Romanos 2 - Triqui de San Juan Copala

Nataꞌ Pabló da̱j quiꞌya̱j Yaꞌanj asa̱ꞌ caꞌneꞌ Yaꞌanj cacunꞌ cheꞌé ꞌo̱ ꞌo̱ yuvii̱ a

¹ Me cheꞌé taj so̱ꞌ se vaa ina̱nj maꞌa̱n tuvíꞌ so̱ꞌ tumé cacunꞌ ga̱. ꞌO̱ se ꞌo̱ cuya̱a̱n vaa cacunꞌ ꞌyaj ma̱ꞌán so̱ꞌ ga̱ cacunꞌ ꞌyaj tuvíꞌ so̱ꞌ, ne̱ sese cuta̱ꞌ so̱ꞌ cacunꞌ xráá tuvíꞌ so̱ꞌ, ne̱ cuta̱ꞌ nii cacunꞌ xráá ma̱ꞌán so̱ꞌ uún ado̱nj.

² Ya̱ uxrá Yaꞌanj me síí caꞌne̱ꞌ cacunꞌ cheꞌé cunuda̱nj síí ꞌyaj da̱nj ado̱nj. Dan me se ina̱nj nana̱ ya̱ caꞌmi̱i̱ Yaꞌanj güii caꞌne̱ꞌ soꞌ cacunꞌ cheꞌé yuvii̱, ne̱ nu̱ꞌ síí chiꞌi̱i̱ roꞌ, quira̱nꞌ ndoꞌo nij soꞌ sayuun, quiꞌya̱j Yaꞌanj na̱nj ado̱nj.

³ Dan me se utáꞌ so̱ꞌ cacunꞌ xráá tuvíꞌ so̱ꞌ, tza̱j ne̱ ꞌo̱ cuya̱a̱n vaa cacunꞌ ꞌyaj ma̱ꞌán so̱ꞌ uún a. Asa̱ꞌ caꞌve̱e nani̱i̱ so̱ꞌ rihaan sayuun asa̱ꞌ caꞌneꞌ Yaꞌanj cacunꞌ cheꞌé cunuda̱nj yuvii̱, rá so̱ꞌ ga̱.

⁴ Me cheꞌé nachríꞌ so̱ꞌ se vaa me rá Yaꞌanj quiꞌya̱j sa̱ꞌ Yaꞌanj cheꞌé so̱ꞌ ga̱. Ne̱ me rá uún Yaꞌanj cunu̱u ꞌe̱e̱ rá Yaꞌanj mán so̱ꞌ ado̱nj. Naꞌvej rá Yaꞌanj quiꞌya̱j Yaꞌanj sayuun mán so̱ꞌ maꞌ. Ne neꞌén so̱ꞌ se vaa Yaꞌanj me síí ꞌe̱e̱ rá niꞌya̱j mán so̱ꞌ a. Ne̱ me rá Yaꞌanj nuchra̱nꞌ nimán so̱ꞌ ca̱nocóꞌ so̱ꞌ man soꞌ ado̱nj.

⁵ Tza̱j ne̱ veé dan me se naꞌvej uxrá rá so̱ꞌ ta̱náj so̱ꞌ chrej noco̱ꞌ so̱ꞌ, ne̱ naꞌvej rá so̱ꞌ nuchra̱nꞌ nimán so̱ꞌ ca̱nocóꞌ so̱ꞌ man Yaꞌanj maꞌ. Ne̱ vaa güii caꞌne̱ꞌ Yaꞌanj cacunꞌ cheꞌé yuvii̱, ne̱ caꞌmi̱i̱ ya̱ Yaꞌanj, ne̱ cuya̱nj rá Yaꞌanj ni̱ꞌyaj Yaꞌanj man cunuda̱nj nij síí tumé cacunꞌ, ne̱ dan me se cuya̱nj rá Yaꞌanj ni̱ꞌyaj Yaꞌanj man ma̱ꞌán so̱ꞌ uún ado̱nj.

⁶ Dan me se caꞌne̱ꞌ Yaꞌanj cacunꞌ cheꞌé ꞌo̱ ꞌo̱ yuvii̱, ne̱ nda̱a vaa quiꞌyaj ꞌo̱ ꞌo̱ yuvii̱ roꞌ, da̱nj quiꞌya̱j Yaꞌanj ga̱ soꞌ uún ado̱nj.

