San Lucas 3 - Triqui de San Juan Copala

Caꞌanj Juan Síí Utaꞌ Ne man yuvii̱ tacaan, caꞌmii natáj soꞌ a

^1-2 Yoꞌ xnu̱ꞌ cayáán síí cuꞌna̱j Tiberio síí nica̱j suun emperador roꞌ, ma̱an yoꞌ dan me rqué Yaꞌanj snana̱ Yaꞌanj rihaan síí cuꞌna̱j Juan taꞌníí Zacarías ga̱a cachéé soꞌ tacaan a. Veé ma̱an yoꞌ caꞌmii Yaꞌanj rihaan Juan, dan me cayáán síí cuꞌna̱j Poncio Pilató síí nica̱j suun gobernador uun chij rihaan estadó cuꞌna̱j Judea a. Ne̱ veé ma̱an yoꞌ dan cayáán síí cuꞌna̱j Herodes síí nica̱j suun tetrarca uun chij rihaan estadó cuꞌna̱j Galilea, ne̱ cayáán tinúú soꞌ síí cuꞌna̱j Felipé síí nica̱j suun tetrarca uun chij rihaan ro̱j estadó cuꞌna̱j Iturea ga̱ Traconite a. Ne̱ veé ma̱an yoꞌ dan cayáán síí cuꞌna̱j Lisanias síí nica̱j suun tetrarca uun chij rihaan estadó cuꞌna̱j Abilinia, ne̱ cayáán ro̱j síí cuꞌna̱j Anás ga̱ Caifás xrej ata̱ suun noco̱o doj rihaan nij yuvii̱ israelitá a. Ta̱ranꞌ nij soꞌ me síí uun chij ga̱a cuchiꞌ snana̱ Yaꞌanj rihaan Juan ga̱a cachéé soꞌ tacaan a.

³ Dan me se cachéé Juan nu̱ꞌ rej na̱j nichru̱nꞌ tuꞌva chráá cuꞌna̱j Jordán, ne̱ guun cheꞌe̱ soꞌ caꞌmii natáj soꞌ rihaan yuvii̱, cataj soꞌ se vaa cata̱ꞌ ne nij yuvii̱ cheꞌé yan ti̱haa̱n nij soꞌ se vaa ya̱ nuchranꞌ nimán nij soꞌ ne̱ tanáj nij soꞌ chrej chiꞌi̱i̱, ne̱ caꞌve̱e tinavi̱j Yaꞌanj cacunꞌ tumé nij soꞌ, taj Juan ado̱nj.

⁴ Dan me se quiꞌyaj Juan nu̱ꞌ nda̱a vaa taj nana̱ cachrón síí cuꞌna̱j Isaías síí nataꞌ snana̱ Yaꞌanj ga̱a naá rihaan yanj, ne̱ nihánj me nana̱ cachrón soꞌ a: Nucua̱j ndoꞌo caꞌmi̱i̱ natáj ꞌo̱ soꞌ rej tacaan, ne̱ cata̱j soꞌ a: “Naquiꞌya̱j sa̱ꞌ soj chrej cheꞌé se caꞌna̱ꞌ Síí ꞌNi̱j Raꞌa man níꞌ á. Da̱j se naquiꞌyaj nica̱ yuvii̱ chrej anica̱j roꞌ, veꞌé naquiꞌya̱j sa̱ꞌ níꞌ nimán níꞌ, nuchra̱nꞌ nimán níꞌ, ne̱ se̱ caráán chrej ca̱yáán Síí ꞌNi̱j Raꞌa man níꞌ ga̱ níꞌ á.

⁵ Nu̱ꞌ cuxruj roꞌ, cunu̱u nata̱j, ne̱ nu̱ꞌ quij do̱ꞌ, tacaan do̱ꞌ, cunu̱u nica̱ a. Chrej anica̱j me se cunu̱u nica̱, ne̱ rej ruva̱a̱ me se cunu̱u yoꞌ rej veꞌé cache̱n yuvii̱ ado̱nj.

⁶ Ga̱a ne̱ queneꞌe̱n nu̱ꞌ nij síí ma̱n rihaan chumii̱ se vaa caꞌve̱e ti̱nanii Yaꞌanj man yuvii̱ rihaan sayuun na̱nj á.” Dan me nana̱ cachrón Isaías rihaan yanj ga̱a naá nana̱ taj xnaꞌanj cheꞌé Juan a.

