San Juan 19 - Triqui de San Juan Copala

¹ Dan me se nica̱j Pilató man Jesús, ne̱ goꞌ nij tanuu cuartá xráá soꞌ, quiꞌyaj Pilató yoꞌ a.

² Ne̱ quiꞌyaj nij tanuu cachriin tanj, ne̱ cutaꞌ nij soꞌ raa̱ Jesús, ne̱ naꞌnéé nij soꞌ yatzéj tintá sa̱ꞌ ndoꞌo man Jesús a.

³ Ga̱a ne̱ cuchiꞌ ndoꞌo nij soꞌ rihaan Jesús, ne̱ cataj nij soꞌ a: ―Veé síí nica̱j suun rey uun chij rihaan nij yuvii̱ israelitá mé so̱ꞌ na̱nj á ―taj nij soꞌ, caꞌmii tico nij soꞌ, ne̱ coxro nij soꞌ xruu̱ Jesús a.

⁴ Ga̱a ne̱ curiha̱nj uún Pilató xeꞌ, ne̱ cataj soꞌ rihaan nij yuvii̱ a: ―Ni̱ꞌyaj soj á. Cu̱riha̱nj uún soꞌ rihaan soj, qui̱ꞌyáj, cheꞌé rej xca̱j soj cuentá se vaa taj va̱j cacunꞌ tumé soꞌ naríꞌ ꞌu̱nj a̱ maan chugua̱nj ―taj Pilató rihaan nij yuvii̱ a.

⁵ Ga̱a ne̱ curiha̱nj Jesús xeꞌ, ne̱ ꞌni̱j raa̱ soꞌ cachriin tanj, ne̱ nu̱u̱ soꞌ yatzéj tintá sa̱ꞌ yoꞌ a. Ne̱ cataj Pilató rihaan nij yuvii̱ a: ―Ni̱ꞌyaj soj man snóꞌo nihánj vi̱j ―taj Pilató rihaan nij yuvii̱ a.

⁶ Dan me se ga̱a queneꞌen nij xrej ata̱ suun noco̱o do̱ꞌ, nij tanuu nu̱u̱ rihaan nij soꞌ do̱ꞌ, man Jesús, ne̱ caguáj nij soꞌ, cataj nij soꞌ a: ―Cavi̱ꞌ soꞌ rihaan rcutze̱, qui̱ꞌyáá so̱ꞌ á. Cavi̱ꞌ soꞌ rihaan rcutze̱, qui̱ꞌyáá so̱ꞌ á ―taj nij soꞌ, caguáj nij soꞌ a. Ga̱a ne̱ cataj Pilató rihaan nij soꞌ a: ―Ni̱caj maꞌa̱n soj man soꞌ cachro̱n soj man soꞌ rihaan rcutze̱, sese me rá soj na̱nj á. Xa̱ꞌ ꞌu̱nj, tza̱j ne̱ taj va̱j a̱ doj cacunꞌ tumé soꞌ naríꞌ ꞌu̱nj a̱ maꞌ ―taj Pilató rihaan nij soꞌ a.

⁷ Ga̱a ne̱ cataj nij síí uun chij rihaan nij yuvii̱ israelitá rihaan Pilató a: ―Vaa tucuáán noco̱ꞌ núj, ne̱ tucuáán noco̱ꞌ núj taj se vaa no̱ xcúún soꞌ cavi̱ꞌ soꞌ, cheꞌé se cataj soꞌ se vaa Taꞌni̱j Yaꞌanj me soꞌ ado̱nj ―taj nij soꞌ rihaan Pilató a.

⁸ Dan me se ga̱a cuno Pilató nana̱ vaa da̱nj, ga̱a ne̱ doj a̱ cuchuꞌviꞌ soꞌ a.

