San Lucas 1 - Triqui de San Juan Copala

Nataꞌ Lucas me cheꞌé quiꞌyaj soꞌ yanj nihánj caꞌne̱j soꞌ rihaan síí cuꞌna̱j Teófilo a

¹ Dan me se queꞌe̱e̱ yuvii̱ guun rá cachro̱n nica̱ nana̱ rihaan yanj cheꞌé nu̱ꞌ se vaa guun scaꞌnúj níꞌ asi̱j rque̱ doj a.

² Dan me se cachrón nij soꞌ nana̱ cataj xnaꞌanj nij síí queneꞌen cunuda̱nj se vaa guun asi̱j guun cheꞌe̱ Jesús cayáán soꞌ rihaan chumii̱ nihánj, ne̱ nij síí queneꞌen roꞌ, me síí ata̱ suun nata̱ꞌ nana̱ yoꞌ rihaan nu̱ꞌ yuvii̱ a.

³ Ne̱ ꞌu̱nj nihánj me síí tucuꞌyón uxrá, dan caꞌvee narij cunuda̱nj rasu̱u̱n yoꞌ, ne̱ cheꞌé dan vaa cheꞌé cachro̱n nica̱ ꞌu̱nj cunuda̱nj rihaan yanj nihánj naya̱a̱ so̱ꞌ si̱j cuꞌna̱j Teófilo si̱j sa̱ꞌ ndoꞌo, raj ado̱nj.

⁴ Na̱nj qui̱ꞌyáj, ga̱a ne̱ caꞌve̱e gu̱un ya̱ rá so̱ꞌ se vaa ya̱ vaa nu̱ꞌ nana̱ cataj xnaꞌanj nii rihaan so̱ꞌ ado̱nj.

Cataj xnaꞌanj se‑mo̱zó Yaꞌanj se vaa caꞌnga̱a̱ Juan Síí Cuta̱ꞌ Ne man yuvii̱ a

⁵ Ga̱a cayáán síí cuꞌna̱j Herodes síí nica̱j suun rey uun chij rihaan estadó Judea, ga̱a ne̱ ꞌo̱ xrej canicunꞌ rihaan yuvii̱ israelitá me ꞌo̱ síí cuꞌna̱j Zacarías, ne̱ noco̱ꞌ soꞌ xꞌneꞌ nij taꞌníí taꞌnij siꞌno̱ ꞌo̱ xrej cuꞌna̱j Abías síí cayáán ga̱a naá a. Ne̱ nica̱ Zacarías me chana̱ cuꞌna̱j Elisabet, ne̱ taꞌníí taꞌnij siꞌno̱ xrej cuꞌna̱j Aarón síí cayáán ga̱a naá me noꞌ,

⁶ ne̱ síí ya̱nj sa̱ꞌ rihaan Yaꞌanj me ro̱j ni̱ca̱ ro̱j soꞌ, ne̱ sa̱ꞌ uxrá ꞌyaj ro̱j soꞌ nda̱a vaa taj nu̱ꞌ nij tucuáán cuchruj Yaꞌanj canoco̱ꞌ níꞌ, ne̱ nuviꞌ cacunꞌ tumé ro̱j soꞌ a̱ doj a̱ maꞌ.

⁷ Tza̱j ne̱ taj va̱j taꞌníí ro̱j soꞌ, cheꞌé se chana̱ itu̱un me Elisabet ado̱nj. Ne̱ a̱j cachén ndoꞌo yoꞌ ne ro̱j ni̱ca̱ ro̱j soꞌ na̱nj á.

⁸ Dan me se ga̱a natúj nij taꞌníí taꞌnij siꞌno̱ Abías quiꞌya̱j nij soꞌ se‑su̱u̱n Yaꞌanj,

⁹ ne̱ ꞌo̱ güii quiriꞌ niꞌya̱j Zacarías catu̱u̱ soꞌ nuvií noco̱o snuvií Síí ꞌNi̱j Raꞌa man níꞌ cara̱a soꞌ squíí xlá rihaan yaꞌan a. ꞌO̱ se tucuáán noco̱ꞌ nij xrej me se da̱j a̱ güii tico tixaj nij soꞌ se‑chuvi̱i nij soꞌ, cheꞌé rej queneꞌe̱n nij soꞌ a̱ me síí quiri̱ꞌ niꞌya̱j cara̱a squíí xlá rihaan yaꞌan a.