⁷ Dan me se cuchiꞌ queꞌe̱e̱ ndoꞌo yuvii̱ rihaan Juan cheꞌé se guun rá nij soꞌ cuta̱ꞌ ne Juan man nij soꞌ a. Ga̱a ne̱ cataj Juan rihaan nij soꞌ a: ―Ase vaa xcuáá yuva̱a̱ vaa soj á. Me síí cataj xnaꞌanj rihaan soj cuna̱nj soj, ne̱ nani̱i̱ soj rihaan sayuun quiꞌya̱j Yaꞌanj ga̱. Asa̱ꞌ caꞌve̱e nani̱i̱ soj rihaan sayuun, quiꞌya̱j na̱nj na cata̱ꞌ ne soj, rá soj ga̱.

⁸ Sese ya̱ nuchranꞌ nimán soj, ne̱ quiꞌya̱j soj nda̱a vaa ꞌyaj yuvii̱ cunuu sa̱ꞌ nimán na̱nj á. Ne̱ se̱ guun cheꞌe̱ soj cata̱j soj se vaa xi̱i soj síí cayáán ga̱a naá me Abraham maꞌ. Cata̱j xnaꞌanj ꞌu̱nj rihaan soj se vaa, sese Yaꞌanj rá, ne̱ caꞌve̱e ni̱caj soꞌ náá guun yahij na̱j rihaan yoꞌóó nihánj, ne̱ quiꞌya̱j soꞌ man ꞌo̱ taꞌníí taꞌnij siꞌno̱ Abraham ado̱nj.

⁹ Da̱j se vaa ꞌyaj yuvii̱ nica̱j yuvii̱ agaꞌ ne̱ aꞌneꞌ yuvii̱ chruun nuviꞌ chruj sa̱ꞌ raꞌa ne̱ caca̱a̱ yoꞌ roꞌ, taꞌngaꞌ da̱nj quiꞌya̱j Yaꞌanj ado̱nj. Nichrunꞌ quiꞌya̱j soꞌ sayuun man nij yuvii̱ naꞌvej rá canoco̱ꞌ chrej sa̱ꞌ ado̱nj ―da̱nj cataj Juan rihaan nij yuvii̱ a.

¹⁰ Ga̱a ne̱ xnáꞌanj nij yuvii̱ man Juan, cataj nij yuvii̱ a: ―Sese da̱nj vaa, ne̱ da̱j quiꞌya̱j núj, rá so̱ꞌ ga̱ ―taj nij soꞌ rihaan Juan a.

¹¹ Ga̱a ne̱ cataj Juan rihaan nij soꞌ a: ―Síí vaa vi̱j se‑co̱toó roꞌ, rque̱ u̱u̱n soꞌ ꞌo̱ cotoó man síí nuviꞌ se‑co̱toó á. Ne̱ síí vaa se chá rihaan roꞌ, rque̱ soꞌ do̱j se chá man síí nuviꞌ se chá rihaan á ―da̱nj cataj Juan rihaan nij soꞌ a.

¹² Do̱j nij síí aꞌnéj impuestó roꞌ, caꞌnaꞌ rihaan Juan cheꞌé se guun rá nij soꞌ cuta̱ꞌ ne Juan man nij soꞌ a. Ne̱ xnáꞌanj nij soꞌ man Juan, cataj nij soꞌ a: ―Da̱j quiꞌya̱j núj, rá so̱ꞌ, ga̱a maestro̱ꞌ ―taj nij soꞌ rihaan Juan a.

¹³ Ne̱ cataj Juan rihaan nij soꞌ a: ―Ina̱nj saꞌanj no̱ xcúún soj caꞌne̱e̱ soj man yuvii̱ roꞌ, caꞌve̱e caꞌne̱e̱ soj á. Se̱ caꞌnéj soj doj saꞌanj man yuvii̱ maꞌ ―taj Juan rihaan nij soꞌ a.

¹⁴ Ga̱a ne̱ xnáꞌanj do̱j tanuu man Juan a: ―Da̱j quiꞌya̱j núj, rá so̱ꞌ ga̱ ―taj nij soꞌ rihaan Juan a. Ne̱ cataj Juan rihaan nij soꞌ a: ―Se̱ rquee̱ soj man yuvii̱ rque̱ yuvii̱ saꞌanj rihaan soj a̱ maꞌ. Se̱ caꞌmii ne̱ soj cheꞌé yuvii̱ ne̱ caꞌne̱e̱ soj saꞌanj man nij yuvii̱ a̱ maꞌ. Veé do̱j saꞌanj vaa tuꞌvee soj roꞌ, gu̱un niha̱ꞌ rá soj ni̱caj soj na̱nj á ―da̱nj cataj Juan rihaan nij tanuu a.

