nij soꞌ do̱ꞌ, aꞌmii xco̱j ruva̱a̱ rá nij soꞌ do̱ꞌ, cheꞌé tuviꞌ nij soꞌ a.

¹⁵ Chéé nda̱a unánj tacóó nij soꞌ, cheꞌé rej ticavi̱ꞌ nij soꞌ tuviꞌ nij soꞌ a.

¹⁶ Me rej maꞌa̱n va̱j nij soꞌ ꞌyaj nij soꞌ sayuun a.

¹⁷ Ne neꞌen nij soꞌ rej cuma̱n nij soꞌ dínj ga̱ ꞌó yuvii̱ maꞌ.

¹⁸ Ne chuꞌviꞌ nij soꞌ quiꞌya̱j Yaꞌanj sayuun man nij soꞌ maꞌ. Da̱nj vaa taj Danj Yaꞌanj cheꞌé cunuda̱nj yuvii̱ na̱nj ado̱nj.

¹⁹ Dan me se yuvii̱ noco̱ꞌ stucua̱nj Moisés me nij síí israelitá, ne̱ dan me se neꞌen níꞌ se vaa nu̱ꞌ nana̱ yoꞌ nana̱ no̱ rihaan Danj Yaꞌanj roꞌ, taj xnaꞌanj rihaan nij soꞌ da̱j vaa maꞌa̱n nij soꞌ a. Nda̱a síj, ga̱a ne̱ gu̱un naꞌa̱j nij soꞌ ga̱ ꞌó nij yuvii̱ ma̱n rihaan chumii̱ nihánj, ne̱ queneꞌe̱n cunuda̱nj níꞌ se vaa vaa cheꞌé quiꞌya̱j Yaꞌanj sayuun man níꞌ na̱nj ado̱nj.

²⁰ ꞌO̱ se taj a̱ ꞌó yuvii̱ ne quisi̱j quiꞌya̱j nu̱ꞌ nda̱a vaa taj stucua̱nj Moisés, ne̱ cheꞌé dan taj se qui̱ꞌyáꞌ cunu̱u sa̱ꞌ a̱ doj yuvii̱ rihaan Yaꞌanj quiꞌya̱j tucuáán yoꞌ a̱ maꞌ. Ma̱an se nariꞌ yuvii̱ stucua̱nj Moisés, ne̱ xcaj yuvii̱ cuentá se vaa ya̱ ya̱ si̱j tumé cacunꞌ me maꞌa̱n nij yuvii̱ rihaan Yaꞌanj na̱nj ado̱nj.

Cunuda̱nj yuvii̱ cuchumán rá niꞌya̱j man Cristó roꞌ, cunuu sa̱ꞌ nij soꞌ rihaan Yaꞌanj a

²¹ Ne̱ ya̱j me se tihaa̱n Yaꞌanj rihaan yuvii̱ da̱j quiꞌya̱j soꞌ ne̱ tinavi̱j soꞌ cacunꞌ tumé yuvii̱ a. Dan me se se̱ cunuu sa̱ꞌ yuvii̱ quiꞌya̱j ina̱nj tucuáán rqué Yaꞌanj rihaan Moisés maꞌ. ꞌO̱ se cataj Danj Yaꞌanj cataj nij síí nataꞌ snana̱ Yaꞌanj ga̱a naá cataj se vaa

²² cuchuma̱n rá yuvii̱ ni̱ꞌyaj yuvii̱ Jesucristó, ga̱a ne̱ tinavi̱j Yaꞌanj cacunꞌ tumé nij yuvii̱, ne̱ cunu̱u sa̱ꞌ nimán nij yuvii̱ rihaan Yaꞌanj a. Taj a̱ ꞌó yuvii̱ ino̱ vaa rihaan Yaꞌanj maꞌ.

²³ ꞌO̱ se cunuda̱nj yuvii̱ tumé cacunꞌ na̱nj ado̱nj. Ne quisi̱j uxrá nij yuvii̱ cunu̱u sa̱ꞌ ina̱nj nij yuvii̱ nda̱a vaa Yaꞌanj a̱ maꞌ.

²⁴ ꞌO̱ se ma̱an cheꞌé se cunuu ꞌe̱e̱ rá Yaꞌanj man cunuda̱nj yuvii̱ ne̱ quiꞌyaj maꞌa̱n Yaꞌanj se lu̱j cheꞌé nij yuvii̱ me caꞌvee tinavij Yaꞌanj cacunꞌ tumé nij yuvii̱ ado̱nj. Dan me se caꞌnéé Yaꞌanj man Cristó Jesús rihaan chumii̱, cheꞌé rej caꞌne̱e̱ soꞌ cacunꞌ xráá nij síí amán rá niꞌya̱j man soꞌ,