⁹ Ga̱a ne̱ catúj uún soꞌ tucuá suun, ne̱ xnáꞌanj soꞌ man Jesús, cataj soꞌ a: ―Me rej cavii so̱ꞌ ga̱ ―taj soꞌ, xnáꞌanj soꞌ man Jesús a. Tza̱j ne̱ a̱ ꞌó nana̱ ne caꞌmi̱i̱ Jesús rihaan soꞌ a̱ maꞌ.

¹⁰ Cheꞌé dan cataj Pilató rihaan soꞌ a: ―Me cheꞌé ne aꞌmii so̱ꞌ ga̱. Ne neꞌén so̱ꞌ sese ꞌu̱nj roꞌ, me síí no̱ xcúún quiri̱i̱ mán so̱ꞌ tagaꞌ, ne̱ vej nó xcúún quiꞌya̱j cachro̱n nij tanuu mán so̱ꞌ rihaan rcutze̱ á ―taj Pilató, xnáꞌanj soꞌ man Jesús a.

¹¹ Ga̱a ne̱ cataj Jesús rihaan soꞌ a: ―Sese né Yaꞌa̱nj me síí cuneꞌ mán so̱ꞌ ca̱tá so̱ꞌ suun nihánj, ne̱ ne gu̱un nu̱cuáá so̱ꞌ qui̱ꞌyáá so̱ꞌ a̱ doj rasu̱u̱n asuun tza̱j maꞌ. Cheꞌé dan síí tacuachén manj rihaan so̱ꞌ me síí tumé doj cacunꞌ rihaan so̱ꞌ ado̱nj ―taj Jesús rihaan Pilató yoꞌ a.

¹² Quisíj cuno Pilató nana̱ caꞌmii soꞌ, ga̱a ne̱ nanoꞌ soꞌ da̱j quiꞌya̱j soꞌ, ga̱a ne̱ caꞌve̱e ti̱nanii soꞌ man Jesús a. Tza̱j ne̱ doj a̱ caguáj nij síí uun chij rihaan nij yuvii̱ israelitá, cataj nij soꞌ a: ―Sese caꞌa̱nj u̱u̱n síí nihánj, qui̱ꞌyáá so̱ꞌ, ne̱ né tuvi̱ꞌ síí nica̱j suun rey cuꞌna̱j César mé so̱ꞌ maꞌ. ꞌO̱ se síí nihánj me se si̱j me rá gu̱un síí nica̱j suun rey me soꞌ, ne̱ dan me se caꞌne̱e̱ soꞌ suun man síí cuꞌna̱j César, rá soꞌ, ne̱ si̱j ta̱j riꞌyunj man síí cuꞌna̱j César me soꞌ ado̱nj ―taj nij soꞌ, caguáj nij soꞌ a.

¹³ Dan me se ga̱a cuno Pilató nana̱ caꞌmii nij soꞌ, ga̱a ne̱ caꞌanj nica̱j soꞌ man Jesús xeꞌ, ne̱ caꞌanj ca̱yáán soꞌ rihaan xrúún soꞌ chruun xlá rej caꞌneꞌ soꞌ cacunꞌ cheꞌé yuvii̱ a. Ne̱ rej ya̱nj chruun xlá yoꞌ roꞌ, me rej cuꞌna̱j Enlosado, ne̱ Gabata cuꞌna̱j rej yoꞌ xnaꞌánj hebreo a.

¹⁴ Dan me se güii ꞌyaj chuvi̱i nii cheꞌé Chaꞌanj Pascuá me yoꞌ, ne̱ rej caxu̱j me yoꞌ a. Ne̱ cataj Pilató rihaan nij síí uun chij rihaan nij yuvii̱ israelitá a: ―Ni̱ꞌyaj soj á. Nihánj me síí nica̱j suun rey uun chij rihaan soj chugua̱nj ―taj soꞌ rihaan nij yuvii̱ a.