¹⁵ Dan me se nuchruj nij yuvii̱ cuentá sese Si̱j Caꞌnéé Yaꞌanj Ti̱nanii man Yuvii̱ rihaan Sayuun me Juan, ne̱ cheꞌé dan naꞌvi̱j ndoꞌo nij yuvii̱ cata̱j xnaꞌanj maꞌa̱n Juan da̱j si̱j me maꞌa̱n soꞌ a.

¹⁶ Ne̱ cheꞌé dan cataj Juan rihaan nij soꞌ a: ―Síí utaꞌ ne na u̱u̱n man soj mej, tza̱j ne̱ vaa ꞌó síí caꞌna̱ꞌ, ne̱ si̱j nucua̱j doj me soꞌ rihanj a. Cheꞌé dan me a̱j ne nó xcúnj na̱chej nuj correá ꞌni̱j tacanj soꞌ maꞌ. Ne̱ caꞌna̱ꞌ soꞌ, ne̱ cuta̱ꞌ ne soꞌ nimán soj ga̱ maꞌa̱n Nimán Yaꞌanj, ne̱ caxri̱i̱ yaꞌan soꞌ man soj si̱j naꞌvej rá cuno̱ rihaan Yaꞌanj, ne̱ caca̱a̱ soj ado̱nj.

¹⁷ Dan me se ase vaa síí oro̱ꞌ chruun palá vaa soꞌ cuano̱ ado̱nj. Dan me se síí nica̱j chruun palá roꞌ, rii nu̱ꞌ ꞌnúú trigó na̱j rihaan yoꞌóó, ne̱ naquiꞌyaj chre̱ꞌ soꞌ man ꞌnúú trigó sa̱ꞌ, ne̱ araa soꞌ man ꞌnúú trigó sa̱ꞌ rá veꞌ, ne̱ anica̱j soꞌ araa soꞌ squíj niꞌya xráá trigó rihaan yaꞌan a. Ne̱ ase vaa síí nica̱j palá ma̱n cuano̱ roꞌ, da̱nj quiꞌya̱j síí caꞌna̱ꞌ, ne̱ naquiꞌya̱j chre̱ꞌ soꞌ man cunuda̱nj nij síí cunuu sa̱ꞌ nimán, ne̱ cara̱a soꞌ man nij síí chiꞌi̱i̱ rihaan yaꞌan, ne̱ caca̱a̱ nij soꞌ nu̱ꞌ cavii nu̱ꞌ caꞌanj, ne̱ daj chiha̱a̱ míj se̱ quinaꞌáj yaꞌan yoꞌ a̱ maan ado̱nj ―da̱nj taj Juan rihaan nij yuvii̱ yoꞌ a.

¹⁸ Ne̱ vaa uxrá doj chrej sa̱ꞌ nagoꞌ soꞌ man nij yuvii̱, ne̱ veꞌé nataꞌ soꞌ snana̱ Yaꞌanj nana̱ sa̱ꞌ rihaan nij soꞌ a.

¹⁹ Dan me se cataj Juan se vaa ne chiha̱nꞌ quiꞌyaj síí nica̱j suun rey síí cuꞌna̱j Herodes cheꞌé se caꞌnéj soꞌ nica̱ tinúú soꞌ chana̱ cuꞌna̱j Herodías ne̱ xcaj soꞌ man noꞌ do̱ꞌ, cheꞌé queꞌe̱e̱ ndoꞌo doj se chiꞌi̱i̱ quiꞌyaj Herodes do̱ꞌ a.

²⁰ Ga̱a ne̱ quiꞌyaj Herodes ꞌó cacunꞌ chiꞌi̱i̱ uxrá doj se vaa caxríj soꞌ tagaꞌ man Juan ado̱nj.

Cutaꞌ ne Juan man Jesús a

²¹ Dan me se ga̱a ataa catu̱u̱ Juan tagaꞌ, ne̱ cataꞌ ne ta̱ranꞌ nij yuvii̱, quiꞌyaj Juan, ga̱a ne̱ cataꞌ ne Jesús, ne̱ nu̱ꞌ cachíín niꞌya̱j Jesús rihaan Yaꞌanj, ga̱a ne̱ naxraꞌ rej xta̱ꞌ a.

²² Ga̱a ne̱ nanij Nimán Yaꞌanj xráá Jesús, ne̱ ase vaa ruviꞌ ꞌo̱ chaꞌaa̱n roꞌ, da̱nj vaa curuviꞌ Nimán Yaꞌanj a. Ga̱a ne̱ caꞌmii Yaꞌanj si̱j nicu̱nꞌ xta̱ꞌ, cataj Yaꞌanj a: ―Taꞌníí ꞌu̱nj síí ꞌe̱e̱ ndoꞌo raj man mé so̱ꞌ, ne̱ aranꞌ ndoꞌo raj niꞌya̱j ꞌu̱nj mán so̱ꞌ ado̱nj ―taj Yaꞌanj a.