⁷ Dan me se taꞌa̱j yuvii̱ racuíj man tuviꞌ nij soꞌ, ne̱ ina̱nj ꞌyaj nij soꞌ se sa̱ꞌ cheꞌé tuviꞌ nij soꞌ, cheꞌé rej niꞌndaj ya̱ sa̱ꞌ quiꞌya̱j Yaꞌanj ga̱ nij soꞌ ne̱ caꞌmi̱i̱ cochro̱j Yaꞌanj cheꞌé nij soꞌ a. Me rá nij soꞌ ca̱yáán nij soꞌ ga̱ Yaꞌanj nu̱ꞌ cavii nu̱ꞌ caꞌanj, ne̱ ya̱ uxrá da̱nj ga̱a̱ quiꞌya̱j Yaꞌanj á.

⁸ Xco̱j ruva̱a̱ ndoꞌo rá ꞌó taꞌa̱j yuvii̱, ne̱ ne uno nij soꞌ nana̱ ya̱ maꞌ. Tana̱nj tucuáán chiꞌi̱i̱ ina̱nj nocoꞌ nij soꞌ, ne̱ cheꞌé dan cuya̱nj rá Yaꞌanj ni̱ꞌyaj Yaꞌanj man nij soꞌ a.

⁹ Quiꞌya̱j Yaꞌanj sayuun man cunuda̱nj nij síí ꞌyaj se nij, ne̱ quira̱nꞌ ndoꞌo nij soꞌ sayuun, quiꞌya̱j Yaꞌanj, ne̱ asino caꞌne̱ꞌ Yaꞌanj cacunꞌ cheꞌé nij síí israelitá, ga̱a ne̱ caꞌne̱ꞌ soꞌ cacunꞌ cheꞌé nij yuvii̱ yaníj uún a.

¹⁰ Tza̱j ne̱ niꞌndaj ya̱ sa̱ꞌ quiꞌya̱j Yaꞌanj ga̱ nij yuvii̱ ꞌyaj se sa̱ꞌ, ne̱ Yaꞌanj me síí caꞌmi̱i̱ cochro̱j cheꞌé nij soꞌ, ne̱ ga̱a̱ xe̱j nimán nij soꞌ, quiꞌya̱j Yaꞌanj a. Da̱nj quiꞌya̱j Yaꞌanj cheꞌé nij yuvii̱ israelitá ꞌyaj se sa̱ꞌ, ne̱ veé da̱nj quiꞌya̱j soꞌ cheꞌé nij yuvii̱ yaníj ꞌyaj se sa̱ꞌ uún a.

¹¹ ꞌO̱ se ꞌo̱ cuya̱a̱n vaa cunuda̱nj níꞌ rihaan Yaꞌanj ado̱nj.

¹² Yuvii̱ noco̱ꞌ stucua̱nj Moisés me nij yuvii̱ israelitá, ne̱ cheꞌé dan, sese ne ꞌyaj nij yuvii̱ israelitá nu̱ꞌ stucua̱nj Moisés, ne̱ quiꞌya̱j Yaꞌanj sayuun man nij soꞌ a. Nda̱ꞌ se né si̱j nocoꞌ stucua̱nj Moisés me nij síí yaníj, tza̱j ne̱ neꞌen maꞌa̱n nij soꞌ da̱j me rá Yaꞌanj quiꞌya̱j nij soꞌ, ne̱ cheꞌé dan quira̱nꞌ nij soꞌ sayuun sese se̱ caꞌvej rá nij soꞌ quiꞌya̱j nij soꞌ nda̱a vaa me rá Yaꞌanj ado̱nj.

¹³ Caꞌve̱e se neꞌen uxrá níꞌ da̱j vaa stucua̱nj Moisés, tza̱j ne̱ sese se̱ quiꞌyaj níꞌ nda̱a vaa taj tucuáán yoꞌ, ne̱ se̱ cunuu sa̱ꞌ nimán níꞌ rihaan Yaꞌanj maꞌ. Tza̱j ne̱ sese quiꞌya̱j níꞌ nda̱a vaa taj tucuáán yoꞌ, ne̱ ya̱ cunu̱u sa̱ꞌ nimán níꞌ rihaan Yaꞌanj ado̱nj.

¹⁴ Nda̱ꞌ se ne neꞌen nij yuvii̱ yaníj stucua̱nj Moisés, tza̱j ne̱ avii ina̱nj raa̱ maꞌa̱n nij soꞌ quiꞌya̱j maꞌa̱n nij soꞌ nda̱a vaa me rá Yaꞌanj quiꞌya̱j yuvii̱ ado̱nj. Ne̱ ga̱a ꞌyaj maꞌa̱n nij soꞌ se vaa me rá Yaꞌanj quiꞌya̱j nij soꞌ, ne̱ xcaj níꞌ cuentá se vaa nica̱j nij soꞌ tucuáán me rá Yaꞌanj canoco̱ꞌ yuvii̱,