¹⁰ Dan me se catúj Zacarías rque nuvií noco̱o, ne̱ ma̱n ri̱i̱ yuvii̱ xeꞌ, achíín niꞌya̱j nij soꞌ rihaan Yaꞌanj ga̱a caraa Zacarías squíí xlá rihaan yaꞌan a.

¹¹ Dan me se curuviꞌ ꞌo̱ se‑mo̱zó Yaꞌanj rihaan Zacarías, ne̱ nicunꞌ mozó yoꞌ rej nuva̱ꞌ mesá altar acaa squíí xlá a.

¹² Dan me se ga̱a queneꞌen Zacarías man se‑mo̱zó Yaꞌanj, ga̱a ne̱ caráyaꞌa̱nj ndoꞌo soꞌ ne̱ cuchuꞌviꞌ ndoꞌo soꞌ a.

¹³ Tza̱j ne̱ cataj se‑mo̱zó Yaꞌanj rihaan soꞌ a: ―Se̱ cuchuꞌvíꞌ so̱ꞌ, maan Zacarías. ꞌO̱ se a̱j cuno Yaꞌanj nana̱ cachíín ni̱ꞌyáá so̱ꞌ rihaan soꞌ, ne̱ cheꞌé dan cuchru̱j nica̱ so̱ꞌ Elisabet taꞌnij sno̱ꞌo so̱ꞌ ado̱nj. Juan tu̱cuꞌnáj so̱ꞌ man soꞌ á.

¹⁴ Gu̱un niha̱ꞌ ndoꞌo rá nimán so̱ꞌ, ne̱ gu̱un niha̱ꞌ rá queꞌe̱e̱ uxrá yuvii̱ asa̱ꞌ caꞌngaa soꞌ ado̱nj.

¹⁵ ꞌO̱ se taꞌníí so̱ꞌ me síí gu̱un síí noco̱o ndoꞌo rihaan Yaꞌanj na̱nj ado̱nj. Se̱ coꞌo soꞌ na vinó se̱ coꞌo soꞌ tziꞌ se̱ coꞌo soꞌ maꞌ. Asi̱j ataa caꞌnga̱a̱ soꞌ, ne̱ cu̱nuû Nimán Yaꞌanj nimán soꞌ na̱nj á.

¹⁶ Ne̱ queꞌe̱e̱ ndoꞌo síí israelitá ca̱nica̱j nimán canoco̱ꞌ man Yaꞌanj Si̱j ꞌNi̱j Raꞌa man nij soꞌ, quiꞌya̱j taꞌníí so̱ꞌ ado̱nj.

¹⁷ Dan me se gu̱un soꞌ síí caꞌa̱nj suun rihaan Yaꞌanj ado̱nj. Asino taꞌníí so̱ꞌ gu̱un cheꞌe̱ caꞌmi̱i̱ natáj rihaan yuvii̱, ga̱a ne̱ caꞌmi̱i̱ síí caꞌne̱j Yaꞌanj man a. Da̱j se quiꞌyaj Nimán Yaꞌanj, racuíj Nimán Yaꞌanj man síí cuꞌna̱j Elías ga̱a naá roꞌ, da̱nj quiꞌya̱j gue̱e̱ Nimán Yaꞌanj, ra̱cuíj ndoꞌo soꞌ man taꞌníí so̱ꞌ a. Veꞌé caꞌmi̱i̱ yuvii̱ ga̱ taꞌníí yuvii̱ do̱ꞌ, natuna̱ nimán nij síí chiꞌi̱i̱ cuno̱ nij soꞌ rihaan Yaꞌanj do̱ꞌ, quiꞌya̱j soꞌ na̱nj á. Juan me síí quiꞌya̱j se vaa cara̱yaꞌa̱nj nu̱ꞌ yuvii̱ cheꞌé se caꞌna̱ꞌ Síí Qui̱ꞌnij Raꞌa man níꞌ ado̱nj ―da̱nj cataj xnaꞌanj se‑mo̱zó Yaꞌanj rihaan Zacarías a.