Nij xi̱i Jesús a

²³ Nda̱a quisíj Jesús ico̱ chi̱ꞌ (30) yoꞌ ta̱ꞌ asuun, ga̱a ne̱ guun cheꞌe̱ soꞌ quiꞌyaj soꞌ se‑su̱u̱n soꞌ a. Dan me se guun re̱j Jesús man síí cuꞌna̱j José, ne̱ taꞌníí José me Jesús, rá nij yuvii̱ a. Ne̱ taꞌníí Elí me José a.

²⁴ Taꞌníí Matat me Elí, ne̱ taꞌníí Leví me Matat, ne̱ taꞌníí Melqui me Leví, ne̱ taꞌníí Jana me Melqui, ne̱ taꞌníí José me Jana a.

²⁵ Taꞌníí Matatías me José, ne̱ taꞌníí Amós me Matatías, ne̱ taꞌníí Nahum me Amós, ne̱ taꞌníí Esli me Nahum, ne̱ taꞌníí Nagai me Esli a.

²⁶ Taꞌníí Maat me Nagai, ne̱ taꞌníí Matatías me Maat, ne̱ taꞌníí Semei me Matatías, ne̱ taꞌníí José me Semei, ne̱ taꞌníí Judá me José a.

²⁷ Taꞌníí Joana me Judá, ne̱ taꞌníí Resa me Joana, ne̱ taꞌníí Zorobabel me Resa, ne̱ taꞌníí Salatiel me Zorobabel, ne̱ taꞌníí Neri me Salatiel a.

²⁸ Taꞌníí Melqui me Neri, ne̱ taꞌníí Adi me Melqui, ne̱ taꞌníí Cosam me Adi, ne̱ taꞌníí Elmodam me Cosam, ne̱ taꞌníí Er me Elmodam a.

²⁹ Taꞌníí Josué me Er, ne̱ taꞌníí Eliezer me Josué, ne̱ taꞌníí Jorim me Eliezer, ne̱ taꞌníí Matat me Jorim a.

³⁰ Taꞌníí Leví me Matat, ne̱ taꞌníí Simeón me Leví, ne̱ taꞌníí Judá me Simeón, ne̱ taꞌníí José me Judá, ne̱ taꞌníí Jonán me José, ne̱ taꞌníí Eliaquim me Jonán a.

³¹ Taꞌníí Melea me Eliaquim, ne̱ taꞌníí Mainán me Melea, ne̱ taꞌníí Matata me Mainán, ne̱ taꞌníí Natán me Matata a.

³² Taꞌníí David me Natán, ne̱ taꞌníí Isaí me David, ne̱ taꞌníí Obed me Isaí, ne̱ taꞌníí Booz me Obed, ne̱ taꞌníí Salmón me Booz, ne̱ taꞌníí Naasón me Salmón a.

³³ Taꞌníí Aminadab me Naasón, ne̱ taꞌníí Aram me Aminadab, ne̱ taꞌníí Esrom me Aram, ne̱ taꞌníí Fares me Esrom, ne̱ taꞌníí Judá me Fares a.

³⁴ Taꞌníí Jacob me Judá, ne̱ taꞌníí Isaac me Jacob, ne̱ taꞌníí Abraham me Isaac, ne̱ taꞌníí Taré me Abraham, ne̱ taꞌníí Nacor me Taré a.

³⁵ Taꞌníí Serug me Nacor, ne̱ taꞌníí Ragau me Serug, ne̱ taꞌníí Peleg me Ragau, ne̱ taꞌníí Heber me Peleg, ne̱ taꞌníí Sala me Heber a.

³⁶ Taꞌníí Cainán me Sala, ne̱ taꞌníí Arfaxad me Cainán, ne̱ taꞌníí Sem me Arfaxad, ne̱ taꞌníí Noé me Sem, ne̱ taꞌníí Lamec me Noé a.

³⁷ Taꞌníí Matusalén me Lamec, ne̱ taꞌníí Enoc me Matusalén, ne̱ taꞌníí Jared me Enoc, ne̱ taꞌníí Mahalaleel me Jared, ne̱ taꞌníí Cainán me Mahalaleel a.

³⁸ Taꞌníí Enós me Cainán, ne̱ taꞌníí Set me Enós, ne̱ taꞌníí Adán me Set, ne̱ Adán roꞌ, me síí quiꞌyaj maꞌa̱n Yaꞌanj man a. Nu̱ꞌ nij soꞌ me xi̱i Jesús cumán ga̱a naá a.