¹⁵ Ga̱a ne̱ caguáj nij yuvii̱, cataj nij soꞌ a: ―Ni̱caj tanuu man soꞌ, ne̱ caꞌa̱nj cachro̱n tanuu man soꞌ rihaan rcutze̱ cuaj qui̱ꞌyáá so̱ꞌ á ―taj nij soꞌ rihaan Pilató a. Ne̱ xnáꞌanj Pilató man nij soꞌ, cataj soꞌ a: ―Maꞌa̱n síí nica̱j suun rey uun chij rihaan soj cachro̱nj rihaan rcutze̱, rá soj a̱ naꞌ ―taj soꞌ, xnáꞌanj soꞌ man nij soꞌ a. ―Taj va̱j ꞌó rey maꞌ. O̱rúnꞌ síí cuꞌna̱j César me rey uun chij rihaan núj ado̱nj ―taj nij xrej ata̱ suun noco̱o a.

¹⁶ Ga̱a ne̱ tacuachén Pilató man Jesús rihaan nij soꞌ cachro̱n nij soꞌ man soꞌ rihaan rcutze̱ a. Dan me se caꞌanj nica̱j nij soꞌ man Jesús,

Cachrón tanuu man Jesús rihaan rcutze̱ a

¹⁷ ne̱ maꞌa̱n soꞌ cata̱ rcutze̱, ne̱ cavii soꞌ caꞌanj soꞌ rej cuꞌna̱j Tacaan Cúú Yave̱ Xnangá, ne̱ rej yoꞌ roꞌ, cuꞌna̱j Gólgota xnaꞌánj hebreo a.

¹⁸ Ne̱ ga̱a cuchiꞌ nij soꞌ rej yoꞌ, ga̱a ne̱ cachrón nij tanuu man soꞌ rihaan rcutze̱ a. Ne̱ yavíj ro̱j soꞌ cachrón uún nij tanuu rihaan yavíj rcutze̱ uún, ne̱ ꞌo̱ soꞌ roꞌ, nicu̱nꞌ rej nuva̱ꞌ Jesús, ne̱ ꞌó soꞌ roꞌ, nicu̱nꞌ rej nichru̱un Jesús, ne̱ tanu̱u̱ nicunꞌ maꞌa̱n Jesús a.

¹⁹ Ne̱ caꞌneꞌ síí cuꞌna̱j Pilató suun, se vaa cano̱ letrá rihaan ꞌo̱ rcuchra̱ꞌ, ne̱ cano̱ rcuchra̱ꞌ yoꞌ raa̱ rcutze̱, ne̱ letrá yoꞌ taj xnaꞌanj me cheꞌé cavi̱ꞌ Jesús a. Ne̱ nihánj me se taj letrá no̱ rihaan rcuchra̱ꞌ yoꞌ a: “Síí nihánj me Jesús síí cavii chumanꞌ Nazaret, ne̱ síí nica̱j suun rey uun chij rihaan nij yuvii̱ israelitá me soꞌ a”, taj letrá yoꞌ a.

²⁰ Dan me se nayaa queꞌe̱e̱ nij síí israelitá nana̱ yoꞌ a. ꞌO̱ se nichru̱nꞌ naj rej cachrón nii man Jesús rihaan rcutze̱ ga̱ maꞌa̱n chumanꞌ Jerusalén yoꞌ a. Ne̱ cachrón nii nana̱ yoꞌ xnaꞌánj hebreo do̱ꞌ, xnaꞌánj latín do̱ꞌ, xnaꞌánj griego do̱ꞌ a.

²¹ Cheꞌé dan nij xrej ata̱ suun noco̱o rihaan nij yuvii̱ israelitá roꞌ, cataj nij soꞌ rihaan Pilató a: ―Se̱ guun cano̱ letrá se vaa síí nica̱j suun rey uun chij rihaan núj si̱j israelitá me soꞌ maꞌ. Ma̱an se cata̱j letrá se vaa maꞌa̱n soꞌ cataj se vaa síí nica̱j suun rey uun chij rihaan nij yuvii̱ israelitá me soꞌ á ―taj nij soꞌ rihaan Pilató a.