¹⁸ Ga̱a ne̱ cataj Zacarías rihaan se‑mo̱zó Yaꞌanj a: ―Asa̱ꞌ caꞌve̱e cuchuma̱n raj se vaa ya̱ caꞌmii so̱ꞌ ga̱. Chii nga̱ mé ꞌu̱nj nihánj, ne̱ chana̱ chij me nica̱ ꞌu̱nj nihánj na̱nj á ―taj Zacarías rihaan se‑mo̱zó Yaꞌanj yoꞌ a.

¹⁹ Ga̱a ne̱ cataj se‑mo̱zó Yaꞌanj rihaan Zacarías a: ―Gabriel síí nicu̱nꞌ rihaan Yaꞌanj mé ꞌu̱nj ado̱nj. Maꞌa̱n Yaꞌanj me síí caꞌnéé manj caꞌna̱j caꞌmi̱j ga̱ so̱ꞌ ado̱nj. Caꞌneꞌ soꞌ suun rihanj se vaa cata̱j xnaꞌanj ꞌu̱nj nana̱ sa̱ꞌ nihánj rihaan so̱ꞌ,

²⁰ tza̱j ne̱ ne cuchuma̱n rá so̱ꞌ nana̱ nihánj, ne̱ cheꞌé dan me gu̱un ya̱ꞌmií so̱ꞌ ado̱nj. A̱ ꞌó nana̱ se̱ caꞌvee caꞌmi̱i̱ so̱ꞌ nda̱a se quisi̱j güii quisi̱j ya̱ nu̱ꞌ nana̱ nihánj nda̱a vaa cataj xnaꞌanj ꞌu̱nj rihaan so̱ꞌ ado̱nj. Ne̱ ya̱ quisi̱j nana̱ nihánj güii a̱j cachrón Yaꞌanj ado̱nj ―da̱nj cataj se‑mo̱zó Yaꞌanj rihaan Zacarías a.

²¹ Dan me se xeꞌ mán nij yuvii̱, naꞌvi̱j nij yuvii̱ a̱ me orá cu̱riha̱nj Zacarías rque nuvií, ne̱ caráyaꞌa̱nj nij soꞌ se vaa guun ra̱a̱n soꞌ rque nuvií a.

²² Dan me se ga̱a curiha̱nj soꞌ rque nuvií, ga̱a ne̱ ne caꞌve̱e caꞌmi̱i̱ soꞌ ga̱ nij soꞌ a̱ maꞌ. Cheꞌé dan xcaj nij soꞌ cuentá se vaa naquiꞌyaa ꞌo̱ rasu̱u̱n rihaan Zacarías, quiꞌyaj Yaꞌanj, ga̱a nu̱u̱ soꞌ rque nuvií a. Da̱j doj raꞌa soꞌ tucunó soꞌ cheꞌé se ꞌo̱ guun yaꞌmi̱i soꞌ a.

²³ Ga̱a cachén Zacarías se‑su̱u̱n Yaꞌanj, ga̱a ne̱ quinanꞌ soꞌ tucuá soꞌ a.

²⁴ Cachén do̱j güii, ga̱a ne̱ nariꞌ nica̱ soꞌ Elisabet neꞌej a. ꞌU̱nꞌ ya̱ yavii cayáán sa̱ꞌ noꞌ tucuá noꞌ,

²⁵ ne̱ nuchruj ra̱a̱ noꞌ nana̱ nihánj a: “Ga̱a naá guun naꞌa̱j uxraj rihaan yuvii̱ cheꞌé se chana̱ itu̱un mej, tza̱j ne̱ nda̱a ya̱j racuíj Yaꞌanj manj na̱nj ado̱nj.” Da̱nj guun rá noꞌ a.