¹⁵ ne̱ cheꞌé se vaa ꞌyaj nij soꞌ roꞌ, cheꞌé dan neꞌen níꞌ se vaa neꞌen maꞌa̱n nij soꞌ da̱j me rá Yaꞌanj quiꞌya̱j yuvii̱ a. Ne̱ dan me se sese ꞌyaj nij soꞌ se nij, ne̱ neꞌen maꞌa̱n nij soꞌ se vaa naꞌvej Yaꞌanj quiꞌya̱j nij soꞌ da̱nj a. Ne̱ nuchruj ra̱a̱ nij soꞌ me tucuáán sa̱ꞌ quiꞌya̱j nij soꞌ, ne̱ cheꞌé dan neꞌen níꞌ se vaa ya̱ neꞌen nij soꞌ da̱j me rá Yaꞌanj quiꞌya̱j nij soꞌ ado̱nj.

¹⁶ Ne̱ da̱nj ga̱a̱ caꞌne̱ꞌ Yaꞌanj cacunꞌ cheꞌé nij soꞌ güii caꞌne̱ꞌ Yaꞌanj cacunꞌ cheꞌé nimán yuvii̱ á. Da̱nj taj nana̱ sa̱ꞌ cheꞌé Cristó aꞌmii natáj ꞌu̱nj rihaan yuvii̱ na̱nj á.

Ne nocoꞌ sa̱ꞌ nij yuvii̱ israelitá stucua̱nj Moisés maꞌ

¹⁷ Tza̱j ne̱ so̱ꞌ roꞌ, ya̱ yuvii̱ israelitá mé so̱ꞌ, rá so̱ꞌ á. Nucua̱j rá so̱ꞌ se vaa cavi̱i̱ sa̱ꞌ so̱ꞌ, quiꞌya̱j stucua̱nj Moisés, ne̱ neꞌén so̱ꞌ Yaꞌanj, rá so̱ꞌ á.

¹⁸ Neꞌén so̱ꞌ da̱j me rá Yaꞌanj qui̱ꞌyáá so̱ꞌ, ne̱ tucuꞌyón so̱ꞌ stucua̱nj Moisés, ne̱ ina̱nj sa̱ꞌ ꞌyáá so̱ꞌ, rá ma̱ꞌán so̱ꞌ á.

¹⁹ Neꞌen ma̱ꞌán so̱ꞌ ti̱haán so̱ꞌ chrej man nij yuvii̱ aráán rihaan, rá so̱ꞌ á. Neꞌen ma̱ꞌán so̱ꞌ se vaa ase vaa yaꞌan chuguu̱n rihaan síí chéé rej rmi̱ꞌ mé so̱ꞌ, rá so̱ꞌ á.

²⁰ Neꞌén so̱ꞌ tu̱cuꞌyón so̱ꞌ man nij yuvii̱ niꞌyo̱n do̱ꞌ, man nij xnii do̱ꞌ, rá so̱ꞌ á. Cheꞌé se tucuꞌyón so̱ꞌ stucua̱nj Moisés, ne̱ cheꞌé dan neꞌén so̱ꞌ nu̱ꞌ nana̱ ya̱, rá so̱ꞌ á.

²¹ Sese neꞌén so̱ꞌ tu̱cuꞌyón so̱ꞌ man ꞌó yuvii̱, ne̱ me cheꞌé naꞌvej rá so̱ꞌ tu̱cuꞌyón so̱ꞌ man ma̱ꞌán so̱ꞌ ga̱an. Aꞌmii natáj so̱ꞌ rihaan yuvii̱ se vaa se̱ quiꞌyaj itu̱u̱ yuvii̱ maꞌ. Tza̱j ne̱ ma̱ꞌán so̱ꞌ me síí itu̱u̱, ne̱ me cheꞌé ꞌyaj itu̱u̱ so̱ꞌ ga̱an.

²² Taj so̱ꞌ se vaa se̱ cotoj ꞌo̱ soꞌ ga̱ ꞌó yuvii̱ sese né ni̱ca̱ soꞌ me, tza̱j ne̱ me cheꞌé otoj so̱ꞌ ga̱ nica̱ tuvíꞌ so̱ꞌ ga̱an. Nij ndoꞌo vaa yaꞌanj quiꞌyaj maꞌa̱n yuvii̱, rá so̱ꞌ, tza̱j ne̱ me cheꞌé ꞌyaj itu̱u̱ so̱ꞌ saꞌanj nu̱u̱ tacóó nij yaꞌanj yoꞌ ga̱an.

