Hechos 6 - Triqui de San Juan Copala

Cuneꞌ nii man chi̱j síí nica̱j suun rihaan Yaꞌanj ra̱cuíj man nij síí tucuꞌyón snana̱ Jesús a

¹ Güii dan me se uun ri̱i̱ doj nij síí tucuꞌyón snana̱ Jesús, ne̱ dan me se nij caꞌmii nij síí aꞌmii xnaꞌánj griego niꞌya̱j nij soꞌ man nij síí aꞌmii xnaꞌánj hebreo cheꞌé se chá rqué nij síí aꞌmii xnaꞌánj hebreo man nij chana̱ caviꞌ nica̱ da̱j a̱ güii a. ꞌO̱ se ne cuya̱a̱n rqué nij síí aꞌmii xnaꞌánj hebreo se chá man nij chana̱ aꞌmii xnaꞌánj griego, taj nij síí aꞌmii xnaꞌánj griego a.

² Cheꞌé dan chuvi̱j nij síí ata̱ suun caꞌa̱nj nata̱ꞌ snana̱ Jesús roꞌ, canacúún nij soꞌ man xꞌneꞌ nij síí tucuꞌyón snana̱ Jesús cunu̱u chre̱ꞌ nij soꞌ, ne̱ cataj chuvi̱j nij soꞌ a: ―Ne cuna̱j vaa sese tanáj xco̱ núj suun nataꞌ snana̱ Yaꞌanj rihaan yuvii̱ cheꞌé rej ca̱nica̱j núj coꞌoo rihaan nij chana̱ caviꞌ nica̱ a̱ maꞌ.

³ Cheꞌé dan nari̱i̱ nij soj chi̱j tinúú níꞌ síí veꞌé aꞌmii nii niꞌya̱j nii man, tinu̱j. Dan me se nano̱ꞌ soj síí nu̱u̱ ndoꞌo Nimán Yaꞌanj nimán, ne̱ síí cu̱u raa̱ nano̱ꞌ soj, ne̱ cune̱ꞌ núj man nij soꞌ se vaa quiꞌya̱j nij soꞌ suun nihánj á.

⁴ Ne̱ xa̱ꞌ núj, tza̱j ne̱ ina̱nj suun ꞌo̱ cachi̱nj niꞌya̱j rihaan Yaꞌanj quiꞌya̱j núj, ne̱ nata̱ꞌ núj snana̱ Yaꞌanj na̱nj á ―taj chuvi̱j nij síí cuneꞌ Jesús a.

⁵ Dan me se guun niha̱ꞌ rá cunuda̱nj nij yuvii̱ ga̱a cuno nij yuvii̱ nana̱ yoꞌ, ne̱ narii nij yuvii̱ man chi̱j tinúú nij soꞌ a. Ne̱ ꞌo̱ soꞌ me síí cuꞌna̱j Esteban, ne̱ soꞌ roꞌ, me síí nucua̱j uxrá rá niꞌya̱j man Yaꞌanj, ne̱ nu̱u̱ ndoꞌo Nimán Yaꞌanj nimán soꞌ a. Ne̱ narii uún nij soꞌ man síí cuꞌna̱j Felipé do̱ꞌ, Prócoro do̱ꞌ, Nicanor do̱ꞌ, Timón do̱ꞌ, Parmenas do̱ꞌ, Nicolás do̱ꞌ a. Ne̱ né si̱j israelitá me Nicolás, ma̱an se síí guun rá canoco̱ꞌ stucua̱nj nij síí israelitá guun soꞌ, ne̱ síí cavii chumanꞌ Antioquía me soꞌ uún a.

⁶ Ne̱ dan me se nica̱j nij yuvii̱ man chi̱j nij soꞌ caꞌanj nij soꞌ rihaan chuvi̱j nij síí ata̱ suun caꞌa̱nj nata̱ꞌ snana̱ Jesús rihaan yuvii̱ a. Ne̱ cachíín niꞌya̱j nij soꞌ rihaan Yaꞌanj, ga̱a ne̱ cutaꞌ nij soꞌ raꞌa nij soꞌ raa̱ chi̱j nij soꞌ cheꞌé yan ca̱ta̱ nij soꞌ suun yoꞌ a.

⁷ Dan me se chaꞌnuu̱ uxrá snana̱ Yaꞌanj, ne̱ guun ri̱i̱ ndoꞌo doj nij síí tucuꞌyón snana̱ Jesús chumanꞌ Jerusalén yoꞌ, ne̱ nda̱a queꞌe̱e̱ uxrá nij xrej israelitá cuchumán rá snana̱ Jesús ne̱ cuno rihaan Jesús a.