Cataj xnaꞌanj se‑mo̱zó Yaꞌanj se vaa caꞌnga̱a̱ Jesús a

²⁶ Ga̱a quisíj vata̱nꞌ yavii nu̱u̱ rque Elisabet, ga̱a ne̱ caꞌnéé Yaꞌanj man se‑mo̱zó soꞌ síí cuꞌna̱j Gabriel caꞌa̱nj soꞌ nda̱a ꞌo̱ chumanꞌ na̱j rihaan estadó Galilea chumanꞌ cuꞌna̱j Nazaret a.

²⁷ Ne̱ caꞌanj cata̱j xnaꞌanj soꞌ ꞌo̱ nana̱ rihaan ꞌo̱ chana̱ ya̱a̱n cuꞌna̱j Mariá a. A̱j guun ya̱ xca̱j ꞌo̱ síí cuꞌna̱j José man noꞌ, ne̱ ꞌo̱ taꞌníí taꞌnij siꞌno̱ rey cuꞌna̱j David síí cayáán ga̱a naá me soꞌ a.

²⁸ Ga̱a ne̱ dan me se cuchiꞌ se‑mo̱zó Yaꞌanj rihaan Mariá, ne̱ cataj soꞌ a: ―Ra̱cuíj Yaꞌanj mán so̱ꞌ á. ꞌO̱ se quiꞌyaj ndoꞌo Yaꞌanj se lu̱j cheꞌé so̱ꞌ, ne̱ ꞌo̱ yáán Yaꞌanj ga̱ so̱ꞌ ado̱nj. Sa̱ꞌ doj avii uruún so̱ꞌ rihaan cunuda̱nj nij chana̱, ꞌyaj Yaꞌanj a ―da̱nj cataj se‑mo̱zó Yaꞌanj rihaan Mariá a.

²⁹ Tza̱j ne̱ caráyaꞌa̱nj Mariá cuno noꞌ nana̱ caꞌmii se‑mo̱zó Yaꞌanj, ne̱ ne queneꞌe̱n noꞌ me cheꞌé caꞌmii soꞌ nana̱ vaa da̱nj maꞌ.

³⁰ Ga̱a ne̱ cataj uún se‑mo̱zó Yaꞌanj rihaan noꞌ a: ―María, se̱ cuchuꞌvíꞌ so̱ꞌ maꞌ. Aranꞌ rá Yaꞌanj quiꞌya̱j Yaꞌanj se lu̱j cheꞌé so̱ꞌ ado̱nj.

³¹ Nari̱ꞌ so̱ꞌ neꞌej, ne̱ cuchru̱j so̱ꞌ ꞌo̱ neꞌej sno̱ꞌo ado̱nj. JESÚS tu̱cuꞌnáj so̱ꞌ man soꞌ á.

^32-33 Síí noco̱o ndoꞌo gu̱un soꞌ, ne̱ Taꞌníí Yaꞌanj Si̱j Uun Chij Doj cuꞌna̱j soꞌ ado̱nj. Gu̱un soꞌ síí gu̱un chij rihaan níꞌ, quiꞌya̱j Yaꞌanj Si̱j ꞌNi̱j Raꞌa man níꞌ a. Ase vaa guun chij xi̱i soꞌ rey cuꞌna̱j David rihaan soj si̱j israelitá ga̱a naá roꞌ, taꞌngaꞌ da̱nj quiꞌya̱j maꞌa̱n soꞌ gu̱un chij soꞌ rihaan soj nu̱ꞌ cavii nu̱ꞌ caꞌanj ado̱nj ―da̱nj cataj Gabriel rihaan Mariá a.

³⁴ Ne̱ cataj Mariá rihaan se‑mo̱zó Yaꞌanj a: ―Chana̱ ya̱a̱n mej á. Asa̱ꞌ caꞌve̱e cuchru̱j ꞌu̱nj neꞌej, rá so̱ꞌ ga̱ ―taj Mariá, xnáꞌanj noꞌ man se‑mo̱zó Yaꞌanj a.