²² ―A̱j quisíj cachrón ꞌu̱nj nana̱ cachronj na̱nj á ―taj Pilató rihaan nij soꞌ a.

²³ Dan me se ga̱a quisíj cachrón nij tanuu man Jesús rihaan rcutze̱, ne̱ nica̱j nij soꞌ saga̱nꞌ Jesús, ne̱ cuxraꞌ taꞌa̱j nij soꞌ saga̱nꞌ Jesús, ne̱ nica̱j ꞌo̱ ꞌo̱ tanuu taꞌa̱j saga̱nꞌ Jesús yoꞌ a. Ne̱ vaa se‑co̱toó Jesús cotoó xca̱a̱n uún a. Ne̱ xa̱ꞌ se‑co̱toó soꞌ, tza̱j ne̱ taj va̱j rej nuvá nii se‑co̱toó soꞌ maꞌ. Ma̱an se o̱rúnꞌ yatzéj me yoꞌ ga̱a canánj nii man yoꞌ a.

²⁴ Cheꞌé dan cataj nij tanuu rihaan tuviꞌ nij soꞌ a: ―Se̱ cuxraꞌ taꞌa̱j níꞌ man cotoó nihánj maꞌ. Ma̱an se tico̱ tixaj níꞌ cheꞌé cotoó nihánj, ne̱ queneꞌe̱n níꞌ me síí naca̱j man cotoó yoꞌ á ―taj nij soꞌ a. Da̱nj quiꞌyaj nij soꞌ, ne̱ quisíj ya̱ nu̱ꞌ nana̱ nihánj nana̱ no̱ rihaan Danj Yaꞌanj a: “Cuxraꞌ taꞌa̱j nii saga̱nꞌ ꞌu̱nj, ne̱ tico tixaj nii cheꞌé se‑co̱toó ꞌu̱nj a”, taj Danj Yaꞌanj a. Dan me se nij tanuu me nij síí quiꞌyaj da̱nj ado̱nj.

²⁵ Ne̱ nichru̱nꞌ nicunꞌ nii Jesús do̱ꞌ, chuꞌvij nii soꞌ do̱ꞌ, chana̱ cuꞌna̱j Mariá nica̱ síí cuꞌna̱j Cleofas do̱ꞌ, chana̱ cuꞌna̱j Mariá Magdalena do̱ꞌ, rihaan rcutze̱ no̱ Jesús a.

²⁶ Dan me se queneꞌen Jesús man nii soꞌ do̱ꞌ, man síí tucuꞌyón snana̱ soꞌ síí ꞌe̱e̱ rá soꞌ man do̱ꞌ, se vaa nicunꞌ rcuaꞌa̱a̱n ro̱j soꞌ rihaan soꞌ, ne̱ cataj soꞌ rihaan nii soꞌ a: ―Síí nihánj gu̱un taꞌníí so̱ꞌ, nahiin ―taj Jesús rihaan nii soꞌ a.

²⁷ Ga̱a ne̱ cataj soꞌ rihaan síí tucuꞌyón snana̱ soꞌ yoꞌ a: ―Chana̱ nihánj gu̱un nií so̱ꞌ á ―taj soꞌ rihaan síí tucuꞌyón snana̱ soꞌ yoꞌ a. Ne̱ ma̱an orá dan guun ni̱i síí tucuꞌyón snana̱ Jesús yoꞌ man nii Jesús, ne̱ caꞌanj nica̱j soꞌ man noꞌ veꞌ tucuá maꞌa̱n soꞌ a.

Caviꞌ Jesús a

²⁸ Síj ga̱a ne̱ neꞌen Jesús se vaa a̱j quisíj nu̱ꞌ suun quiꞌyaj soꞌ, tza̱j ne̱ cheꞌé yan quisi̱j nana̱ no̱ rihaan Danj Yaꞌanj roꞌ, cataj soꞌ a: ―Nacoó ꞌu̱nj na na̱nj á ―taj soꞌ a.

