Romanos 1 - Triqui de San Juan Copala

¹ ꞌU̱nj me síí cuꞌna̱j Pabló nu̱u̱ rihaan Cristó Jesús a. Dan me se canacúún soꞌ mán ꞌu̱nj guún ꞌu̱nj síí caꞌa̱nj nata̱ꞌ snana̱ soꞌ, ne̱ cuneꞌ soꞌ mán ꞌu̱nj ꞌo̱ nata̱ꞌ ꞌu̱nj snana̱ Yaꞌanj nana̱ sa̱ꞌ rihaan yuvii̱ a.

² Dan me se cataꞌ tuꞌva Yaꞌanj rihaan nij síí nataꞌ snana̱ Yaꞌanj ga̱a naá se vaa vaa güii ti̱nanii ya̱ Yaꞌanj man yuvii̱ rihaan sayuun, ne̱ cachrón nij soꞌ nana̱ caꞌmii Yaꞌanj rihaan Yanj Gue̱e̱ na̱nj ado̱nj.

³ Dan me se caꞌmii Yaꞌanj cheꞌé Taꞌníí soꞌ Jesucristó Si̱j ꞌNi̱j Raꞌa man níꞌ, ne̱ xa̱ꞌ nee̱ ma̱n soꞌ, tza̱j ne̱ síí noco̱ꞌ xnaꞌanj tuvi̱ꞌ ga̱ rey cuꞌna̱j David síí cayáán ga̱a naá me soꞌ ado̱nj.

⁴ Da̱nj ina̱nj uún ne̱ tihaa̱n Nimán Yaꞌanj síí sa̱ꞌ ina̱nj se vaa ya̱ Taꞌníí Yaꞌanj me Jesucristó cheꞌé se cunuu iꞌna̱ꞌ uún soꞌ scaꞌnúj nij síí caviꞌ quiꞌyaj se‑nucua̱j Yaꞌanj a.

⁵ Ina̱nj cheꞌé Jesucristó me quiꞌyaj Yaꞌanj se lu̱j cheꞌej se vaa cuneꞌ Yaꞌanj manj caꞌa̱nj ꞌu̱nj nata̱ꞌ ꞌu̱nj snana̱ soꞌ cheꞌé rej cuchuma̱n rá yuvii̱ yaníj ma̱n da̱j a̱ nij xꞌneꞌ yuvii̱ ino̱ vaa stucua̱nj nana̱ sa̱ꞌ yoꞌ, ga̱a ne̱ cuno̱ nij soꞌ rihaan Yaꞌanj ado̱nj. Da̱nj ꞌyáá ꞌu̱nj aráj co̱chróó ꞌu̱nj se‑chuvi̱i Jesucristó a.

⁶ Ne̱ nij soj me taꞌa̱j nij síí yaníj canacúún Jesucristó man canoco̱ꞌ man soꞌ ado̱nj.

⁷ Dan me se ꞌyáá ꞌu̱nj yanj nihánj caꞌne̱j ꞌu̱nj rihaan nij soj xꞌneꞌ yuvii̱ ya̱nj chumanꞌ Romá si̱j ꞌe̱e̱ ndoꞌo rá Yaꞌanj man, ne̱ dan me se canacúún Yaꞌanj man soj gu̱un soj síí nuu sa̱ꞌ nimán, ne̱ me raj quiꞌya̱j Rej níꞌ Yaꞌanj quiꞌya̱j Jesucristó Si̱j ꞌNi̱j Raꞌa man níꞌ quiꞌya̱j se lu̱j cheꞌé soj, ne̱ ga̱a̱ xe̱j nimán soj, quiꞌya̱j uún ro̱j soꞌ ado̱nj.

Me ndoꞌo rá Pabló cuchi̱ꞌ soꞌ chumanꞌ Romá a

⁸ Cuno yuvii̱ ma̱n nu̱ꞌ rihaan chumii̱ se vaa amán rá nij soj niꞌya̱j soj Yaꞌanj, ne̱ cheꞌé dan me taj ꞌu̱nj guun niꞌya̱j níꞌ rihaan Yaꞌanj, ne̱ racuíj Jesucristó mán ꞌu̱nj taj ꞌu̱nj guun niꞌya̱j níꞌ rihaan Yaꞌanj cheꞌé cunuda̱nj soj na̱nj á.