Taꞌaa nii man Esteban a

⁸ Dan me se síí cuꞌna̱j Esteban me se quiꞌyaj uxrá Yaꞌanj se lu̱j ga̱ soꞌ, ne̱ guun nucua̱j ndoꞌo soꞌ, ne̱ dan me se quiꞌyaj ndoꞌo soꞌ suun sa̱ꞌ noco̱o quiꞌyaj se vaa caꞌanj rá nij yuvii̱ a.

⁹ Tza̱j ne̱ naxuma̱a̱n queꞌe̱e̱ yuvii̱, ne̱ taꞌa̱j nij soꞌ me síí ꞌanj veꞌ tucuꞌyón yuvii̱ stucua̱nj Moisés rej nuu chre̱ꞌ nij síí quiꞌyaj canaán cu̱riha̱nj rihaan se‑ruꞌve̱e̱ nij soꞌ a. Ne̱ ꞌó taꞌa̱j nij soꞌ me síí cavii chumanꞌ Cirene, ne̱ ꞌó taꞌa̱j nij soꞌ me síí cavii chumanꞌ Alejandría, ne̱ ꞌó taꞌa̱j nij soꞌ me síí cavii rej cuꞌna̱j Cilicia do̱ꞌ, rej cuꞌna̱j Asia do̱ꞌ a. Dan me se caꞌmii canó tuviꞌ ta̱ranꞌ nij soꞌ ga̱ Esteban,

¹⁰ tza̱j ne̱ ne caꞌve̱e quiꞌya̱j canaán snana̱ nij soꞌ rihaan snana̱ Esteban a̱ maꞌ. ꞌO̱ se racuíj ndoꞌo Nimán Yaꞌanj man Esteban, ne̱ cavii ndoꞌo nana̱ cu̱u raa̱ soꞌ, quiꞌyaj Nimán Yaꞌanj a.

¹¹ Ga̱a ne̱ caxríj nij soꞌ chrej rque ꞌó taꞌa̱j snóꞌo uún, ne̱ snóꞌo yoꞌ cataj a: ―Cuno núj se vaa caꞌmii Esteban nana̱ qui̱j cheꞌé síí cuꞌna̱j Moisés ga̱ maꞌa̱n Yaꞌanj á ―taj nij snóꞌo yoꞌ, caꞌmii ne̱ nij soꞌ a.

¹² Ga̱a ne̱ caꞌmaan rá nij yuvii̱ do̱ꞌ, nij síí uun chij rihaan nij yuvii̱ israelitá do̱ꞌ, nij síí naquiꞌyaj cu̱u stucua̱nj Moisés do̱ꞌ, ga̱a cuno nij soꞌ snana̱ nij síí ne̱ yoꞌ a. Ga̱a ne̱ cavii nij soꞌ, taꞌaa cunuda̱nj nij soꞌ man Esteban, ne̱ caꞌanj nica̱j nij soꞌ man soꞌ rá veꞌ nuu chre̱ꞌ Xꞌneꞌ Nij Síí Ata̱ Suun Noco̱o Doj rihaan nij yuvii̱ israelitá a.

¹³ Ga̱a ne̱ caꞌanj nica̱j nii man do̱j síí caꞌmii ne̱ síí caraa cacunꞌ rmi̱ꞌ xráá Esteban, ne̱ cataj nij soꞌ a: ―Síí nihánj roꞌ, ne aꞌneꞌ rá soꞌ ga̱ suun aꞌmii qui̱j cheꞌé rej gue̱e̱ nihánj do̱ꞌ, cheꞌé tucuáán noco̱ꞌ níꞌ do̱ꞌ a̱ maꞌ.

¹⁴ ꞌO̱ se cuno núj se vaa cataj soꞌ se vaa Jesús síí cavii chumanꞌ Nazaret me síí tiri̱ꞌ nu̱ꞌ nuvií noco̱o nihánj, ne̱ natuna̱ soꞌ tucuáán cuchruj síí cuꞌna̱j Moisés cheꞌé níꞌ ado̱nj ―taj nij soꞌ, caꞌmii ne̱ nij soꞌ niꞌya̱j nij soꞌ man Esteban yoꞌ a.

¹⁵ Ga̱a ne̱ niꞌya̱j uxrá cunuda̱nj nij síí ya̱nj rá veꞌ nuu chre̱ꞌ xꞌneꞌ nij síí ata̱ suun noco̱o doj man Esteban yoꞌ, ne̱ ase vaa rihaan se‑mo̱zó Yaꞌanj roꞌ, da̱nj vaa rihaan soꞌ, niꞌya̱j nij soꞌ a.