²⁹ Ya̱nj ꞌo̱ xruj nu̱u̱ na vinó yu̱u̱ rihaan yoꞌóó, ne̱ nica̱j nij soꞌ ꞌo̱ yataa̱n, ne̱ tucuaꞌanj nij soꞌ yataa̱n rque na vinó yu̱u̱ yoꞌ, ne̱ cutaꞌ nij soꞌ raa̱ ꞌo̱ coj hisopo, ne̱ cachrón nij soꞌ yataa̱n yoꞌ tuꞌva Jesús a.

³⁰ Ne̱ ga̱a quisíj coꞌo Jesús na vinó yu̱u̱ nu̱u̱ rque yataa̱n yoꞌ, ne̱ cataj soꞌ a: ―Veé da̱nj quisíj se‑su̱u̱n ꞌu̱nj na̱nj á ―taj Jesús a. Ne̱ tacoꞌ ni̱j soꞌ cúú yave̱ soꞌ, ne̱ caꞌneꞌ rá soꞌ, ne̱ caviꞌ soꞌ a.

Choꞌoj ꞌo̱ tanuu chruun ta̱j agaꞌ siha̱a̱ raa̱ xꞌnúú Jesús a

³¹ Dan me se güii ꞌyaj chuvi̱i nij síí israelitá cha̱ nij soꞌ Chaꞌanj Pascuá me yoꞌ a. Ne̱ güii gue̱e̱ ndoꞌo rihaan nij yuvii̱ israelitá me cueta̱nꞌ aꞌyuj, ne̱ ne caꞌve̱j rá nij yuvii̱ yoꞌ canoco̱ꞌ xnangá rihaan rcutze̱ güii gue̱e̱ yoꞌ a. Cheꞌé dan me cachíín niꞌya̱j nij síí uun chij rihaan nij yuvii̱ israelitá rihaan síí cuꞌna̱j Pilató se vaa caꞌne̱ꞌ soꞌ suun tucuachra̱nꞌ nii tacóó nij síí noco̱ꞌ rihaan rcutze̱ yoꞌ cheꞌé rej raꞌya̱nj doj cavi̱ꞌ nij soꞌ, ga̱a ne̱ quiri̱i̱ yaníj nii man nij síí caviꞌ yoꞌ a.

³² Quiꞌyaj Pilató nda̱a vaa cachíín niꞌya̱j nij soꞌ rihaan soꞌ, ne̱ caꞌanj nij tanuu, ne̱ asino tucuachranꞌ nij tanuu tacóó ꞌo̱ síí noco̱ꞌ rej xꞌnu̱j Jesús a. Ga̱a ne̱ tucuachranꞌ uún nij tanuu tacóó síí noco̱ꞌ níchrej xꞌnúú Jesús a.

³³ Tza̱j ne̱ ga̱a cuchiꞌ nij soꞌ rej noco̱ꞌ maꞌa̱n Jesús, ga̱a ne̱ xcaj nij soꞌ cuentá se vaa a̱j caviꞌ soꞌ, ne̱ cheꞌé dan ne tucuachra̱nꞌ nij soꞌ tacóó soꞌ maꞌ.

³⁴ Tza̱j ne̱ ꞌo̱ nij tanuu nica̱j xrúún soꞌ chruun ta̱j agaꞌ siha̱a̱ raa̱, ne̱ choꞌoj soꞌ xꞌnúú Jesús a. Ne̱ nu̱ꞌ quiꞌyaj soꞌ da̱nj, ne̱ nu̱ꞌ cavii ndoꞌo ton do̱ꞌ, na do̱ꞌ, rej catúj agaꞌ siha̱a̱ yoꞌ a.

³⁵ Ne̱ síí taj xnaꞌanj nana̱ nihánj me se si̱j queneꞌen nu̱ꞌ se vaa guun me soꞌ, ne̱ ya̱ vaa snana̱ soꞌ, ne̱ neꞌen soꞌ se vaa ya̱ aꞌmii soꞌ, ado̱nj. Ne̱ taj xnaꞌanj soꞌ nu̱ꞌ nana̱ nihánj cheꞌé rej cuchuma̱n rá soj a.