⁹ Dan me se nda̱a nimán yá ꞌu̱nj ꞌyáá ꞌu̱nj suun rihaan Yaꞌanj natáꞌ ꞌu̱nj nana̱ sa̱ꞌ cheꞌé Taꞌníí soꞌ, ne̱ neꞌen Yaꞌanj se vaa ya̱ ya̱ niga̱nj achíín ni̱ꞌyáj cheꞌé soj ado̱nj.

¹⁰ Ne̱ achíín ni̱ꞌyáj rihaan Yaꞌanj se vaa caꞌve̱j soꞌ cuchi̱j chiháán soj vaa güii,

¹¹ ne̱ me raj que̱neꞌenj man soj ne̱ narque̱j chrej nucua̱j man soj, cheꞌé rej nari̱ꞌ nucuaj nimán soj a.

¹² Dan me se nucua̱j ndoꞌo rá cunuda̱nj níꞌ man tuviꞌ níꞌ, ne̱ cheꞌé dan me asa̱ꞌ nariꞌ tuviꞌ níꞌ, ne̱ narque̱ níꞌ chrej nucua̱j man tuviꞌ níꞌ á.

¹³ Ne̱ me raj queneꞌe̱n soj se vaa guun queꞌe̱e̱ güii cachronj cuchi̱j chiháán soj, tinu̱j, nocoj. Tza̱j ne̱ ne caꞌve̱e cuchi̱j, cheꞌé se vaa chru̱j rihanj, tza̱j ne̱ ase vaa natáꞌ ꞌu̱nj rihaan ꞌó nij yuvii̱ yaníj roꞌ, da̱nj ga̱a̱ gue̱e̱ nata̱ꞌ ꞌu̱nj rihaan soj a. Nda̱a síj, ga̱a ne̱ cunu̱u ri̱i̱ doj tuviꞌ níꞌ, quiꞌya̱j níꞌ ado̱nj.

¹⁴ Dan me se cheꞌé se no̱ xcúún ꞌu̱nj nata̱ꞌ ꞌu̱nj rihaan cunuda̱nj nij yuvii̱ yaníj roꞌ, cheꞌé dan nata̱ꞌ ꞌu̱nj rihaan nij síí yaníj aꞌmii xnaꞌánj griego do̱ꞌ, rihaan nij síí yaníj ne aꞌmii xnaꞌánj griego do̱ꞌ, rihaan nij síí avii raa̱ do̱ꞌ, rihaan nij síí ne nica̱j cuentá do̱ꞌ, rihaan cunuda̱nj nij soꞌ natáꞌ ꞌu̱nj a.

¹⁵ Cheꞌé dan niha̱ꞌ ndoꞌo raj cuchi̱j chumanꞌ Romá caꞌmi̱i̱ natáj ꞌu̱nj nana̱ sa̱ꞌ cheꞌé Cristó rihaan soj uún ado̱nj.

Vaa ndoꞌo yuꞌvee nó nana̱ sa̱ꞌ cheꞌé Cristó a

¹⁶ Taj a̱ doj chrej naꞌa̱j nó rihanj caꞌmi̱j nana̱ sa̱ꞌ cheꞌé Cristó maꞌ. ꞌO̱ se nana̱ nucua̱j uxrá me snana̱ Yaꞌanj, ne̱ dan me se caꞌmii Yaꞌanj snana̱ Yaꞌanj cuno̱ yuvii̱, ne̱ cuchuma̱n rá nij yuvii̱ cuno̱ nij yuvii̱ nana̱, ne̱ nani̱i̱ nij yuvii̱ rihaan sayuun ne̱ cavi̱i̱ sa̱ꞌ nij soꞌ a. Ne̱ dan me se asino ya̱a̱n me rá Yaꞌanj ti̱nanii Yaꞌanj man nij yuvii̱ israelitá, ne̱ me rá uún Yaꞌanj ti̱nanii Yaꞌanj man nij yuvii̱ yaníj ado̱nj.