³⁵ Ga̱a ne̱ cataj se‑mo̱zó Yaꞌanj rihaan Mariá a: ―Nani̱j Nimán Yaꞌanj catu̱u̱ soꞌ nimán so̱ꞌ, ne̱ ca̱ráán se‑nucua̱j Yaꞌanj Si̱j Uun Chij Doj mán so̱ꞌ ga̱ scachu̱nꞌ soꞌ, ne̱ cheꞌé dan cuchru̱j so̱ꞌ neꞌej sa̱ꞌ ina̱nj rihaan Yaꞌanj, ne̱ Taꞌníí Yaꞌanj me neꞌej cuchru̱j so̱ꞌ, cata̱j yuvii̱ a.

³⁶ Ne̱ xca̱j so̱ꞌ cuentá cheꞌé tuviꞌ cha̱na̱ so̱ꞌ Elisabet se vaa nda̱ꞌ se chana̱ itu̱un me noꞌ, taj nii, ne̱ nda̱ꞌ se chana̱ chij me noꞌ, tza̱j ne̱ da̱j doj quisi̱j vata̱nꞌ yavii nuû rque noꞌ cuano̱ na̱nj á.

³⁷ ꞌO̱ se Yaꞌanj me síí aꞌvee ꞌyaj cunuda̱nj a ―taj se‑mo̱zó Yaꞌanj rihaan Mariá a.

³⁸ Ne̱ cataj Mariá rihaan se‑mo̱zó Yaꞌanj a: ―Cuna̱j vaa a. Na̱nj chana̱ nu̱u̱ rihaan Yaꞌanj Si̱j ꞌNi̱j Raꞌa man níꞌ mej, ne̱ caꞌve̱e quiꞌya̱j soꞌ nda̱a vaa cataj so̱ꞌ rihanj á ―taj Mariá rihaan se‑mo̱zó Yaꞌanj yoꞌ a. Ga̱a ne̱ naxuun se‑mo̱zó Yaꞌanj man soꞌ a.

Caꞌanj Mariá caꞌmi̱i̱ noꞌ ga̱ Elisabet a

³⁹ Cachén do̱j güii, ga̱a ne̱ quiꞌyaj chuvi̱i Mariá siꞌyaj noꞌ, ne̱ yo̱o ndoꞌo caꞌanj noꞌ nda̱a ꞌo̱ chumanꞌ na̱j estadó Judea, ꞌo̱ chumanꞌ na̱j rej xra̱j a.

⁴⁰ Ne̱ caꞌanj noꞌ tucuá Zacarías, ne̱ catúj noꞌ rá veꞌ, ne̱ veꞌé caꞌmii noꞌ ga̱ Elisabet a.

⁴¹ Nu̱ꞌ cuno Elisabet nana̱ caꞌmii Mariá, ne̱ nu̱ꞌ güéj neꞌej rque noꞌ a. Dan me se caraa Nimán Yaꞌanj nimán Elisabet,

⁴² ne̱ nucua̱j caꞌmii noꞌ ga̱ Mariá, cataj noꞌ a: ―Quiꞌyaj ndoꞌo Yaꞌanj se lu̱j cheꞌé uruún so̱ꞌ rihaan cunuda̱nj chana̱ a. Ne̱ uxrá rque̱ Yaꞌanj xnaꞌanj niꞌya̱j neꞌej cuchru̱j so̱ꞌ a.

⁴³ Veꞌé ndoꞌo quiránꞌ ꞌu̱nj se vaa caꞌnaꞌ nii Síí Qui̱ꞌnij Raꞌa man níꞌ tucuaj a.

⁴⁴ Nu̱ꞌ cunoj nana̱ cataj so̱ꞌ rihanj, ne̱ nu̱ꞌ guun niha̱ꞌ rá neꞌej, ne̱ nu̱ꞌ güéj neꞌej rquej a.

⁴⁵ Riꞌ ndoꞌo so̱ꞌ se lu̱j cheꞌé se amán rá so̱ꞌ snana̱ Yaꞌanj, se vaa quisi̱j ya̱ nu̱ꞌ nana̱ caꞌmii Yaꞌanj rihaan so̱ꞌ ado̱nj ―taj Elisabet rihaan Mariá a.