³⁶ ꞌO̱ se guun nu̱ꞌ nihánj cheꞌé rej quisi̱j ya̱ nu̱ꞌ nana̱ nihánj nana̱ no̱ rihaan Danj Yaꞌanj, se vaa taj yoꞌ a: “Se̱ cachranꞌ a̱ ꞌó cúú man soꞌ maꞌ”, taj nana̱ no̱ rihaan Danj Yaꞌanj a.

³⁷ Ne̱ ꞌó nana̱ roꞌ, taj a: “Ni̱ꞌyaj nij soꞌ man síí choꞌoj maꞌa̱n nij soꞌ agaꞌ man a”, taj ꞌó nana̱ no̱ rihaan Danj Yaꞌanj uún a.

Cachinꞌ nii man Jesús a

³⁸ Quisíj quiꞌyaj nij tanuu da̱nj, ga̱a ne̱ cachíín niꞌya̱j síí cuꞌna̱j José síí cavii chumanꞌ Arimatea rihaan síí cuꞌna̱j Pilató se vaa caꞌve̱j rá Pilató quiri̱i̱ yaníj soꞌ cúú man Jesús a. Ne̱ xa̱ꞌ José, tza̱j ne̱ si̱j tucuꞌyón snana̱ Jesús me soꞌ, tza̱j ne̱ ma̱an se nocoꞌ yuve̱ soꞌ man Jesús, cheꞌé se cuchuꞌviꞌ soꞌ niꞌya̱j soꞌ man nij síí uun chij rihaan nij yuvii̱ israelitá a. Dan me se caꞌvej rá Pilató, ne̱ cheꞌé dan quirii yaníj José cúú man Jesús a.

³⁹ Ne̱ vaa síí cuꞌna̱j Nicodemo uún, ne̱ si̱j cuchiꞌ rihaan Jesús rej nii̱ asi̱j rque̱ doj me soꞌ a. Ne̱ caꞌanj soꞌ ga̱ José, ne̱ cata̱ soꞌ ico̱ chi̱ꞌ (30) kiló táá doj squíí cuꞌna̱j “mirra” nachej ga̱ se cuꞌna̱j áloe a.

⁴⁰ Dan me se tananij ro̱j soꞌ man Jesús, ne̱ nucutáj ro̱j soꞌ mantá sa̱ꞌ man nu̱ꞌ cúú man Jesús, ne̱ caraa ro̱j soꞌ “mirra” do̱ꞌ, áloe do̱ꞌ, rque mantá yoꞌ a. Dan me se tucuáán noco̱ꞌ nij yuvii̱ israelitá ga̱a achinꞌ nij soꞌ man nij síí caviꞌ quiꞌyaj ro̱j soꞌ a.

⁴¹ Dan me se nichru̱nꞌ rej cachrón nii man Jesús rihaan rcutze̱ roꞌ, naj ꞌo̱ naa̱ chruun, ne̱ rque naa̱ yoꞌ roꞌ, táá yuꞌuj rque yuvej rej achinꞌ nii xnangá a. Tza̱j ne̱ yuꞌuj naca̱ me yoꞌ, ne̱ a̱ ꞌó xnangá ne cachi̱nꞌ nii rque yuꞌuj yoꞌ maꞌ.

⁴² Dan me se güii ꞌyaj chuvi̱i nij síí israelitá cha̱ nij soꞌ Chaꞌanj Pascuá me yoꞌ, ne̱ nichru̱nꞌ naj rej ta̱j yuꞌuj yoꞌ ga̱ rej nicu̱nꞌ rcutze̱ yoꞌ, ne̱ cheꞌé dan cachinꞌ ro̱j soꞌ man Jesús rque yuꞌuj yoꞌ a.