¹⁷ Dan me se cataj snana̱ Yaꞌanj nana̱ sa̱ꞌ rihaan níꞌ se vaa caꞌve̱e cunu̱u sa̱ꞌ nimán níꞌ rihaan Yaꞌanj, quiꞌya̱j Yaꞌanj, sese amán rá níꞌ niꞌya̱j níꞌ Yaꞌanj a. Nda̱a síj, ga̱a ne̱ cuchuma̱n doj rá níꞌ ni̱ꞌyaj níꞌ man Yaꞌanj a. Veé ꞌo̱ cuya̱a̱n vaa nana̱ nihánj ga̱ nana̱ no̱ rihaan Danj Yaꞌanj, taj yoꞌ a: “Síí a̱j cunuu sa̱ꞌ nimán rihaan Yaꞌanj roꞌ, ꞌo̱ amán rá soꞌ niꞌya̱j soꞌ Yaꞌanj ga̱a vaa iꞌna̱ꞌ soꞌ ado̱nj”, taj Danj Yaꞌanj a.

Nataꞌ Pabló cheꞌé cacunꞌ quiꞌyaj yuvii̱ a

^18-19 A̱j cataj xnaꞌanj Yaꞌanj si̱j nicu̱nꞌ xta̱ꞌ rihaan níꞌ se vaa uyanj uxrá rá Yaꞌanj niꞌya̱j Yaꞌanj cunuda̱nj se chiꞌi̱i̱ ꞌyaj nij yuvii̱, ne̱ me rá Yaꞌanj xca̱j nij yuvii̱ cuentá da̱j vaa soꞌ, ne̱ cheꞌé dan quiꞌyaj Yaꞌanj da̱j a̱ rasu̱u̱n ma̱n rihaan chumii̱ nihánj ni̱ꞌyaj yuvii̱ a. A̱j neꞌen yuvii̱ rasu̱u̱n, ne̱ xcaj nij yuvii̱ cuentá da̱j vaa Yaꞌanj, tza̱j ne̱ ina̱nj cacunꞌ ꞌyaj nij yuvii̱, ne̱ cheꞌé dan taj se ꞌyáꞌ cuno̱ nij yuvii̱ nana̱ ya̱ a̱ maꞌ. Cheꞌé dan me uyanj rá Yaꞌanj niꞌya̱j Yaꞌanj man nij yuvii̱ a.

²⁰ Dan me se ga̱a quiꞌyaj Yaꞌanj chumii̱, ne̱ curuviꞌ nu̱ꞌ rasu̱u̱n quiꞌyaj Yaꞌanj niꞌya̱j yuvii̱, ne̱ nuviꞌ maꞌa̱n Yaꞌanj niꞌya̱j yuvii̱, tza̱j ne̱ neꞌen yuvii̱ nij rasu̱u̱n quiꞌyaj Yaꞌanj a. Ne̱ me rá Yaꞌanj xca̱j nij yuvii̱ cuentá se vaa síí uun chij ndoꞌo me Yaꞌanj, ne̱ dan me se xca̱j nij yuvii̱ cuentá se vaa ya̱ o̱rúnꞌ soꞌ me Yaꞌanj, ne̱ xca̱j nij yuvii̱ cuentá se vaa ga̱a̱ nucua̱j ndoꞌo Yaꞌanj nu̱ꞌ caꞌnaꞌ nu̱ꞌ caꞌanj a. Cheꞌé dan sese cata̱j nij yuvii̱ se vaa ne neꞌen nij yuvii̱ da̱j vaa Yaꞌanj, ne̱ síí ne̱ me nij yuvii̱ na̱nj ado̱nj.

