Romanos 12 - Triqui de San Juan Copala

Veꞌé quiꞌya̱j níꞌ se‑su̱u̱n Yaꞌanj a

¹ Tinu̱j, nocoj, cheꞌé se nuu ꞌe̱e̱ ndoꞌo rá Yaꞌanj man níꞌ, cheꞌé dan rquee̱ ndoꞌo ꞌu̱nj rihaan soj se vaa rque̱ soj man maꞌa̱n soj rihaan Yaꞌanj ya̱j ga̱a vaa iꞌna̱ꞌ soj, da̱j se vaa ticaviꞌ yuvii̱ xcuu ne̱ rqué yuvii̱ rihaan Yaꞌanj á. Sese da̱nj quiꞌya̱j soj, ne̱ ꞌo̱ rasu̱u̱n gue̱e̱ do̱ꞌ, ꞌo̱ rasu̱u̱n cara̱nꞌ rá Yaꞌanj do̱ꞌ, me yoꞌ, ne̱ suun no̱ xcúún soj quiꞌya̱j soj me yoꞌ uún ado̱nj.

² Se̱ quiꞌyaj soj nda̱a vaa tucuáán noco̱ꞌ nij yuvii̱ ma̱n chumii̱ nihánj maꞌ. Tana̱nj caꞌve̱j rá soj cunu̱u sa̱ꞌ nimán soj quiꞌya̱j Yaꞌanj, ne̱ xca̱j naca̱ soj cuentá da̱j quiꞌya̱j soj ga̱a yáán soj rihaan chumii̱ nihánj, ga̱a ne̱ nari̱ꞌ soj da̱j me rá Yaꞌanj quiꞌya̱j soj, ne̱ xca̱j soj cuentá me se me se sa̱ꞌ niꞌya̱j Yaꞌanj á. Dan me se xca̱j soj cuentá me suun sa̱ꞌ me rá Yaꞌanj quiꞌya̱j soj ado̱nj.

³ Dan me se quiꞌyaj Yaꞌanj se lu̱j ga̱ ꞌu̱nj, caꞌneꞌ Yaꞌanj suun rihanj tu̱cuꞌyonj man nij soj, ne̱ cheꞌé dan cata̱j xnaꞌanj ꞌu̱nj rihaan ꞌo̱ ꞌo̱ soj da̱j quiꞌya̱j soj se‑su̱u̱n Yaꞌanj á. Dan me se ino̱ ga̱a̱ suun quiꞌya̱j ꞌo̱ ꞌo̱ soj rihaan Yaꞌanj, ne̱ ra̱cuíj Yaꞌanj man soj se vaa gu̱un ya̱ rá ꞌo̱ ꞌo̱ soj me suun gu̱un nucua̱j soj quiꞌya̱j soj rihaan Yaꞌanj a. Tza̱j ne̱ se̱ guun rá soj ca̱ta̱ soj suun noco̱o doj maꞌ. Ma̱an se xca̱j soj cuentá, ne̱ cata̱j soj se vaa sa̱ꞌ vaa suun vaa rihaan soj na̱nj á.

⁴ ꞌO̱ se a̱j neꞌen níꞌ se vaa vaa queꞌe̱e̱ nee̱ man níꞌ, ne̱ dan me se vaa raꞌa níꞌ vaa tacóó níꞌ vaa, ne̱ vaa queꞌe̱e̱ doj nee̱ man níꞌ, ne̱ ino̱ vaa suun ꞌyaj suun raꞌa níꞌ do̱ꞌ, tacóó níꞌ do̱ꞌ, xréé níꞌ do̱ꞌ, tuꞌva níꞌ do̱ꞌ, ne̱ ino̱ doj vaa suun ꞌyaj suun ꞌo̱ ꞌo̱ nee̱ man níꞌ a.