²⁵ ne̱ dan me se caꞌnéé Yaꞌanj man Jesús nayo̱n Jesús rihaan yuvii̱ tumé cacunꞌ, ne̱ cuchuma̱n rá nij síí tumé cacunꞌ se vaa caviꞌ Jesús cheꞌé nij soꞌ, ne̱ nani̱i̱ nij soꞌ rihaan sayuun na̱nj ado̱nj. Dan me se neꞌen níꞌ se vaa tinavij Yaꞌanj cacunꞌ tumé yuvii̱, ne̱ xcaj níꞌ cuentá se vaa vaa nica̱ rá Yaꞌanj ga̱a tinavij Yaꞌanj cacunꞌ tumé nij yuvii̱ cayáán ga̱a naá a. Yuvii̱ cayáán ga̱a naá roꞌ, ne quira̱nꞌ nij soꞌ sayuun cheꞌé cacunꞌ tumé nij soꞌ maꞌ.

²⁶ Ma̱an se caráj xꞌnaa Yaꞌanj, ne̱ naꞌvi̱j Yaꞌanj nda̱a se caviꞌ Jesús, ga̱a ne̱ navij cacunꞌ tumé nij síí cayáán ga̱a naá síí amán rá niꞌya̱j man Yaꞌanj a. Ne̱ xcaj uún níꞌ cuentá se vaa vaa nica̱ rá Yaꞌanj ga̱a aꞌneꞌ soꞌ cacunꞌ tumé yuvii̱ ya̱nj rihaan chumii̱ cuano̱ a. Dan me se nica̱ vaa rá Yaꞌanj, ne̱ uun nucua̱j Yaꞌanj tinavi̱j soꞌ cacunꞌ tumé cunuda̱nj níꞌ si̱j amán rá niꞌya̱j man Jesús, ga̱a ne̱ gu̱un níꞌ síí sa̱ꞌ rihaan Yaꞌanj ado̱nj.

²⁷ Stucua̱nj Moisés me se taj se ꞌyaj tucuáán yoꞌ cheꞌé cacunꞌ tumé yuvii̱ maꞌ. Dan me se né cheꞌe̱ suun sa̱ꞌ quiꞌyaj suun níꞌ me navij cacunꞌ xráá níꞌ maꞌ. Ma̱an se cheꞌé se amán rá níꞌ niꞌya̱j níꞌ man Cristó, cheꞌé dan navij cacunꞌ tumé níꞌ ado̱nj. Cheꞌé dan se̱ guun cata̱j níꞌ ma̱an cheꞌé se cuno níꞌ nu̱ꞌ tucuáán rqué Yaꞌanj rihaan Moisés, cheꞌé dan guun níꞌ síí sa̱ꞌ maꞌ. Ma̱an se ina̱nj cheꞌé Cristó me nanii níꞌ rihaan sayuun na̱nj ado̱nj.

²⁸ Dan me se cuchuma̱n rá yuvii̱ ni̱ꞌyaj yuvii̱ man Cristó, ne̱ navi̱j cacunꞌ xráá yuvii̱ yoꞌ a. Taj se ꞌyaj nda̱ꞌ se quiꞌyaj ndoꞌo yuvii̱ se sa̱ꞌ maꞌ. Ma̱an se ina̱nj cheꞌé Cristó navij cacunꞌ xráá yuvii̱ na̱nj ado̱nj. Dan me nana̱ guun ya̱ rá níꞌ cuno níꞌ ado̱nj.

²⁹ Taꞌanj ina̱nj nij síí israelitá me Yaꞌanj naꞌ. Né Taꞌa̱nj nij síí yaníj me uún soꞌ naꞌ. Ya̱ uxrá Taꞌanj nij síí yaníj me uún soꞌ chugua̱nj.

³⁰ O̱rúnꞌ Yaꞌanj nicunꞌ, ne̱ sese cuchuma̱n rá nij yuvii̱ israelitá ni̱ꞌyaj nij yuvii̱ Yaꞌanj, ne̱ cata̱j Yaꞌanj se vaa síí nuu sa̱ꞌ nimán me nij soꞌ, ne̱ sese cuchuma̱n rá yuvii̱ yaníj ni̱ꞌyaj nij soꞌ Yaꞌanj, ne̱ cata̱j uún Yaꞌanj se vaa síí nuu sa̱ꞌ nimán me nij soꞌ uún na̱nj ado̱nj.

³¹ Dan me se a̱j cataj núj se vaa taj se gúnꞌ man nana̱ cataj xnaꞌanj Yaꞌanj ga̱a naá, rá soj naꞌ. Daj chiha̱a̱ míj se̱ guun da̱nj rá soj maꞌ. Vaa se gúnꞌ man yoꞌ ado̱nj. Vaa cheꞌé ndoꞌo cuchruj Moisés tucuáán caꞌmii Yaꞌanj cheꞌé níꞌ na̱nj á.