²¹ Dan me se a̱j queneꞌen nij yuvii̱ da̱j vaa Yaꞌanj, tza̱j ne̱ ne cata̱j nij yuvii̱ se vaa sa̱ꞌ uxrá vaa soꞌ nda̱a vaa no̱ xcúún nii quiꞌya̱j nii ga̱ Yaꞌanj maꞌ. Ne cata̱j nij yuvii̱ guun niꞌya̱j níꞌ rihaan Yaꞌanj maꞌ. Tana̱nj raa̱ maꞌa̱n nij yuvii̱ cavii da̱j vaa Yaꞌanj a. Cheꞌé dan ne caꞌve̱e xca̱j nij soꞌ cuentá a̱ maꞌ.

²² Síí cu̱u raa̱ me nij soꞌ, taj maꞌa̱n nij soꞌ, tza̱j ne̱ caꞌmii ne̱ nij soꞌ, ne̱ tana̱nj nahuun nij soꞌ síí niꞌyo̱n rmaꞌa̱n doj a.

²³ Yaꞌanj me síí niꞌndaj ya̱ sa̱ꞌ veꞌé vaa, ne̱ daj chiha̱a̱ míj ne aviꞌ soꞌ, ne̱ cheꞌé dan no̱ xcúún yuvii̱ canoco̱ꞌ yuvii̱ man soꞌ ado̱nj. Tza̱j ne̱ naꞌvej rá nij yuvii̱ canoco̱ꞌ nij yuvii̱ Yaꞌanj ya̱ maꞌ. Tana̱nj quiꞌyaj nij yuvii̱ rasu̱u̱n ase vaa yuvii̱ do̱ꞌ, xtâj do̱ꞌ, xcuu do̱ꞌ, xcuáá do̱ꞌ, ne̱ ꞌó rasu̱u̱n ꞌanj niꞌya̱ u̱u̱n rihaan yoꞌóó nihánj quiꞌyaj nij soꞌ, ne̱ taj nij soꞌ se vaa yaꞌanj me rasu̱u̱n quiꞌyaj nij soꞌ na̱nj ado̱nj.

²⁴ Cheꞌé dan caꞌneꞌ rá Yaꞌanj ga̱ nij soꞌ quiꞌya̱j nij soꞌ me se nij me rá maꞌa̱n nij soꞌ quiꞌya̱j nij soꞌ, ne̱ ina̱nj se nij ndoꞌo quiꞌyaj nij soꞌ na̱nj ado̱nj. Dan me se quiꞌyaj ndoꞌo nij soꞌ rasu̱u̱n naꞌa̱j qui̱j ga̱ nee̱ man maꞌa̱n nij soꞌ do̱ꞌ, ga̱ tuviꞌ nij soꞌ do̱ꞌ,

²⁵ ne̱ snana̱ Yaꞌanj nana̱ ya̱ roꞌ, ne caꞌve̱j nij soꞌ cuno̱ nij soꞌ a̱ maꞌ. Tana̱nj nana̱ ne̱ cuno nij soꞌ na̱nj ado̱nj. Ne̱ caráj gue̱e̱ nij soꞌ rihaan nij rasu̱u̱n quiꞌyaj Yaꞌanj, tza̱j ne̱ rihaan maꞌa̱n Yaꞌanj ne cara̱a̱ gue̱e̱ nij soꞌ maꞌ. Ne̱ xa̱ꞌ Yaꞌanj, tza̱j ne̱ no̱ xcúún níꞌ cata̱j níꞌ se vaa sa̱ꞌ uxrá vaa soꞌ nu̱ꞌ cavii nu̱ꞌ caꞌanj ado̱nj. Veé da̱nj ga̱a̱ ya̱ ado̱nj.

²⁶ Cheꞌé dan caꞌneꞌ rá Yaꞌanj ga̱ nij yuvii̱ quiꞌya̱j maꞌa̱n nij yuvii̱ rasu̱u̱n naꞌa̱j qui̱j, ne̱ nij chana̱ me se ne caꞌve̱j rá nij chana̱ coto̱j nij noꞌ ga̱ nica̱ nij noꞌ a̱ maꞌ. ꞌO̱ se naquiꞌyaj taꞌa̱j nij chana̱ sno̱ꞌo man nij chana̱, ne̱ otoj nij noꞌ ga̱ tuviꞌ cha̱na̱ maꞌa̱n nij noꞌ na̱nj ado̱nj.