⁵ Dan me se a̱j canocoꞌ cunuda̱nj níꞌ man Cristó, ne̱ cheꞌé dan ase vaa nu̱ꞌ nee̱ man ꞌo̱ yuvii̱ roꞌ, da̱nj vaa nu̱ꞌ níꞌ, ne̱ ino̱ vaa suun vaa rihaan ꞌo̱ ꞌo̱ níꞌ, tza̱j ne̱ racuíj tuviꞌ níꞌ,

⁶ ga̱a ne̱ gu̱un nucua̱j níꞌ quiꞌya̱j níꞌ suun vaa rihaan ꞌo̱ ꞌo̱ níꞌ a. Da̱nj ꞌyaj Yaꞌanj cheꞌé níꞌ, tza̱j ne̱ ino̱ vaa suun neꞌen ꞌo̱ ꞌo̱ níꞌ quiꞌya̱j níꞌ, quiꞌyaj Yaꞌanj a. Cheꞌé dan sese vaa suun rihaan ꞌo̱ níꞌ caꞌmi̱i̱ natáj níꞌ rihaan yuvii̱ cheꞌé Yaꞌanj, ne̱ sese uun ya̱ rá níꞌ se vaa ya̱ vaa nana̱ nariꞌ níꞌ, ne̱ caꞌmi̱i̱ natáj níꞌ á.

⁷ Sese caꞌneꞌ Yaꞌanj suun rihaan ꞌó níꞌ suun racuíj níꞌ man yuvii̱, ne̱ da̱nj quiꞌya̱j níꞌ cheꞌé tuviꞌ níꞌ uún á. Sese vaa suun rihaan ꞌó níꞌ suun tihaa̱n níꞌ snana̱ Yaꞌanj, ne̱ da̱nj quiꞌya̱j uún níꞌ, ti̱haa̱n níꞌ snana̱ Yaꞌanj á.

⁸ Sese vaa suun rihaan ꞌó níꞌ nago̱ꞌ níꞌ chrej nucua̱j, ne̱ da̱nj quiꞌya̱j níꞌ á. Sese vaa suun rihaan ꞌó níꞌ rque̱ níꞌ rasu̱u̱n rihaan nij síí nique̱, ne̱ gu̱un niha̱ꞌ rá níꞌ quiꞌya̱j níꞌ da̱nj á. Sese vaa suun rihaan ꞌó níꞌ gu̱un chij níꞌ rihaan tuviꞌ níꞌ, ne̱ quiꞌya̱j uxrá níꞌ suun ni̱caj yuꞌunj níꞌ man tuviꞌ níꞌ á. Sese vaa suun rihaan níꞌ cunu̱u ꞌe̱e̱ rá níꞌ tuviꞌ níꞌ do̱ꞌ, ra̱cuíj níꞌ tuviꞌ níꞌ do̱ꞌ, ne̱ ga̱a̱ niha̱ꞌ rá níꞌ quiꞌya̱j níꞌ da̱nj á.

Nataꞌ Pabló da̱j quiꞌya̱j níꞌ si̱j noco̱ꞌ man Cristó a

⁹ Se̱ cataj soj se vaa ꞌe̱e̱ rá soj man tinúú soj, sese ne ya̱ ꞌe̱e̱ rá soj tinúú soj maꞌ. Se̱ tuꞌva rmaꞌa̱n soj da̱nj maꞌ. Tana̱nj ya̱ ga̱a̱ ꞌe̱e̱ rá soj tinúú soj á. Nachri̱ꞌ soj ni̱ꞌyaj soj se chiꞌi̱i̱, ne̱ ina̱nj se sa̱ꞌ canoco̱ꞌ xraan soj á.

¹⁰ Ga̱a̱ ꞌe̱e̱ ndoꞌo rá soj man tinúú soj síí noco̱ꞌ man Cristó, ne̱ gu̱un niha̱ꞌ rá soj cara̱a̱ cochro̱j soj rihaan tinúú soj á.

¹¹ Se̱ gaa rmi̱i̱ soj maꞌ. Tana̱nj ga̱a̱ niha̱ꞌ rá nimán soj quiꞌya̱j soj se‑su̱u̱n Yaꞌanj Si̱j ꞌNi̱j Raꞌa man níꞌ na̱nj á.

¹² Cheꞌé se uun ya̱ rá soj se vaa vaa güii cavi̱i̱ sa̱ꞌ ndoꞌo soj, quiꞌya̱j Yaꞌanj, ne̱ cheꞌé dan ga̱a̱ niha̱ꞌ uxrá rá nimán soj á. Caꞌne̱j nucuaj soj nimán soj ga̱a ranꞌ soj sayuun, ne̱ se̱ caꞌneꞌ rá soj ga̱ suun achíín niꞌya̱j rihaan Yaꞌanj maꞌ.