⁴⁶ Ga̱a ne̱ cataj Mariá a: Taj nimán ꞌu̱nj se vaa síí niꞌndaj ya̱ sa̱ꞌ me Yaꞌanj,

⁴⁷ ne̱ uun niha̱ꞌ ndoꞌo rá nimanj cheꞌé Yaꞌanj Si̱j Tinanii manj rihaan Sayuun na̱nj ado̱nj.

⁴⁸ Dan me se soꞌ me síí nanuj rá mán ꞌu̱nj, ꞌo̱ chana̱ nica̱ꞌ rá, ne̱ se‑mo̱zó soꞌ mé ꞌu̱nj a. Nda̱a ya̱j nihánj rej rihaan níꞌ me se cata̱j cunuda̱nj yuvii̱ se vaa ꞌu̱nj me chana̱ riꞌ ndoꞌo se lu̱j ꞌyaj Yaꞌanj a.

⁴⁹ Da̱nj cata̱j nij soꞌ cheꞌé se sa̱ꞌ noco̱o quiꞌyaj Yaꞌanj Si̱j Nucua̱j Ndoꞌo cheꞌej a. Tumé sa̱ꞌ níꞌ se‑chuvi̱i soꞌ ado̱nj.

⁵⁰ ꞌO̱ ꞌe̱e̱ rá soꞌ man ta̱ranꞌ nij síí uno rihaan soꞌ a.

⁵¹ Quiꞌyaj Yaꞌanj suun noco̱o uxrá a. Nij síí xta̱ꞌ nimán roꞌ, tichaꞌnuu̱ Yaꞌanj man nij soꞌ na̱nj ado̱nj.

⁵² Nij síí rii taꞌngaꞌ roꞌ, caꞌnéj Yaꞌanj suun raꞌa nij soꞌ na̱nj ado̱nj. Ne̱ nij síí noco̱ꞌ roꞌ, guun nij soꞌ síí rii taꞌngaꞌ naca̱, quiꞌyaj Yaꞌanj na̱nj á.

⁵³ Nij síí naꞌaan rque roꞌ, rqué Yaꞌanj chá nij soꞌ, ne̱ nij ruꞌvee roꞌ, cunuu nique̱ nij soꞌ, quiꞌyaj Yaꞌanj a.

⁵⁴ Racuíj soꞌ man níꞌ si̱j israelitá, cheꞌé se si̱j nu̱u̱ rihaan soꞌ me níꞌ ado̱nj. Nanuj rá soꞌ se vaa cataꞌ tuꞌva soꞌ se vaa ga̱a̱ ꞌe̱e̱ rá soꞌ man níꞌ a.

⁵⁵ Da̱nj cataj soꞌ rihaan nij xi̱i níꞌ síí cuꞌna̱j Abraham síí cayáán ga̱a naá ga̱ nij taꞌníí taꞌnij siꞌno̱ soꞌ nu̱ꞌ cavii nu̱ꞌ caꞌanj a. Nu̱ꞌ nana̱ nihánj me nana̱ cataj Mariá a.

⁵⁶ Ga̱a ne̱ vaꞌnu̱j yavii ta̱ꞌ asuun cayáán Mariá tucuá Elisabet, ga̱a ne̱ quinanꞌ noꞌ tucuá noꞌ a.

Caꞌngaa Juan Síí Cuta̱ꞌ Ne man yuvii̱ a

⁵⁷ Ga̱a quisíj güii caꞌnga̱a̱ taꞌníí Elisabet, ne̱ cuchruj noꞌ ꞌo̱ neꞌej sno̱ꞌo a.

⁵⁸ Cuno nij tuviꞌ noꞌ se vaa veꞌé uxrá quiꞌyaj Yaꞌanj ga̱ noꞌ, ne̱ guun niha̱ꞌ uxrá rá nij soꞌ ga̱ noꞌ a.

⁵⁹ Ga̱a quisíj neꞌej tu̱nj güii, ne̱ cuchiꞌ nij síí cuta̱ꞌ taꞌngaꞌ nee̱ man neꞌej veꞌ a. Ne̱ nij soꞌ me rá tu̱cuꞌnáj Zacarías man neꞌej cheꞌé se Zacarías cuꞌna̱j rej neꞌej,

⁶⁰ tza̱j ne̱ cataj nii neꞌej a: ―Taj maꞌ. Juan cuꞌna̱j se‑chuvi̱i taꞌníj á ―taj noꞌ rihaan nij soꞌ a.