²³ Sa̱ꞌ uxrá ꞌyáá so̱ꞌ unó so̱ꞌ nu̱ꞌ stucua̱nj Moisés, taj so̱ꞌ, tza̱j ne̱ me cheꞌé ꞌyaj ndoꞌo so̱ꞌ cacunꞌ naꞌvej rá Yaꞌanj qui̱ꞌyáá so̱ꞌ ga̱an. Cheꞌé dan aꞌngaꞌ naco̱o̱ nij yuvii̱ niꞌya̱j nij yuvii̱ Yaꞌanj, ꞌyáá so̱ꞌ ado̱nj.

²⁴ ꞌO̱ se a̱j quiꞌyaj soj nda̱a vaa taj nana̱ nihánj no̱ rihaan Danj Yaꞌanj a: “Maꞌa̱n soj si̱j israelitá ꞌyaj aꞌmii yuvii̱ yaníj nana̱ qui̱j cheꞌé Yaꞌanj á.” Nihánj me nana̱ caꞌmii Yaꞌanj cheꞌé maꞌa̱n soj ado̱nj.

Me rá Yaꞌanj canoco̱ꞌ nimán yuvii̱ man Yaꞌanj a

²⁵ Cutaꞌ nii taꞌngaꞌ man nee̱ mán so̱ꞌ asânj. Cuna̱j vaa yoꞌ, sese ya̱ ꞌyáá so̱ꞌ nda̱a vaa taj stucua̱nj Moisés, tza̱j ne̱ sese ne ꞌyáá so̱ꞌ nda̱a vaa taj stucua̱nj Moisés, ne̱ taj se gúnꞌ man taꞌngaꞌ yoꞌ maꞌ.

²⁶ Ne̱ xa̱ꞌ síí yaníj, tza̱j ne̱ sese ꞌyaj soꞌ se vaa me rá Yaꞌanj quiꞌya̱j yuvii̱, ne̱ ase vaa síí ta̱j taꞌngaꞌ man roꞌ, da̱nj vaa gue̱e̱ soꞌ rihaan Yaꞌanj ado̱nj.

²⁷ Dan me se neꞌén so̱ꞌ si̱j israelitá nu̱ꞌ stucua̱nj Moisés, ne̱ cutaꞌ nii taꞌngaꞌ mán so̱ꞌ, tza̱j ne̱ sese se̱ quiꞌyáá so̱ꞌ nda̱a vaa taj stucua̱nj Moisés, ne̱ cuta̱ꞌ nii cacunꞌ xráá so̱ꞌ, cata̱j nii se vaa sa̱ꞌ doj ꞌyaj síí yaníj ase ꞌyáá so̱ꞌ á. Nda̱ꞌ se taj taꞌngaꞌ táá man síí yaníj, tza̱j ne̱ ꞌyaj soꞌ nda̱a vaa taj stucua̱nj Moisés, cata̱j nii a.

²⁸ Tza̱j ne̱ caꞌve̱e se quiꞌya̱j ꞌo̱ soꞌ nu̱ꞌ stucua̱nj nij yuvii̱ israelitá, tza̱j ne̱ né si̱j israelitá veꞌé nocoꞌ man Yaꞌanj me soꞌ, quiꞌya̱j tucuáán yoꞌ, ni̱ꞌyaj Yaꞌanj maꞌ. Caꞌve̱e se cutaꞌ nii taꞌngaꞌ nee̱ man ꞌo̱ soꞌ, tza̱j ne̱ se̱ caꞌvee gu̱un soꞌ síí sa̱ꞌ uno rihaan Yaꞌanj, quiꞌya̱j taꞌngaꞌ yoꞌ maꞌ.

²⁹ Caꞌve̱e se nu̱ꞌ nana̱ no̱ rihaan yanj nocoꞌ ꞌo̱ soꞌ, tza̱j ne̱ né si̱j israelitá veꞌé noco̱ꞌ man Yaꞌanj me soꞌ, quiꞌya̱j yanj yoꞌ, ni̱ꞌyaj Yaꞌanj maꞌ. Tza̱j ne̱ me maꞌa̱n síí noco̱ꞌ ya̱ man Yaꞌanj ne̱ nahuun sa̱ꞌ nimán, ne̱ ase vaa ꞌo̱ yuvii̱ israelitá roꞌ, da̱nj ga̱a̱ soꞌ rihaan Yaꞌanj, ne̱ caꞌve̱e se caꞌmi̱i̱ yuvii̱ nana̱ chiꞌi̱i̱ cheꞌé soꞌ, tza̱j ne̱ ne rihuun rá soꞌ maꞌ. ꞌO̱ se maꞌa̱n Yaꞌanj cata̱j se vaa sa̱ꞌ ndoꞌo quiꞌyaj soꞌ ado̱nj.