²⁷ Ne̱ adi̱ꞌ se ꞌyaj nij chana̱ ga̱ tuviꞌ cha̱na̱ nij noꞌ roꞌ, da̱nj quiꞌyaj gue̱e̱ nij snóꞌo uún ga̱ tuviꞌ sno̱ꞌo soꞌ uún na̱nj ado̱nj. Dan me se síj cotoj nij snóꞌo ga̱ nica̱ nij soꞌ, ne̱ guun rá nij soꞌ coto̱j nij soꞌ ga̱ tuviꞌ sno̱ꞌo nij soꞌ, ne̱ nij ndoꞌo quiꞌyaj nij snóꞌo, ne̱ quiranꞌ nij soꞌ sayuun man maꞌa̱n nij soꞌ cheꞌé se nij quiꞌyaj nij soꞌ ado̱nj.

²⁸ Ne caꞌve̱j rá nij yuvii̱ queneꞌe̱n nij yuvii̱ da̱j vaa Yaꞌanj a̱ maꞌ. Cheꞌé dan caꞌneꞌ rá Yaꞌanj ga̱ nij yuvii̱, ne̱ navij raa̱ nij yuvii̱ quiriꞌ na̱nj á. Nda̱a síj, ga̱a ne̱ ina̱nj se nij ꞌyaj nij yuvii̱, ne̱ dan me se ꞌyaj nij soꞌ ina̱nj se naꞌvej rá Yaꞌanj quiꞌya̱j nij soꞌ na̱nj ado̱nj.

²⁹ Se araa nimán nij soꞌ me cunuda̱nj se ne nica̱ vaa do̱ꞌ, se chiꞌi̱i̱ do̱ꞌ, se nij do̱ꞌ, se uun ne̱ rá saꞌanj do̱ꞌ, se qui̱j do̱ꞌ a. Ina̱nj síí xco̱j ruva̱a̱ rá do̱ꞌ, síí ticaviꞌ do̱ꞌ, síí anó tuviꞌ do̱ꞌ, síí taꞌyunj do̱ꞌ, síí riꞌyunj do̱ꞌ, me nij soꞌ ado̱nj. Aꞌmii ne̱ nij soꞌ do̱ꞌ,

³⁰ nanó nij soꞌ cuentó ne̱ do̱ꞌ, nachriꞌ nij soꞌ man Yaꞌanj do̱ꞌ, aꞌmii nij nij soꞌ do̱ꞌ, xta̱ꞌ nimán nij soꞌ do̱ꞌ, aꞌmii xta̱ꞌ nij soꞌ do̱ꞌ a. Nanoꞌ nij soꞌ rej quiꞌya̱j nij soꞌ se chiꞌi̱i̱ a. Ne uno nij soꞌ rihaan rej nij soꞌ do̱ꞌ, rihaan nii nij soꞌ do̱ꞌ maꞌ.

³¹ Síí niꞌyón rmaꞌa̱n do̱ꞌ, síí naꞌvej quiꞌya̱j se ataꞌ tuꞌva do̱ꞌ, síí ne ꞌe̱e̱ rá man tuviꞌ do̱ꞌ, síí ꞌyaj ndoꞌo sayuun do̱ꞌ, síí ne ꞌyaj se lu̱j ga̱ tuviꞌ do̱ꞌ, me nij soꞌ a.

³² Neꞌen nij soꞌ se vaa quira̱nꞌ nij soꞌ sayuun, quiꞌya̱j Yaꞌanj, tza̱j ne̱ ne acaj nij soꞌ cuentá niꞌya̱j nij soꞌ nana̱ aꞌmii Yaꞌanj a̱ maꞌ. Ma̱an se ina̱nj cacunꞌ ꞌyaj nij soꞌ, ne̱ nda̱a niha̱ꞌ rá nij soꞌ niꞌya̱j nij soꞌ man ꞌó yuvii̱ ꞌyaj nij cacunꞌ yoꞌ ado̱nj.