⁶¹ Tza̱j ne̱ cataj nij síí caꞌnaꞌ rihaan noꞌ a: ―Tza̱j ne̱ a̱ ꞌó tuviꞌ ro̱j so̱j ne cuꞌna̱j Juan maꞌ ―taj nij soꞌ rihaan noꞌ a.

⁶² Cheꞌé dan xnáꞌanj nij soꞌ man rej neꞌej, da̱j doj raꞌa nij soꞌ tucunó nij soꞌ a. Guun rá nij soꞌ queneꞌe̱n nij soꞌ da̱j quina̱j se‑chuvi̱i neꞌej, quiꞌya̱j rej neꞌej, rá nij soꞌ a.

⁶³ Cachíín Zacarías rucuchra̱ꞌ cunii ga̱ raꞌa soꞌ, ne̱ cachrón soꞌ letrá a: “Juan cuꞌna̱j se‑chuvi̱i neꞌej a”, taj letrá cachrón soꞌ, ne̱ cheꞌé dan caráyaꞌa̱nj ndoꞌo nij síí caꞌnaꞌ a.

⁶⁴ Nu̱ꞌ cachrón Zacarías letrá, ne̱ nu̱ꞌ caꞌvee caꞌmii uún soꞌ na̱nj ado̱nj. Ga̱a ne̱ guun cheꞌe̱ soꞌ cataj soꞌ se vaa veꞌé uxrá ꞌyaj Yaꞌanj a.

⁶⁵ Ne̱ caráyaꞌa̱nj nij síí ya̱nj nichru̱nꞌ se vaa quiranꞌ Zacarías, ne̱ nda̱a ta̱ranꞌ nij síí ya̱nj tacaan nicu̱nꞌ estadó Judea roꞌ, cuno nda̱a vaa quiranꞌ soꞌ a.

⁶⁶ Ta̱ranꞌ nij síí cuno roꞌ, nuchruj ra̱a̱, ne̱ xnáꞌanj nij soꞌ man tuviꞌ nij soꞌ me suun ca̱ta̱ Juan asa̱ꞌ cachij soꞌ a. Da̱nj tuꞌva nij soꞌ cheꞌé se queneꞌen nij soꞌ se vaa ꞌyaj ndoꞌo Yaꞌanj se lu̱j ga̱ Juan a.

Cataj Zacarías se vaa sa̱ꞌ uxrá quiꞌyaj Yaꞌanj a

⁶⁷ Caraa Nimán Yaꞌanj nimán rej Juan síí cuꞌna̱j Zacarías, ne̱ cataj soꞌ a:

⁶⁸ Veꞌé uxrá caꞌmi̱i̱ níꞌ cheꞌé Síí ꞌNi̱j Raꞌa man níꞌ, Taꞌanj níꞌ síí israelitá á. Ese racuíj soꞌ man níꞌ, ne̱ tinanii soꞌ rihaan sayuun man níꞌ nij síí me se‑chuma̱nꞌ soꞌ a.

⁶⁹ Caꞌnaꞌ ꞌo̱ síí nucua̱j gu̱un soꞌ Síí Ti̱nanii man níꞌ rihaan sayuun, quiꞌyaj Yaꞌanj a. ꞌO̱ taꞌníí taꞌnij siꞌno̱ rey cuꞌna̱j David síí cayáán ga̱a naá me soꞌ,

⁷⁰ nda̱a vaa cataj nij síí sa̱ꞌ síí nataꞌ snana̱ Yaꞌanj ga̱a naá a.

⁷¹ Dan me se caꞌna̱ꞌ síí nucua̱j ti̱nanii soꞌ man níꞌ rihaan nij síí ta̱j riꞌyunj man níꞌ do̱ꞌ, ti̱nanii soꞌ man níꞌ raꞌa nij síí nachriꞌ man níꞌ do̱ꞌ, taj nij soꞌ a.