¹³ Sese vaa se achiin rihaan tinúú soj síí noco̱ꞌ man Cristó, ne̱ ra̱cuíj soj man nij soꞌ a. Ne̱ veꞌé quiꞌya̱j soj caꞌve̱j soj cara̱nꞌ yuvii̱ tucuá soj do̱ꞌ, cha̱ yuvii̱ ga̱ soj do̱ꞌ á.

¹⁴ Xa̱ꞌ síí ꞌyaj sayuun man soj, tza̱j ne̱ veꞌé quiꞌya̱j soj rihaan nij soꞌ, ne̱ se̱ caꞌmii chre̱e soj cheꞌé nij soꞌ maꞌ. Tana̱nj cachi̱nj niꞌya̱j soj rihaan Yaꞌanj se vaa cavi̱i̱ sa̱ꞌ nij soꞌ quiꞌya̱j Yaꞌanj a.

¹⁵ Gu̱un niha̱ꞌ rá soj ga̱ nij yuvii̱ uun niha̱ꞌ rá, ne̱ taꞌve̱e soj ga̱ síí taꞌvee,

¹⁶ ne̱ ꞌo̱ cuya̱a̱n ga̱a̱ rá nimán ta̱ranꞌ soj nij síí noco̱ꞌ man Cristó a. Se̱ guun rá soj ca̱ta̱ maꞌa̱n soj suun sa̱ꞌ doj maꞌ. Ma̱an se nano̱ꞌ soj man nij yuvii̱ taj suun ata̱, ne̱ cache̱e̱ soj ga̱ nij soꞌ a. Se̱ guun rá soj se vaa si̱j avii ndoꞌo raa̱ me soj maꞌ.

¹⁷ Sese quiꞌya̱j yuvii̱ se chiꞌi̱i̱ man soj, ne̱ se̱ guun rá soj quiꞌya̱j soj se chiꞌi̱i̱ man nij yuvii̱ maꞌ. Tana̱nj veꞌé quiꞌya̱j soj rihaan cunuda̱nj yuvii̱, ne̱ ina̱nj se sa̱ꞌ quiꞌya̱j soj ni̱ꞌyaj cunuda̱nj yuvii̱ á.

¹⁸ Dínj cuma̱n soj ga̱ cunuda̱nj yuvii̱, sese caꞌve̱j rá nij yuvii̱, ne̱ se̱ cunuꞌ maꞌa̱n soj ga̱ yuvii̱ maꞌ.

¹⁹ Se̱ quiꞌyaj maꞌa̱n soj sayuun man yuvii̱ ꞌyaj sayuun man soj maꞌ. Ma̱an se caꞌne̱ꞌ rá soj, ne̱ Yaꞌanj me síí na̱ruꞌvee rihaan nij yuvii̱ quiꞌyaj sayuun, ne̱ vaa güii quiꞌya̱j Yaꞌanj sayuun man nij soꞌ a. Da̱nj me raj quiꞌya̱j nij soj, tinu̱j, nocoj. ꞌO̱ se Danj Yaꞌanj taj a: “Ma̱ꞌanj me síí no̱ xcúún na̱ruꞌvee sayuun rihaan yuvii̱, ne̱ ya̱ na̱ruꞌvee ꞌu̱nj rihaan yuvii̱”, taj Yaꞌanj a.

²⁰ Tza̱j ne̱ ino̱ quiꞌya̱j soj rihaan yuvii̱ ta̱j riꞌyunj man níꞌ cuano̱, taj Danj Yaꞌanj a. Nihánj me nana̱ aꞌmii Danj Yaꞌanj a: “Sese naꞌaan rque síí ta̱j riꞌyunj man soj, ne̱ rque̱ soj se chá cha̱ soꞌ á. Sese nacoo̱ soꞌ na, ne̱ rque̱ soj na coꞌo̱ soꞌ á. Da̱nj quiꞌya̱j soj, ne̱ gu̱un naꞌa̱j síí ta̱j riꞌyunj man soj, ne̱ nano̱ rá soꞌ cheꞌé sayuun quiꞌyaj soꞌ ado̱nj.” Da̱nj taj Danj Yaꞌanj a.

²¹ Se̱ guun quiꞌya̱j canaán se chiꞌi̱i̱ rihaan soj maꞌ. Ma̱an se ina̱nj se sa̱ꞌ quiꞌya̱j soj, ne̱ quiꞌya̱j canaán soj rihaan se chiꞌi̱i̱ ado̱nj.