⁷² Dan me se cunuu ꞌe̱e̱ rá soꞌ man xi̱i níꞌ, ne̱ ꞌo̱ nuû rá soꞌ nana̱ gue̱e̱ se vaa cataꞌ tuꞌva soꞌ se vaa quiꞌya̱j soꞌ cheꞌé níꞌ do̱ꞌ a.

^73-74 Dan me se cataꞌ tuꞌva soꞌ rihaan xi̱i níꞌ síí cuꞌna̱j Abraham se vaa ya̱ ya̱ ti̱nanii soꞌ man níꞌ rihaan nij síí ta̱j riꞌyunj man níꞌ, ga̱a ne̱ se̱ cuchuꞌviꞌ níꞌ cu̱nuû níꞌ rihaan soꞌ a.

⁷⁵ Ne̱ ga̱a̱ sa̱ꞌ nimán níꞌ do̱ꞌ, ga̱a̱ nica̱ nimán níꞌ do̱ꞌ, rihaan Yaꞌanj nu̱ꞌ güii ga̱a̱ iꞌna̱ꞌ níꞌ ado̱nj, taj Zacarías, ga̱a ne̱ caꞌmii Zacarías rihaan maꞌa̱n taꞌníí soꞌ uún a:

⁷⁶ Ne̱ xa̱ꞌ ma̱ꞌán so̱ꞌ, tza̱j ne̱ guún so̱ꞌ síí nata̱ꞌ snana̱ Yaꞌanj Si̱j Uun Chij Doj, rej. Asino so̱ꞌ gu̱un cheꞌe̱ caꞌmi̱i̱ natáj, ga̱a ne̱ caꞌna̱ꞌ Síí Qui̱ꞌnij Raꞌa man níꞌ ado̱nj. Dan me se cunu̱u nica̱ nimán yuvii̱, qui̱ꞌyáá so̱ꞌ, ne̱ cara̱yaꞌa̱nj yuvii̱ ni̱ꞌyaj yuvii̱ man síí caꞌna̱ꞌ qui̱ꞌnij raꞌa man níꞌ, qui̱ꞌyáá so̱ꞌ,

⁷⁷ ne̱ so̱ꞌ quiꞌya̱j xca̱j nij síí canoco̱ꞌ man Yaꞌanj cuentá se vaa caꞌve̱e navi̱j cacunꞌ tumé nij soꞌ, ne̱ caꞌve̱e nani̱i̱ nij soꞌ rihaan sayuun a.

⁷⁸ Da̱nj quiꞌya̱j Taꞌanj níꞌ cheꞌé nij soꞌ cheꞌé se ꞌe̱e̱ uxrá rá Yaꞌanj man nij soꞌ, ne̱ cheꞌé dan caꞌne̱j soꞌ man Síí Qui̱ꞌnij Raꞌa man nij soꞌ asa̱ꞌ quisíj güii caꞌve̱e cavi̱i̱ sa̱ꞌ níꞌ quiꞌya̱j Yaꞌanj ado̱nj.

⁷⁹ Ga̱a ne̱ xa̱ꞌ tuviꞌ níꞌ síí ne acaj cuentá do̱ꞌ, xa̱ꞌ tuviꞌ níꞌ síí chuꞌviꞌ ndoꞌo se vaa cavi̱ꞌ nij soꞌ do̱ꞌ, tza̱j ne̱ cuchugu̱u̱n rihaan nimán nij soꞌ, ga̱a ne̱ xca̱j nij soꞌ cuentá, ga̱a ne̱ nari̱ꞌ ta̱ranꞌ níꞌ da̱j quiꞌya̱j níꞌ, ne̱ cunu̱u xe̱j nimán níꞌ ado̱nj, taj Zacarías rihaan taꞌníí soꞌ a.

⁸⁰ Dan me se cachij xnii cuꞌna̱j Juan, ne̱ guun soꞌ síí nucua̱j nimán, ne̱ ina̱nj rej tacaan yáán soꞌ nda̱a se quisíj güii guun cheꞌe̱ soꞌ caꞌmii natáj soꞌ snana̱ Yaꞌanj rihaan nij síí israelitá a.